Read Talaud ZEFANYA 3 Bible Online

ZEFANYA 3 - Talaud bible

ZEFANYA 3

¹Niawontohante Yerusalem, soa mal᷊awangnga apan apulune mammangalo MAWU wuṛṛu mangngallanga tumanangnge sassane!

²Nasilakate soa apan maddiri manengkamma pananaungnga wuassu MAWU, wuṛṛu tawe lai maddaringikka manga tataggu-Ne, apan tawe manantillu ola'u pabbiaṛṛanne su MAWU, wuṛṛu tawe maiontolla si Tou!

³Manga tembonannu soa udde naal᷊ihidda singa apan mammasingnga. Manga mallaṛṛuungnge naal᷊ihidda manga serigala mal᷊unussa; i mangitou tumaniten bal᷊iu na'oman sara duṛṛi sampaddi lai tadewu itantangnga tiṛṛabbine.

⁴Manga nabine tawe apendamma mandiaga wuṛṛu tawe apangimananna; manga iman mandal᷊eo apa apan niṛṛae su MAWU wuṛṛu mammal᷊elongngu manga titan Duata ipaddea'a auntunganni mangitou sassane.

⁵Arawe MAWU ta'e su soa udde; i Tou sidutu ma'ola'a apapia wuṛṛu taweddu massal᷊a. Suapan marua allo i Tou sarun mangonggollu atatul᷊idda su uman-Ne. Arawe, taumata apan tawe maaillal᷊a atatul᷊idda su soa udde sidutu ma'ola'a al᷊al᷊eo ringannu tawe masili.

⁶MAWU nabbisara, “I Ya'u buatte napaawul᷊in anambon balahanna; manga soan mangitou Ta'u niṛṛimunsa'a, wuṛṛu manga darandungnga see manga candin mangitou Ta'u niola'a manga tuidda. Manga soan mangitou mal᷊anna-l᷊annabba taweddu uatana'a wuṛṛu manga lal᷊anne mal᷊annabba.

⁷I Ya'u maṛṛingidda, ‘Orassa indi uma-U sarun mangaddatta si Ya'u wuṛṛu maddaringikka al᷊awo'u tatagu-U. I mangitou sarun mannaungnga al᷊aṛṛa'a apan Ta'u nionggolla si mangitou.’ Arawe wutte'e, i mangitou lembon maṛṛimadda lai ma'ola'a al᷊al᷊eo wuassu paarorone.

⁸Arawe paatehamma! Paṛṛaddote allone i Ya'u dumarisikka maola'a mangangalaene. Ana waugu buatte Ta'u niṛṛawessa tadea'u mangammullu manga walahanna wuṛṛu manga araratuanna ipangema'u asasa'u-U si mangitou. Ahewallu runia sarun masue soṛṛowannu putungngu asasa'u-U.

⁹Arawe wua'udde i Ya'u sarun mamal᷊u naungngu manga walahanna udde, na'oman sara i mangitou tumba'u u'al᷊iomanna si Ya'u, wuṛṛu tawe su manga monganna waine. Manga walahanna udde sarangkanambone sarun tumuṛṛutta si Ya'u.

¹⁰Ewe'e lai wuassu Sudan apan marau, uma-U apan nassal᷊iawukka udde sarun dumanta wuṛṛu mangongollu sasamba si Ya'u.

¹¹Sutempo udde, ei uma-U, i yamiu ariete paasili lai ana waugu buatte nilumawangnga si Ya'u. I Ya'u sarun mallimbuakka suapan taumata mawunga wuṛṛu matanggakka, wuṛṛu i yamiu tate lumawangnga apia si Ya'u su wui-U apan susi.

¹²Poiaroddi sarun Ta'u iwala mamanua sambau walahanna apan naungnge mawawo, apan mangngasakku tul᷊ungang-Ku. I mangitou wotongnge matana'a poiaroddi.

¹³Taumatan Israel apan ta'e nallambe, tate ma'ola'a al᷊al᷊eo apia su taumata waine; i mangitou tate mangawusu apia wuṛṛu tate lai mallinga. I mangitou sarun mabbiakka su lal᷊umanna'a wuṛṛu mal᷊angnganna, wuṛṛu tate maapendamma atata'utta su anambon taumata waine.”

¹⁴Ei Israel, paggiote wuṛṛu pangantarite! Ei Yerusalem, lalluasse ringannu ahewallu naungnga!

¹⁵Ana waugu MAWU nangillol᷊ote makkuumanni yamiu; i Tou buatte nallimbuakka al᷊awo'u seennu. I yamiu lal᷊u'arannu ratun Israel, Mawunu sassane. Orassa indi i yamiu ariete mata'utta apia.

¹⁶Sarun a'omanna tempone manga taumata sarun mabbisara sal᷊immurine, “Ei Yerusalem, ariete paata'utta wuṛṛu maaddio'a naungngu.

¹⁷I yamiu lal᷊u'arannu MAWU Ruatannu apan matohassa. I yamiu naauntungnga ana waugu taṛṛino-Ne. MAWU lullassa wuṛṛu lullala'a ana waugu i yamiu, sulal᷊ummu darangngu-Ne i yamiu mabbiakka wakku. Ana waugu i yamiu, i Tou mangngantari lulluassa.

¹⁸Naal᷊ihidda taumata apan tantal᷊anna maandeangnga.” Unnu MAWU, “Asasilaka apan maṛṛia'a si yamiu Ta'u iapaarau. Paasiangngu buatte Ta'u nipapassa.

¹⁹Tempone sarun dumanta manga allangngu Ta'u ṛimunsaanna, wuṛṛu taumata peṛṛo Ta'u iapasal᷊amatta; anambon taumata niwuangnga Ta'u ehetanna mapul᷊e. Aal᷊uandagi mangitou Ta'u wal᷊uanna mabbali aaddata; suapan tampa, ewe'e lai su ahewallu runia, i mangitou sarun wantuhanna wuṛṛu raloanna.

²⁰Tempone sarun dumanta, tumanangngu apan uasal᷊iawukka Ta'u ehetanna mapul᷊e. I yamiu Ta'u olaanna tumelengnga su ahewallu runia, wuṛṛu lal᷊umanna'a sarun Ta'u iapaawelengnga apia.” MAWU buatte nabbisara.