Read Talaud MALEAKHI 3 Bible Online

MALEAKHI 3 - Talaud bible

MALEAKHI 3

¹MAWU Apan Lembontaṛṛino sinumimbakka, “Ya'u sarun mandolokku daroloṛṛang-Ku iapasaddia lal᷊ang-Ku. Ne ringannu inaṛṛombanganne i Ya'u, MAWU apan raddeaanni yamiu, sarun dumanta su Wal᷊e-U. Daroloṛṛang-Ku apan aantimanni yamiu udde sarun dumanta wuṛṛu umal᷊iatan paaire-U.”

²Arawe isai wotongnge maataṛṛangnga sutempo allon MAWU rumanta wuṛṛu maipasilon batangan-Ne? Ana waugu i Tou naal᷊ihidda mamamaresi wul᷊awanna, wuṛṛu naal᷊ihidda sabonna mabbawansalla.

³I Tou rumanta tadea'u makkuungnga, naal᷊ihidda taumata apan mammaresi wul᷊awanna wuṛṛu sal᷊a'a. Ere sangkatou mapapanden logamma mammaresi wul᷊awanna wuṛṛu sal᷊a'a, aroddi lai daroloṛṛannu MAWU sarun mamaresi manga imam tadea'u i mangitou mangngonggollu manga sasamba ringannu olangnge apan ipaapulun MAWU.

⁴Ne ere sutempon dorone, MAWU sarun manengkamma manga sasamba apan niongollu umattu Yehuda wuṛṛu Yerusalem si Tou.

⁵Unnu MAWU Apan Lembontaṛṛino, “I Ya'u sarun dumanta ringannu tadea'u makkuungnga. I Ya'u sarun masasaṛṛawutta maola'a matatiala su manga taṛṛa wal᷊i'in mata, manga taumata apan masandaga, apan mattiala awusu, wuṛṛu inolaanne mallinga sulal᷊ummu mangonggollu bawaekke su taumata mammanara, apan mangngallangnga manga wawine wal᷊u, asisi timpal᷊uassa, wuṛṛu manga taumata raho, su saruannu anambon taumata apan tawe mangaddatta si Ya'u.”

⁶“Ete i Ya'u MAWU, wuṛṛu i Ya'u tawe mawalu. Ana waugu udde i yamiu, papapulunni Yakub, tawe pateanna.

⁷Ere iupungngu al᷊amonanu dorone, i yamiu sarangkanambone buatte simewedda wuassu manga tita wuṛṛu tawe mattuṛṛutta mappaamanne. Pabbelengke ringang-Ku, ne i Ya'u lai sarun mabbelengnga ringannu. Arawe i yamiu ma'iwal᷊o, ‘Apa apan ṛinone olaanni yami tadea'u mabbelengnga ringan-Nu?’

⁸Orasa indi i Ya'u maiwal᷊o si yamiu: Wotongngewe taumata mamahia Ruata? Asingka udde tawe. Arawe i yamiu namahia si Ya'u lai. I yamiu ma'iwal᷊o, ‘Ereapa?’ Sasimba-U: Sulal᷊ummu olangnge mammaekka sepeṛṛe mapul᷊o wuṛṛu mangngonggollu sasamba.

⁹Anambon walahanna mangngawusu si Ya'u, ne i yamiu sarangkanambone aṛṛinoannu wontoga.

¹⁰Apira'e sepeṛṛe mapul᷊onu sarangkanambone watukku Wal᷊e-U tadea'u pia anna manambo poiaroddi. Panal᷊u'ate si Ya'u, ne i yamiu sarun maasilo manungku i Ya'u namu'a manga ngaran surga wuṛṛu nangonggolla si yamiu al᷊awo'a apan mapia.

¹¹I Ya'u sarun tawe mamala saṛṛappalanna manggohakka hessin sinuanannu; manga punnu anggorenu sarun mabbelle'u wuane.

¹²Ne i yamiu sarun isaggo su lal᷊umanna'a ṛattangannu anambon walahanna, ana waugu wanuanu nabbal᷊i tampa apan mapia pamanuanna.”

¹³MAWU nabbisara, “Manga wisaranu atonna mallobbossa si Ya'u.” “Arawe i yamiu ma'iwal᷊o, ‘Apa apan niwisaran kami su olang-Ngu?’

¹⁴I yamiu mabbisara, ‘Tawe gunane i ya'u mattaṛṛamawu Ruata. Apa hunane mappaamattu manaran kite su MAWU Apan Lembontaṛṛino, ara'e mamasilo si tou manungku i ite sinumassillu pasasal᷊an kite?

¹⁵I ite maasilo sassane manungku manga taumata mawunga su lal᷊umanna'a. Taumata lal᷊eo tawe tumba'u mabbiakka su al᷊al᷊uassa, arawe amungkangngu i mangitou manal᷊u'atta asasabaren Duata ringannu ma'ola'a al᷊al᷊eo, i mangitou nal᷊iu lai.’ ”

¹⁶Ana see manga taumata apan matta'uttu MAWU uahahatto sangkatou ringannu sangkatou. MAWU maddaringikka wuṛṛu mannutukka apa apan iwabbisaran mangitou. Manga taumata apan mangngaddatta si Tou wuṛṛu matta'utti Tou, aranne iwoṛṛetta sulal᷊ummu buken pamoṛṛetanna su saruan-Ne.

¹⁷MAWU Apan Lembontaṛṛino nabbisara, “I mangitou sarun mabbal᷊i uma-U. Su allo udde i Ya'u mammanara, i mangitou sarun maola'a pussa'a arangnguang-Ku. I Ya'u sarun umakkanni mangitou, ere sangkatou iamangnga u'akkannu anangnge apan matuṛṛutta si tou.

¹⁸Uma-U sarun maasilo apia ereapa paṛṛalane pal᷊addu taumata mapia wuṛṛu taumata lal᷊eo, suwallattu taumata apan mattaṛṛamawu si Ya'u wuṛṛu tawe.”