Read Talaud ZAKARIA 11 Bible Online

ZAKARIA 11 - Talaud bible

ZAKARIA 11

¹Ei Libanon, wu'ate manga ngaranu, tadea'u putungnga manoṛṛobba manga alu arasi yamiu!

²Ei punnu daru, lalluaite, ana waugu naṛṛaate manga punnu alu cemara, manga aaluanna apan matohassa nawansalle. Ei manga aaluanna masallakka su Basan, lalluaite. Ana waugu manga mahurangnge mal᷊alangnga buatte niwabbassa mal᷊aukka.

³Paddaringikke lal᷊uai manga tembonanne nawul᷊ite awawantugi mangitou! Paddaringikke wawassingngu manga singa su mahurangnge; ana waugu nahohakke atatanaanni mangitou su al᷊o'engngu Sal᷊ukku Yordan.

⁴MAWU Ruata nabbiara si ya'u, “I'o pattingkaola'e ere mallal᷊u'adda apan uataṛṛapa domba apan sarun ṛatanna.

⁵Manga mamamalline mammate manga domba udde ringannu tawe naasomba ṛuumanna. I mangitou apan mabbalu'u ṛemessu manga domba udde mabbisara, ‘Dalo su MAWU! Orassa indi niatambante paa'alan kite!’ Manga mallal᷊u'udda udde tawe maapendamma umakkanna su manga domba papadul᷊iananni mangitou.

⁶I Ya'u maddirite lai umakkanni sai-sai su wanua indi. I Ya'u sassane sarun manantillu anambon tumanangnge su manga tembonanne. I mangitou sarun makkimunsa'a wanua indi, wuṛṛu i Ya'u tate manganu apia wuassu lima mangitou.”

⁷I ya'u, Zakaria, ana see nisewannu manga mabbawal᷊u'u domba tadea'u mallu'adda manga domba apan sarun ratanna. I ya'u pia darua ta'inna; iapa sambua ta'u nisaggo “Aakkanna” wuṛṛu iapa sambau lai “Nii'itta”. Wua'udde i ya'u mannattakke mandiaga wuṛṛu mammadul᷊i manga domba udde.

⁸Siri tallu malll᷊u'adda apan maddantingku nanginsue asasabbare'u. I mangitou ta'u nilimbuaṛṛanna sulal᷊ummu tempo sambul᷊anna.

⁹Wua'udde i ya'u nabbisara su ammul᷊annu domba udde, “I ya'u maddirite mallu'adda si yamiu apia. Iapa matete wal᷊a'e i tou nate, wuṛṛu iapa masilaka, wala'e i tou masilaka. Ana see lambene walate i mangitou mapapate.”

¹⁰Ana see ta'inna apan ta'u nisaggo “Aakkanna” udde ta'u nianu wuṛṛu ta'u nipaddi tadea'u ipanal᷊are paaire apan niola'u MAWU ringannu anambon balahanna.

¹¹Su allo udde lai paaire tawe nariaddi. Manga mabbawal᷊u'u domba uataṛṛapa si ya'u, wuṛṛu i mangitou naatutukke manungku MAWU tantal᷊anna mabbisara sulal᷊ummu inolaangku.

¹²I ya'u nabbisara si mangitou, “Amungkangngu manga Tuangnga mappulu, onggol᷊a'e sewa'u; amungkangngu tawe, lasa'e lai.” Wua'udde i mangitou nangonggolla si ya'u tallun pul᷊o roitta sal᷊a'a maola'a sewa'u. MAWU nabbisara si ya'u, “Taṛṛoa'e roitta udde sulal᷊ummu kasen Wal᷊e-U.” nariaddi ta'u nitaṛṛo tallun pul᷊o roitta sal᷊a'a udde sulal᷊ummu kasen Wal᷊en MAWU. Tumba'u aroddi pangangareggan mangitou si ya'u!

¹⁴Wua ude ta'u nipaddi ta'ingku aruane, eteudde apan ta'u nisaggo “Nii'itta”, ne napesangke paa'aukku Yehuda wuassu Israel.

¹⁵Ana see MAWU nabbisarate si ya'u, “Pa'ola'e paassa apia ere ola'u i'o mallal᷊u'adda, arawe paassa indi ere sangkatou mallal᷊u'adda apan dal᷊eo.

¹⁶Ana waugu i Ya'u sarun mapamanaran sangkatou mallal᷊u'adda iapariaga ammul᷊annu domba-U, arawe i tou tawe maddea'a domba nawul᷊i; i tou tawe maddea'a domba apan nilamammiṛṛane, tawe lai mangundamma domba apan nal᷊essa, wuṛṛu tawe mapa'annu domba apan ta'e wiakka. Ewe'e i tou lai sassane u'inassa ṛemessu domba apan atawanne wuṛṛu nanawutta manga anu'un binatangnga udde.

¹⁷Niawontohante mallal᷊u'adda apan tawe gunane udde! It ou buatte nanantangngu ammul᷊annu dombane. Ta'iakke sarun mabbal᷊i lome wuṛṛu mata aikkatanne mabbal᷊i wuta.”