Read Talaud MATIUS 11 Bible Online

MATIUS 11 - Talaud bible

MATIUS 11

¹Napawe Mawu Yesus suete nanantiro sire mapul᷊o dua mallal᷊aṛṛenggen-Ne, i Tou nanantangken tampa udde. I Tou inaite nangaṛṛa'a wuṛṛu nabbatti'u tanatan Ruata su al᷊awo'u manga soa apan marani isudde.

²I Yohanes Mananaṛṛani apan tantal᷊anna uaṛṛuumanna naaringikka su ola'u pamamanara Mawu Yesus Kristus. See i tou nandolokke manga pira mallal᷊aṛṛenggenne ringannu Mawu Yesus niapaiwal᷊o,

³“Ete Iamangnga taumata apan sarun dumanta ere suete pina'iren Ruata, ara'e i yami sarun maṛṛado lai taumata waine?”

⁴Mawu Yesus sinumimbakka, “Pabbelengke ringanni Yohanes wuṛṛu wal᷊oa'e apa apan suete niaringiṛṛanna wuṛṛu niasiloanni yamiu.

⁵Taumata wuta naasilo, taumata lome naa'amatta, taumata raddangnge paro napia, taumata wengella naaringikka, taumata nate nabbiakka apia, wuṛṛu Watti'u Al᷊al᷊uassa wuassu Ruata niapasingkatta su manga taumata asiangnga.

⁶Lal᷊umanna'a su taumata tawe pinangiananne su ipanol᷊a'u!”

⁷Napawe ralol᷊oṛṛanni Yohanes nabelengke, Mawu Yesus nanattakke nabbisara su taumata nambo su ola'i Yohanes, wisara-Ne, “I yamiu inai su wadda'a ma'ellega apa? Sangkul᷊appa wal᷊abukka itattalla'u anginna?

⁸I yamiu inai ma'ellega apa? Sangkatou apan uapedetta mapia? Manga taumata apan uapedetta aroddi uatana'a su tampan araratuanna!

⁹Nariaddi anio i yamiu inai su wadda'a? Inai ma'ellega sangkatou nabi? Atonna i tou nangillembo wuassu sangkatou nabi.

¹⁰Ana waugu ete Yohanes udde apan isassaggo su wageangngu Wuke Susi ereindi, ‘Ete indi ralol᷊oṛṛang-Ku, unnu Ruata, I Ya'u nandolokki tou dorone wuassi'o tadea'u i tou mamu'a lal᷊an-Nu.’

¹¹Naunge! Su runia indi taambe sangkatou taumata nangillembo wuassi Yohanes Mananaṛṛani. Salaiwe aroddi taumata apan addio'anne wuassu wallattu al᷊aṛṛana'u Ruata, nanampal᷊iu wuassi Yohanes.

¹²Ro'en Yohanes namasingkattu wattingnge udde na'oman sara orassa indi, al᷊aṛṛana'u Ruata ipaseettu manga taumata apan maapulu mamarenta ringannu araṛṛagissa.

¹³Na'oman sara rarantan Yohanes Mananaṛṛani, anambon tita Musa wuṛṛu manga al᷊aṛṛa'u manga nabi namasingkatta su ola'u apa apan ṛinone mariaddi.

¹⁴Wuṛṛu amungkangngu i yamiu mangngimanna, i Yohanes uddewe i Elia, apan darantane suete niapasingkatta.

¹⁵Amungkangngu pia tal᷊inga, paddaringikka!

¹⁶Ringannu apa sarun Ta'u isumandingnga manga taumata su tempo indi? I mangitou ere manga al᷊aṛṛana'a apan ua'ianna su pasakka. Sambageanganna u'ui su ammul᷊anna waine,

¹⁷‘I yami mangngantari aantarin lal᷊uassa si yamiu, arawe i yamiu madiri massal᷊aingnga. I yami mangngantari aantarin patatampungnga, wuṛṛu i yamiu madiri lumuai!’

¹⁸I Yohanes nirumanta — i tou mappuasa wuṛṛu tawe ma'inumma anggore; wuṛṛu manga taumata mabbisara, ‘I Tou niasuttannu setanna!’

¹⁹Orassa indi Ana'u Taumata, nirumanta — i Tou u'anna wuṛṛu ma'inumma; see manga taumata mabbisara, ‘Pa'ellega taumata udde! Wal᷊iu, taṛṛa wu'anna, hawene maddarorongnga wose, wuṛṛu hawene taumata marosa.’ Salaiwe aroddi, apapande Ruata niatialanna wuassu manga wuane.”

²⁰See Mawu Yesus nanattakke mapaasal᷊a manga soa, suapa isudde i Tou asokkanne ma'ola'a al᷊aṛṛindu'a. Ana waugu manga taumata su soa udde madiri mawal᷊u wuassu paddarosa mangitou.

²¹“Nasilakate yamiu Korazim! Wuṛṛu nasilakate lai yamiu, Betsaida! Unnu wisara manga al᷊aṛṛindu'a apan niola'a su pattangnganni yamiu suete niola'a su Tirus wuṛṛu Sidon, asinungka manga taumata poiaroddi mal᷊annute nawal᷊u wuassu paddarosa mangitou wuṛṛu suete nalluṛṛen laubbu massusa, see nandenoten awu su pua mangitou.

²²Paanaunge, su Allong Kiamatta, manga taumatan Tirus wuṛṛu Sidon malluasanna ampungannu Ruata wuassi yamiu.

²³Wuṛṛu i yamiu, Kapernaum! Apa i yamiu sarun iapaatanggakka ma'oman sara surga? Tawe! Ewe'e i yamiu sarun iwontolla su naraka! Ana waugu unnu wisara manga al᷊aṛṛindu'a apan niola'a su pattangnganni yamiu udde suete niola'a su Sodom, saran orassa indi ta'e pia Sodom!

²⁴Paanaunge, su Allong Kiamatta, taumatan Sodom malluasanna ampungannu Ruata wuassi yamiu!”

²⁵Su tempo udde Mawu Yesus u'al᷊iomanna, “Iamangnga Mawu apan uataṛṛino langitta wuṛṛu runia! I Ya'u ma'adiangkamanna Si'o ana waugu sarangkanambone udde niadapping-Ngu wuassu manga taumata apan pande wuṛṛu pia asingkanne, arawe I'o mannualaga su manga taumata apan tawe si'ol᷊ane.

²⁶Eteudde ma'al᷊uassa naungngu Iamangnga.”

²⁷See Mawu Yesus nabbisara, “Sarangkanambone suete tinantillu Mawu Iamangnga si Ya'u. Tawe sangkatou masingkattu Ana'a, tumba'u Mawu Iamangnga. Tawedu lai apan masingkattu Mawu Iamangnga, tumba'u Ana'a, wuṛṛu manga taumata, ete sisai Ana'a udde mamasingkattu Mawu Iamangnga.

²⁸Rantate ringang-Ku i yamiu sarangkanambone apan nal᷊otakke, wuṛṛu uapendamma winabbawa mawakkatta; i Ya'u sarun mappaaul᷊eng kamiu.

²⁹Tuṛṛutte parenta-U wuṛṛu pattannote pallal᷊agu-U. Ana waugu i Ya'u indi masaṛṛionto'a wuṛṛu mawawo naungnge, ne i yamiu sarun maapendamma asasunge atatahul᷊andimma.

³⁰Ana waugu manga parenta-U ma'al᷊uassa, wuṛṛu winabbawa apan Ta'u iapapasanna si'o, maṛṛanna.”