Read Talaud HABAKUK 1 Bible Online

HABAKUK 1 - Talaud bible

HABAKUK 1

¹Eteindi tanata apan niapal᷊iatta'u MAWU si Nabi Habakuk.

²Oh MAWU, maddatingngu tingngera i ya'u ṛinone sumal᷊ande maddorongnga aontolla? Tingngera I'o sarun maddaringikka wuṛṛu manal᷊amatta si yami wuassu pangangallangnga?

³Anio niwala-Nu i ya'u ma'ellega aroddi anambone al᷊al᷊eo? Ṛatadde I'o maataṛṛangnga maasilo aroddi anambone pallal᷊awangnga? Su al᷊awo'u tampa pia araṛṛimunsa'a wuṛṛu araṛṛagissa, pabbawawul᷊o wuṛṛu pattatiakka.

⁴Tita tate daringiṛṛanna wuṛṛu atatul᷊idda tate iapaamatta. Taumata lal᷊eo nabbal᷊i naauntunnga wuassu taumata mapia, ne atatul᷊idda niwal᷊elongnga.

⁵Wua'udde MAWU nabbisara su uman-Ne, “Panutukke manga walahanna su al᷊indongannu, ne i yamiu sarun tumiangnga wuṛṛu iagukke. Ana waugu sutempon kamiu i Ya'u sarun ma'ola'a sambau saranapa apan tawe pangimananni yamiu amungkangngu tumba'u iwatti'a si yamiu.

⁶Walahanna Babel apan dal᷊eo wuṛṛu maṛṛagissa udde sarun Ta'u olaanna walahanna apan uataṛṛino. I mangitou mabbarissa sumabbangnga wuassu wanuane wuṛṛu mamal᷊intaddu ahewallu runia tadea'u mamaddon manga walahanna waine.

⁷Su al᷊awo'u tampa i mangitou mandantan atata'utta; ringannu mawunga i mangitou mannol᷊a'u anambon tita tabbene'e nasul᷊ungngu apulun mangitou.

⁸Awal᷊o mallihaṛṛanna wuassu macan tutul, wuṛṛu maṛṛagisanna wuassu serigala apan mal᷊unussa. Tantaran awal᷊onne nirumanta wuassu manga wanua marau; i mangitou nirumanta naahil᷊idda asiaṛṛe apan nangapatta inanne.

⁹Tantarane mammangalo mappaamattu araṛṛagissa, anambon taumata matta'utta naasilo darantan mangitou. Tawananni mangitou tawe iareengnga anambone.

¹⁰I mangitou mangngal᷊uandaga manga ratu wuṛṛu lullagen manga mamanaran araratuanna atanggaṛṛanne. I mangitou mangngadio'a suapan tanda'a watu, ana see niombannu leta'a wua'udde niaṛṛo tanda'a watu udde.

¹¹Ana see ere al᷊ihakku anginna inaite manga tumata apan mangngasakku atatohanne sassane udde.”

¹²MAWU, ro'en al᷊omonane I'o uddewe Ruata. I'o Ruata'u apan susi wuṛṛu saran mal᷊annu-l᷊annu. MAWU, Ruata'u wuṛṛu mallal᷊u'adda si ya'u, walahannu Babel udde nipile-Ne wuṛṛu niolang-Ngu matohassa ipakkuumanni yami.

¹³Arawe ereapa I'o maataṛṛangnga ma'ellega manga taumata lal᷊eo apan maṛṛagissa udde? Wal᷊inewe I'o tumaniten susi ipa'ellega al᷊al᷊eo? Wal᷊inewe I'o tattaṛṛa muta ma'ellega tawe atatul᷊idda? Nariaddi, anio I'o sidutu mal᷊annaaba sutempo taumata na'ukkassa niṛṛimunsa'u taumata lal᷊eo?

¹⁴Anio taumata sassunnan-Nu ere inassa su tahal᷊oangnga, wuṛṛu ere haṛṛammissa apan tawe piaṛṛangnge?

¹⁵Walahannu Babel mannametta manga taumata ringannu pe'ana, ere ola'u i mangitou udde inassa. Manga taumata udde niwol᷊engnga sulal᷊ummu manga soma wuṛṛu walahannu Babel lulluassa ringannu inasaharanni mangitou.

¹⁶Ana see soma udde nionggolli mangitou wuṛṛu niola'a sasamba, ana waugu ringannu soma udde i mangitou buatte naasomba wiakka manambo-nambo wuṛṛu mabbiakka su lal᷊umanna'a.

¹⁷Tawe mariaddi i mangitou sidutu uasawutta hel᷊elene wuṛṛu mamate manga walahanna, ringannu tawe ampungnge?