Read Talaud MATIUS 15 Bible Online

MATIUS 15 - Talaud bible

MATIUS 15

¹Sangkawageanganna taumatan Farisi wuṛṛu manga pira hurun agama wuassu Yerusalem nirumanta ringannu Mawu Yesus. I mangitou naiwal᷊o si Tou,

²“Anio manga mallal᷊aṛṛenggennu nilumawangnga addatta inanaramannu iupungngu al᷊amonang kite? Su tempo umanna, i mangitou tawe mangukkassa lima rorone ere su atoranna!”

³Mawu Yesus sinumimbakka, “Wuṛṛu anio i yamiu lai lullawangnga parentan Ruata, tumba'u ana waugu maapulu tuttuṛṛutta addatta inanaramannu iupungngu al᷊amona?

⁴Ana waugu Ruata nabbisara, ‘Pangaddatta iamangngu wuṛṛu inangngu,’ wuṛṛu ‘Isai-sai apan mabbisara hagurangnge sarun iṛṛuumanna ma'oman sara mate.’

⁵Arawe i yamiu mangngaṛṛa'a: amungkangngu taumata mabbisara hagurangnge, ‘Apa apan ṛinone ta'u ionggola su hagurangnga, sueten ta'u nionggola su Ruata,’

⁶ne taumata udde tate lai iapaaddatta hagurangnge. Aroddi ana waugu addatta inanaramannu iupungngu al᷊amonanu, i yamiu mangngaddio'a wisara Ruata.

⁷I yamiu taumata lilangkamal᷊e'a! Tawe sal᷊ane apa apan suete niwal᷊on Yesaya su ola'i yamiu eteudde,

⁸‘Arendi wisaran Ruata: Manga taumata udde tumba'u massubba Si Ya'u ringannu manga wisara, arawe naungngi mangitou marau wuassia-U.

⁹Tawe gunane i mangitou massubba si Ya'u, ana waugu atorannu taumata, ia'aṛṛa'i mangitou, ere lai atorang-Ku.’ ”

¹⁰Wua'udde Mawu Yesus namaggo manga taumata wuṛṛu nabbisarate si mangitou, “Paddaringikka tadea'u maasunna!

¹¹Apan sinumutta su moṛṛongnga tawe maarosa taumata udde; tumba'u apan sinumabangnga wuassu moṛṛongnge eteudde ma'alal᷊eo si tou.”

¹²See manga mallal᷊aṛṛenggennu Mawu Yesus nirumanta wuṛṛu naiwal᷊o si Tou, “Iamangnga masingkatta manungku manga taumatan Farisi nasa'u su tempo naaringikka Iamangnga nabbisara aroddi?”

¹³Mawu Yesus sinumimbakka, “Manga sinuananna apan tawe nisuannu Iamangku su surga sarun abbutanna.

¹⁴Ariete maddaringikka manga taumatan Farisi udde. I mangitou udde mangngehetta taumata wuta; wuṛṛu amungkangngu taumata wuta mangehetta taumata wuta, itarua sarun manawo sulal᷊ummu loṛṛangnga.”

¹⁵I Petrus nabbisara, “Tul᷊unga'a tal᷊aa'a sasumandingnga udde si yami Iamangnga!”

¹⁶Mawu Yesus sinumimbakka si mangitou, “I yamiu taambe lai naasunna?

¹⁷I yamiu wagga, manungku apan sussutta sulal᷊ummu moṛṛongnga masutta lai su tianna wuṛṛu wua'udde masabangnga apia?

¹⁸Arawe apan sinumabangnga wuassu moṛṛongnga, udde wuassu naungnga; wuṛṛu eteudde apan ma'alal᷊eo taumata.

¹⁹Ana waugu wuassu naungnga sumabangnga manga ṛingiṛṛanna lal᷊eo, apan maaola'a taumata mammate, sussandaga, ma'ola'a al᷊al᷊eo, manna'o, mammahia, wuṛṛu ma'umbilangnga.

²⁰Manga inolaanna udde ma'arosa taumata, wal᷊ine u'anna ringannu lima tawe ukkasanna.”

²¹Wua'udde Mawu Yesus nanantangken tampa udde wuṛṛu inaite su wageangngu leta'a maranin soa Tirus wuṛṛu Sidon.

²²Sangkatou wawinen Kanaan wuassu wageangngu leta'a udde, nirumanta ringannu Mawu Yesus, lapiddu u'ui, “Ana'i Daud, akkana'a i ya'u! Ana'u wawine, niasuttannu ghaṛṛaho lal᷊eo. Raddangnge masadatta atonna.”

²³Mawu Yesus tawe sinumimbakka wawine udde saran addio'a. See mallal᷊aṛṛenggennu Mawu Yesus nirumanta ringanni Tou wuṛṛu sussal᷊ande, “Iamangnga roloṛṛa'e wawine udde mangingkatta. I tou tumba'u maggio su liuddi ite!”

²⁴Mawu Yesus sinumimbakka, “I Ya'u nirolokka tumba'u su walahannu Israel, nangillembo si mangitou apan nial᷊iwune.”

²⁵Wawine udde nirumanta see inumal᷊intuda su saruannu Mawu Yesus wuṛṛu nabbisara, “Tul᷊unga'a i ya'u Mawu.”

²⁶Mawu Yesus sinumimbakka, “Tawe wotongnge manganu annu manga al᷊aṛṛana'a wuṛṛu ilombo su asu.”

²⁷“Atonna Mawu,” sasimbakku wawine udde, “arawe asu lai u'anna manga taṛṛoton anna wuassu medda mawune.”

²⁸See Mawu Yesus nabbisara si tou, “Inangnga, matohassa atonna pangangimannu! Ariadite apa apan ipa'apulunu!” Orassa udde lai ana'a wawine udde napia.

²⁹Mawu Yesus nanantangken tampa udde, see sinumallete su apannu Ranon Galilea. Wua'udde i Tou sinumaate su sambau wuidda see inuma'iante isudde.

³⁰Manambo taumata nirumanta ringanni Tou uaapiddu taumata peṛṛo, wuta, lome, mou, wuṛṛu manambo lai taumata maradda'a waine. I mangitou nangadon rumaradda'a udde su saruannu Mawu Yesus, ne i Tou napaapiate manga rumaradda'a udde.

³¹Taumata nambo isudde, naherangnga atonna, su tempo i mangitou naasilo taumata mou naawisara, taumata peṛṛo napia, taumata lome niumamatta, wuṛṛu taumata wuta naasilo. See i mangitou nadalote Ruatan walahannu Israel.

³²Wua'udde Mawu Yesus namaggo manga mallal᷊aṛṛenggen-Ne see nabbisara, “I Ya'u u'akkannu taumata nambo indi. Tallute allo al᷊annune i mangitou su sampunna ringang-Ku, wuṛṛu orassa indi i mangitou inasueanten anna. I Ya'u tawe mapaapul᷊e mangitou mal᷊unussa, aṛṛombanganne i mangitou mawantingnga su lal᷊anna.”

³³See manga mallal᷊aṛṛenggennu Mawu Yesus naiwal᷊o si Tou, “Suapa i ite wotongnge maasomba anna su wadda'a araune indi iapaanna su taumata anambone indi?”

³⁴“Sangkura roti si yamiu?” Mawu Yesus naiwal᷊o si mangitou. “Pitu,” sasimbakki mangitou, “wuṛṛu manga pira inassa maraddio'a.”

³⁵Ne Mawu Yesus nandolokku taumata nambo udde inuma'ianna su leta'a.

³⁶See i Tou nanganute roti pitum bau wuṛṛu inassa, wua'udde na'adiangkamanna su Ruata. Wua'udde i Tou nattahiate roti wuṛṛu inassa udde ringannu lima-Ne sassane, see nionggola su mallal᷊aṛṛenggen-Ne. Wuṛṛu i mangitou nattahiate su taumata manambo udde.

³⁷Anambon taumata udde inumanna na'oman sara nal᷊aidda wua'udde mallal᷊aṛṛenggen-Ne nangammullu lamben anna udde. Sarangkanambone pitung kul᷊a'a napene-pene.

³⁸Reengannu taumata esakka sassane apan inumanna su tempo udde appattu ṛiwu su atoune, taambe nareengnga wawine wuṛṛu manga al᷊aṛṛana'a.

³⁹Wua'udde Mawu Yesus nandolokke manga taumata udde niapapul᷊e. I Tou sassane sinuma'e sangngassa saalanna wuṛṛu inaite watukku wageangngu leta'u Magadan.