Read Talaud MATIUS 25 Bible Online

MATIUS 25 - Talaud bible

MATIUS 25

¹“Napawe Ana'u Taumata rumanta ere Mawu, olangnge ere sulal᷊ummu sasumandingnga indi: Sire mapul᷊o maṛṛuala mamantuga ma'aawingnga, sangkatou-sangkatou nanganu sol᷊o, see inai manal᷊oho ma'aawingnga esakka.

²Sire lima su wallatti mangitou boddo, wuṛṛu sire lima waine pande.

³Sire lima maṛṛuala apan boddo uaapiddu sol᷊o, arawe tawe nangapiddu wal᷊unna lana.

⁴Sire lima maṛṛuala pande uaapiddu sol᷊o ringannu wal᷊unne lana.

⁵Ma'aawingnga esakka udde mal᷊annu nirumanta, nariaddi manga maṛṛuala udde niamatiilanna wuṛṛu natiille.

⁶Su alloarane, wakku udde inaringikka aintul᷊i, ‘Ma'aawingnga esakka nirumantate! Wette manal᷊oho si Tou!’

⁷Sire mapul᷊o maṛṛuala udde napu'ote wuṛṛu nande'ompe sol᷊o mangitou.

⁸Manga maṛṛuala woddo udde nabbisara su maṛṛuala pande, ‘Onggol᷊ewe lanang kamiu addio'a si yami, ana waugu sol᷊ong kami mappadumpe.’

⁹‘Tawe wotongnge!’ sinimbakku manga maṛṛuala pande udde, ‘ana waugu takka lana tawe mattiudda si ite nambo. Roote pamalli su mabbawal᷊u'a.’

¹⁰Ne manga maṛṛuala apan boddo udde inaite namalli lana. Tantal᷊anna inaiaroddi, nirumantate ma'a'awingnga esakka. Sire lima maṛṛuala apan nasaddiate udde sinumuttate su sampunna ringannu ma'a'awingnga esakka su tampan andeangnga, wuṛṛu ngara niṛṛuudde!

¹¹Wua'udde manga maṛṛuala apan boddo nabelengke. I mangitou uu'ite, ‘Mawu, Mawu, wu'awe ngara si yami.’

¹²Arawe maa'awingnga esakka udde sinumimbakka, ‘I Ya'u waggang kamiu!’ ”

¹³See Mawu Yesus nanginsuete sasumandingnga udde arendi, “Ana waugu udde paariaga, ana waugu i yamiu wagga allone ara'e oranne.”

¹⁴“Napawe Ana'u Taumata nirumanta ere sangkatou Mawu olangnge ere lai sulal᷊ummu sasumandingnga indi. Sangkatou esakka maapulu inai massenggotta su tampa apan marau. I tou namaggo manga mangangimbene niapariaga darotongnge.

¹⁵Su sangkatou-sangkatou mangangimbe udde i tou nangagilla tumuṛṛuttu auatannu sangkatou-sangkatou. Su sangkatou i tou nangagillu lima ṛiwu roitta wul᷊awanna. Wuṛṛu su waine lai i tou nangagillu rua ṛiwu roitta wul᷊awanna. Wuṛṛu su sangkatou lai i tou nangagillu saṛṛiwu roitta wul᷊awanna. See i tou nassenggote.

¹⁶Mangangimbe apan nanengkamma lima ṛiwu roitta wul᷊awanna udde nal᷊iha-l᷊ihakka inai nabbal᷊u'a, see naasomba auntunganne lima ṛiwu roitta wul᷊awanna.

¹⁷Aroddi lai mangangimbe apan nanengkamma rua ṛiwu roitta wul᷊awanna udde, naasomba auntunganne lai rua ṛiwu.

¹⁸Arawe mangangimbe apan nanengkamma saṛṛiwu roitta wul᷊awanna udde, inaite naal᷊i loṛṛangnga, see namuniten doittu mawune isudde.

¹⁹Mal᷊annu atonna wua'udde, mawu manga mangangimbe udde napul᷊ete, wuṛṛu nanattakke na'ola'a reenganna ringanni mangitou.

²⁰Mangangimbe apan nanengkamma lima ṛiwu roitta wul᷊awanna udde nirumanta wuṛṛu nanantillu mapul᷊o ṛiwu. ‘Mawu,’ wisarane, ‘Mawu nanantillu lima ṛiwu roitta wul᷊awanna si ya'u. Pa'ellege, i ya'u naasomba auntunganna lai lima ṛiwu.’

²¹‘Mapia,’ unnu mawu udde, ‘ete i'o mangangimbe apan mapia wuṛṛu matuṛṛutta. Ana waugu i'o apangimananna ringannu apan addio'a, i ya'u sarun manantillu anamboanne si'o. Suttate wuṛṛu lalluasse ringangku!’

²²See mangangimbe aruane apan nanengkamma rua ṛiwu roitta wul᷊awanna udde nirumanta wuṛṛu nabbisara, ‘Mawu, Mawu suete nanantillu rua ṛiwu roitta wul᷊awanna si ya'u. Pa'ellege, i ya'u naasomba auntunganne rua ṛiwu lai.’

²³‘Mapia,’ unnu mawu udde, ‘i'o mangangimbe apan mapia wuṛṛu matuṛṛutta. Ana waugu i'o apangimananna ringannu apan addio'a, i ya'u sarun mangagillu anamboanne si'o. Suttate wuṛṛu lalluasse ringangku!’

²⁴Wua'udde mangangimbe apan nanengkamma saṛṛiwu roitta wul᷊awanna udde nirumanta wuṛṛu nabbisara, ‘Mawu, i ya'u masingkatta i'o mawu sangkatou apan maṛṛagissa. Mawu mangngitingnga wuane su tampa mawu tawe nassuanna, wuṛṛu mammurutta wuane su tampa mawu tawe nangasi'u wualanna.

²⁵I Ya'u matta'utta aroddi ya'u inai namunin doittu mawu sulal᷊ummu leta'a. Indete roinnu Mawu.’

²⁶‘I'o mangangimbe apan lal᷊eo wuṛṛu malassa!’ unnu mawune udde. ‘Wal᷊inewe i'o masingkatte manungku i ya'u mangngitingnga su tampa i ya'u tawe massuanna, wuṛṛu mammurutta su tampa i ya'u tawe mangasi'u wualanna?

²⁷Amungkangngu aroddi i'o ṛirone mangaddon roi'u su banganga, tadea'u su tempo i ya'u mapul᷊e, i ya'u manengkamma roi'u apia udde ringannu wungane.

²⁸Ana waugu udde, anute roitta wuassi tou wuṛṛu onggol᷊a'e su taumata apan uatahuanna mapul᷊o roitta wul᷊awanna udde.

²⁹Ana waugu taumata apan piate, sarun onggol᷊annu lai lembon anamboanne wuṛṛu i tou sarun pia lebbene. Arawe taumata apan tawe darotongnge, addio'a apan ta'e si tou, sarun ul᷊eanna lai.

³⁰Wuṛṛu mangangimbe apan tawe gunane udde, rammea'e sulal᷊ummu ararandumma su liudde. Poiaroddi i tou sarun lumuai wuṛṛu matataṛṛangnga asasusa!’ ”

³¹“Napawe Ana'u Taumata rumanta ere sangkatou ratu tatantalongannu anambo mala'ekan-Ne, i Tou sarun uma'ianna su adderan araratuanna apan mawantuga.

³²Al᷊awo'u walahanna sarun iammulla su saruan-Ne. See i Tou sarun maṛṛae mangitou maola'a ruang kadoananna ere mallal᷊u'adda domba maṛṛaen dombane wuassu ambingnga.

³³Manga taumata apan tuttuṛṛutta apulun Duata sarun iammulla su samba'an uanan-Ne, wuṛṛu waine su samba'an aiṛṛi-Ne.

³⁴Wua'udde ratu sarun mabbisara su manga taumata su samba'an uanan-Ne, ‘Wette i yamiu apan nial᷊amatannu Iamangku. Suttate sulal᷊ummu araratuanna apan suete pinassaddia ro'en panattaṛṛannu runia.

³⁵Ana waugu su tempo i Ya'u mal᷊unussa, yamiu nangagillu anna si Ya'u, wuṛṛu su tempo i Ya'u marou, i yamiu nangagillu ua'e si Ya'u. I Ya'u sangkatou raho, i yamiu nanarimmatta si Ya'u su wal᷊enu.

³⁶I Ya'u tawe laubba, i yamiu nangagillu laubba si Ya'u. I Ya'u maradda'a i yamiu nangundamma si Ya'u, i Ya'u su ṛuumanna, i yamiu nantul᷊ung-Ku.’

³⁷See manga taumata udde sarun mabbisara, ‘Mawu, angngerate i yami naasilo Mawu mal᷊unussa see i yami napaannu Mawu, ara'e marou see i yami napa'inummu Mawu?

³⁸Angngerate i yami naasilo Mawu ere sangkatou taumata raho, see i yami nanal᷊oho Mawu su wal᷊eng kami? Su tempo suapa Mawu tawe laubba see i yami nangagillu laubba?

³⁹Su tempo suapa i yami naasilo Mawu maradda'a ara'e su ṛuumanna, see i yami nantul᷊ungngu Mawu?’

⁴⁰Ratu udde sarun sumimbakka, ‘Asingkate: su tempo i yamiu ma'ola'a inolaanna udde, salaiwe su wallattu sangkatou taumata wuassu manga tuṛṛangku apan addio'anne, ere lai yamiu na'ola'a si Ya'u!’

⁴¹See Ratu udde sarun mabbisara su manga taumata su samba'an aiṛṛiNe, ‘Roote wua isindi, manga taumata lal᷊eo! Suttate sulal᷊ummu putungnga apan tawe iapadumma, apan suete nissaddia su Setanna wuṛṛu su manga ralol᷊oṛṛanne!

⁴²Ana waugu su tempo i Ya'u mal᷊unussa, i yamiu tawe nangagillu anna si Ya'u; su tempo i Ya'u marou, i yamiu tawe nangagillu ua'e si Ya'u.

⁴³I Ya'u taumata raho, i yamiu tawe nanarimmatta si Ya'u sulal᷊ummu wal᷊enu. I Ya'u tawe laubba i yamiu tawe nangagillu laubba si Ya'u. I Ya'u maradda'a wuṛṛu su ṛuumanna, i yamiu tawe nantul᷊ungku.’

⁴⁴See i mangitou sarun mabbisara si Tou, ‘Mawu, su tempo suapa i yami naasilo Mawu mal᷊unussa, ara'e narou, ara'e ere sangkatou raho, ara'e tawe laubba, ara'e maradda'a ara'e su ṛuumanna, wuṛṛu i yami tawe nantul᷊ungngu Mawu?’

⁴⁵Ratu udde sarun sumimbakka, ‘Asingkate: su tempo i yamiu madiri mantul᷊ungngu sangkatou taumata asusane ereindi, ere lai yamiu madiri mantul᷊ungku.’

⁴⁶Ne manga taumata udde sarun iṛṛuumanna ringannu ṛuumanna ma'oman sara mal᷊annu-l᷊annu, arawe manga taumata apan tuttuṛṛutta apulun Ruata sarun maapendamma pabbawiakka tutune saran mal᷊annu-l᷊annu.”