Read Talaud MATIUS 6 Bible Online

MATIUS 6 - Talaud bible

MATIUS 6

¹“Naungete, arie i yamiu ma'ola'a tatuṛṛuttu agama su saruannu awadaalla tadea'u ellehannu taumata. Amungkangngu i yamiu ma'ola'a aroddi, i yamiu tawe onggol᷊annu lal᷊antakke wuassu Iamangngu su surga.

²Nariaddi, amungkangngu i yamiu mangagillu aonggolla su taumata asiangnga, arie mangke itattunggalla darangngu udde, ere a'olaannu taumata lilangkamal᷊e'a. I mangitou maapulu ma'ola'a udde sulal᷊ummu wal᷊em pattataṛṛamawuanna, su lal᷊anna, tadea'u raloannu taumata. Naungete, i mangitou suete nanengkamma lal᷊antakke.

³Arawe i yamiu, amungkangngu mangagillu aonggolla, anggil᷊a'e ringannu mal᷊anna-l᷊annaba, tadea'u tawedu maasingkatta.

⁴Wala'e pallal᷊agunu udde tawe asingkatannu taumata, tumba'u Iamangngu su surga. I tou ma'asilo pallal᷊agunu apan uawuni udde wuṛṛu sarun mangonggolu lal᷊antakke si yamiu.”

⁵“Amungkangngu i yamiu umal᷊iomanna, imbaṛṛangnga ere manga taumata ma'ola'a awusu. I mangitou u'al᷊iomanna lapiddu uarisikka su wal᷊em pattataṛṛamawuanna wuṛṛu su pengan dal᷊anna, tadea'u iasilon taumata. Paanaunge, eteudde lal᷊antakke apan suete nisengkammi mangitou.

⁶Arawe amungkangngu i yamiu umal᷊iomanna, suttate su wabbo'a wuṛṛu ṛuura'a ngara, see al᷊iomante su Ruata Iamangnga apan tawe iasilo udde. Ne Iamangngu apan ma'asilo pallal᷊agunu apan uawuni udde, sarun mangonggolu lal᷊antakke si yamiu.

⁷Amungkangngu i yamiu umal᷊iomanna, arie mal᷊o'e-l᷊o'e ere su manga taumata apan tawe ma'aillal᷊a Mawu. I mangitou massunna manungku darorongngi mangitou sarun daringiṛṛanna ana waugu aal᷊iomanni mangitou mal᷊o'e aroddi.

⁸Imbaṛṛangnga ere i mangitou udde. Iamangngu masingkatte apa apan ipaapulung kamiu, salaiwe i yamiu taambe naddorongnga.

⁹Nariaddi aal᷊iomante ereindi, ‘Iamangngi yami su surga; Ete I'o Ruata tumba'u Sambau. Antimanna I'o subbanna wuṛṛu wantuhanna.

¹⁰Ete I'o Ratung kami. Antimanna I'o mamarenta su runia wuṛṛu apulu-Nu tatuṛṛutanna ere lai su surga.

¹¹Onggol᷊a'awe si yami su allo indi pabbawiakka apan ipaapulung kami.

¹²Ampungewe i yami wuassu passasal᷊ang kami, ere lai yami suete nangampungnga taumata apan nassal᷊a si yami.

¹³Ariewe mamalang kami awul᷊iannu pangangimanna su tempo i yami wabal᷊intongnganna ewe'e liua'a i yami wuassu taṛṛinon Al᷊al᷊eo. [Ete I'o Ratu apan uataṛṛino wuṛṛu mawantuga ma'oman sara mal᷊annu-l᷊annu. Amin.]’

¹⁴Amungkangngu i yamiu mangampunga taumata apan nassal᷊a si yamiu, Iamangngu su surga lai sarun mangampunga pasasal᷊ang kamiu.

¹⁵Arawe amungkangngu i yamiu tawe mangampunga pasasal᷊an taumata waine, Iamangngu su surga tawe lai mangampunga pasasal᷊ang kamiu.”

¹⁶“Amungkangngu i yamiu mappuasa, imbaṛṛangnga massusa ere taumata apan apulune mammahia. I mangitou mammal᷊u hatine tadea'u anambon taumata maasingkatta manungku i mangitou mappuasa. Paanaunge, eteudde lal᷊antakke apan suete nisengkammi mangitou.

¹⁷Arawe amungkangngu i yamiu mappuasa, rammusa hatinu wuṛṛu paaṛṛo paal᷊eno-l᷊eno utangngu,

¹⁸tadea'u tawedu maasingkatta manungku i yamiu mappuasa, ewe'e tumba'u Iamangngi yamiu apan tawe asiloanna udde, masingkatta. I Tou ma'asilo pallal᷊agunu apan uawuni udde, wuṛṛu sarun mangonggolu lal᷊antakke si'o.”

¹⁹“Ariewe mangammullu darotongnga hunam badangngu su runia, isudde wiangnga wuṛṛu tain atta'a mandal᷊eo wuṛṛu manana'o rumanta manna'o.

²⁰Apianne mangammullu darotongnga su surga, isudde wiangnga wuṛṛu tain atta'a tawe maahohakka wuṛṛu manana'o tawe rumanta manna'o.

²¹Ana waugu suapa pia darotongngu uaaddo, isudde lai naungngu uaṛṛundinganna!”

²²“Mata eteudde sol᷊om badangnga. Amungkangngu matanu matilangnga ahewallu wadangngu lai masema-semakka.

²³Arawe amungkangngu matanu mal᷊abukka, ahewallu wadangngu marandumma lai. Nariaddi amungkangngu sol᷊o sulal᷊ummu wadangnga udde marandumma, lembo nabbasa lai ararandumma udde!”

²⁴“Tawe saran sangkatou taumata maamanara su ruang katou mawu. Ana waugu i tou sarun lembo marangngu sangkatou wuassu sangkatou apan baine. Ara'e i tou lembo matuṛṛutta su mawune apan sambau wuassu mawune apan baine. Aroddi lai matataṛṛino si yamiu. I yamiu tawe maappammanara manara su Ruata wuṛṛu su darotongnga lai.

²⁵Ana waugu udde naunge; arie passinggawangnga su ola'u wiakki yamiu, eteudde apa apan sarun annananna wuṛṛu inumanni yamiu, ara'e apa sarun iluṛṛeng kamiu. Wal᷊inewe wiakka nangillembo wuassu anna, wuṛṛu wadangnga nangillembo wuassu peddetta?

²⁶Pa'ellege manu'u winalanganna. I mangitou tawe massuanna, tawe mangitingnga wuṛṛu tawe lai mangammullu wuan sinuananne sulal᷊ummu wal᷊ingkakka. Manimbe aroddi Iamangngu su surga mappadul᷊i lai si mangitou! Wal᷊inewe i yamiu maareganne marau wuassu manu'u winalanganna?

²⁷Isai wuassu wallatti yamiu apan ringannu asasinggawangnge mappal᷊o'engngu uukke saran addio'a?

²⁸Anio i yamiu sussinggawangnga su ola'u peddennu? Panutukka manga wunga bakung apan tuttuwo su wadda'a. Anambon wungane udde tawe mammanara wuṛṛu tawe mandadu'a;

²⁹arawe Ratu Salomo apan pa'a'alane aroddi anambone, tawe uapedetta ere al᷊aṛṛamagu manga wunga udde!

³⁰Wal᷊abukka su wadda'a allo indi tumuwo wuṛṛu tiṛṛabbine tutunganna ma'oman sara masue. Arawe Ruata mamedetta wal᷊abukka udde aroddi aṛṛamage. Lembonete i yamiu! Arawe pangangimanni yamiu mattul᷊ungnga!

³¹Arie passinggawangnga wuṛṛu mabbisara ‘Apa apan sarun annananni ite’, ara'e ‘apa apan sarun inumanni ite’, ara'e ‘apa apan sarun iluṛṛeng kite’?

³²Sarangkanambone udde sidutu raddeaannu taumata apan tawe maaillal᷊a Ruata. Arawe Iamangngu su surga, masingkatta manungku i yamiu maapulun sarangkanambone udde.

³³Nariaddi paddea'e dorone tadea'u Ruata mamarenta sulal᷊ummu wiakku wuṛṛu tuṛṛutte apulu-Ne. Ne al᷊awo'u darotongnga waine lai sarun ionggolu Ruata si yamiu.

³⁴Ana waugu udde arie suminggawangnga su ola'u allo tiṛṛabbi. Ana waugu tiṛṛabbi lai pia asasinggawangnge sassane. Allo indi natipusse asasusane, walasa'e tambanna apia.”