Read Talaud HAGAI 2 Bible Online

HAGAI 2 - Talaud bible

HAGAI 2

¹Su allo ruan pul᷊o assa, wul᷊anna appitune sulal᷊ummu tonna udde lai, MAWU nabbisara apia ringannu nappaatti Hagai.

²MAWU nandolokki Hagai mabbisara si Gubernure Zerubabel, Imam Bahewa Yosua, see tumanangnge iapapasingkattu tanata indi,

³“Apa pia suwallatti yamiu apan ta'e maanaungnga aroddi awantuge Wal᷊e-U indi dorone? Orassa indi ereapa olangnge, tumuṛṛuttu addapannu? Wal᷊inewe mangke tawe maal᷊uassa naungnga?

⁴Arawe, arie maadio'a naungngu, ei i yamiu sarangkanambone! Sassute manara udde, ana waugu i Ya'u sidutu massumbala si yamiu.

⁵Sutempo i yamiu sinumabbangnga wuassu Mesir, i Ya'u buatte naddiandi manungku sidutu sarun mallu'adda si yamiu. Wuṛṛu orassa indi lai i Ya'u ta'e ual᷊u'adda si yamiu. Nariaddi i yamiu ariete suminggawangnga.

⁶Sulal᷊ummu tempo apan mal᷊ihakka i Ya'u sarun mangio'u langitta wuṛṛu runia, ammaranne wuṛṛu tahal᷊oangnga.

⁷Anambon walahanna sarun Ta'u pata'utanna wuṛṛu darotongngi mangitou sarun iapidda inawarendi, na'oman sara Wal᷊e-U mapenen paa'alan mangitou.

⁸Al᷊awo'u wul᷊awanna wuṛṛu sal᷊a'a su runia indi udde pussa'a-Ku.

⁹Wal᷊e-U apan wakku sarun mappianna wuassu paarorone, wuṛṛu isindi i Ya'u sarun mangonggollu paddarame wuṛṛu lal᷊umanna'a su walahang-Ku.” MAWU Apan Lembontaṛṛino buatte nabbisara.

¹⁰Su allo ruan pul᷊o appatta wul᷊anna assione sulal᷊ummu tonna aruane sutempo i Ratu Darius uaparenta, MAWU Apan Lembontaṛṛino nabbisara apia si Nabi Hagai.

¹¹Wisara-Ne, “Paddorongke inaapuannu manga imam su ola'u hatto indi:

¹²Unnu wisara pia taumata nanganu ṛemessa sanduru wuassu sasamba apan nionggolla su MAWU, ana see niapidde napul᷊e sulal᷊ummu lappin jubane, wuṛṛu wua'udde ringannu jubane i tou nangeṛṛetta roti ara'e pabbawiakka waine, ara'e anggore, ara'e lanan zaitun, ara'e al᷊awo'u anna, apa sarangkanambone udde mabbal᷊i susi lai?” Sutempo i Hagai nangapiddu aiwal᷊o udde, manga imam sinumimbakka, “Tawe.”

¹³Wua'udde Hagai naiwal᷊o apia, “Unnu wisara pia taumata apan nabbal᷊i narosa ana waugu i tou nangeṛṛetta winal᷊unanna, wua'udde i tou nangeṛṛetta lai suwallattu sambau anna udde, apa anna udde mabbal᷊i marosa lai?” Manga imam sinumimbakka, “Ore, udde atonna!”

¹⁴Wua'udde Hagai nabbisara apia, “MAWU nabbisara manungku atoranna udde iapaamatta lai su taumatan Israel su wanua indi su al᷊awo'u saranapa apan a'olaanni mangitou. Nariaddi, apa apan nionggolli mangitou sassamba su mezbah indi addewe rosa.”

¹⁵MAWU nabbisara, “Annama'o, panutukka apa apan nariaddi tantal᷊anna taambe allo indi, eteudde tantal᷊anna Wal᷊e-U indi taambe niola'a apia! Ereapa olangnge sutempo udde?

¹⁶I yamiu inaite na'ellega ombon gandumma wuṛṛu massunna sarun maasomba 200 su kilone gandumma, arawe wutte'e tumba'u pia 100 su kilone. I yamiu inai mangabba 100 su literene anggore wuassu wowongngu anggore, arawe pia tumba'u 40 su literene.

¹⁷I Ya'u buatte nanossokku anginna wuṛṛu urana watu ipakkimunsa'a al᷊awo'u wuan wawail᷊annu, arawe i yamiu maddiri lai mabbelengnga ringang-Ku.

¹⁸Su allo indi, allo aruan pal᷊o appatta wulanna assione, rapappaku Wal᷊e-U masue itaingnga! Panutukke apa apan sarun mariaddi manattakka orassa indi.

¹⁹Salaiwe tate ganduma apan natantangnga, wuṛṛu punnu anggore, punnu ara, punnu delima wuṛṛu punnu zaitun taambe nabbua, arawe manattakka orassa indi i Ya'u sarun mangal᷊amatta si yamiu!”

²⁰Su allo udde lai, eteudde allo ruan pul᷊o appatta wul᷊anna assione, MAWU nangonggollu tanata apan aruane si Hagai,

²¹tadea'u iapasingkatta si Gubernure Zerubabel. Unnu MAWU, “Tate mal᷊annu lai langitta wuṛṛu runia sarun Ta'u iio'a,

²²manga araratuanna Ta'u iapaṛṛa'a wuṛṛu taṛṛinon mangitou Ta'u ṛinumsaanna. Manga karetan pangalo ringannu mangangapidde sarun Ta'u iwal᷊insuangnga; anambon awal᷊o sarun nate wuṛṛu manga sumasa'ene sarun mapapate.

²³Su allo udde i'o Zerubabel, allang-Ku, sarun Ta'u itenega mamarenta ringannu arang-Ku. Ana waugu ete i'o apan buatte Ta'u nipile.” MAWU Apan Lembontaṛṛino buatte nabbisara.