Read Talaud MIKHA 7 Bible Online

MIKHA 7 - Talaud bible

MIKHA 7

¹Nasilakate i ya'u! I ya'u naal᷊ihidda ere taumata niamal᷊unusanna apan inaite nani'o wuan aaluanna napawe nal᷊iudde tempone. Nasuete manga wuane su aaluanna. Wuan anggore wuṛṛu wuan ara apan mangkapia sarangkanambone nasuete niti'o.

²Taumata matul᷊idda nawul᷊ite wuassu wanua, taumata apan satia su Ruata tate asangkal᷊anna lai. Suapan taumata uaṛṛaddo tempone mamate. Sangkatou-sangkatou nantaingngu sedda su taumata sansul᷊ungnge.

³Sarangkanambone pande sulal᷊ummu ma'ola'a al᷊al᷊eo. Tembonanne wuṛṛu mallaṛṛuungnga maddorongnga roitta aonggolla, wuṛṛu matatimmaddu wanua mammata'u apulune, etearoddi i mangitou nabbaidda suadio'a.

⁴Apan apianne wuṛṛu atul᷊iranne wuassi mangitou lai naal᷊ihidda aputta ṛoaanna apan tawe gunane. Nia'omante tempone Ruata makkuumannu uman-Ne ere buatte niapasingkan-Ne si mangitou wuassu manga nabi-Ne. Orassa indi nilumapputte aal᷊iba'ukka suwallatti mangitou.

⁵Imbaṛṛangnga mangimanna su manga al᷊indongannu, ariete mangantimma hawenu. Paatehamma ringannu manga wisaranu salaiwe apan maddaringikka udde awingngu sassane.

⁶Ana waugu, sutempo ereindi lal᷊oṛṛon bal᷊e lai uasaseetta; ana'a esakka mallobbossa iamangnge, ana wawine lullawangnga inangngene, wuṛṛu manambo wawine uatatiakku la'iananne.

⁷Arawe i ite mangngantimma MAWU; ringannu napenen pangangimanna i ite tuttuṛṛutta Ruatan kite. I Tou sarun maddaringikka aal᷊iomanni ite wuṛṛu manal᷊amatta si ite.

⁸Tawe pinangiananne su manga seetti ite lumuassu asasuasan kite. Ana waugu salaiwe i ite nanawo, i ite sarun mabbangunna apia. Orassa indi uatana'a sulal᷊ummu ararandumma, arawe MAWU sarun manualaga si ite.

⁹I ite narosate su MAWU, ana waugu udde orassa indi i ite ṛinone mamendamma asasa'u-Ne. Arawe tate mal᷊annu lai i Tou sarun manamba'a si ite wuṛṛu mangonggollu atatul᷊idda si ite. i Tou sarun mangapiddi ite sumabbangnga watukku asasemakka; i ite sarun maapendamma sassane manungku i Tou nanal᷊amatta si ite.

¹⁰Dorone seetta mallobbossa si ite ringannu mabbisara, “Suapate MAWU, Ruatanu udde?” Arawe orassa indi i mangitou sarun maasilo apa apan niola'u MAWU si ite, wuṛṛu i mangitou sarun masili. I ite sarun mabbiala manga seetti ite niwaddo wuṛṛu mangke laṛṛindanna ere labbo su lal᷊anna.

¹¹Ei Yerusalem! Nia'omante tempone i yamiu mabbangunna apia manga darandungngu soanu. Su allo udde wageangngu letangngu sarun atambanna ahewalle.

¹²Manga taumata sarun mabbelengnga ringannu wuassu al᷊awo'u tampa — wuassu Asyur su samba'a ra'i, wuassu Mesir su samba'a timukka, wuṛṛu wuassu wageangngu Sal᷊ukku Efrat, wuassu samba'an tahal᷊oangnga wuṛṛu wuassu manga wowone apan marau.

¹³Arawe runia sarun mabbal᷊i lol᷊okka ana waugu al᷊al᷊eon tumanangnge.

¹⁴Oh MAWU, lu'arawe uman-Nu, umatta nipile-Nu. I mangitou uatana'a marau su mahurangnge, su pattangngannu leta'a apan masuwukka. Wala'ewe i mangitou maasomba anna su wadda'u nannal᷊on Basan wuṛṛu su Gilead ere sutempo dorone.

¹⁵Pa'ola'a al᷊aṛṛindu'a si yami, oh MAWU, ere buatte niolang-Ngu dorone sutempo I'o nangapiddi yami sinumabbangnga wuassu Mesir.

¹⁶Manga walahanna sarun maasilo olangnge udde wuṛṛu mabbal᷊i masili ana waugu naatutukke manungku al᷊awo'u atatohassi mangitou mangke tawe apa-apa. I mangitou sarun awul᷊iannu ṛingidda ma'oman sara tawe maawisara ara'e maaringikka.

¹⁷I mangitou sarun umomangnga su leta'a ere atoanna. Ringannu matta'utta wuṛṛu mangngindo i mangitou sarun sumabbangnga wuassu tanda'a watu mangitou, wua'udde rumanta ringa-Nu, oh MAWU Ruatan kami.

¹⁸Tawe Duata waine ere I'o, oh MAWU, apan nangampungnga rosan umatta apan nipile-Nu apan lambene. Tawe saran mal᷊annu-l᷊annu I'o masa'u; arawe mawal᷊ia, I'o mal᷊uassa mapal᷊iatta'u darangngu-Nu apan tawe pattaal᷊anne udde.

¹⁹I'o sarun umakkanni yami apia wuṛṛu mangampungnga si yami. Manga rosan kami sarun ṛussaan-Nu wuṛṛu iwareta-Nu su wantan tahal᷊oangnga!

²⁰Su uman-Nu, papapulunni Abraham wuṛṛu Yakub, I'o sarun mapal᷊iatta'u darangngu-Nu wuṛṛu aakkan-Nu apan tawe pattaal᷊anne udde ere buatte nipa're-Nu su al᷊amonan kami tiwatta.