Read Talaud MATIUS 26 Bible Online

MATIUS 26 - Talaud bible

MATIUS 26

¹Su tempo Mawu Yesus nasue mangngaṛṛa'u manga al᷊aṛṛa'a udde, i Tou nabbisara su manga mallal᷊aṛṛenggen-Ne,

²“I yamiu masingkatta tillorege Allo Wahewam Paskah, wuṛṛu Ana'u Taumata sarun itantilla iapaarussa!”

³Su tempo udde manga imam tembonanne wuṛṛu piaṛṛa'u Yahudi maammulla su wal᷊en araratuannu Imam Bahewa Kayafas.

⁴I mangitou ma'ire manametta Mawu Yesus ringannu mal᷊anna-l᷊annaba, wuṛṛu mamate si Tou.

⁵“Arawe,” unni mangitou, “imbaṛṛangnga olangnge udde olaanna su tempo allo wahewa, ana waugu takka maola'a hio su wallattu tumana'u soa.”

⁶Su tempo Mawu Yesus su Betania, su wal᷊en Simon apan dorone uatataṛṛangnga radda'a paro,

⁷sangkatou wawine nirumanta ringannu Mawu Yesus. I tou uaapiddu wotolla sambau, lal᷊oṛṛone lana mawangngi apan maarega. Su tempo Mawu Yesus tantal᷊anna uaianna u'anna, wawine udde namobokku lana mawangngi udde su pua Mawu Yesus.

⁸Manga mallal᷊aṛṛenggennu Mawu Yesus naasilo olangnge udde mangke namul᷊o, “Apa hunane sarangkanambone indi mangke iradamme tawe mangal᷊ene?” unni mangitou.

⁹“Lana mawangngi udde wotongnge iwal᷊u'a ringannu aregane apan masaggada, wuṛṛu roinne ionggolla su taumata asiangnga!”

¹⁰Mawu Yesus naasingkatta ṛingiṛṛanni mangitou, see i Tou nabbisara, “Anio i yamiu mapaasusan bawine indi? I tou na'ola'a inolaanna apan mapia wuṛṛu mawantuga si Ya'u.

¹¹Taumata asiangnga sidutu isudde su wallatti yamiu, arawe i Ya'u tawe mal᷊annu su sampunna ringanni yamiu.

¹²Ringannu namobokku lana mawangngi udde su wadangku, i tou na'ola'a saddia'u su pallal᷊abingku.

¹³Pangimante! su ahewallu runia, suapan tampa Watti'u Al᷊al᷊uassa wuassu Ruata iapasingkatta, inolaannu bawine indi sarun iwatti'a lai maola'a pananaunganna si tou.”

¹⁴See sangkatou wuassu wallattu sire mapul᷊o dua mallal᷊aṛṛenggennu Mawu Yesus, aranne i Yudas Iskariot, inaite ringannu manga imam tembonanne.

¹⁵I tou nabbisara si mangitou, “Apa sarun ionggolli yamiu si ya'u, amungkangngu i ya'u manantillu Mawu Yesus si yamiu?” Ne i mangitou nandeengngu tallum pul᷊o roitta sal᷊a'a, see nionggole roitta udde si tou.

¹⁶Nanattakka wuassu tempo udde i Yudas maddea'a tempone apan mapia ipandal᷊eo Mawu Yesus.

¹⁷Su allo paarorone su Allo Wahewan Roti Tawe Ragine, manga mallal᷊aṛṛenggennu Mawu Yesus nirumanta ringanni Tou. I mangitou naiwal᷊o, “Suapa tampane ipaapulun Iamangnga i yami manaddia annu Paskah Iamangnga?”

¹⁸Mawu Yesus sinumimbakka, “Roote ringannu sangkatou su soa wuṛṛu wal᷊oa'a si tou, ‘Tanatan Iamangnga Huru, ina'omante tempone si Ya'u, i Ya'u maapulu maddameam Paskah su wal᷊enu, su sampunna ringannu mallal᷊aṛṛenggeng-Ku.’ ”

¹⁹Manga mallal᷊aṛṛenggennu Mawu Yesus tinumuṛṛutte apa apan nirolokku Mawu Yesus si mangitou. I mangitou inaite nanaddia annu Paskah.

²⁰Napawe ṛabbite, Mawu Yesus wuṛṛu sire mapul᷊o dua mallal᷊aṛṛenggen-Ne inuma'iante wuṛṛu inumanna.

²¹Tantal᷊anna i mangitou u'anna, Mawu Yesus nabbisara, “Paddaringikka: Sangkatou wuassu wallatti yamiu sarun mandal᷊eo si Ya'u.”

²²Naaringikka aroddi, mallal᷊aṛṛenggennu Mawu Yesus mangke nasusa. See i mangitou, sangkatou ringannu sangkatou nanattakke naiwal᷊o Mawu Yesus, “Wal᷊inewe i ya'u apan su pandumanni Iamangnga udde?”

²³Mawu Yesus sinumimbakka, “Taumata apan nangammon roti sulal᷊ummu mangko su sampunna ringangku, ete i tou sarun mandal᷊eo si Ya'u.

²⁴Atonna Ana'u Taumata sarun mate ere uawoṛṛetta sulal᷊ummu Wuke Susi. Arawe nasilakate taumata apan mandal᷊eo Ana'u Taumata! Mappianne taumata udde tawe niasungkangnga!”

²⁵See i Yudas taumata lal᷊eo udde nabbisara, “Atonna wal᷊inewe i ya'u apan supandumanni Iamangnga Huru?” Mawu Yesus sinumimbakka, “Aroddi ere su wisaranu!”

²⁶Su tempo i mangitou u'anna, Mawu Yesus nanganute roti, see inumal᷊iomanna na'adiangkamanna. Wua'udde i Tou nattahiate roti ringannu lima-Ne nionggole su mallal᷊aṛṛenggen-Ne ringannu wisara-Ne, “Sengkampe, wuṛṛu ante; indi wadang-Ku.”

²⁷Wua'udde i Tou nanganute mangkon anggore sambau, see na'adiangkamante su Ruata. Wua'udde i Tou nangagillu mangko udde su mallal᷊aṛṛenggen-Ne ringannu wisara-Ne, “Pa'inumpe, i yamiu sarangkanambone.

²⁸Ana waugu indi ṛaṛṛa-U apan mannohassa pa'airen Ruata ṛaṛṛa apan niapaturo ana waugu taumata nambo wuṛṛu ipangampungnga rosa mangitou.

²⁹Pangimante: i Ya'u tate ma'inumma anggore indi apia ma'oman sara tempone i Ya'u ma'inumma anggore wakku su sampunna ringanni yamiu su Araratuannu Iamangku.”

³⁰Wua'udde i mangitou nangantarin sambau antari daralo. Wuṛṛu wua'udde i mangitou inaite watukku Wuiddu Zaitun.

³¹See Mawu Yesus nabbisarate su mallal᷊aṛṛenggen-Ne, “Ṛabbi indi lai yamiu sarangkanambone tumal᷊angnga manantang-Ku; ana waugu sulal᷊ummu Wuke Susi uawoṛṛetta, Ruata nabbisara, ‘I Ya'u sarun mamate mallal᷊u'adda udde, wuṛṛu ammul᷊annu dombane sarun massal᷊iawukka.’

³²Arawe napawe i Ya'u niapawangunna apia, i Ya'u sarun inai malliu ṛoro si yamiu su Galilea.”

³³I Petrus nabbisara Mawu Yesus, “Wala'e i mangitou nambo manantangngu Iamangnga, i ya'u tawe manantangnga!”

³⁴“Naunge,” unnu Mawu Yesus si tou, “Ṛabbi indi lai, tantal᷊anna manu'a taambe inumu'u, paatallute i'o massina'a-U.”

³⁵I Petrus sinumimbakka, “Salaiwe i ya'u ṛinone mate ringannu Iamangnga, i ya'u tawe mabbisara manungku i ya'u tawe maaillal᷊a Iamangnga!” Wuṛṛu manga mallal᷊aṛṛenggen-Ne waine nabbisara aroddi lai.

³⁶Wua'udde Mawu Yesus inaite ringannu manga mallal᷊aṛṛenggen-Ne su sambau tampa aranne Getsemani. Poiaroddi i Tou nabbisara si mangitou, “A'iante isindi tantal᷊anna i Ya'u inai umal᷊iomanna.”

³⁷See i Tou nangahe si Petrus wuṛṛu ruang katou ana'i Zebedeus inai su sampunna ringanni Tou. I Tou nanattakke maapendamma susa wuṛṛu sussinggawangnga.

³⁸I Tou nabbisara su mallal᷊aṛṛenggen-Ne, “Naungku tumanite massusa, pendamanna ere matete. Atana'e i yamiu isindi, wuṛṛu pandiagate su sambau ringang-Ku.”

³⁹Wua'udde Mawu Yesus inaite marau addio'a, see i Tou inumal᷊intuda su leta'a wuṛṛu inumal᷊iomanna. “Iamangnga,” wisara-Ne, “amungkangngu wotongnge, paaraua'a wuassia'u asasusa apan maṛṛia'a si Ya'u indi. Arawe arie tumuṛṛuttu apulu-U, arawe tumuṛṛuttu apulun Iamangnga sassane.”

⁴⁰Wua'udde Mawu Yesus nabelengke apia ringannu sire tallu mallal᷊aṛṛenggen-Ne, wuṛṛu inaratinganna i mangitou mattiilla. I tou nabbisara si Petrus, “Tumba'u sangka orassa, yamiun tallu tawe maataṛṛangnga mandiaga ringang-Ku?

⁴¹Paariagate wuṛṛu aal᷊iomante tadea'u i yamiu tawe maasomba wawono'a. Atonna ghaṛṛahonu maapulu ma'ola'a apapia, arawe i yamiu tawe maataṛṛangnga ana waugu pallal᷊agun taumata udde lome.”

⁴²Apia lai Mawu Yesus inaite inumal᷊iomanna, wisara-Ne, “Iamangnga, amungkangngu asasusa indi sarun maṛṛia'a si Ya'u wuṛṛu tate ial᷊inda'a, apulu-Nu ariadite Iamangnga.”

⁴³Wua'udde Mawu Yesus nabelengke apia, wuṛṛu inaratinganna mallal᷊aṛṛenggen-Ne ta'e mattiilla, ana waugu i mangitou tumaniten a'amatiil᷊anna.

⁴⁴Apia lai Mawu Yesus nanantangngi mangitou wuṛṛu su atallunete lai inumal᷊iomanna nabbisara wisara apan uasul᷊ungnga.

⁴⁵Wua'udde i Tou nabelengke apia ringannu mallal᷊aṛṛenggen-Ne wuṛṛu nabbisara, “Ta'e lai mattiilla i yamiu wuṛṛu mangngillol᷊o Pa'ellega, nia'omante tempone Ana'u Taumata itantilla su liman taumata marosa.

⁴⁶Pabbangunte, wette i ite inaite. Pa'ellega! Taumata apan mandal᷊eo si Ya'u uddete!”

⁴⁷Tantal᷊anna Mawu Yesus ta'e uahahatto, i Yudas, sangkatou wuassu wallattu sire mapul᷊o dua mallal᷊aṛṛenggen-Ne udde nirumanta. Suaddio'a ringanni tou, nirumanta lai taumata manambo apan uaapiddu hal᷊ele wuṛṛu papuulla. I mangitou nirolokku manga imam tembonanne, wuṛṛu piaṛṛa'u Yahudi.

⁴⁸Iapa mandal᷊al᷊eo, suete nabbal᷊o si mangitou tatialane indi, “Taumata apan ta'u ari'anna, eteudde taumata-Ne. Samette i Tou!”

⁴⁹Aroddi na'omate su tampa udde, i Yudas lapiddu inai ringannu Mawu Yesus wuṛṛu nabbisara, “Tabea, Iamangnga Huru!” See i tou nangaria'a Mawu Yesus.

⁵⁰Mawu Yesus sinumimbakka, “Tuṛṛangnga, apa pandumannu rumanta isindi?” Wua'udde taumata nambo udde nilumempangnga lapiddu nanametta Mawu Yesus.

⁵¹Su wallattu mallal᷊aṛṛenggen-Ne pia sangkatou isudde lai ringannu Mawu Yesus, nanawutta hal᷊elene wuṛṛu namilitta allangngu imam bahewa udde na'oman sara tal᷊ingane nattal᷊ei.

⁵²Mawu Yesus nabbisara su mallal᷊aṛṛenggen-Ne udde, “Sutta'e apia hal᷊elenu su ṛomane, ana waugu anambon taumata apan ahide hal᷊ele sarun pateannu hal᷊ele.

⁵³Su naungngu i Ya'u tawe maarorongnga tul᷊unganna wuassi Iamangku, wuṛṛu i Tou ringannu mal᷊ihakka mandolokku mapul᷊o dua pia lebbene wageangngu tantara mala'ekatta?

⁵⁴Arawe amungkangngu aroddi, ereapa wotongnge mariaddi maola'a ere suete niapaasingkatta sulal᷊ummu Wuke Susi manungku ṛinone sarun mariaddi ere su orassa indi?”

⁵⁵See Mawu Yesus nabbisara su taumata manambo udde, “Apa i Ya'u indi taumata lal᷊eo, na'oman sara i yamiu nirumanta ringannu uaapiddu hal᷊ele wuṛṛu papuulla ipanametta si Ya'u? Miallo-miallo i Ya'u mangngaṛṛa'a su Wal᷊e Mawu, arawe i yamiu tawe manametta si Ya'u.

⁵⁶Arawe atonna naṛṛinote aroddi tadea'u matipusse apa apan niwoṛṛettu manga nabi sulal᷊ummu Wuke Susi.” Wua'udde, manga mallal᷊aṛṛenggen-Ne tinumal᷊angke nanantangngu Mawu Yesus.

⁵⁷Manga taumata apan nanametta Mawu Yesus nangapidde Mawu Yesus su wal᷊en Imam Bahewa Kayafas. Poiaroddi manga hurun agama wuṛṛu piaṛṛa'u Yahudi uaammulle.

⁵⁸I Petrus uantantalongnga Mawu Yesus wuassu marau na'oman sara su passalangannu wal᷊en imam bahewa. See i Petrus sinumuttate su passalanganna, wuṛṛu inuma'ianna su sampunna ringannu mandariaga. I tou maapulu maasingkatta ereapa panginsueanne sarangkanambone udde.

⁵⁹Manga imam tembonanne wuṛṛu anambo Mallaṛṛuungngu Agama mangke mammata'a maasomba tatiala awusu apan botongnge maṛṛawessa manungku Mawu Yesus iṛṛuumanna ma'oman sara mate.

⁶⁰Arawe i mangitou tawe maasomba saran sambau pasasal᷊a, salaiwe manambo apan nirumanta mattiala awusu. Panginsueanne pia ruang katou nirumanta su saruanne.

⁶¹I mangitou nabbisara, “Taumata indi mabbisara, ‘I Ya'u wotongnge mapaaṛṛa'an Bal᷊e Mawu, wuṛṛu sulal᷊ummu tallu allo wotongnge mapararisikka apia.’ ”

⁶²See imam bahewa nirumarisikka, wuṛṛu nabbisara Mawu Yesus, “Apa I'o tawe sumimbakka alae apan ipa'iwal᷊o Si'o?”

⁶³Arawe Mawu Yesus mal᷊annaba. Paassa lai imam bahewa nabbisara si Tou, “Ringannu arannu Ruata apan wiakka, Wal᷊oa'e si yami apa ete I'o Ratum Punnu Sal᷊amatta, Ana'u Ruata?”

⁶⁴Mawu Yesus sinumimbakka, “Aroddite ere su wisaranu. Arawe pangimante: manattakka orassa indi yamiu sarun maasilo Ana'u Taumata uma'ianna su samba'an uanannu Ruata Lembo Mataṛṛino, wuṛṛu rumanta sulal᷊ummu winabbawa wuassu langitta!”

⁶⁵Ne imam bahewa udde nanggesa'a laungnge, wuṛṛu nabbisara, “I tou mangngaddio'a Ruata! Tawe gunane lai madea'a sakassi. I yamiu sarangkanambone suete naaringikka sassane manga wisara apan ipangngaddio'a Ruata.

⁶⁶Orassa indi ereapa adapatti yamiu?” I mangitou sinumimbakka, “I Tou nassal᷊a wuṛṛu ṛinone pateanna.”

⁶⁷See i mangitou nangaddu hati Mawu Yesus, wuṛṛu namuulla si Tou. Piaddu lai namero si Tou,

⁶⁸wuṛṛu nabbisara, “Si'ata'a wuṛṛu pasingkata'a si yami, ei Ratum Punnu Sal᷊amatta! Isai namero Si'o?”

⁶⁹I Petrus tantal᷊anna ua'ianna su liudde, su rallakka. Sangkatou mangangimbe bawine wuassu wallattu wawine isudde nirumanta, wuṛṛu nabbisara Petrus, “Wal᷊inewe i'o lai su sampunna ringannu Mawu Yesus taumatan Galilea udde?”

⁷⁰Arawe i Petrus nassinaadda su saruanni mangitou sarangkanambone, “I Ya'u wagga apa pandumannu,” sasimbakki Petrus, see i tou inaite watukku ngaram passalanganna.

⁷¹Sangkatou mangangimbe wawine apan waine lai naasilo si Petrus, wuṛṛu nabbisara su manga taumata isudde, “Taumata indi lai tanginna su sampunna ringannu Mawu Yesus wuassu Nazaret udde!”

⁷²See i Petrus nassinaadde apia, wuṛṛu nassalu. “Atonna-tonna ya'u waggan taumata udde!” unni Petrus.

⁷³Tawe nal᷊annu wua'udde, manga taumata apan uarisikka isudde nirumanta ringanni Petrus, wuṛṛu nabbisara, “Atonna-tonna i'o sangkatou wuassu wallatti mangitou. Udde naillal᷊anna wuassu pabbawisaranu.”

⁷⁴See i Petrus nanattakke mangke massalu wuṛṛu mabbisara, “I ya'u waggan taumata udde!” Orassa udde lai manu'a inumuute.

⁷⁵Wuṛṛu i Petrus naanaungke manungku Mawu Yesus suete nabbisara si tou, “Tantal᷊anna manu'a taambe niumu'u, i'o paatallute massinaa-U.” See i Petrus sinumabangnga, wuṛṛu nilumuaite ringannu massusa.