Read Talaud ZAKARIA 8 Bible Online

ZAKARIA 8 - Talaud bible

ZAKARIA 8

¹MAWU Apan Lembontaṛṛino nangonggollu tanata indi si ya'u,

²“I Ya'u mangke mappulu atonna mantul᷊ungngu Yerusalem ana waugu i Ya'u lembon u'akkannu tumanangnge, wuṛṛu ana waugu darangngu-Ku udde, naung-Ku mal᷊oso su manga seettu soa udde.

³I Ya'u sarun mabbelengnga su Yerusalem, soa-Ku apan susi udde. Yerusalem sarun tumelengnga sambau soa apan satia, wuṛṛu wuiddu MAWU Apan Lembontaṛṛino sarun isaggo Wuidda susi.

⁴Su lete'a mal᷊alangngu soan Yerusalem, sarun uma'ianna lai manga tete wuṛṛu manga nene apan tumaniten timmade na'oman sara ṛinone umamatta ringannu ta'inna.

⁵Manga lal᷊ana su soa sarun mapene apia ringannu al᷊aṛṛana'a apan mannalangnga.

⁶Olangnge udde aellehanna ere ola'u tawe masutta su ṛingirannu manga taumata apan ta'e mabbiakka wuassu walahanna indi, arawe udde atonna si Ya'u.

⁷I Ya'u sarun manal᷊amatta uma-Ku wuassu manga wanua sutampa i mangitou niṛṛootta,

⁸wuṛṛu mangapiddi mangitou mabbelengnga wuassu ra'i wuṛṛu wuassu waṛṛatta, ma'oman sara i mangitou matana'a su Yerusalem apia. I mangitou sarun mabbal᷊i uma-U wuṛṛu i Ya'u Ruatan mangitou. I Ya'u sarun mamarenta si mangitou ringannu satia wuṛṛu atatul᷊idda.”

⁹MAWU nabbisara su uman-Ne, “Paatohasse naungngu! Orassa indi i yamiu ma'aringikka manga wisara apan buatte niwisara lai manga nabi sutempo rapappakke niaddo, ipabbangunna apia Wal᷊e-U.

¹⁰Tantal᷊anna taambe tempo udde taweddu wotongnge maasewa ikkattu taumata ara'e winatangnga, wuṛṛu taweddu apan maapendamma matammudda wuassu seetta. I ya'u buatte napawawul᷊on sangkatou ringannu waine.

¹¹Arawe orassa indi manga taumata apan ta'e wiakka wuassu walahanna indi Ta'u olaanna uapapaṛṛala ere dorone.

¹²I mangitou sarun mangasi'u wualanna ringannu paddarame. Manga punnu anggori mangitou sarun mabbua, leta'a sarun mangonggollu hessine, wuṛṛu uranna sarun mangansalla ringannu manambo-nambo. Al᷊awo'u al᷊amatta Ta'u iionggolla su manga taumata apan ta'e wiakka wuassu walahanna indi.

¹³Ei tumana'u Yehuda wuṛṛu Israel! Sutempo nanangkal᷊iu, amungkangngu manga taumata raho uawawontoga, i mangitou mabbisara, ‘Antimanna asasilaka apan naṛṛia'a su Yehuda wuṛṛu Israel maṛṛia'a si'o lai!’ Arawe i Ya'u sarun manal᷊amatta si yamiu, ma'oman sara manga taumata raho udde sarun mabbisara rundussa i mangitou, ‘Antimanna al᷊amatta apan nonto'a su Yehuda wuṛṛu Israel, umonto'a lai su watangannu!’ Ana waugu udde paatohasse naungu wuṛṛu arie paata'utta!”

¹⁴MAWU Apan Lembontaṛṛino nabbisara, “Sutempo iupungngu al᷊amonanu naaola'a a si Ya'u nasa'u, i Ya'u nakkawessa tadea'u makkuumanni mangitou ringannu maṛṛagissa. I Ya'u sarun tawe mamal᷊u putusang-Ku udde, ewe'e mangke mapaamatta.

¹⁵Arawe orassa indi i Ya'u mangal᷊amatte tumana'u Yerusalem wuṛṛu tumana'u Yehuda. Nariaddi, ariete pa'ata'utta.

¹⁶Eteindi manga parenta apan rinone olaanni yamiu: Amungkangngu mabbisara, pabbisarate ringannu atonna su sansul᷊ungngu. Pangonggollennu pallaṛṛuungnga apan matul᷊idda wuṛṛu mangngapiddu paddarame.

¹⁷Imbaṛṛangnga manggol᷊agu al᷊al᷊eo su saruannu sansul᷊ungngu. Imbaṛṛangnga massalu awusu. I ya'u maddantinnu wawahia wuṛṛu pallal᷊inga see lai araṛṛagissa.”

¹⁸MAWU apan Lembontaṛṛino nangonggollu tanata indi si ya'u hunan uman-Ne,

¹⁹“Puasa apan a'olaanna su wul᷊anna aippanne, al᷊imane, appitune, wuṛṛu appul᷊one sarun maola'a manga ramea apan napenen al᷊al᷊uassa wuṛṛu lal᷊umanna'a su tumana'u Yehuda. Pandangngute atatul᷊idda wuṛṛu paddarame!”

²⁰MAWU Apan Lembontaṛṛino nabbisara, “Tempone sarun a'omanna tumana'a wuassu anambon soa sarun dumanta su Yerusalem.

²¹Tumana'a wuassu soa apan sambau mabbisara singana'a waine, “Wette i ite inaite massubba MAWU Apan Lembontaṛṛino wuṛṛu sumalande al᷊aman-Ne. Tantalongke si yami!”

²²Ana see manambo taumata wuṛṛu manambo walahanna apan mangkatohassa sarun dumanta su Yerusalem massubba si Ya'u MAWU Apan Lembontaṛṛino wuṛṛu sumal᷊ande al᷊ama-U.

²³Su manga allo udde siri mapul᷊o taumata raho sarun dumanta ringannu sangkatou taumatan Yahudi wuṛṛu mabbisara, ‘I yami mappulu maauntunnga ere i yamiu; ana waugu i yami naaringikka manungku Ruata nangal᷊amatta si yamiu.’ ” MAWU Apan Lembontaṛṛino buatte nabbisara.