Read Talaud MATIUS 13 Bible Online

MATIUS 13 - Talaud bible

MATIUS 13

¹Su allo udde lai Mawu Yesus nanantangken bal᷊e udde see inaite su winggin rano wuṛṛu inuma'iante isudde.

²Manambo atonna taumata uaammulla mamal᷊iwutta Mawu Yesus, ana waugu udde i Tou inaite inuma'ianna su saalanna, arawe taumata nambo udde pasirarisikka su apanne.

³See Mawu Yesus nangaṛṛa'en al᷊awo'u al᷊aṛṛa'a si mangitou ringannu sasumandingnga. “Sangkatou mabbawailla inaite mangasi'u wualanna,” aroddiwe Mawu Yesus nanattakku watti'i Tou.

⁴“Su tempo i tou mangngasi'a, pia bualanna nanawo su lal᷊anna. See manu'a nirumanta wuṛṛu wualanna udde nianni tou na'oman sara nasue.

⁵Pia laiddu nanawo su tampa mawatu, apan letangnge addio'a. Manga bualanna udde lapiddu tinumuwo ana waugu mattul᷊ungnga letangnge.

⁶Arawe su orassu matannallo matanggakke, manga tatuwon wualanna udde mannattakke tinumolangnga, ana see naṛṛangu wuṛṛu nate ana waugu ṛamunne tawe nusippa mal᷊al᷊umma.

⁷Pia lai wualanna nanawo su tangngan ahuranganna ṛoaanna. Ahuranganna ṛoaanna udde tinumuwo wuṛṛu namul᷊issa tatuwon bualanna udde na'oman sara nate.

⁸Arawe pia lai wualanna apan nanawo su leta'a masuwukka, see nabbua; piaddu maṛṛasutta, piaddu anummu pul᷊o, wuṛṛu pia lai paatallum pul᷊one anambone.”

⁹Napawe suete nabbatti'u sasumandingnga udde, Mawu Yesus nabbisara, “Amungkangngu pia tal᷊inga paddaringikka!”

¹⁰Wua'udde mallal᷊aṛṛenggennu Mawu Yesus nirumanta naiwal᷊o si Tou, “Anio Iamangnga mappaattu sasumandingnga amungkangngu mabbisara ringannu taumata nambo udde?”

¹¹Mawu Yesus sinumimbakka, “Ana waugu i yamiu suete nionggol᷊annu al᷊amatta ipani'attu addapingnga su ola'u ereapa Ruata mamarenta, arawe i mangitou tawe nionggol᷊anna.

¹²Ana waugu taumata apan uatahuante, sarun onggol᷊anna lai lembon anamboanne, wuṛṛu i tou sarun lebbeanna. Arawe taumata apan tawe tatahuananne, tumba'u addio'a lai si tou sarun anuanna.

¹³Ana waugu udde i Ya'u mappaattu sasumandingnga amungkangngu maggahatton taumata nambo, ana waugu i mangitou ma'ellega, arawe ere taumata apan tawe maasilo; i mangitou maddaringikka arawe ere taumata wengella, wuṛṛu tawe maasunna.

¹⁴Ringannu udde nariaddite apa apan suete niwal᷊o Nabi Yesaya, ‘Ruata nabbisara: I mangitou sarun sidutu uararingikka arawe tawe maasunna; i mangitou sarun sidutu mannutukka arawe tawe maasingkatta apa apan nariaddi.

¹⁵Ana waugu ṛingiṛṛannu taumata indi nal᷊umute tal᷊inga mangitou nabbengelle wuṛṛu mata mangitou tawe maasilo. Indi mariaddi tadea'u mata mangitou tawe maasilo tal᷊inga mangitou tawe maaringikka, ṛingiṛṛanni mangitou tawe maasunna wuṛṛu arie mabelengnga ringang-Ku, see i Ya'u mapaapia mangitou.’ ”

¹⁶“Arawe auntunganna eteapa si yamiu,” unnu Mawu Yesus su mallal᷊aṛṛenggen-Ne, “ana waugu i yamiu atonna-tonna suete naasilo wuṛṛu naaringikka.

¹⁷Paanaunge, manambonabi wuṛṛu taumata apan tuttuṛṛutta Ruata maapulu ma'ellega apa apan a'ellehanni yamiu orassa indi, arawe i mangitou tawe maasilo. I mangitou ma'apulu maddaringikka apa apan raddaringiṛṛanni yamiu su orassa indi, arawe i mangitou tawe maaringikka.”

¹⁸“Daringiṛṛete apa atappasannu sasumandingngu sangkatou mangangasi'a udde.

¹⁹Wualanna apan nanawo su lal᷊anna isassumandingnga su taumata apan naaringikka watti'u Ruata mamarenta, arawe i tou tawe naasunna. Setanna udde nirumanta wuṛṛu nangaṛṛo wualanna apan suete niasi'a sulal᷊ummu naungngi mangitou.

²⁰Wualanna apan nanawo su leta'a mawatu, isassumandingnga su taumata apan maddaringikka watti'a udde wuṛṛu lapiddu nangngimanna ringannu naungnga mal᷊uassa.

²¹Arawe watti'a udde tawe naṛṛamutta sulal᷊ummu naungngi mangitou, na'oman sara tawe tinumuwo mal᷊annu. Aroddi i mangitou naasomba asasusa ara'e asasansara ana waugu watti'a udde, i mangitou lapiddu nassinaadda.

²²Wualanna apan nanawo su tangngan ahuranganna ṛoaanna, isassumandingnga su taumata apan uararingikka watti'a udde, arawe sussinggawangnga su ola'u wiakki mangitou wuṛṛu maapulu mabbiakka su al᷊al᷊uassa. Ana waugu udde watti'a wuassu Ruata nawul᷊i wuassu naungngi mangitou na'oman sara tawe buane.

²³Wuṛṛu wualanna apan nanawo su leta'a masuwukka, isassumandingnga su taumata apan maddaringikka watti'a udde wuṛṛu maasunna. I mangitou nabbua manambo, piaddu maṛṛasutta, piaddu anummu pul᷊o wuṛṛu pia lai wuane paatallum pul᷊o anambone.”

²⁴Mawu Yesus nabbatti'u lai sambau sasumandingnga su taumata nambo, wisara-Ne, “Amungkangngu Ruata mamarenta, tul᷊adane naal᷊ihidda ere sasumandingnga indi: Sangkatou mabbawailla nangasi'u wualanna apan mapia su wawail᷊anne.

²⁵Su ṛabbi sambau, su tempo anambon taumata mattiille, seettu mabbawailla udde nirumanta nangasi'u wualannu akke su wallattu gandumma udde, see napul᷊e.

²⁶Su tempo sinuananna udde tinumuwote wuṛṛu manga raene nanattakke sussabangnga, niasiloante lai manga akke udde.

²⁷See manga taumatan sewa mabbawailla udde nirumanta su mawun bailla udde wuṛṛu nabbisara, ‘Tuanga, talawe i Tuanga nangasi'u wualanna apan mapia su wailli Tuanga? Naola'a ereapa na'oman sara pia akke isudde?’

²⁸Mabbawailla udde sinumimbakka, ‘Udde inolaannu seetta.’ Ana see manga taumatan sewa udde naiwal᷊o apia, ‘Tuanga maapulu, i yami inai mallele akke udde?’

²⁹‘Arie,’ sasimbakke, ‘Ana waugu amungkangngu akke udde leleanna, gandumma lai mal᷊ele.

³⁰Wala'e akke udde tumuwo su sampunna ma'oman sara orassu pangangitingnga. Paṛṛado i ya'u mabbisara su manga taumata apan mangitingnga: Ammul᷊a'a rorone manga akke udde, wa'issa see tutungnga. Wua'udde ammul᷊a'a gandumma, see sahipunna sulal᷊ummu wal᷊ingkakka.’ ”

³¹Mawu Yesus nabbatti'e lai sambau sasumandingnga su taumata nambo, wisara-Ne, “Napawe Ruata mamarenta, olangnge ere sasumandingnga indi: Sambau wualannu sawi nianun sangkatou, see nisuanna su wailli tou.

³²Watun sawi eteudde wualanna apan addio'anne. Arawe amungkangngu tinumuwote, i tou maola'a ahewal᷊anne su wallattu al᷊awo'u sinuananna. I tou maola'a alu, ma'oman sara manga manu'u winalanganna massal᷊akka su manga rannane.”

³³Pia sambau sasumandingnga waine, apan niwatti'u Mawu Yesus su taumata nambo. “Napawe Ruata mamarenta, olangnge ere ragi apan nipaattu sangkatou wawine see niompella ringannu taponna appattu pul᷊o su liteṛṛene na'oman sara nal᷊uakka mapia!”

³⁴Sarangkanambone niaṛṛa'u Mawu Yesus su taumata nambo sidutu mappaattu sasumandingnga.

³⁵Ringannu aroddi nariaddite apa apan niwal᷊o nabi, “I ya'u mappaattu sasumandingnga amungkangngu maggahatto mangitou; I ya'u sarun mabbatti'u inolaanna apan uawuni ro'en arariadin runia indi.”

³⁶Wua'udde Mawu Yesus nanantangken taumata nambo udde. See sinumutta su wal᷊e. Mallal᷊aṛṛenggen-Ne nirumanta wuṛṛu nabbisara, “Tal᷊aa'o si yami sasumandingngu akke su wallattu gandumma udde.”

³⁷Mawu Yesus sinumimbakka, “Taumata apan mangngasi'u wualanna apan mapia udde, eteudde Ana'u Taumata.

³⁸Wailla eteudde runia indi. Wualanna apan mapia, eteudde manga taumata apan nasutta al᷊aṛṛana'u Ruata. Ahuranganna akke, eteudde manga taumata uasamba'a Setanna.

³⁹Seetta apan nangasi'u akke, eteudde Setanna. Tempo mangitingnga eteudde Allong Kiamatta, wuṛṛu manga taumata apan mangitingnga, eteudde manga mala'ekattu Ruata.

⁴⁰Su ereapa manga akke iammulla wuṛṛu tutungannu putungnga, aroddi lai mariaddi su allom panginsueanne.

⁴¹Ana'u Taumata sarun mandolokku manga mala'ekan-Ne mangammullu manga taumata su wallattu al᷊aṛṛanang-Nge apan naola'a taumata marosa, wuṛṛu anambon taumata waine lai apan ma'ola'a al᷊al᷊eo.

⁴²I mangitou sarangkanambone sarun iramme sulal᷊ummu sunggilla pia putungnge apan luṛṛenggamma, isudde i mangitou sarun lumuai wuṛṛu matataṛṛangnga.

⁴³Wuṛṛu manga taumata apan ma'ola'a apulun Ruata sarun lumansiangnga ere matannallo sulal᷊ummu Runia Wakkun Ruata, Iamangngi mangitou. Nariaddi, amungkangngu pia tal᷊inga paddaringikka!”

⁴⁴“Napawe Ruata mamarenta, olangnge ere sasumandingnga indi: Pia darotongnga uaal᷊i su leta'a see niabaannu sangkatou taumata, wuṛṛu niaddo apia su leta'a. Wua'udde ana waugu lulluassa, taumata udde inaite nabbal᷊u'u al᷊awo'u darotongnge, see nabelengke wuṛṛu namalli leta'a udde.”

⁴⁵“Napawe Ruata mamarenta olangnge ere sasumandingnga indi: Sangkatou mabbawal᷊u'a madea'a manga mutiara maarega.

⁴⁶Su tempo i tou naasomba sambau mutiara apan nangillembon maṛṛamaga, ringannu mal᷊ihakka i tou niumamatta wuṛṛu nabbal᷊u'u al᷊awo'u darotongnge, see namalli mutiara sambau udde.”

⁴⁷“Napawe Ruata mamarenta olangnge ere sasumandingngu soma apan ipannoma su rano, see naahau al᷊awo'u hating kinassa.

⁴⁸Napawe soma udde napenete, soma niapidde manga samakka su ammaranne. Wua'udde i mangitou inuma'ianna wuṛṛu naṛṛaete manga inassa udde: Inassa apianne niaddo su wensada wuṛṛu inassa aral᷊eoanne niramme.

⁴⁹Ete aroddi olangnge su Allong Kiamatta, manga mala'ekatta sarun inai maṛṛae manga taumata lal᷊eo wuassu manga taumata apan tuttuṛṛutta apulun Ruata.

⁵⁰Wua'udde manga taumata lal᷊eo udde iramme sulal᷊ummu sunggilla pia putungnge. Isuddewe i mangitou sarun lumuai wuṛṛu matataṛṛangnga.”

⁵¹“Apa i yamiu naasunna sarangkanambone udde?” aiwal᷊o Mawu Yesus. “Ma'asunna Iamangnga!” sasimbakki mangitou.

⁵²See Mawu Yesus nabbisara, “Ana waugu udde manga hurun agama apan suete naola'a lal᷊oṛṛon araratuannu Ruata, udde ere sangkatou tatahuannu wal᷊e apan mappasabangngu darotongnge wakku wuṛṛu tabbe, wuassu pangadoanne.”

⁵³Napawe Mawu Yesus suete nabbatti'u manga sasumandingnga udde, i Tou nanantangken tampa udde,

⁵⁴see nabelengke su wanua-Ne. Poi sindi i Tou mangngaṛṛa'a su wal᷊em pattataṛṛamawuanna, wuṛṛu manga taumata apan maddaringikka si Tou isudde, mangke naherangnga. I mangitou nabbisara, “Wuassu apa taumata indi naasomba apande ereudde? Wuṛṛu wuassu apa i Tou naasomba taṛṛino ma'ola'a al᷊aṛṛindu'a udde?

⁵⁵Wal᷊inewe i Tou ana'u waseng kalu? Wal᷊inewe i Maria udde inangnge; wuṛṛu manga tuṛṛangnge udde i Yakobus, i Yusuf, i Simon, wuṛṛu i Yudas?

⁵⁶Wuṛṛu wal᷊inewe manga tuṛṛangnge wawine uatana'a lai isindi? Wuassu apa i Tou naasomba sarangkanambone udde?”

⁵⁷Ne i mangitou nanol᷊a'e Mawu Yesus. See Mawu Yesus nabbisara si mangitou, “Sangkatou nabi aaddatanna su al᷊awo'u tampa, tumba'u tawe su ampungnge wuṛṛu su wal᷊ene sassane.”

⁵⁸Ne ana waugu udde Mawu Yesus tawe na'ola'a al᷊aṛṛindu'a manambo isudde ana waugu i mangitou tawe mangngimanna.