Read Talaud MATIUS 23 Bible Online

MATIUS 23 - Talaud bible

MATIUS 23

¹See Mawu Yesus nabbisarate taumata nambo udde wuṛṛu su mallal᷊aṛṛenggen-Ne,

²“Manga hurun agama wuṛṛu manga taumatan Farisi naasomba taṛṛino manal᷊a'an tita Musa.

³Ana waugu udde tuṛṛutte wuṛṛu ola'e sarangkanambone apan iradolokki mangitou. Arawe imbaṛṛangnga ma'ola'a apa apan a'olaanni mangitou, ana waugu i mangitou tawe tumuṛṛutta apa apan iaaṛṛa'i mangitou.

⁴I mangitou mangngatokku manara masahada wuṛṛu mawakkatta, arawe i mangitou tawe mantul᷊ungngu taumata ma'ola'a manarane.

⁵Sarangkanambone apan niola'i mangitou tumba'u iapa'ellega su taumata. I mangitou malluṛṛen tal᷊in aal᷊iomanna apan mal᷊ala-l᷊alakka wuṛṛu mal᷊o'engnga uatungkele su jubah mangitou!

⁶I mangitou maapulun tampa apianne su manga andeangnga, wuṛṛu addera apianne su manga wal᷊em pattataṛṛamawuanna.

⁷I mangitou lulluassa amungkangngu aaddatannu taumata su manga pasakka wuṛṛu wabbagoanna ‘Iamangnga Huru’.

⁸Arawe i yamiu, ariewe maapulu wagoanna ‘Iamangnga Huru’, ana waugu Hurunu tumba'u sambau wuṛṛu i yamiu sarangkanambone sangkatuṛṛangnganna.

⁹Wuṛṛu arie lai yamiu mamaggo saran sangkatou su runia indi ‘Iamangnga’, ana waugu Iamangngu tumba'u sambau, eteudde Iamangnga apan su surga.

¹⁰Wuṛṛu arie lai yamiu maapulu wagoanna ‘Piaṛṛangnge’, ana waugu piaṛṛa'i yamiu tumba'u sangkatou, eteudde Ratum Punnu Sal᷊amatta apan suete pina'ire Ruata.

¹¹Taumata apan ahewal᷊anne su wallatti yamiu ṛinone maola'a mangangimbeng kamiu.

¹²Taumata apan mannanggakku watanganne sarun iapaawawo, wuṛṛu taumata apan sussallungngu watanganne sarun itanggakka.”

¹³“Nasilakate i yamiu manga hurun agama wuṛṛu manga taumatan Farisi! Yamiu taṛṛa lilangkamal᷊e'a. I yamiu mannal᷊awa'a taumata ma'apulu maola'a lal᷊oṛṛon araratuannu Ruata. I yamiu sassane madiri maola'a lal᷊oṛṛon araratuannu Ruata, wuṛṛu taumata waine apan maapulu, sassal᷊awaanni yamiu. [

¹⁴Nasilakate i yamiu manga hurun agama wuṛṛu manga taumatan Farisi: I yamiu taṛṛa lilangkamal᷊e'a. I yamiu mangngawusu manga wawine wal᷊u wuṛṛu mangngaṛṛo wal᷊ene wuṛṛu tadea'u maawunin al᷊al᷊eo udde, i yamiu u'al᷊iomanna mal᷊o'e-l᷊o'engnga. Ana waugu udde ṛuumanni yamiu sal᷊immurine awakkatanne!]

¹⁵Nasilakate i yamiu manga hurun agama wuṛṛu manga taumatan Farisi! I yamiu taṛṛa lilangkamal᷊e'a! I yamiu inai massenggotta marau-rau nilumewessa tahal᷊oangnga, wuṛṛu mammal᷊iwutta ammaranne, tumba'u madea'a sangkatou taumata sumutta su agamanu. Wuṛṛu napawe taumata udde uasuttate su agamanu, i yamiu ma'ola'a si tou taumata naraka, apan al᷊al᷊eone paarua wuassu al᷊al᷊eong kamiu sassane!

¹⁶Nasilakate i yamiu manga piaṛṛangnge apan buta! I yamiu mangngaṛṛa'a ereindi, ‘Amungkangngu taumata massalu ringannu arannu Wal᷊e Mawu, taumata udde tawe aiitannu sasalune; arawe amungkangngu i tou nassalu ringannu arannu wul᷊awanna sulal᷊ummu Wal᷊e Mawu, i tou aiitannu sasalune udde.’

¹⁷I yamiu manga taumata woddo apan buta! Suapa ahunanne: Wul᷊awanna, ara'e Wal᷊e Mawu apan na'ola'a wul᷊awanna udde na'ukkassa?

¹⁸I yamiu mangangaṛṛa'u indi lai, ‘Amungkangngu sangkatou nassalu ringannu arannu tampan sasamba, taumata udde tawe aiitannu sasalune; arawe amungkangngu i tou nassalu ringannu arannu sasamba su wowon tampane udde, i tou aiitannu sasalune udde.’

¹⁹Tumanitem buta i yamiu! Suapa ahunanne? Sasamba ara'e tampan sasamba apan na'ola'a sasamba udde na'ukkassa?

²⁰Ana waugu udde, amungkangngu sangkatou massalu ringannu arannu tampan sasamba, udde atappasanne i tou nassalu ringannu arannu tampan sasamba, wuṛṛu ringannu arannu al᷊awo'u sasamba apan uarandangnga isudde.

²¹Wuṛṛu amungkangngu sangkatou massalu ringannu arannu Wal᷊e Mawu, udde atappasanne i tou nassalu ringannu arannu Wal᷊e Mawu, wuṛṛu ringannu arannu Ruata apan uatana'a isudde.

²²Wuṛṛu amungkangngu sangkatou massalu ringannu arannu surga, udde atappasanne i tou nassalu ringannu arannu adderan araratuannu Mawu, wuṛṛu ringannu arannu Ruata apan ua'ianna su addera udde.

²³Nasilakate i yamiu manga hurun agama wuṛṛu manga taumatan Farisi! I yamiu lilangkamal᷊e'a. Rampa-rampa ere selasi, adassa matemangnga, wuṛṛu jintan, nionggoli yamiu sambau wuassu mapul᷊o wageangnge su Ruata. Arawe apa apan nangillembo wua isudde sulal᷊ummu al᷊aṛṛa'u agama ere tul᷊adane: Atatul᷊idda, darangngu, wuṛṛu tatuṛṛutta tawe olaanni yamiu. Sumbal᷊i eteudde apan ṛinone olaanni yamiu, ringannu tawe manantangngu al᷊aṛṛa'a waine lai.

²⁴I yamiu manga piaṛṛangnge apan buta! Lango sulal᷊ummu ua'enu, ia'atapissi yamiu, wutte'e unta aallupanni yamiu!

²⁵Nasilakate i yamiu manga hurun agama wuṛṛu manga taumatan Farisi! I yamiu taṛṛa lilangkamal᷊e'a! Manga mangko wuṛṛu manga lama'i yamiu niukkassa waresi-waresi su liudde, arawe sulal᷊umme nallal᷊uhuranna ringannu al᷊awo'u apa apan niasombanganni yamiu ringannu araṛṛagissa wuṛṛu awawal᷊iu.

²⁶Farisi wuta! Ukkassa asuene pa'awaresi lal᷊ummu manga mangko wuṛṛu manga lamangngu, tadea'u liudde mawaresi lai!

²⁷Nasilakate i yamiu manga hurun agama wuṛṛu manga taumatan Farisi! I yamiu taṛṛa lilangkamal᷊e'a! I yamiu naal᷊ihidda ere manga holangnga apan niwuṛṛannu mawira; su liudde ellehanna maṛṛansangnga, arawe sulal᷊umme napenen duṛṛi wuṛṛu sarangkanambone apan mawuku'a.

²⁸Aroddi lai yamiu. Wuassu liudde i yamiu ellehanna taumata mapia; arawe sulal᷊umme, i yamiu napenen awusu wuṛṛu al᷊awo'u lal᷊awangnga.”

²⁹“Nasilakate i yamiu manga hurun agama wuṛṛu manga taumatan Farisi! I yamiu taṛṛa lilangkamal᷊e'a! I yamiu napararisikku holangnga apan maṛṛansangnga su manga nabi, wuṛṛu nallogakka manga palem pananaunganna su manga taumata apan mabbiakka matul᷊idda.

³⁰Wuṛṛu i yamiu mabbisara, ‘Unnu wisara i yami mabiakka su tempon iupungngu al᷊amonang kami dorone, i yami tawe tinumantalongnga ringanni mangitou namate manga nabi.’

³¹Nariaddi yamiu mangnga'u sassane manungku ete i yamiu papapulunnu manga taumata apan namate manga nabi!

³²Amungkangngu aroddi sidutua'e wuṛṛu insuete manga rosa apan suete tinattakku iupungngu al᷊amonang kamiu udde!

³³I yamiu lal᷊eo wuṛṛu papapulunnu taumata lal᷊eo! Ereapa i yamiu wotongnge manal᷊amatta wadangngi yamiu wuassu ṛuumanna su naraka?

³⁴Paddaringikka paapia-pia: i Ya'u sarun mandolokku manga nabi ringanni yamiu, taumata pande, wuṛṛu manga huru; sangkaadoanna wuassi mangitou sarun pateanni yamiu, wuṛṛu sangkaadoanna waine lai sarun iarussang kamiu. Piaddu sansaranni yamiu lai sulal᷊ummu manga wal᷊em pattataṛṛamawuanna, wuṛṛu i yamiu a'enggenanna wuassu soa sambau watukku soa apan baine.

³⁵Ana waugu udde, i yamiu sarun iṛṛuumanna ana waugu pamamate apan niola'a su manga taumata apan tawe sal᷊ane — nanatakka wuassu pamamate si Habel apan tawe sal᷊ane, na'oman sara pamamate si Zakharia ana'i Berekia apan nipateng kamiu su wallattu Wal᷊e Mawu wuṛṛu tampan sasamba.

³⁶Pangimante: sarangkanambone udde sarun maola'a winabbawa manga taumata su tempo indi!”

³⁷“Yerusalem, Yerusalem! Manga nabi suete nipatenu. Manga ralol᷊oṛṛannu Ruata suete tinuntungannu watu na'oman sara nate. Paapirate i Ya'u maapulu mangammullu tumana'u soa naal᷊ihidda ere inangngu manu'a mangooppa al᷊aṛṛanangnge sulal᷊ummu papaidde, arawe i yamiu madiri!

³⁸Ana waugu udde Ruata tate lai maṛṛundinganna si yamiu.

³⁹Paasingkate: Manattakka wuassu orassa indi, i'o tate lai maasilo si Ya'u ma'oman sara i'o mabbisara, ‘Nial᷊amatanna i Tou apan nirumanta ringannu arannu Mawu.’ ”