Read Talaud HABAKUK 2 Bible Online

HABAKUK 2 - Talaud bible

HABAKUK 2

¹I ya'u mappulu umawitta su candi pandiagangku, wuṛṛu maṛṛaddo apa apan sarun iwal᷊on MAWU si ya'u, wuṛṛu ereapa sasimbakku MAWU su sal᷊ande'u.

²MAWU sinumimbakka si ya'u arendi, “Uitte ringannu matualaga pesangngu lete'a maṛṛamu, apa apan Ta'u niapasingkatta si'o tadea'u wotongnge iawasa ringannu mal᷊uassa.

³Woṛṛeta'e udde ana waugu orassa indi taambe tempone. Arawe tempone udde sarun dumanta, wuṛṛu apa apan Ta'u niapasingkatta si'o mariaddi. Salaiwe pemdamanna ta'e mal᷊annu, arawe paṛṛaddote! Tempo udde sarun dumanta wuṛṛu tawe iasoṛṛota.

⁴Wuṛṛu paanaungete: Taumata apan dal᷊eo tawe masal᷊amatta, arawe taumata apan tuttuṛṛutta apulun Duata sarun mabbiakka ana waugu tatuṛṛunne su Ruata.”

⁵Paa'ala udde sidutu mammahia taumata. Taumata wal᷊iu udde mawunga wuṛṛu sussinggawangnga. Naal᷊ihidda papate, i tou lai tawe mawusa; walahanna passambau mangke aaṛṛoanne.

⁶Arawe sarangkanambone apan niawaddone udde sarun mamasendekka wuṛṛu mallobbossa si tou. I mangitou sarun mabbisara, “Niawontohante i'o ana waugu mangngombon darotongnga apan wal᷊ine tatahuanannu! Pira tempo lai i'o mapaalan batangannu ringannu mammata'u manga taumata pia awallassa si'o tadea'u mamaekka awallassi mangitou?”

⁷Arawe ringannu tawe niapendamannu, i'o apan buatte namaddon taumata waine, sarun mabbalassalai wuṛṛu iwata'a mamaekka wangane. Manga seenu sarun dumanta wuṛṛu ma'ola'a si'o matta'utta. I mangitou sarunmangaṛṛo darotongngu!

⁸I'o buatte nangaṛṛo manambo walahanna, arawe manga walahanna apan naal᷊assangnga sarun mangaṛṛo si'o, ana waugu pamamate apan buatte niolangngu, wuṛṛu ana waugu araṛṛagissa apan buatte niolangngu su manga wanua, manga soa wuṛṛu tumanangnge.

⁹Niawontohante i'o! I'o napaalan amonannu ringannu auntunganna apan niasombangannu ringannu araṛṛagissa, tadea'u wal᷊enu sassane mal᷊angnganna wuṛṛu maliu wuassu asasusa wuṛṛu asasilaka.

¹⁰Arawe hol᷊agu udde tumba'u mangapiddu asasili su amonannu. Ringannu mangngaṛṛo su manambo walahanna, i'o mandugi watangannu sassane.

¹¹Ewe'e lai manga watu su darandungnga mangngintul᷊i mammontoga si'o, wuṛṛu manga diṛṛin bal᷊e uuin bisara udde.

¹²Niawontohante i'o! I'o napararisikku soa ringannu pinangiananne al᷊al᷊eo wuṛṛu namangunna ringannu pamamate.

¹³Manga walahanna apan niawaddonu mattinsahadda tawe gunane, al᷊awo'u saranapa apan niapararisikki mangitou nasue niepoddu putungnga. Sarangkanambone uddewe apulun MAWU Apan Lembontaṛṛino.

¹⁴Arawe naal᷊ihidda tahal᷊oangnga napenen ua'e, aroddi runia lai sarun peneannu asingkatta su ola'u MAWU wuṛṛu taṛṛino-Ne.

¹⁵Niawontohante i'o! I'o mallobbossa wuṛṛu mammansili al᷊indongannu; i'o na'ola'a si mangitou sussansendekka ere taumata wu'anna.

¹⁶Orassa indi nia'omante i'o pansilianna, wuṛṛu wal᷊ine tadea'u aadatanna. Aadannu sarun mawal᷊u mabbal᷊i aal᷊uandaga. MAWU sarun mamatangngu ma'inumma wuassu cawanna apan lal᷊oṛṛoannu ṛuumanna si'o. I'o sarun ma'inumma wuṛṛu sumassedekka.

¹⁷I'o mannuwangnga manga aaluanna su mahurangngu Libanon, wuṛṛu orassa indi i'o sassane apan sarun tuwanganna. I'o mammate manga winatangnge, wuṛṛu orassa indi manga winatangnga mamma'utta si'o. Sarangkanambone udde mariaddi ana waugu pamamate wuṛṛu araṛṛagissa apan buatte niolangngu su saruannu manga wanua, manga soa wuṛṛu manga tumanangnge.

¹⁸Niawontohante i'o! I'o mabbisara su alu sampaddi, “Darisikke!” ara'e su sambau watu wahewalla, “Pabbangunte!” wotongngewe sambau paal᷊uanna mamasingkattu sambau saranapa si'o? Wotongnge mariaddi paal᷊uanna udde aoosannu wul᷊awanna wuṛṛu sal᷊a'a, arawe i tou tawe niawa. Apa hunane paal᷊uanna sassubbanna? Udde tumba'u inolaannu taumata. Apan niasombangannu wuassi tou tumba'u awusu. Tawe gunane pangangimannu mallal᷊anginnu paal᷊uanna su lanna'u limane, apan tawe maawisara udde.

²⁰MAWU udde sulal᷊ummu Wal᷊en-Ne apan susi; ṛinone anambon taumata su runia uma'ukku'u watanganne su saruan-Ne.