Read Talaud MATIUS 20 Bible Online

MATIUS 20 - Talaud bible

MATIUS 20

¹“Napawe Ruata mamarenta, olangnge ere sasumandingnga indi: Sangkatou tatahuannu waillu anggore sinumabangnga su tempo rua'allo madea'a taumata iapamanara su waillu anggorene.

²Napawe na'irete i tou mamaekka si mangitou allo massallo sambau roitta sal᷊a'a, i tou nandolokke mangitou mammanara su waillu anggorene.

³Puulla sio ruaallo, tatahuannu wailla udde sinumabangnga apia wuṛṛu naasilo manga pirang katou taumata uarisikka su pasakka tawe manarane.

⁴Ne nabbisarate i tou si mangitou, ‘Roote yamiu pammanara su waillu anggore'u. I Ya'u sarun mamaekka si yamiu ringannu lal᷊antakke su ṛinone.’

⁵Ne i mangitou inaite. Puulla mapul᷊o dua allatune wuṛṛu lai puulla tatallu wawallo, i tou sinumabangnga apia wuṛṛu na'ola'a inolaanna ereudde lai.

⁶Wuṛṛu iraṛṛangngo puulla lima wawallo, i tou sinumabangnga lai wuṛṛu naasilo ta'e pia lai taumata tawe manarane. See i tou naiwal᷊o si mangitou, ‘Anio i yamiu uarisikka allo massallo indi isindi ringannu tawe mammanara?’

⁷Manga taumata udde sinumimbakka, ‘Tawe taumata mapamanarang kami.’ ‘Amungkangngu aroddi,’ unnu tatahuannu wailla udde, ‘roote i yamiu pammanara su waillu anggore'u.’

⁸Wawallone, tatahuannu waillu anggore udde, nabbisara su mandorene, ‘Wagoite mammamanara udde wuṛṛu waeṛṛete lal᷊antakki mangitou sangkatou sangkatou, manattakka wuassu sinumutta panginsueanne ma'oman sara sinumutta paarorone.’

⁹See nirumantate mammamanara apan nanattakka nammanara wuassu puulla lima wawallo. I mangitou sangkatou-sangkatou nanarimmattu roitta sal᷊a'a sangkatou sambau.

¹⁰Wua'udde nirumantate lai mammamanara niapamanara ro'en ruaallo. I mangitou maṛṛingidda, i mangitou sarun manengkamma anamboanne. Arawe i mangitou tumba'u inonggol᷊annu lai sambau roitta sal᷊a'a.

¹¹Su tempo nanengkamma roitta udde, i mangitou sussungkuta su tatahuannu wailla udde:

¹²‘Mammamanara apan nirumanta panginsueanne udde tumba'u nammanara sangka orassa. Arawe i yami nammanara allo massallo uawati su paddissu matannallo, arawe mawu namaekka si mangitou ere lai si yami!’

¹³Tatahuannu waillu anggore udde sinumimbakka su sangkatou wuassu wallatti mangitou, ‘Hawe, i ya'u tawe sal᷊a'u si yamiu. Wal᷊inewe i'o na'ire manengkamma lal᷊antakke roitta sal᷊a'a sambau su ipammanaranu allo massallo?

¹⁴Ne anute roinnu wuṛṛu apul᷊ete. I Ya'u atonna maapulu mangagilla su taumata apan nammanara panginsueanne udde ringannu lal᷊antakke apan nassul᷊ungnga ringannu ta'u nionggola si yamiu.

¹⁵Anio i ya'u tawe wotongnge ma'ola'a apulu'u su rarotongku? Ara'e i'o mannaungnga lal᷊eo ana waugu i ya'u mandangngu?’ ”

¹⁶See Mawu Yesus nabbisara apia, “Aroddi lai su manga taumata apan sal᷊immurine sarun maola'a paarorone, wuṛṛu manga taumata apan paarorone sarun maola'a sal᷊immurine.”

¹⁷Su tempo Mawu Yesus mattuddan Yerusalem, su pattangngannu lal᷊anna i Tou namaggo mapul᷊o dua mallal᷊aṛṛenggen-Ne maammulla suaddio'a sassane. See i Tou nabbisarate si mangitou,

¹⁸“Paddaringikka! I ite orassa indi mattuddan Yerusalem. Poiaroddi Ana'u Taumata sarun itantilla su manga imam tembonanne wuṛṛu su manga hurun agama. See i Tou sarun iṛṛuumanna ma'oman sara mate,

¹⁹wua'udde itantilla su manga taumata wal᷊ine Yahudi. I mangitou sarun mangal᷊uandaga si Tou, mannansara si Tou, wuṛṛu mangarussan Tou. Arawe su allo atallune, i Tou sarun iapawangunna apia.”

²⁰Wua'udde awingngi Zebedeus wuṛṛu manga al᷊aṛṛanangnge nirumanta ringannu Mawu Yesus. Su saruannu Mawu Yesus i tou inumal᷊intuda ana piaddu doronganna.

²¹“Inangnga maapulu napa?” aiwal᷊o Mawu Yesus. Inangnga sinumimbakka, “I Ya'u maapulu ana'u darua indi uma'ianna su samba'a aiṛṛi wuṛṛu uanannu Iamangnga su tempo Iamangnga maola'a Ratu.”

²²“I yamiu wagga apa apan raddoronganni yamiu,” wisara Mawu Yesus si mangitou. “Wotongngewe i yamiu ma'inumma wuassu mangkon asasusa apan sarun Ta'u inumanna?” “Wotongnge,” sasimbakki mangitou.

²³Mawu Yesus nabbisara, “Atonna i yamiu sarun ma'inumma lai wuassu mangko-U udde. Arawe su ola'u isai apan sarun uma'ianna su aiṛṛi wuṛṛu su uanang-Ku udde tawe i Ya'u manantunna. Manga tampa udde, tampa manga taumata apan suete tinantunnu Iamangku.”

²⁴Su tempo sire mapul᷊o mallal᷊aṛṛenggen-Ne waine naaringikka hatto udde, i mangitou nasa'u sitarua sangkatuṛṛangnga udde.

²⁵Ana waugu udde Mawu Yesus namaggo si mangitou sarangkanambone, see nabbisara, “I yamiu masingkatta manungku manga tembonannu walahanna apan wagga Ruata mannansara tumanangnge. Wuṛṛu manga tembonanni mangitou mannasa'i mangitou.

²⁶Arawe i yamiu tawe wotongnge aroddi. Arawe taumata apan maapulu maola'a wahewa su wallatti yamiu, ṛinone maola'a mangangimbenu.

²⁷Wuṛṛu taumata apan maapulu maola'a paarorone su wallatti yamiu, ṛinone maola'a allangngu.

²⁸Ere lai Ana'u Taumata udde, i Tou nirumanta wal᷊ine tadea'u imbeanna, arawe mangimbe, wuṛṛu manantillu niawa-Ne ipamallossu taumata nambo.”

²⁹Su tempo i mangitou nanantangngu Yerikho, manambo taumata uatantalongnga Mawu Yesus.

³⁰Pia ruang katou wuta ua'ianna su winggin dal᷊anna. Su tempo itarua naaringikka manungku Mawu Yesus sumabbi, itarua inumui, “Ana'i Daud, akkanaawe i yami!”

³¹Taumata nambo isudde namul᷊o sitarua wuṛṛu nandolokki tarua mallanaba. Arawe itarua inumui lembon aikkanne lai, “Mawu, Ana'i Daud, akkanaawe i yami!”

³²See Mawu Yesus natta'alla wuṛṛu namaggo sitarua. “Apa ipaapulun raddua Ta'u olaanna siraddua?” aiwal᷊o Mawu Yesus.

³³Itarua sinumimbakka, “Mawu i yami maapulu maasilo!”

³⁴Mawu Yesus inumakkanni tarua, see namita matan tarua. Orassa udde lai itarua naasilote. See itarua tinumantalongke Mawu Yesus.