Read Talaud ZEFANYA 2 Bible Online

ZEFANYA 2 - Talaud bible

ZEFANYA 2

¹Ei walahanna apan tawe masili, panutukke

²tatal᷊anna i yamiu taambe tinumolangnga wuṛṛu maṛṛangu ere bunga! Awal᷊ute tantal᷊anna taambe nirumanta allo asasa'un MAWU, wuṛṛu i yamiu aṛṛiaannu asasa'un MAWU apan lukkenggamma udde.

³Pabbelengke ringannu MAWU, ei anambon taumata apan naungnge manawo su wanua indi, wuṛṛu anambon taumata apan tuttuṛṛutta manga parenta-Ne. Pammanarete tumuṛṛuttu apulun MAWU, wuṛṛu paawawoa'e watangannu su saruan-Ne. Isai masingkatta i yamiu sarun mal᷊iu wuassu pallaṛṛuumanna su allo MAWU mapal᷊iatta'u asasa'u-Ne.

⁴Su soa Gaza tawe saran sangkatou apan sarun iapaasal᷊amatta. Askelon sarun mal᷊annabba tawe mamanuane. Tumana'u Asdod sarun limbuaṛṛanna sulal᷊ummu sambau pangalo ipamaṛṛindu'a su allattune see tumana'u Ekron irolokka iapasal᷊iu wuassu soan mangitou.

⁵Niawontohante i yamiu, ei taumatan Filistin, walahanna apan uatana'a su al᷊o'engngu apanne. MAWU buatte nanantunnu ṛuumanna si'o. I tou sarun mamate si yamiu, tawe saran sangkatou wuassi yamiu apan maatal᷊angnga.

⁶Wageangngu letangngu maranin tahal᷊oangnga mabbal᷊i wadda'u nannal᷊o; manga rasannu mallal᷊u'adda winatangnga wuṛṛu manga tanda'u domba sarun olaanna isudde.

⁷Tumana'u Yehuda tawe maal᷊assangnga, sarun mamanua su wageangngu letangngu udde. I mangitou sarun mamadul᷊i winatangnga su leta'a udde, wuṛṛu napane ṛabbite i mangitou sarun matiilla su manga wal᷊en taumatan Askelon. Ana waugu MAWU, Ruatan mangitou sarun mandiaga si mangitou apia wuṛṛu ma'ola'a si mangitou sulal᷊umanna'a apia.

⁸MAWU Apan Lembontaṛṛino nabbisara, “I Ya'u buatte naaringikka manga wlahannu Moab wuṛṛu Amon mallobbossa wuṛṛu mangngal᷊uandaga uma-U. I mangitou mattal᷊imoṛṛongana naudde manganu leta'u uma-U.

⁹Ringannu arang-Ku apan wiakka, Ruatan balahannu Israel, i Ya'u sarun manahangginna ma'oman sara mawaresi Moab wuṛṛu Amon ere lai Sodom wuṛṛu Gomora. Manga wanua udde sarun mapenen manga paṛṛihin asimma wuṛṛu manga tuidda tate maṛṛa'a apan tinumuwo su ṛapusi'a ṛoaanna. Lamben uma-U apan naal᷊assangnga sarun mangaṛṛo tumanangnge, wuṛṛu manganu leta'i mangitou.”

¹⁰Etearoddi tumana'u Moab wuṛṛu Amon sarun iṛṛuumanna ana waugu awawunga wuṛṛu atatanggakki mangitou, wuṛṛu lai i mangitou buatte nallobbossa umattu MAWU Apan Lembontaṛṛino.

¹¹MAWU sarun ma'ola'a si mangitou matta'utta. I tou sarun makkimunsa'a manga monganna su runia. Wua'udde anambon walahanna mattaṛṛamawu su MAWU, sambau-sambau su wanuane sassane.

¹²See lai tumana'u Sudan sarun aṛṛiannu ṛuumanna pateanna ṛattangannu MAWU.

¹³Wua'udde MAWU sarun mappaattu taṛṛino-Ne ipakkimunsa'a Asyur. Soa Niniwe sarun olaanna mal᷊annabba wuṛṛu wadda'a apan lol᷊okka.

¹⁴Isudde ammul᷊annu winatangnga wuṛṛu al᷊awo'u hatin binatangnga papadul᷊iananna sarun massal᷊akka su manga tuidda udde wuṛṛu mangintul᷊i wuassu manga jandela. Manu'a gagak sarun umu'u wuassu saruannu manga ngara. Alu cemara su manga wal᷊en soa udde sarun masue sassawutanna.

¹⁵Ete udde apan sarun mariaddi su soa apan lullala'a udde wuṛṛu massunna watanganne mal᷊angnganne su runia. Al᷊annabbawe eteapa wageangngu leta'a udde, taweddu uatana'a tumba'u manga winatangngu ahuranganna apan massal᷊akka isudde! Suapan taumata apan sumabbi su soa udde sarun ṛuminddu'a wuṛṛu maapendamma atata'utta.