Read Talaud MATIUS 3 Bible Online

MATIUS 3 - Talaud bible

MATIUS 3

¹Su tempo udde nirumantate i Yohanes Mananaṛṛani su wadda'u Yudea wuṛṛu nanattakke mannase.

²“Awal᷊ute wuassu manga rosanu,” wisarane, “ana waugu Ruata tate mal᷊annu lai mamarenta ere sangkatou Ratu!”

³Ete i Yohanes udde taumata apan pappandumannu Nabi Yesaya sulal᷊ummu manga wisarane indi, “Pia taumata u'al᷊iata su wadda'a, ‘Saddiaite lal᷊annu Mawu; rataṛṛa'e lal᷊anni Tou.’ ”

⁴I Yohanes ual᷊uṛṛen laubba wuassu wambul᷊un unta. Papeṛṛenne wuassu pisim binatangnga wuṛṛu anni tou saṛṛapalanna wuṛṛu pul᷊an ahuranganna.

⁵Manambo taumata wuassu Yerusalem, wuassu al᷊awo'u wanua Yudea wuṛṛu wuassu wageangngu leta'u Sal᷊ukku Yordan, nirumanta ringanni Yohanes.

⁶I mangitou nanga'u manga rosa mangitou, see i Yohanes nanaṛṛanite si mangitou su Sal᷊ukku Yordan.

⁷Manambo lai taumatan Farisi wuṛṛu Saduki nirumanta ringanni Yohanes maisaṛṛani. Arawe su tempo i tou naasilo si mangitou nirumanta, i tou nabbisara si mangitou, “I yamiu taumata lal᷊eo! Isai suete nabbal᷊o manungku i yamiu mal᷊iudda wuassu ṛuumannu Ruata apan sarun rumanta?

⁸Pasiloa'e ringannu pallal᷊agunu, manungku i yamiu nawal᷊ute wuassu manga rosanu.

⁹Arie massunna manungku i yamiu mal᷊iu wuassu ṛuumanna ringannu mabbisara manungku i Abraham uddewe iupungngu al᷊amonang kamiu. Naunge, wuassu manga watu indi lai, Ruata wotongnge ma'ola'a papapulunni Abraham!

¹⁰Bal᷊iungnga nasaddiate ipanuwangnga alu, ma'oman sara manga ṛamunne. Al᷊awo'u alu apan tawe mabbua apan mapia sarun tuwanganna wuṛṛu iramme sulal᷊ummu putungnga.

¹¹I ya'u mannaṛṛani si yamiu ringannu ua'e, udde mappaal᷊iatta'a manungku i yamiu nawal᷊ute wuassu paddarosang kamiu, arawe apan sarun dumanta sal᷊immurine wuassia'u, sarun manaṛṛani si yamiu ringannu Ghaṛṛahon Duata wuṛṛu putungnga. I Tou maggewal᷊anna wuassia'u saran mangapiddu sapatune lai Ya'u tawe su ṛinone.

¹²Su limane pia niṛṛu ipattappa al᷊awo'u ammene ma'oman sara mawaresi. Amme sarun iammulla sulal᷊ummu wal᷊ingkakke, arawe anambon wal᷊aane sarun tutunganna su putungnga apan tawe mappadumma.”

¹³Su tempo udde Mawu Yesus inaite wuassu Galilea watukku Sal᷊ukku Yordan. Poiaroddi i Tou nirumanta ringanni i Yohanes wuṛṛu naddorongnga maisaṛṛani.

¹⁴Arawe Yohanes ma'annamma mannol᷊a'u darorongngi Tou udde. I Yohanes nabbisara, “I ya'u indi ṛinone saṛṛanianni Iamangnga. Orassa indi'e Iamangnga nirumanta ringangku maisaṛṛani si ya'u.”

¹⁵Arawe Mawu Yesus nisumimbakka, “Wala'e aroddi su orassa indi. Ana waugu ringannu aroddi i ite ma'ola'a al᷊awo'u apa apan ipaapulun Ruata.” Nariaddi Yohanes nanaṛṛanite Mawu Yesus.

¹⁶Napawe suete nissaṛṛani, Mawu Yesus mal᷊iha-l᷊ihakka sinumapputta wuassu ua'en sal᷊ukka udde. Inaṛṛombanganne langitta nawu'a wuṛṛu Mawu Yesus naasilo Ghaṛṛahon Ruata niumonto'a ere manu'a merpati niumarunna si Tou.

¹⁷Wua'udde niaringikka tingikku Ruata nabbisara, “Ete indi Ana'u apan arangnguanna, i Tou ma'al᷊uassa naung-Ku.”