Read Talaud NAHUM 2 Bible Online

NAHUM 2 - Talaud bible

NAHUM 2

¹Ei Niniwe, paddaringikka! Apan sarun manggohakka si'o nirumantate! Riagaite manga tanda'a watu pattillummanna! Lu'arete lalanna! Pandiahite mapapangalo. (

²Atonna, MAWU sarun mapaawelengngu awawantugu Israel, tadea'u maola'a ere paarorone, tantalanna taambe nipangaṛṛoannu manga seenne.)

³Allungngu seetta kalurene maṛṛamutta, wuṛṛu laungnge uasul᷊ungnga ere daṛṛa. Seetta nasaddiate mamangalo. Naal᷊ihidda putungnga, atta'u keretane lullendappa. Anambon awal᷊one sussassolo'a.

⁴Su lal᷊anna, manga kereta u'amatta ringannu mal᷊ihakka. Su leta'a mal᷊al᷊angnga, i mangitou uaa'enggenna. Aellehanna naal᷊ihidda sasol᷊oanna apan sussal᷊oi, mattalumma mal᷊ihakka naal᷊ihidda rallu'a.

⁵Manga tembonannu tantara niwagoanna inai; i mangitou mangke masokka matara sutempo mammangalo. Nasasaṛṛawutta i mangitou mattuddan darandungngu soa, ahidda ipanggohakka ringannu mal᷊ihakka.

⁶Ngaran ua'e anambon sal᷊ukka buatte niwaassa, ne niṛṛumindu'e ahewallu wal᷊en araratuanna!

⁷Ratu buatte niasametta, manga mangangimbene sussal᷊iomanna wuṛṛu sussangitta, i mangitou ma'uare ere manua'a addio'a, wuṛṛu mammeppella sabba'a ana waugu massusa.

⁸Tumana'u Niniwe tinumal᷊angnga nassal᷊iawukka, naal᷊ihidda ua'e sinumabbangnga wuassu tatandange apan naṛṛa'a. Pia aintul᷊i, “Pattaalla, pattaalla!” arawe tadewu pia apan mappulu mabbelengnga.

⁹Pangaṛṛote al᷊awo'u wul᷊awanna wuṛṛu sal᷊a'ane! Darotongngu soa indi mangke ete nilumbalanna!

¹⁰Niniwe naṛṛimunsa'e, mal᷊annabba wuṛṛu nal᷊ol᷊okka. Naungnga nabbal᷊i maammi ana waugu matta'utta. Wantiṛṛanna nabbal᷊i lome wuṛṛu mangngindo. Ne anambon taumata nabbal᷊i namikkassa mawira-wira.

¹¹Suapate soa udde orassa indi? Soa apan naal᷊ihidda liangnga tampan singa massal᷊akka? Tampan manga ana'u singa a'onggol᷊annu anna, tampa pattuddannu singa esakka wuṛṛu singa wawine, tampa apan mal᷊angnganna su manga anangnge?

¹²Dorone poiaroddi singa mangngaṛṛatta wiakke, wuṛṛu mammangngassa ionggolla su singa wawine wuṛṛu anangnge. I tou namene sal᷊akke ringannu hesa'u ṛemessa nireaanne.

¹³“I Ya'u indi seennu,” unnu MAWU Apan Lembontaṛṛino. “Manga keretanu sarun Ta'u soṛṛowanna abbi. Tantaranu sarun mate sulal᷊ummu pangallo, wuṛṛu i Ya'u sarun manganu al᷊awo'u saranapa apan buatte nianunu wuassu taumata waine. Manga darongngu daroloṛṛannu sarun aringiṛṛanna apia.”