Read Talaud MATIUS 7 Bible Online

MATIUS 7 - Talaud bible

MATIUS 7

¹“Imbaṛṛangnga maṛṛuungngu taumata waine, tadea'u i yamiu sassane lai tawe iṛṛuungngu Ruata.

²Ana waugu su ereapa i yamiu maṛṛuungngu taumata waine, aroddi lai Ruata sarun maṛṛuungngi yamiu. Wuṛṛu uuṛṛanna apan ipanguukki yamiu su taumata waine sarun ipanguukku Ruata lai si yamiu.

³Anio i yamiu ma'asilo sampaddi alu sulal᷊ummu matan tuṛṛangngu, arawe sal᷊aba'u sulal᷊ummu matanu sassane tawe iatutukki yamiu?

⁴Ereapa i yamiu wotongnge mabbisara tuṛṛangngu, ‘Wette i ya'u manabangngu alu sampaddi wuassu matanu,’ arawe sulal᷊ummu matanu sassane pia sal᷊aba'u?

⁵Ei lilangkamal᷊e'a! Sabbanga'e rorone sal᷊aba'u wuassu matanu sassane, wakkute udde i'o maasilo ringannu masemakka, wuṛṛu wotongngete mapaasabangngu alu sampaddi wuassu matan tuṛṛangngu.

⁶Arie mangonggolu sarannapa na'ukkassa su asu, tadea'u asu udde tawe mangawal᷊i'a mamangalo si'o. Wuṛṛu arie mangonggolu mutiara su wawi, tadea'u wawi udde tawe maṛṛinda mutiara udde.”

⁷“Paddorongke, ne i yamiu sarun manengkamma. Paddea'e, ne i yamiu sarun maasomba. Panengkelle, ne i yamiu sarun pamu'anna ngara.

⁸Ana waugu taumata maddorongnga sarun manengkamma; taumata madea'a sarun maasomba; wuṛṛu taumata mannengkella sarun wu'anna ngara.

⁹Su wallatti yamiu, apa pia iamangnga mangngagillu watu su anangnge, amungkangngu i tou maddorongnga roti?

¹⁰Ara'e mangagillu atoanna, amungkangngu i tou maddorongnga inassa?

¹¹Salaiwe i yamiu lal᷊eo, i yamiu masingkatta lai mangagillu apa apan mapia su manga al᷊aṛṛanangngu. Nangillembo Iamangngu su surga! I Tou lembone lai sarun mangagillu apa apan mapia su taumata apan maddorongnga si Tou.

¹²Ola'awe taumata waine ere i yamiu lai maapulu olaanni mangitou. Eteudde lal᷊oṛṛon al᷊aṛṛa'i Musa wuṛṛu manga nabi.”

¹³“Suttate su ngara maṛṛiputta, ana waugu ngara wuṛṛu lal᷊anna apan mattudda naraka wahewa wuṛṛu mal᷊oangnga, wuṛṛu manambo taumata apan umamatta isudde.

¹⁴Arawe ngara wuṛṛu lal᷊anna maṛṛiputta wuṛṛu masahada amatanne, mangapiddu taumata su pabbiaṛṛanna. Wuṛṛu tumba'u mattul᷊ungnga taumata maasomba udde.”

¹⁵“Paatehamma su manga nabi awusu. I mangitou nirumanta ringanni yamiu, lihide ere domba, arawe i mangitou ṛinone ere serigala apan mal᷊aṛṛaga.

¹⁶I yamiu sarun maaillal᷊a si mangitou wuassu wuan inolaanne. Anggaṛṛumunanne tawe mabbuan anggore, wuṛṛu rapusi'a roaanna tawe mabbuan ara.

¹⁷Wuassu alu apan masuwukka, asombanganna wua apan mapia, wuṛṛu wuassu alu maṛṛisitta wua apan dal᷊eo.

¹⁸Alu apan masuwukka tawe mabbua wua lal᷊eo wuṛṛu alu maṛṛisitta tawe mabbua wua apan mapia.

¹⁹Su manga alu apan tawe mabbua wua apan mapia, tuwanganna wuṛṛu tutunganna.

²⁰Aroddi lai manga nabi awusu. I yamiu sarun maaillal᷊a wuassu pabbawuan inolaanni mangitou.”

²¹“Tawe anambon taumata apan mammaggo si Ya'u, ‘Mawu, Mawu,’ sarun maola'a lal᷊oṛṛon araratuannu Ruata, arawe tumba'u manga taumata apan tuttuṛṛutta apulun Iamangku su surga.

²²Su Allong Kiamatta manambo taumata sarun mabbisara si Ya'u, ‘Mawu, Mawu, wal᷊inewe ringannu arannu i yami suete nabbal᷊on tanata Ruata? Wuṛṛu wal᷊inewe ringannu arannu Mawu lai yami suete nallimbuakka manga ghaṛṛaho lal᷊eo see na'ola'a anambon al᷊aṛṛindu'a?’

²³Arawe i Ya'u sarun sumimbakka, ‘I Ya'u taambe saran paassa naaillal᷊a si yamiu! Roote paarau wua isindi, yamiu apan ma'ola'a al᷊al᷊eo!’ ”

²⁴“Ei, taumata apan maaringikka wisara-U indi, wuṛṛu tuttuṛṛutta, i tou ere taumata pande apan napararisikku wal᷊ene su wowon batu.

²⁵Su tempo nanguranna, wuṛṛu nammanawangnga lapiddu anginna ma'ikkatta tinumiuppa maṛṛa'an wal᷊e udde, bal᷊e udde tawe naṛṛa'a ana waugu niaparisikka su wowom batu.

²⁶Wuṛṛu taumata apan maddaringikka wisara-U indi, arawe tawe tumuṛṛutta, i tou nassul᷊ungngu taumata woddo apan napararisikku wal᷊ene su wowon anne.

²⁷Su tempo nanguranna wuṛṛu nammanawangnga lapiddu anginna ma'ikkatta tinumiuppa su wal᷊e udde, wal᷊e udde naṛṛa'a. Wuṛṛu ahahohakke wahewalla atonna!”

²⁸Panginsueanne Mawu Yesus nangillol᷊o mangngaṛṛa'a, wuṛṛu manga taumata apan isudde lembo naherangnga naaringikka al᷊aṛṛang-Nge.

²⁹Ana waugu i Tou mangngaṛṛa'a ringannu saṛṛaungnge tawe ere manga hurun agama mangitou.