Read Talaud ZAKARIA 10 Bible Online

ZAKARIA 10 - Talaud bible

ZAKARIA 10

¹Napawe tempon manontongnga rumantate, paddorongke uranna su MAWU. Ne MAWU sarun mangammullu winabbawa ma'itumma, wuṛṛu manosokku urana masassaga ma'oman sara manga wawail᷊anna mabbal᷊i mangelomma mapia su anambon taumata.

²Manga taumata apan maddorongnga tantatiro su manga paal᷊uanna wuṛṛu manga manani'atta, arawe manga sasimbakka apan niasombanganni mangitou uddewe awusu wuṛṛu mangke tawe loṛṛone. Piaddu mannal᷊a'an bal᷊iawa,arawe tatal᷊a'an mangitou tumba'u mangal᷊iwun kamiu, wuṛṛu lal᷊uassa apan nionggolle tawe pangaratianne. Ana waugu udde tumanangnge nassal᷊iawukka ere domba. I mangitou massusa ana waugu tawe piaṛṛangnge.

³MAWU nabbisara, “I Ya'u nasa'u atonna su tembonanne uaparenta uma-U, wuṛṛu i mangitou Ta'u iṛṛuumanna. Arawe tumana'u Yehuda uddewe pussa'a-U, wuṛṛu i Ya'u, MAWU Apan Lembontaṛṛio sarun mamadul᷊i si mangitou. I mangitou sarun Ta'u olaanna awal᷊on pangalo apan matohassa si Ya'u.

⁴Wuassu wallatti mangitou sarun Ta'u pileanna tembonanne, piaṛṛa'a, wuṛṛu panglima tantara apan sarun mamarenta uma-U.”

⁵Tumana'u Yehuda sarun maauntungnga ere manga atumannaṛṛane apan maṛṛinda seetta ere labbo su lal᷊anna. I mangitou mattinsahadda ana waugu i Ya'u, MAWU massumbala si mangitou, wuṛṛu tantaran seetta apan uasa'e awal᷊o sarangkanambone sarun iawaddon mangitou.

⁶“Tumana'u Yehuda sarun Ta'u tohasanna, umattu Israel sarun Ta'u iapaasal᷊amatta. Ta'u iapidda i mangitou mabbelengnga watukku wanuane ana waugu i Ya'u marangngu si mangitou. I mangitou sarun Ta'u olaanna ere walahanna apan tawe Ta'u niawusuanna. Ete i Ya'u MAWU Ruata mangitou, al᷊awo'u rosane sarun Ta'u ellehanna apia.

⁷Umattu Israel naal᷊ihidda atumannaṛṛane apan matohassa, naal᷊ihidda taumata apan na'inumma anggore, i mangitou lulluassa. Papapulunni mangitou wuassu tempo maddatingngu tempo sarun tawe maabul᷊in auntunganna indi apan Ta'u nionggolla. I mangitou sarun lumala'a ana waugu inolaang-Ku si mangitou.

⁸Uma-U sarun Ta'u waggoanna wuṛṛu iammulla mabbal᷊i sambau. I mangitou Ta'u ipallossa wuṛṛu anambon Ta'u olaanna dorone.

⁹Salaiwe i mangitou Ta'u isal᷊iawukka su pattangngannu manga walahanna, i mangitou sidutu uanaungnga si Ya'u poiaroddi. I mangitou sarun masal᷊amatta, aroddi lai al᷊aṛṛaanangnge wuṛṛu sarun mapul᷊e suadio'a watukku wanuane.

¹⁰Wuassu Mesir wuṛṛu Asyur, i mangitou sarun Ta'u iapaapul᷊e. Su wanuane sassane i mangitou sarun Ta'u iapaatana'a. Ta'u niapidda i mangitou watukku Gilead wuṛṛu lai Libanon, Ma'oman sara ahewallu wanua mapenen mangitou.

¹¹Napawe i mangitou tumumbe tahal᷊oangngu asasusa, i Ya'u, MAWU sarun mamuulla manga lua'a; ne ṛanassu Sal᷊ukku Nil mabbali mamara-mara. Walahannu Asyur apan mawunga sarun iapawawo, wuṛṛu Mesir apan matohassa sarun iapawul᷊i taṛṛinone.

¹²I Ya'u sarun manohassa uma-U, i mangitou sarun matuṛṛutta wuṛṛu mattaṛṛamawu si Ya'u. I Ya'u, MAWU, buatte nabbisara.”