Read Talaud MATIUS 10 Bible Online

MATIUS 10 - Talaud bible

MATIUS 10

¹Su allo sambau Mawu Yesus namaggote mapul᷊o dua mallal᷊aṛṛenggen-Ne ma'ammulla. See i Tou nangonggollen taṛṛino si mangitou mallimbuakka manga ghaṛṛaho lal᷊eo wuṛṛu mangapia al᷊awo'u hatin radda'a wuṛṛu al᷊awo'u sangkullu wadangnga.

²Arannu sire mapul᷊o dua rasulle eteudde: paarorone i Simon (apan isassaggo lai i Petrus) ringannu tuṛṛangnge Andreas, see i Yakobus ringannu tuṛṛangnge i Yohanes, eteudde al᷊aṛṛana'i Zebedeus.

³Wua'udde i Filipus wuṛṛu i Bartolomeus, see i Tomas, see i Matius, mallal᷊uṛṛu wose, see i Yakobus ana'i Alfeus, wuṛṛu i Tadeus;

⁴see panginsueanne i Simon, si Patriot wuṛṛu i Yudas Iskariot apan nandal᷊eo Mawu Yesus.

⁵Sire mapul᷊o dua rasulle udde nirolokke Mawu Yesus ringannu tatantiro ereindi, “Imbaṛṛangnga inai su wageangngu leta'u manga taumata apan bal᷊ine Yahudi. Arie lai inai su manga soa taumatan Samaria.

⁶Arawe roote su wallattu taumatan Israel, nangillembo si mangitou apan nial᷊iwune.

⁷Wal᷊oa'e si mangitou manungku Ruata mal᷊ihakke lai mamarenta ere sangkatou Ratu.

⁸Paapia'e manga taumata apan maradda'a; pawanguna'e manga taumata apan nate; paapia'e manga taumata pia raddangnge paro apan ma'arantinna, wuṛṛu limbuaṛṛete manga ghaṛṛaho lal᷊eo. I yamiu suete nanengkamma sarangkanambone udde ringannu tawe bawaekke. Nariaddi pangonggolla lai ringannu tawe maddorongnga bawaekke.

⁹Arie mangapiddu roitta wul᷊awanna, roitta sal᷊a'a, ara'e roitta witu'a.

¹⁰Arie lai mangapiddu pato'am padaroronganna, ara'e laubba ruam parassa su amatannu, ara'e sapatu, ara'e ta'inna. Ana taumata apan mammanara sarun isuungnga hausanne.

¹¹Amungkangngu i yamiu na'omate su soa ara'e su ampungnga, paddea'e sangkatou apan maapulu manarimmatta si yamiu. Atana'e ringanni tou ma'oman sara i yamiu umamatta apia.

¹²Su tempo i yamiu sumutta su wal᷊e, pabbisarate, ‘Antimanna Mawu mangal᷊amatta si yamiu.’

¹³Amungkangngu manga taumata su wal᷊e udde manarimmatta si yamiu, wala'e tabeanu udde matatana'a ringanni mangitou. Arawe amungkangngu i mangitou tawe manarimmatta si yamiu, welenga'a apia tabeanu udde.

¹⁴Amungkangngu pia bal᷊e ara'e soa apan madiri manarimmatti yamiu ara'e madiri maddaringikka si yamiu, tantanga'a tampa udde wuṛṛu tontonga'a awu su pal᷊adu leddanu.

¹⁵Paanaunge! Su Allong Kiamatta, manga taumatan soa Sodom wuṛṛu Gomora malluasanna ampungannu Ruata wuassu manga taumata su soa udde!”

¹⁶“Daringiṛṛe paapia indi: i Ya'u nandolokki yamiu naal᷊ihidda domba apan tawe auatanne su wallattu serigala mal᷊aṛṛaga. I yamiu ṛinone paatehamma ere atoanna wuṛṛu matul᷊idda naungnge ere merpati.

¹⁷Paariaga, ana waugu i yamiu sarun sametanna wuṛṛu iapaasaruanna su Mallaṛṛuungngu Agama. I yamiu sarun sansaranna su manga wal᷊em pattataṛṛamawuanna.

¹⁸I yamiu sarun iapidda su saruannu manga tembonanne wuṛṛu mararatu ana waugu i yamiu mallal᷊aṛṛenggeng-Ku. Wuṛṛu eteudde tempong kamiu mangagillu tatiala su ola'u riri'U si mangitou wuṛṛu su manga taumata apan tawe maaillal᷊a Ruata.

¹⁹Arawe amungkangngu i yamiu iapidda parikisanna, arie suminggawangnga su ola'u apa apan isimbakki yamiu, ara'e ereapa i yamiu sarun mabbatti'a. Ana waugu apa apan sarun iwisarang kamiu udde, sarun iwal᷊o si yamiu su temponete.

²⁰Ana waugu mabbisara su tempo udde wal᷊inewe yamiu, arawe Ghaṛṛahon Iamangnga su surga, uaṛṛundinganna si yamiu.

²¹Sarun mariaddi manungku taumata sarun manantillu tuṛṛangnge sassane iapapate. Wuṛṛu udde lai sarun mariaddi su wallattu iamangnga wuṛṛu anangnge. Al᷊aṛṛana'a sarun lumawangnga hagurangnge, wuṛṛu manantilli mangitou iapapate.

²²I yamiu sarun ia'arantinnu anambon taumata ana waugu i yamiu mallal᷊aṛṛenggeng-Ku. Arawe taumata apan matataṛṛangnga ma'oman sara panginsueanne sarun iapaaralukka.

²³Amungkangngu i yamiu pappateanna su soa sambau, tal᷊angnga su soa waine. I Ya'u mabbal᷊o si yamiu: Tantal᷊anna i yamiu taambe namal᷊intaddu al᷊awo'u soa su Israel, Ana'u Taumata nirumantate.

²⁴Al᷊aṛṛana'a si'ol᷊a tawe maasampal᷊iu hurune, wuṛṛu mangangimbe tawe maasampal᷊iu mawune.

²⁵Naṛṛinote amungkangngu sangkatou ana'a si'ol᷊a maola'a ere hurune, wuṛṛu sangkatou mangangimbe maola'a ere mawune. Amungkangngu pa'ihaguranganna su wal᷊e aranne ete nisaggo Beelzebul, lembonete lal᷊oṛṛon bal᷊ene. I mangitou sarun onggol᷊annu aranna aral᷊eoane lai!”

²⁶“Ariewe pa'atauttu taumata. Tawe apa apan uawuni, apan tawe asiloanna, wuṛṛu tawedu apa apan ia'adappingnga apan tawe asingkatanna.

²⁷Apa apan Ta'u iwal᷊o si yamiu su marandumma, ṛinone isul᷊eng kamiu apia su semakku allo. Wuṛṛu apa apan isasal᷊imburungnga su tal᷊inganu, wal᷊oa'a udde su awada'alla.

²⁸Arie mata'utti mangitou apan mammate wadangnga, arawe tawe taṛṛino mamate niawa. Ata'utten Duata apan uataṛṛino mamate, mapia ete wadangnga aroddi lai ṛimuudda sulal᷊ummu naraka.

²⁹Sanggelokka darua a'awalliannu sambau roitta apan addio'anne. Salaiwe aroddi tawe saran sambau manawo su leta'a amungkangngu tawe ipaapulun Iamangngu.

³⁰Reengannu uta'a su puanu suete nireengnga anambone.

³¹Ana waugu udde, arie mata'utta! I yamiu lembo maareganne wuassu sanggelokka!”

³²“Isai-sai manga'u su saruannu awadaalla manungku i tou mallal᷊aṛṛenggeng-Ku, i Ya'u lai sarun manga'u si tou su saruannu Iamangku su surga.

³³Arawe isai-sai massinaada su saruannu awada'alla manungku i tou mallal᷊aṛṛenggeng-Ku, i Ya'u lai sarun massinaadi tou su saruannu Iamangku su surga.”

³⁴“Arie i yamiu massunna manungku i Ya'u mangapiddu paddarame su runia indi. I Ya'u tawe mangapiddu paddarame, arawe pasaseetta.

³⁵I Ya'u nirumanta na'ola'a ana'a esakka lumawangnga iamangnge, ana'a wawine lumawangnga inangnge, wuṛṛu mananambo lai wawine lumawangnga la'iananne wawine.

³⁶Ore, apa apan sarun maola'a seetta ahewal᷊anne, eteudde lal᷊oṛṛon bal᷊e udde sassane.

³⁷Taumata apan marangngu iamangnge ara'e inangnge manampal᷊iu wuassia-U tawe maola'a mallal᷊aṛṛenggeng-Ku. Aroddi lai taumata apan marangngu anangnge esakka ara'e wawine manampal᷊iu wuassia-U.

³⁸Wuṛṛu taumata apan madiri mamasanna alu arussane wuṛṛu tumantalongnga si Ya'u, tawe maola'a mallal᷊aṛṛenggeng-Ku.

³⁹Taumata apan tumba'u mattinau wiakke, sarun awul᷊iannu wiakke, arawe taumata apan awul᷊iannu wiakke ana waugu tuttuṛṛutta si Ya'u, sarun maasomba wiakke.”

⁴⁰“Taumata apan manarimmatti yamiu, manarimmatta si Ya'u lai. Wuṛṛu taumata manarimmatta si Ya'u, manarimmatta si Tou lai apan suete nandolo-U.

⁴¹Taumata apan nanarimmattu nabi ana waugu i tou nabi, sarun manarimmattu lal᷊antakke ere sangkatou nabi. Wuṛṛu isai apan manarimmattu sangkatou apan mapia ana waugu i tou mapia, sarun manengkamma lal᷊antakku sangkatou taumata apan mapia.

⁴²Isai-sai mappa'inumma, salaiwe tumba'u ua'e tallangnga, su sangkatou su wallattu manga taumata asiangnga indi, ana waugu i tou mallal᷊aṛṛenggeng-Ku, pangimanna i tou sarun manengkamma lal᷊antakke!”