Read Talaud ZAKARIA 1 Bible Online

ZAKARIA 1 - Talaud bible

ZAKARIA 1

¹Su wul᷊anna aual᷊une sulal᷊ummu tonna aruane sutempo i Ratu Darius uaparenta Persia, MAWU namasingkattu tanata indi si ya'u, Nabi Zakaria ana'i Berekhya wuṛṛu pulunni Ido.

²MAWU namarenta si ya'u tadea'u mabbisara arendi su uman-Ne, “Sutempo nanangkal᷊iu i Ya'u, MAWU Apan Lembontaṛṛino, tumaniten nasa'u su iupungngu al᷊amonanu.

³Arawe orassa indi i Ya'u mabbisara si'o: Pabbelengke ringang-Ku, ne i Ya'u lai sarun mabbelengnga ringannu.

⁴Ariewe ere iupungngu al᷊amonanu. Sutempon dorone manga nabi mammasingkattu tanata-U si mangitou tadea'u i mangitou tate lai ma'ola'a al᷊al᷊eo wuṛṛu ma'ola'a rosa. Arawe i mangitou tawe maddaringikka wuṛṛu maddiri tumuṛṛutta si Ya'u.

⁵Suapate iupungngu al᷊amonanu wuṛṛu manga nabi udde orassa indi? I mangitou tate baddi'a.

⁶Ringannu nappaattu manga nabi manga allang-Ku udde, i Ya'u namasingkattu manga parenta wuṛṛu manga tataggu su iupungngu al᷊amonanu. Arawe i mangitou tawe maddaringikka na'oman sara i mangitou ṛinone mamasanna pangillul᷊eanne. Wua'udde i mangitou sinumassilla wuṛṛu nanga'u manungku i Ya'u, MAWU Apan Lembontaṛṛino, buatte nakkuumanni mangitou uasul᷊ungngu pasasal᷊a mangitou, wuṛṛu uasul᷊ungngu apa apan buatte nitantung-Ku.”

⁷Su allo duan pul᷊o appatta wul᷊anna Syebat, eteudde wul᷊anna mapul᷊o dua, sulal᷊ummu tonna aruane sutempo i Ratu Darius uaparenta, MAWU namasingkattu tanata-Ne si ya'u. Sulal᷊ummu sambau sondappa sutempo ṛabbi,

⁸i ya'u naasilo mala'ekattu MAWU uasa'e sambau awal᷊o maṛṛamu. I Tou nattaalla su sambau wawalanne suwallattu manga punnu alu murad. Su liudde uarisikka lai manga pira awal᷊o waine, piaddu maṛṛamu, maramu jambu wuṛṛu mawira.

⁹I ya'u naiwal᷊o si tou, “Tuangnga, apa atappasanne anambon awal᷊o indi?” I Tou sinumimbakka, “Sarun ta'u iapal᷊iatta'a atappasanne si'o.

¹⁰I mangitou nirolokku MAWU iapaparikissa runia.”

¹¹Anambon awal᷊o udde nangalae su mala'ekatta, “I yami buatte namal᷊intaddu ahewallu runia, inauranna runia indi mal᷊annabba wuṛṛu matammudda.”

¹²Wua'udde mala'ekatta udde nabbisara, “MAWU Apan Lembontaṛṛino, pitun pul᷊o su tonnane al᷊annune I'o nasa'u su Yerusalem wuṛṛu su manga soa su Yehuda. Maddatingngu tingngera I'o sidutu massa'u wuṛṛu tawe mangampungnga si mangitou?”

¹³MAWU sinumimbakka mala'ekatta udde ringannu manga wisara ipalluassa,

¹⁴wuṛṛu mala'ekatta udde nandolo'u mamasingkattu apa apan niwisaran MAWU Apan Lembontaṛṛino, “I Ya'u lembon mandangngu wuṛṛu ma'ellega soa Yerusalem, soa apan susi.

¹⁵Arawe i Ya'u tuminiten massa'u su manga walahanna apan uapendamma mal᷊annabba wuṛṛu matammudda. Ana waugu sutempo i Ya'u naṛṛaddannu asasa'u-U su uma-U, manga walahanna udde mannamba asasusan uma-U.

¹⁶Orassa indi i Ya'u mabbelengke su Yerusalem tadea'u mangonggollu pangangampunga su soa udde. Wal᷊e-U sarun iapararisikka apia wuṛṛu soan Yerusalem sarun isul᷊e apia.”

¹⁷Mala'ekatta udde nandolo'u mamasingkattu tanata indi lai, “MAWU Apan Lembontaṛṛino naddiandi manungku manga soa-Ne sarun mabbal᷊i su lal᷊umanna'a apia wuṛṛu manungku paasa lai i Tou sarun mantul᷊ungngu Yerusalem wuṛṛu manga'u maola'a pussa'a-Ne sassane.”

¹⁸Sulal᷊ummu sondappa apan baine, i ya'u naasilo appata tatandu'u sapi.

¹⁹I ya'u naiwal᷊o su mala'ekatta apan buatte nabbisara si ya'u, “Apa atappasannu manga tatandu'a udde?” I Tou sinumimbakka, “Manga tatandu'a uddewe waneṛṛan manga araratuanna matohassa apan nanal᷊iawukku tumana'u Yehuda, Israel wuṛṛu Yerusalem.”

²⁰Wua'udde MAWU namasilo si ya'u siri appata taumata taṛṛa sassalla ara'e ipu apan uaapiddu darupa.

²¹I ya'u naiwal᷊o, “Apa pandumanne darantan mangitou?” I Tou sinumimbakka, “Tadea'u ipamata'utta wuṛṛu ipamal᷊insuangngu manga walahanna apan buatte nakkimunsa'a Yehuda see nanal᷊iawukku tumanangnge.”