Read Talaud ZAKARIA 9 Bible Online

ZAKARIA 9 - Talaud bible

ZAKARIA 9

¹Eteindi tanatan MAWU. I Tou buatte nakkawessa makkuumannu wanua Hadrakh wuṛṛu soan Damsyik. Wal᷊ine tumba'u manga ṛuangannu Israel, arawe lai inangngu soa Siria uddewe pussa'an MAWU.

²Hamat apan uasasara ringannu Hadrakh udde tatahuanan-Ne, aroddi lai manga soan Tirus wuṛṛu Sidon ringannu al᷊awo'u asingkattu tumanangnge.

³Tirus buatte napararisikku manga tanda batun mangitou wuṛṛu nangombon manambo atonna wul᷊awanna wuṛṛu sal᷊a'a na'oman sara naola'a ere saranapa wiasa ere anne wuṛṛu labbo su lallanna.

⁴Arawe MAWU sarun ma'ola'a si mangitou asiangnga. Anambon pa'a'alan soa udde sarun irammen MAWU su tahal᷊oangnga wuṛṛu soa udde sassane sarun masue soṛṛowannu putungnga.

⁵Soa Askelon wuṛṛu Gaza sarun maasilo si Tou wuṛṛu mabbal᷊i mata'utta. Ekron sarun maasilo si Tou lai wuṛṛu sarun awul᷊iannu al᷊awo'u pangangantimme. Gaza sarun awul᷊iannu ratunne, wuṛṛu Askelon sarun mabbal᷊i mal᷊annabba tawe tumatanangnge.

⁶Asdod sarun atanaannu manga taumata wuassu walahanna ual᷊al᷊o'a. MAWU nabbisara, “Taumatan Filistin apan mawunga udde sarun Ta'u ṛaddaanna.

⁷I mangitou tate lai uminassa ṛemessa apan ta'e pia daṛṛane ara'e anna waine apan ipappalli. Anambon taumata apan natantangnga sarun maola'a uma-U wuṛṛu olaanna sambau wageangngu ṛuangannu Yehuda. Ekron sarun maola'a reengannu uma-U, ere taumatan Yebus sutempon dorone.

⁸I Ya'u sarun mandiaga leta-U wuṛṛu mannal᷊are ammul᷊annu tantara raho apan sumabbi umamatta isudde. I Ya'u tate lai mamala mangangallangnga mandal᷊eo uma-U. Ana waugu asasusan mangitou buatte Ta'u niasiloanna.”

⁹Ei tumana'u Sion, lalluasse! Ei tumana'u Yerusalem, paggiote! Pa'ellege! Rutunu nirumanta ringannu auntunganna! I tou ratu matul᷊idda apan uaapiddu asasal᷊amatta. Arawe ringannu napenen asasaṛṛionto'u naungnga i tou nirumanta uasa'e keledai, sambau keledai saṛṛen tumuwo.

¹⁰MAWU nabbisara, “Manga keretan pangalo wuassu Efraim sarun Ta'u iramme, anambon awal᷊o su Yerusalem sarun Ta'u iapaawul᷊i wuṛṛu al᷊awo'u anaanna sarun Ta'u ṛimunsaanna. Ratunu sarun umal᷊iatan paddarame su manga walahanna. Wuassu tahal᷊oangnga watukku tahal᷊oangnga i Tou uataṛṛino, wuassu Sal᷊ukku Efrat maddatingngu pentakku runia.”

¹¹MAWU nabbisara su uman-Ne, “Ringannu paaire apan Ta'u niola'a si yamiu, paaire apan nitialanu daṛṛan sasamba, sarun Ta'u ipallossa tumanangngu apan uatataṛṛangnga sulal᷊ummu pamamuanganna naal᷊ihidda taumata apan uataṛṛo sulal᷊ummu paṛṛihi mamara.

¹²Pabbelengke ei manga taumata apan niwuangnga, orassa indi i yamiu uatahuanna antimma. Pabbelengke watukku tampa passirungannu, i Ya'u sidutu mangal᷊amatta si yamiu. Paddaringikke: Paarua lipanne i Ya'u mangal᷊amatta si yamiu ana waugu al᷊awo'u asasusa apan buatte niapendamanni yamiu.

¹³Yehuda sarun Ta'u ipaatta maola'a anaannu atumannaṛṛanne, wuṛṛu Israel maola'a anaanna apan nasaddiate ipiti'a. Tumana'u Sion Ta'u ipaatta maola'a halele; ringannu hal᷊ele udde manga taumatan Yunani sarun Ta'u pangaloanna.”

¹⁴MAWU sarun maipasilon batangan-Ne su uman-Ne, naal᷊ihidda sawallo manga anaan-Ne nipiti'a. MAWU Apan Atanggaṛṛanne sarun maniuppa trompetta tatiala mamangalote see inaite umamatta sulal᷊ummu tandi'a wuassu timukka.

¹⁵Uman-Ne sarun onggolan-Ne passirunganna, ma'oman sara al᷊awo'u seetta wotongnge iawaddo. Naal᷊ihidda hahuressan taumata wu'anna, etearoddi hahuressan mangitou sulal᷊ummu pangalo. Naal᷊ihidda daṛṛan sasamba apan nilal᷊inna su wowon mezbah, aroddi lai daṛṛan seetti mangitou nabboso.

¹⁶Napawe allo nia'omante, MAWU sarun manal᷊amatta uman-Ne, naal᷊ihidda mallal᷊u'adda manal᷊amatta dombane wuassu asasilaka. I mangitou sarun lumansiangnga su leta'u MAWU, naal᷊ihidda permata mahkota apan sussal᷊endappa.

¹⁷Apiawe eteapa leta'u MAWU sal᷊immurine, tumaniten mapia wuṛṛu aṛṛamage! Isudde anggore wuṛṛu gandumma tinumuwo masuwukka, naaola'a umbasanna maṛṛuala a'atambanna atohanne.