Read Talaud MATIUS 5 Bible Online

MATIUS 5 - Talaud bible

MATIUS 5

¹Su tempo Mawu Yesus naasilo taumata nambo udde, i Tou sinumaate su wuidda. Napawe i Tou ua'iante, manga mallal᷊aṛṛenggen-Ne nirumanta ringanni Tou,

²see i Tou nanattakke mangngaṛṛa'a si mangitou:

³“Lal᷊umanna'a su taumata apan uapendamma tawe atatohassa wuṛṛu tumba'u uaantimma Mawu sassane; ete i mangitou udde lal᷊oṛṛon araratuannu Ruata!

⁴Lal᷊umanna'a su taumata apan massusa naungnge; Ruata sarun malluassa naungngi mangitou!

⁵Lal᷊umanna'a su taumata apan naungnge mawawo; Ruata sarun manipussa paaire-Ne si mangitou!

⁶Lal᷊umanna'a su taumata apan sidutu ma'ola'a apulun Ruata; Ruata sarun manuungngu apulu mangitou!

⁷Lal᷊umanna'a su taumata apan mandangngu taumata waine; Ruata sarun mandangngu si mangitou lai!

⁸Lal᷊umanna'a su taumata apan naungnge waresi; i mangitou sarun maaillal᷊a Ruata.

⁹Lal᷊umanna'a su taumata apan mangapiddu paddarame su wallattu taumata; Ruata sarun manga'u si mangitou maola'a manga al᷊aṛṛanang-Nge!

¹⁰Lal᷊umanna'a su taumata apan uatataṛṛangnga sassansaranna ana waugu ma'ola'a apulun Ruata; ete i mangitou udde lal᷊oṛṛon araratuannu Ruata!

¹¹Lal᷊umanna'a si yamin amungkangngu iapaasal᷊a, sassansaranna, wuṛṛu aaddio'anna ana waugu i Ya'u.

¹²Manga nabi apan nabbiakka su tempo i yamiu taambe su runia, nisansara lai ereudde. Luasse wuṛṛu lala'e, ana waugu lal᷊antakke manambonisaddia Mawu si yamiu.”

¹³“Ete i yamiu uddewe asimmu runia. Amungkangngu asimma udde nawal᷊u maammi, apa wotongnge iapaapakkada apia? Tate gunane lai, ewe'e iramme wuṛṛu ṛindannu taumata.

¹⁴Ete i yamiu uddewe asasemakku runia. Soa apan uaaddo su wuidda tawe iawuni.

¹⁵Tawe taumata mande'omma sol᷊o, see sol᷊o udde luuwannu wensada. I tou sarun mangaddon sol᷊o udde su tampane, tadea'u mangagillu asasemakka su al᷊awo'u taumata sulal᷊ummu wal᷊e.

¹⁶Aroddi lai asasemakku ṛinone lai lumansiangnga su saruannu taumata, tadea'u i mangitou maasilo al᷊awo'u pallal᷊agunu apan mapia, wua'udde padalote Ruata su surga.”

¹⁷“Ariewe massunna manungku i Ya'u nirumanta mamappassa tita Musa wuṛṛu al᷊aṛṛa'u manga nabi. I ya'u nirumanta wal᷊ine mamappassa tita udde, arawe sarun mangaṛṛa'u atappasanne apan su ṛinone.

¹⁸Naunge! Tantal᷊anna langitta wuṛṛu runia ta'e indi, sambau woṛṛetta ara'e titi'a apan addio'anne lai sulal᷊ummu al᷊aṛṛa'a udde, tawe pappasanna amungkangngu sarangkanambone udde taambe natipussa!

¹⁹Ana waugu udde, isai-sai tawe tumuṛṛutta manga parenta udde, manimbe parenta addio'anne, wuṛṛu mangngaṛṛa'a taumata waine ma'ola'a aroddi lai, sarun maola'a addio'anne su wallattu al᷊aṛṛana'u Ruata. Arawe isai-sai apan tuttuṛṛutta manga parenta udde, wuṛṛu mangngaṛṛa'a taumata waine ma'ola'a aroddi lai, sarun maola'a wahewa su wallattu al᷊aṛṛana'u Ruata.

²⁰Nariaddi, naunge: I yamiu tawe maola'a al᷊aṛṛana'u Mawu, amungkangngu i yamiu tawe manampal᷊iu manga hurun agama wuṛṛu manga taumatan Farisi sulal᷊ummu ma'ola'a inolaanna ara'e apulun Duata.”

²¹“I yamiu masingkatta manungku su iupungngu al᷊amonang kite pia al᷊aṛṛa'a ereindi: Arie pamate; isai-sai mamate, sarun parikisanna.

²²Arawe orassa indi Ya'u mabbisara si yamiu, isai-sai masa'u su taumata waine, sarun parikisanna; wuṛṛu isai-sai mallela taumata waine sarun parikisanna su saruannu Mallaṛṛuungngu Agama. Wuṛṛu isai-sai mabbisara taumata waine, ‘Tingngangnga,’ sarun iramme sulal᷊ummu putungngu naraka.

²³Ana waugu udde, amungkangngu piaddu sangkatou wuassu wallatti yamiu mangapiddu sasamba su Ruata, see naanaungnga manungku pia taumata massa'u si tou,

²⁴ṛinone i tou manantangnga asuene sasambane su saruannu meddan sasamba see inai maddamen taumata udde. Wua'udde, wotongngete i tou mabelengnga wuṛṛu manantillu aonggolle su Ruata.

²⁵Amungkangngu pia taumata mangalaeng kamiu su mallaṛṛuungnga, paddameten tou tal᷊abe ta'e pia tempone, tantal᷊anna taambe na'oma su mallaṛṛuungnga. Amungkangngu tawe, taumata udde sarun manantilli yamiu su mallaṛṛuungnga apan manantilli yamiu su polisi. See polisi sarun mapaasuttang kamiu sulal᷊ummu tuttupanna.

²⁶Wuṛṛu paanaunge: Natantuna i yamiu tawe masabangnga wuassu tuttupanna udde, amungkangngu bawaekku pasasal᷊ang kamiu taambe nasuem baekke.”

²⁷“I yamiu masingkatta manungku pia al᷊aṛṛa'a ereindi: Arie sumandaga.

²⁸Arawe tempo indi Ya'u mabbal᷊o si yamiu: Isai-sai ma'ellega sangkatou wawine see ninumemman tou, taumata udde sueten sinumandaga ringannu wawine udde sulal᷊ummu naungnge.

²⁹Amungkangngu mata aikkatannu napaola'u rosa si'o, lasso'a wuṛṛu rammea'a mata udde! Mappianna awul᷊iannu sambau su wallattu aola'u wadangngu wuassu ahewallu wadangngu iramme su naraka.

³⁰Amungkangngu limanu aikkatanna maarosa si'o, pototta wuṛṛu rammea'a limanu udde! Mappianne awul᷊iannu lima samba'a wuassu ahewallu wadangngu mataṛṛo su naraka.”

³¹“Pia lai al᷊aṛṛa'a ereindi: su manga taumata esakka apan nanantangngu awingnge, sarun mangagillu surattu patatal᷊ei si tou.

³²Arawe tempo indi Ya'u mabbisara si yamiu; isai-sai manantangngu awingnge manimbe wawine udde tawe sinumandaga, i tou napaola'u awingnge udde sinumandaga, amungkangngu awingngi tou udde ma'awingnga apia. Wuṛṛu isai-sai ma'awingnga ringannu wawine apan suete nitantangnga udde, sinumandaga lai.”

³³“I yamiu masingkatta manungku iupungngu al᷊amonang kite pia al᷊aṛṛa'a ereindi: Arie pangawusu. Apa apan suete nipa'irenu ringannu pasasalu su saruannu Ruata, ṛinone udde olaannu.

³⁴Arawe orassa indi Ya'u mabbisara si yamiu: arie massalu saran addio'a, mapia ete ringannu langitta, ana waugu langitta udde ramba'u Ruata,

³⁵aroddi lai ringannu runia, ana waugu runia udde apampakku ledda-Ne; ara'e ringannu Yerusalem, ana waugu eteudde soan Ratu wahewa.

³⁶Arie lai massalu ringannu puanu ana waugu i'o sassane tawe maawal᷊u utangngu maola'a mawira ara'e ma'itumma manimbe man sambua.

³⁷Tumba'u pabbisara: ‘Ore’ ara'e ‘Tawe’ — manampal᷊iu wua isudde darantane wuassu Setanna.”

³⁸“I yamiu masingkatta manungku pia lai al᷊aṛṛa'a ereindi: mata hantiannu mata, isi hantiannu isi.

³⁹Arawe orassa indi Ya'u mabbisara si yamiu: arie pabbal᷊issa sangkatou taumata apan ma'ola'a al᷊al᷊eo si yamiu. Apianne amungkangngu taumata mamero wambalanu aikkatanna, wala'a lai i tou mamero wambalanu aiṛṛi.

⁴⁰Wuṛṛu amungkangngu taumata mangalaeng kamiu su mallaṛṛuungnga wuṛṛu maddorongnga laungngu, onggol᷊a'a lai si tou jubahnu.

⁴¹Amungkangngu sangkatou tembonanne mamata'i yamiu mamasanna luranni tou araune sangkilo, pasanna lai luranna udde araune rua kilo.

⁴²Amungkangngu manga taumata maddorongnga manga apa si yamiu, anggil᷊a'e si tou. Wuṛṛu arie lai mapaawelengngu taumata apan maapulu mabballassa sarannapa si'o.”

⁴³“I yamiu masingkatta manungku pia lai al᷊aṛṛa'a ereindi: pandangngute manga hawenu wuṛṛu passeette manga seennu.

⁴⁴Arawe orassa indi Ya'u mabbisara si yamiu: pandangngute manga seennu, wuṛṛu al᷊iomana'a manga taumata apan mammate si yamiu,

⁴⁵tadea'u i yamiu maola'a al᷊aṛṛana'u Iamangngi yamiu su surga. Ana waugu Ruata mapasabangngu matannallo su taumata apan mapia, wuṛṛu su taumata apan dal᷊eo lai. I tou napa'uranna su taumata apan ma'ola'a apapia wuṛṛu su taumata apan ma'ola'a al᷊al᷊eo lai.

⁴⁶Ana waugu amungkangngu i yamiu tumba'u mandangngu taumata apan mandangngu si yamiu, apa hunane su Ruata mabbal᷊issa inolaanni yamiu udde? Wal᷊inewe manga maddarorongnga wose lai ma'ola'a aroddi?

⁴⁷Wuṛṛu amungkangngu i yamiu tumba'u mangngagillu tabea su manga hawenu sassane, apa lebbene? Manga taumata apan wagga ma'illal᷊a Ruata lai ma'ola'a aroddi!

⁴⁸Iamangngu su surga mandangngu al᷊awo'u taumata ringannu nasuungnge. I yamiu sarun pa'ola'a lai aroddi.”