Read Talaud MARKUS 10 Bible Online

MARKUS 10 - Talaud bible

MARKUS 10

¹Wua'udde Mawu Yesus nanantangken tampa udde, wuṛṛu inaite su wageangngu leta'u Yudea wuṛṛu su wageangngu leta'u samba'an Sal᷊ukku Yordan. Taumata manambonirumanta apia maṛṛimpulunna mammal᷊iwutta Mawu Yesus. Wuṛṛu ere wiasane Mawu Yesus mangngaṛṛa'a si mangitou.

²Manga pira taumatan Farisi nirumanta lai mappaasal᷊a Mawu Yesus. I mangitou naiwal᷊o, “Tumuṛṛuttu titan agamang kite, wotongewe taumata manindo awingnge?”

³Mawu Yesus sinumimbakka, “I Musa nangagillu parenta apa si yamiu?”

⁴“I Musa namalan taumata manindo awingnge, sambal᷊iate mamoṛṛettu surattu sindo rorone,” sasimbakki mangitou.

⁵“Musa namoṛṛettu parenta udde ana waugu yamiu tumanite masahadda pangaṛṛaanne,” wisara Mawu Yesus si mangitou.

⁶“Arawe su paarorone, su tempo Ruata nandiaddi taumata, niwalo manungku ‘Ruata nandiaddi si mangitou esakka wuṛṛu wawine.

⁷Ana waugu udde esakka sarun manantangngu inangnga iamangnge wuṛṛu uaaukke ringannu awingnge,

⁸ne itarua naola'e sambau.’ Nariaddi, i mangitou wal᷊ine ruang katou lai, awe'e sambau.

⁹Ana waugu udde, apa apan suete ni'aukku Ruata, tate wotonge iapaatal᷊ein taumata!”

¹⁰Napawe i mangitou sinumuttate su wal᷊e, manga mallal᷊aṛṛenggen-Ne naiwal᷊ote Mawu Yesus su ola'u hatto udde.

¹¹Mawu Yesus nabbisara si mangitou, “Isai manindo awingnge see maawingngu wawine waine, taumata udde sinumandaga su saruannu awingnge paarorone udde.

¹²Aroddi lai wawine apan nanindo awingnge see maawingnga apia ringannu esakka waine, i tou lai sinumandaga.”

¹³Pia manga pira taumata nangapiddu al᷊aṛṛana'a ringannu Mawu Yesus tadea'u i Tou mamita wuṛṛu mangal᷊amatta si mangitou. Arawe mallal᷊aṛṛenggennu Mawu Yesus namul᷊o manga taumata udde.

¹⁴Naasilo olangnge udde Mawu Yesus namul᷊o see i Tou nabbisara mallal᷊aṛṛenggen-Ne, “Wala'e al᷊aṛṛana'a udde rumanta ringang-Ku! Arie passingara'a i mangitou, ana waugu ete taumata ereindi maola'a lal᷊oṛṛon araratuannu Ruata.

¹⁵Naunge indi! Isai tawe sumaruanna Ruata ere sangkatou ana'a, tawe maola'a lal᷊oṛṛon araratuannu Ruata.”

¹⁶Napawe suete nabbisara aroddi, Mawu Yesus naṛṛa'upe al᷊aṛṛana'a udde, wua'udde nangadon lima-Ne su wowom pua mangitou sangkatou-sangkatou wuṛṛu nangal᷊amatte si mangitou.

¹⁷Napawe Mawu Yesus nanassute lai amatanni mangitou, nirumantate sangkatou tuttatal᷊angnga inai ringannu Mawu Yesus. Taumata udde inumal᷊intuda su saruannu Mawu Yesus wuṛṛu naiwal᷊o, “Huru apan mapia, ya'u ma'ola'a apa tadea'u wotongnge maasomba pabbawiakka tutune wuṛṛu saran mal᷊annu-l᷊annu?”

¹⁸“Anio i'o mabbisara i Ya'u mapia?” aiwal᷊o Mawu Yesus. “Tawedu apan mapia, tumba'u Ruata sassane.

¹⁹I'o masingkatte manga parenta Ruata, ‘Arie pamate, arie passandaga, arie panna'o, arie mattiala awusu, arie pallinga, pangaddatta iamangngu wuṛṛu inangngu.’ ”

²⁰“Iamangnga Huru,” unnu taumata udde, “anambon parenta udde suete tinuṛṛutangku ro'en ta'e dario'a.”

²¹Mawu Yesus nanaile taumata udde ringannu aakkanna see nabbisara, “Ete inolaanna sambau lai apan sarun olaannu. Roote wal᷊ua'a anambon darotongngu; onggol᷊a'e roinne su taumata asiangnga, wuṛṛu i'o sarun maasomba darotongnga su surga. Wua'udde rantate ṛundingante si Ya'u.”

²²Naaringikka Mawu Yesus nabbisara aroddi, taumata udde sinumassilla, see nanantangken tampa udde ringannu naungnga massusa ana waugu i tou tumaniten ala.

²³Ne Mawu Yesus nanutudde mallal᷊aṛṛenggen-Ne see nabbisara si mangitou, “Masahadda atonna taumata ala maola'a lal᷊oṛṛo n araratuannu Ruata!”

²⁴Manga mallal᷊aṛṛenggen-Ne naherangnga naaringikka wisara Mawu Yesus. Arawe Mawu Yesus nabbisara apia, “Al᷊aṛṛana'u, masahadda atonna maola'a lal᷊oṛṛon araratuannu Ruata!

²⁵Malluasanna sambau unta sumutta su loṛṛangngu raraṛṛumma wuassu sangkatou ala sumutta su Runia Wakku Ruata.”

²⁶Manga wisara Mawu Yesus udde naaherangnga mallal᷊aṛṛenggen-Ne, na'oman sara i mangitou naaiwal᷊ote sangkatou ringannu sangkatou. “Amungkangngu aroddi, isai wotongnge masal᷊amatta?”

²⁷Mawu Yesus nanutuda si mangitou wuṛṛu sinumimbakka, “Su taumata udde tawe maola'a arawe su Ruata udde mangke maola'a; sarangkanambone wotongnge maola'a su Ruata.”

²⁸See Petrus nabbisara, “Pa'ellega, i yami suete nanantangngu sarangkanambone ana waugu mallaṛṛenggenna Iamangnga.”

²⁹Mawu Yesus nabbisara, “Pangimante: taumata apan suete nanantangngu amonanne, ara'e tuṛṛangnge esakka ara'e tuṛṛangnge wawine, ara'e inangnge ara'e iamangnge, ara'e al᷊aṛṛanangnge, ara'e lai manga wawail᷊anne ana waugu i Ya'u wuṛṛu ana waugu Watti'u Al᷊al᷊uassa wuassu Ruata,

³⁰taumata udde sarun manengkamma lembon anamboanne orassa indi. I tou sarun maasomba paaṛṛasutta pia lebbene anambon bal᷊ene, tuṛṛangnge esakka, tuṛṛangnge wawine, inangnge, al᷊aṛṛanangnge, wawail᷊anne, — wuṛṛu asasusa lai. Wuṛṛu paṛṛangatta su tempo addantane, taumata udde sarun manengkamma pabbawiakka tutune wuṛṛu saran mal᷊annu-l᷊annu.

³¹Arawe manambo taumata apan orassa indi paarorone sarun maola'a panginsueanne wuṛṛu manambo apan orassa indi panginsueanne sarun maola'a paarorone.”

³²Mawu Yesus wuṛṛu mallal᷊aṛṛenggen-Ne tantal᷊anna su amatanna watukku Yerusalem. Mawu Yesus u'amatta paarorone, wuṛṛu mallal᷊aṛṛenggen-Ne sussinggawangnga abbi. Wuṛṛu manga taumata apan mallaṛṛenggenna si mangitou wuassu liudde lai matta'utta. Wua'udde Mawu Yesus namago apia mallal᷊aṛṛenggen-Ne sassane wuṛṛu namasingkatta si mangitou apa apan sarun mariaddi sal᷊immurine su riri-Ne.

³³“Padaringikka,” wisara-Ne, “I ite orassa indi tantal᷊anna mattudan Yerusalem. Poiaroddi Ana'u Taumata sarun itantilla su manga imam tembonanne wuṛṛu manga hurun agama. I Tou sarun iṛṛuumanna ma'oman sara mate, wua'udde itantilla su manga taumata wal᷊ine Yahudi.

³⁴I mangitou sarun mangal᷊uandaga si Tou, wuṛṛu mangaddu si Tou, manansara si Tou, wuṛṛu mangarussan Tou. Arawe su allo atallune i Tou sarun mabangunna apia.”

³⁵See Yakobus wuṛṛu i Yohanes, eteudde al᷊aṛṛana'i Zebedeus, nirumanta ringannu Mawu Yesus, “Iamangnga Huru,” unni tarua, “pia inolaanna apan ipaapulung kami olaanni Iamangnga si yami.”

³⁶“Apa ipaapulung kamiu olaang-Ku si yamiu?” aiwal᷊o Mawu Yesus.

³⁷I mangitou sinumimbakka, “I yami maapulu uma'ianna su uananna wuṛṛu su aiṛṛin Iamangnga, amungkangngu Iamangnga ua'iante su adderan araratuanna apan mawantuga.”

³⁸“I yamiu wagga apa apan radoronganni yamiu,” wisara Mawu Yesus si mangitou. “Wotongnge yamiu ma'inumma wuassu mangkon asasusa apan sarun inumang-Ku wuṛṛu sumutta sulal᷊ummu papaṛṛangnga apan sarun suttang-Ku?”

³⁹“Wotongnge,” sasimbakki mangitou. Ne Mawu Yesus nabbisara apia si mangitou, “Atonna i yamiu sarun ma'inumma wuassu mangkon asasusa apan sarun inumang-Ku wuṛṛu sumutta sulal᷊ummu papaṛṛangnga apan sarun suttang-Ku.

⁴⁰Arawe su ola'u isai apan uma'ianna su uananna ara'e su aiṛṛi-U, udde wal᷊ine i Ya'u manantunna. Ruata apan manantunna isai-sai sarun uma'ianna sumanga tampa udde.”

⁴¹Napawe sire mapul᷊o mallal᷊aṛṛenggennu Mawu Yesus waine udde naaringikka hatto udde, i mangitou nasa'u i Yakobus wuṛṛu i Yohanes.

⁴²Nariaddi Mawu Yesus namagote si mangitou sarangkanambone, see nabbisara, “I yamiu masingkatta manungku manga piaṛṛa'u walahanna apan tawe maaillal᷊a Ruata, mammaṛṛangnga tumanangnge. Wuṛṛu tembonanni mangitou mannasa'i mangitou.

⁴³Arawe i yamiu tawe wotongnge ma'ola'a aroddi! Arawe, taumata apan maapulu maola'a tembonanne su wallatti i yamiu, i tou sarun maola'a mangangimbenu.

⁴⁴Wuṛṛu taumata apan maapulu maola'a paarorone su wallatti yamiu sarun maola'a allangngu awadaalla.

⁴⁵Ana waugu Ana'u Taumata lai nirumanta wal᷊ine ana see imbeanna. I Tou nirumanta mangimbe wuṛṛu manantillu niawa-Ne ipanubussa rosan taumata nambo.”

⁴⁶I mangitou na'omate su Yerikho. Wuṛṛu su tempo Mawu Yesus ringannu manga mallal᷊aṛṛenggen-Ne see taumata nambo nanantangken soa udde, sangkatou wuta tantal᷊anna ua'ianna madoro-rorongnga su winggin dal᷊anna. Aranne Bartimeus, ana'i Timeus.

⁴⁷Napawe i tou naaringikka manungku taumata sinumabbi udde Mawu Yesus taumata Nazaret, i tou nangngintul᷊i, “Mawu Yesus Ana'i Daud! Akkanaawe i ya'u!”

⁴⁸I tou niwul᷊oannu awadaalla wuṛṛu niapal᷊aannaba. Arawe a'atambanna lai aikkanne i tou mangngintul᷊i, “Ana'i Daud, akkanaawe i ya'u!”

⁴⁹Ne Mawu Yesus nattaalle see nabbisara, “Wagoite i tou.” Nariaddi i mangitou namagote taumata wuta udde. I mangitou nabbisara si tou, “Paal᷊annabe! I'o wabagoannu Mawu Yesus, pabbuatte!”

⁵⁰Taumata wuta udde nallomboten jubahne, see nal᷊iha-l᷊ihakka nirumarisikka inaite ringannu Mawu Yesus.

⁵¹“Apa ipaapulunu Ta'u olaang-Ku si'o?” aiwal᷊o Mawu Yesus si tou. Taumata wuta udde sinumimbakka, “Iamangnga Huru, i ya'u maapulu maasilo.”

⁵²“Roote,” unnu Mawu Yesus, “Ana waugu i'o mangngimanna si Ya'u, i'o napiate.” Su orassa udde lai taumata wuta udde naasilote. See i tou tinumantalongke Mawu Yesus su lal᷊anna.