Read Talaud MATIUS 16 Bible Online

MATIUS 16 - Talaud bible

MATIUS 16

¹Pia manga pira taumatan Farisi wuṛṛu Saduki nirumanta ringannu Mawu Yesus, pandumanne mapaasal᷊an Tou. I mangitou maddorongnga si Tou ma'ola'a al᷊aṛṛindu'a ipattiala manungku atonna i Tou nirumanta wuassu Ruata.

²Mawu Yesus sinumimbakka, [“Amungkangngu matannallo mattatuppa, i yamiu mabbisara, ‘Hatim banua mapia, ana waugu langitta maṛṛamutta.’

³Wuṛṛu su ruaallo, i yamiu mabbisara, ‘Allo indi manguranna, ana waugu langitta maṛṛamutta wuṛṛu marandumma.’ Ei, yamiu wotongnge maṛṛangngon hatim banua ringannu ma'ellega ola'u langitta, arawe manga tandan tempo tawe iaṛṛangngong kamiu!”]

⁴“Tumaniten dal᷊eo manga taumata tempo indi. I yamiu maddorongnga i Ya'u ma'ola'a al᷊aṛṛindu'a. I yamiu tawe onggol᷊anna saran sambau al᷊aṛṛindu'a, tumba'u al᷊aṛṛindu'i Nabi Yunus.” Napawe suete nabbisara aroddi, Mawu Yesus nanantangke mangitou, see napul᷊ete.

⁵Su tempo manga mallal᷊aṛṛenggennu Mawu Yesus na'omate su samba'an dano, i mangitou wakkute naasingkatta manungku i mangitou naabul᷊i mangapiddu roti.

⁶Mawu Yesus nabbisara si mangitou, “Paariaga su ragin taumatan Farisi wuṛṛu Saduki.”

⁷Naaringikka wisara Mawu Yesus aroddi, mallal᷊aṛṛenggen-Ne uahahattote sangkatou ringannu sangkatou, “I Tou nabbisara aroddi ana waugu i ite tawe nangapiddu roti.”

⁸Mawu Yesus naasingkatta apa ipagahato mangitou udde. Nariaddi i Tou nabbisara, “Anio i yamiu uatatiakka su ola'u tawe roti? Pangangimanni yamiu lome!

⁹Taambe lai naasunna i yamiu? Apa i yamiu tate naanaungnga su ola'u limam bau roti apan ta'u tinahia su lima ṛiwu su atoune? Pirang kul᷊a'a lambene roti apan niammulli yamiu?

¹⁰Wuṛṛu ereapa lai ringannu pitum bau roti apan tinahia su appattu ṛiwu su atoune udde? Pirang kul᷊a'a roti lambene niammulli yamiu?

¹¹Anio na'oman sara i yamiu tawe maasunna manungku i ya'u wal᷊ine uahahattong kamiu su ola'u roti? Paariagai su ola'u ragin taumatan Farisi wuṛṛu Saduki!”

¹²Panginsueanne mallal᷊aṛṛenggennu Mawu Yesus naasunnate manungku Mawu Yesus mammarenta si mangitou paariaga wal᷊inewe wuassu ragi apan ipappaatta ipa'ola'a roti, arawe su saruannu manga al᷊aṛṛa'u taumatan Farisi wuṛṛu Saduki.

¹³Mawu Yesus inaite su wageangngu leta'a maranin soa Kaisarea Filipi. Isudde i Tou naiwal᷊o mallal᷊aṛṛenggen-Ne, “Unnu wisaran taumata, isai Ana'u Taumata udde?”

¹⁴Manga mallal᷊aṛṛenggen-Ne sinumimbakka, “Piaddu mabbisara i Yohanes Mananaṛṛani. Piaddu lai mabbisara i Elia. Waine lai mabbisara i Yeremia ara'e su wallattu sangkatou nabi.”

¹⁵“Arawe tumuṛṛuttu ṛingiṛṛanni yamiu sassane, isai Ya'u indi?”

¹⁶I Simon Petrus sinumimbakka, “Ete Iamangnga Ratum Punnu Sal᷊amatta, Ana'u Ruata apan biakka.”

¹⁷“Auntunganna si'o Simon ana'i Yona!” unnu Mawu Yesus, “Ana waugu wal᷊inewe taumata apan namasingkattu olangnge udde si'o, arawe Iamangku su surga.

¹⁸Ana waugu udde ṛinone i yamiu masingkatta, i'o udde i Petrus, watu apan matohassa. Wuṛṛu su wowon batu indi ya'u sarun mapararisikku Ghaṛṛeda-U apan tawe iahohakku taumata; salaiwe ete uasaruanna papate!

¹⁹I Ya'u sarun mangonggolla si yamiu a'unsin Runia Wakkun Ruata. Apa apan isassingada su wowon dunia, udde lai isassingada su surga. Wuṛṛu apa apan iapaaṛṛinonu su wowon dunia, udde lai mangke naṛṛino su surga.”

²⁰Wua'udde Mawu Yesus napaanaungnga su mallal᷊aṛṛenggen-Ne tadea'u i mangitou tawe mamasingkatta sisai-sai manungku ete i Tou udde Ratum Punnu Sal᷊amatta.

²¹Nanattakka wuassu orassa udde, Mawu Yesus nabbisara ringannu uahahati su mallal᷊aṛṛenggen-Ne, manungku i Tou sarun inai su Yerusalem wuṛṛu mamendamma anambon asasusa wuassu manga piaṛṛangnge, manga imam tembonanne, wuṛṛu manga hurun agama. I Tou sarun pateanna, arawe su allo atallune i Tou sarun mabangunna apia.

²²See i Petrus nangahete Mawu Yesus watukku sandiṛṛanne wuṛṛu namo'a si Tou, wisarane, “Antimanna Ruata mapaaraun olangnge udde, Mawu! Ariewe olangnge udde mariaddi su Mawu!”

²³Mawu Yesus nanaile see nabbisara si Petrus, “Roote passal᷊iu wua isindi, Mamamono'a! I'o mannal᷊are si Ya'u. Ṛingiddu udde ṛingiṛṛannu taumata; wal᷊ine ṛingiṛṛannu Ruata!”

²⁴Wua'udde Mawu Yesus nabbisara su mallal᷊aṛṛenggen-Ne, “Taumata apan mallal᷊aṛṛenggenna si Ya'u, ṛinone tawe mannaungnga manarane, mamasanna arussane, wuṛṛu sidutu uatantalongnga si Ya'u.

²⁵Ana waugu taumata apan maapulu mandalukka wiakke, sarun awul᷊iannu wiakke. Arawe taumata apan mamalam biakke ana waugu i Ya'u sarun maasomba wiakka.

²⁶Apa auntunganne su sangkatou taumata, amungkangngu ahewallu runia indi maola'a darotongnge arawe i tou awul᷊iannu wiakke? Wotongnge wiakka udde sal᷊iuannu sambau darotongnga?

²⁷Tate mal᷊annu lai Ana'u Taumata, su sampunna ringannu manga mala'ekanNe, sarun dumanta ringannu taṛṛinon IamangNge. Su tempo udde i Tou sarun mabbal᷊issa manga taumata tumuṛṛuttu inolaannu sangkatou-sangkatou.

²⁸Asingkatawe! Wuassu wallatti yamiu isindi piaddu tawe mate, tantal᷊anna taambe naasilo Ana'u Taumata rumanta mamarenta ere sangkatou Ratu.”