Read Talaud MATIUS 22 Bible Online

MATIUS 22 - Talaud bible

MATIUS 22

¹Mawu Yesus nabbisara apia su taumata nambo ringannu sasumandingnga,

²wisarane, “Amungkangngu Ruata mamarenta, olangnge ere sasumandingnga indi: Sangkatou ratu na'ola'a andeangngu awingngu anangnge esakka.

³Ratu udde nandolokku manga ralol᷊oṛṛanne inai iapasal᷊oho manga taumata apan suete niwal᷊oanna su andeangnga udde. Arawe manga taumata apan niwal᷊oanna udde madiri rumanta.

⁴Wua'udde ratu nandolokku lai manga ralol᷊oṛṛanne waine. Wisarane si mangitou: ‘Wal᷊oa'a su taumata apan suete niwal᷊oanna udde: Imbe su andeangnga nasaddiate. Sapi wuṛṛu manga ana'u sapi'u apan apianne suete nipototta. Sarangkanambone nasaddiate. Ringannu addatta rantate su andeangngu awingnga!’

⁵Arawe manga raho apan niwal᷊oanna udde tawe nirumanta. I mangitou nabatukku manga manara mangitou sambau-sambau — sangkatou inaite su waille, waine su tampan pammanaranne;

⁶wuṛṛu waine lai nanametta manga ralol᷊oṛṛannu ratu udde see namuulla wuṛṛu namate si mangitou.

⁷Su tempo ratu udde naaringikka olangnge udde, i tou nasa'u atonna. I tou nandolokku tantarane iapapate manga taṛṛa pate udde, wuṛṛu iapatutungnga soa mangitou.

⁸Wua'udde i tou namaggote mangangimbene, see nabbisara, ‘Andeangngu awingnga nasaddiate, arawe manga taumata apan suete niwal᷊oanna tawe nirumanta.

⁹Orassa indi roote watukku manga lal᷊anna mal᷊oangnga, wal᷊oite anambon taumata apan botongnge rumanta su andeangngu awingnga indi.’

¹⁰Ne manga ralol᷊oṛṛanne udde inaite. I mangitou inaite su manga lal᷊anna wahewa see nangammullen manga taumata apan nassomba mangitou poiaroddi apan mapia ara'e lal᷊eo. Ne napenete andeangngu awingnga udde ringannu al᷊awo'u raho.

¹¹Wua'udde ratu sinumuttate ma'ellega manga raho. I tou naasilo pia sangkatou su andeangnga udde apan tawe ual᷊uṛṛen laubbu andeangnga.

¹²See i tou naiwal᷊ote taumata udde, ‘Hawe, ereapa i'o wotongnge sumutta isindi tawe ual᷊uṛṛen laubbu andeangnga?’ Taumata udde tawe naawisara saran addio'a.

¹³See ratu udde nabbisara su manga ralol᷊oṛṛanne, ‘Ṛapussa leddane wuṛṛu liman taumata indi, wuṛṛu rammea'a i tou su liudde su tampa apan marandumma. Poiaroddi pia lal᷊uai wuṛṛu asasusa.’ ”

¹⁴See Mawu Yesus nanginsue sasumandingnga udde ereindi: “Manambo apan wagoanna, arawe mattul᷊ungnga atonna apan mapile.”

¹⁵Wua'udde manga taumatan Farisi inaite ma'ire su sampunna su ola'u ereapa i mangitou wotongnge mapaasal᷊a Mawu Yesus ringannu manga aiwal᷊o.

¹⁶Ne i mangitou nandolokku mallal᷊aṛṛenggenni mangitou ringannu Mawu Yesus su sambau ringannu manga pira taumata wuassu samba'an Herodes. Manga taumata udde nabbisara Mawu Yesus, “Iamangnga Huru, i yami masingkatta Iamangnga tawe mangawusu. Iamangnga mangngaṛṛa'a masema-semakka su ola'u apulun Ruata su taumata, tawe maddaringikka adapatti sai-sai. Ana waugu Iamangnga tawe mamile taumata.

¹⁷Ana waugu udde, wal᷊oa'e si yami Iamangnga: Tumuṛṛuttu atorannu agamang kite, wotongngewe mamaekka wose si Kaisar ara'e tawe?”

¹⁸Mawu Yesus masingkattu pandumanni mangitou apan dal᷊eo udde, aroddi i Tou nabbisara, “Ei, manga taumata lilangkamal᷊e'a! Anio i yamiu maapulu madea'a sal᷊a'u?

¹⁹Pantingira'a si Ya'u hatin doitta apan ipappaatti yamiu ipammaekka wose!” See i mangitou nangagille si Tou sambau roitta sal᷊a'a.

²⁰Mawu Yesus naiwal᷊o si mangitou, “Hambaranna wuṛṛu aranni sai indi?”

²¹“Kaisar,” sasimbakki mangitou. Ne Mawu Yesus nabbisara si mangitou, “Amungkangngu aroddi, onggol᷊a'e si Kaisar apa apan tatahuananni Kaisar wuṛṛu onggol᷊a'e su Ruata apa apan tatahuannu Ruata.”

²²Su tempo i mangitou naaringikka tal᷊aane aroddi, i mangitou mangke naherangnga. Ne i mangitou inaite nanantangngu Mawu Yesus.

²³Su allo udde lai, manga pira taumatan Saduki nirumanta ringannu Mawu Yesus. I mangitou udde wageangngu taumata apan pia adapanne manungku taumata nate tawe mabiakka apia.

²⁴“Iamangnga Huru,” unni mangitou, “i Musa mangngaṛṛa'a arendi: Amungkangngu sangkatou esakka mate wuṛṛu i tou tawe ana'a, tuṛṛangnge sarun ma'awingngu inawal᷊uanne udde, tadea'u maasomba papapulunna su taumata apan natete udde.

²⁵Suete nariaddi su sire pitu sangkatuṛṛangnga apan uatana'a isindi. Pahul᷊une naawingnga wua'udde nate tawe ana'a. Ne inawal᷊uanne tinantangke su tuṛṛangnge.

²⁶Tuṛṛangnge udde see nate lai tawe ana'a. Olangnge udde nariaddi lai su tuṛṛangnge atallune, see na'al᷊isansunna na'oman sara appitune.

²⁷Panginsueanne wawine udde lai nate.

²⁸Ne su tempo taumata nate iapawangunna apia, awingngi sai wawine udde? Ana waugu sire pitu udde suete naawingngi tou.”

²⁹Mawu Yesus sinumimbakka, “I yamiu nial᷊iwune, ana waugu i yamiu tawe maasunna Wuke Susi, wuṛṛu taṛṛinon Ruata.

³⁰Ana waugu napawe taumata mate iapawangunna apia, i mangitou tate maawingnga apia, arawe i mangitou sarun mabiakka ere mala'ekatta su surga.

³¹I yamiu taambe naawasa apa apan niapasingkattu Ruata su ola'u taumata nate iapawangunna apia? Ruata nabbisara,

³²‘Ete i Ya'u Ruatan Abraham, Ruatan Ishak wuṛṛu Ruatan Yakub.’ Ruata udde wal᷊inewe Ruatan taumata nate. I tou Ruatan taumata wiakka!”

³³Napawe taumata nambo udde naaringikka tal᷊a'a Mawu Yesus, i mangitou mangke naherangngu al᷊aṛṛang-Nge udde.

³⁴Su tempo manga taumatan Farisi naaringikka manungku Mawu Yesus suete na'ola'a manga taumatan Saduki tawe naawisara saran addio'a, i mangitou naammulla.

³⁵Sangkatou wuassu wallatti mangitou, eteudde sangkatou hurun agama, ma'annamma mapaasal᷊a Mawu Yesus ringannu sambau aiwal᷊o.

³⁶“Iamangnga Huru,” wisarane, “parenta suapane apan ahewal᷊anne sulal᷊ummu atorannu agama?”

³⁷Mawu Yesus sinumimbakka, “Pandangngu Mawu Ruatanu ringannu ahewallu naungngu wuṛṛu ahewallu apulunu wuṛṛu ringannu al᷊awo'u apandenu.

³⁸Eteudde parenta apan paarorone wuṛṛu ahewal᷊anne!

³⁹Parenta aruane nassul᷊ungngu paarorone eteudde: Pandangngu sansul᷊ungngu taumata ere i'o mandangngu ririnu sassane.

⁴⁰Anambon titan agama apan nionggoli Musa wuṛṛu al᷊aṛṛa'u manga nabi, rapappake ete su parenta darua udde.”

⁴¹Tantal᷊anna manga taumatan Farisi ta'e uaammulla isudde, Mawu Yesus naiwal᷊o si mangitou,

⁴²“Apa adapatti yamiu su ola'u Ratum Punnu Sal᷊amatta? Papapulunni sai i Tou?” “Papapulunni Daud,” sasimbakki mangitou.

⁴³“Amungkangngu aroddi,” aiwal᷊o Mawu Yesus, “anio Ghaṛṛahon Ruata nangaṛṛa'a si Daud managgon Ratum Punnu Sal᷊amatta ‘Mawu’? Ana waugu i Daud nabbisara,

⁴⁴‘Mawu nabbisara su Mawu'u: a'iante su samba'an uanang-Ku, ma'oman sara i Ya'u ma'ola'a manga seen-Nu massuṛṛubawa Si'o.’

⁴⁵Nariaddi amungkangngu i Daud, mannaggon Ratum Punnu Sal᷊amatta udde ‘Mawu’, ereapa wotongnge i tou papapulunni Daud?”

⁴⁶Tawe saran sangkatou wotongnge naasimbakka Mawu Yesus. Wuṛṛu nanattakka allo udde, tawedu lai waṛṛani maiwal᷊o manga apa si Tou.