Read Talaud ZAKARIA 3 Bible Online

ZAKARIA 3 - Talaud bible

ZAKARIA 3

¹Sulal᷊ummu sondappa apan baine lai, MAWU namasilo si ya'u Imam Bahewa Yosua tantal᷊anna uarisikka su saruannu mala'ekattu MAWU. Su sandiṛṛanni Yosua, uarisikka Setanna apan nariahite mangansilla si tou.

²Mala'ekattu MAWU nabbisara su Setanna, “Antimanna MAWU makkuumannu ei Setanna! Antimanna MAWU apan marangngu Yerusalem makkuumannu. Taumata indi naal᷊ihidda anutungnga apan niabutta wuassu ṛenggammu putungnga.”

³Yosua uarisikka isudde ual᷊uṛṛen laubba nallal᷊uhuranna atonna.

⁴Ne mala'ekatta udde nabbisarate su manga mangangimbe su surga, “Rammea'e laubba nallal᷊uhuranna apan ual᷊uṛṛe su taumata indi.” Wuṛṛu si Yosua i tou nabbisara, “Rosanu buatte ta'u niramme, i'o ta'u onggol᷊annu laubba wakku.”

⁵Ne i tou lai namarentate mangangimbene mama'issu paparongnga apan baresi su puan Yosua. I mangitou tinumuṛṛutta wuṛṛu wua'udde i mangitou nalluṛṛen laubba waku udde si tou ringannu rariagannu maa'ekattu MAWU.

⁶Wua'udde mala'ekatta udde namasingkattu wisara MAWU si Yosua,

⁷“Amungkangngu i'o tumuṛṛutta manga tita-U wuṛṛu mappaamattu manga manara apan Ta'u nionggolla si'o, ne sarangkal᷊o'engnge i'o wotongnge mabbali piaṛṛa'a sulal᷊ummu Wal᷊e-U wuṛṛu mammaresi rallakke. I Ya'u sarun maddaringikka manga aal᷊iomannu, ere lai i Ya'u maddaringikka aal᷊iomannu mala'ekatta apan uatana'u marani-Ku.

⁸Paddaringikke ei Imam Bahewa Yosua, wuṛṛu lai i yamiu manga imam apan naola'a ringanne, i yamiu sarangkanambone uddewe waneṛṛa tempo addantane apan mapia. Sutempo udde i Ya'u sarun mandolokku allang-Ku apan isassago ‘Sambau Solla’.

⁹Ta'u niaddo su saruanni Yosua sambau watu uataṛṛawu'u pitu apan sarun Ta'u uitanna ringannu manga woṛṛeta. Sulal᷊ummu allo massallo sarun Ta'u iramme rosa wuassu wanua indi.

¹⁰Napawe allo udde nia'omante, suapan taumata sarun mannote al᷊indonganne tadea'u rumanta wuṛṛu mamendamma paddarame wuṛṛu atatammudda su pattangngannu manga wawail᷊annu anggore wuṛṛu manga punnu alu ara.”