Read Talaud MARKUS 15 Bible Online

MARKUS 15 - Talaud bible

MARKUS 15

¹Ruaallo atonna, manga Mallaṛṛuungngu Agama nasutta lai manga imam tembonanne, manga piaṛṛa'u taumatan Yahudi wuṛṛu manga hurun agama mal᷊iha-l᷊ihakka na'ire. I mangitou naṛṛapussa Mawu Yesus, wua'udde nangapiddi Tou wuṛṛu tinantilla si Pilatus.

²Pilatus naiwal᷊o Mawu Yesus, “Atonna I'o ratun taumatan Yahudi?” “Aroddi ere su wisaranu,” sasimbakku Mawu Yesus.

³Manga imam tembonanne nabal᷊o manambo ala'e su ola'u Mawu Yesus.

⁴See Pilatus naiwal᷊o apia Mawu Yesus. “I'o maddiri sumimbakka? Pa'ellega sangkura aalae mangitou ipangalae-Nu!”

⁵Arawe Mawu Yesus tawe sumimbakka sara n adio'a, na'oman sara Pilatus naherangnga.

⁶Suapan pia Ramean Paskah, inanaramanne i Pilatus mammallossu sangkatou ṛuumanna tumuṛṛuttu tatebo'u taumata nambo.

⁷Sulal᷊ummu tuttupanna su wallattu manga lumal᷊awangnga apan naola'a taṛṛa pate su tempon passaseetta, pia sangkatou aranne i Barabas.

⁸Taumata manambo na'ammulla wuṛṛu nadorongnga si Pilatus tadea'u i tou mamallossu sangkatou uaṛṛuumanna ere su inanaramanne.

⁹I Pilatus naiwal᷊o si mangitou, “I yamiu maapulu i ya'u mamallossu ratun taumatan Yahudi udde si yamiu?”

¹⁰Ana waugu i Pilatus naatutukka manungku manga imam tembonanne nanantillu Mawu Yesus si tou ana waugu naungngi mangitou tawe mal᷊uassa.

¹¹Arawe manga imam tembonanne mammono'a awada'alla tadea'u madorongnga i Pilatus mamallossi Barabas si mangitou.

¹²Ne Pilatus nabbisara apia su taumata nambo udde, “Amungkangngu aroddi, i ya'u ṛinone ma'ola'a apa su taumata apan isassagong kamiu ratun taumatan Yahudi udde?”

¹³I mangitou inumui, “Arussa'a i Tou!”

¹⁴“Arawe apa al᷊al᷊eone?” aiwal᷊on Pilatus. See i mangitou inumui lembo ma'ikkatta lai, “Arussa'a i Tou!”

¹⁵I Pilatus maapulu mappa'al᷊uassu taumata nambo udde, ne i tou namallossen Barabas si mangitou. Wua'udde i tou nandolokku taumata namuulla Mawu Yesus see tinantilli tou iapaarussa.

¹⁶Mawu Yesus niapidde manga tantara su tampa mallaṛṛuungnga su wal᷊e gubernure. Wua'udde tantara niwagoante ma'ammulla.

¹⁷See i mangitou nalluṛṛen jubah ungu su Mawu Yesus, wuṛṛu niolaanna araposan araratuanna wuassu manga ranna ṛoaanna, wua'udde nitaappa su pua Mawu Yesus.

¹⁸Wua'udde, i mangitou nangadatta si Tou, “Sal᷊amatta ratun taumatan Yahudi!” unni mangitou.

¹⁹I mangitou namuulla pua Mawu Yesus ringannu ta'inna, see i mangitou nangaddu si Tou wuṛṛu nassubba su saruanni Tou.

²⁰Napawe suete nannalangnga Mawu Yesus, i mangitou nalluatte jubah ungu udde see nilluṛṛeanten laung-Nge sassane. Wua'udde i Tou niapidda su liudde ana waugu iarussa.

²¹Su tangngan dal᷊anna i mangitou namata'u sangkatou iapapasanna arussa Mawu Yesus. Taumata udde wakkute wuassu ampungnga inai watukku soa. (Aranne i Simon, — wuassu Kirene — iamangngi Aleksander wuṛṛu i Rufus.)

²²Mawu Yesus niapidda su sambau tampa aranne Golgota, atappasanne “Tampan Tanggilal᷊a”.

²³Isudde i mangitou napa'inummu anggore lal᷊o'annu awawangngi, arawe Mawu Yesus maddiri ma'inumma anggore udde.

²⁴Wua'udde i mangitou nangarussan Tou, wuṛṛu nattahia laung-Nge ringannu ni'undi tadea'u maatantunnu wageangngu sangkatou-sangkatou.

²⁵Mawu Yesus niarussa puulla sio rua'allo.

²⁶Su wowon arussa niwoṛṛeta su ola'u alae si Tou, eteudde: “Ratun Taumatan Yahudi”.

²⁷Su sambau ringannu Mawu Yesus, i mangitou lai nangarussan ruang katou taṛṛa ṛampassa; sangkatou su uananna wuṛṛu sangkatou lai su aiṛṛi. [

²⁸Ringannu aroddi nariaddite apa apan uawoṛṛetta sulal᷊ummu Wuke Susi, eteudde: “I Tou sassunnanna lai nareengnga taumata lal᷊eo.”]

²⁹Manga taumata apan sussabbi isudde mangke uapapa'ilingnga wuṛṛu manggal᷊usa'a Mawu Yesus. I mangitou nabbisara, “Ei, I'o apan manggohakku Wal᷊en Ruata wuṛṛu mapaarisikka sulal᷊ummu tallu allo.

³⁰Annama'o lintukka wuassu arussa wuṛṛu panal᷊amatta riri-Nu!”

³¹Aroddi lai manga imam tembonanne wuṛṛu manga hurun agama mangngeetta Mawu Yesus. I mangitou uahahatto sangkatou ringannu sangkatou, “I Tou ma'asal᷊amatta taumata waine arawe tawe maasal᷊amatta riri-Ne sassane!

³²Amungkangngu i Tou ratun Israel, Ratum Punnu Sal᷊amatta, mappianne i Tou orassa indi lumintukka wuassu arussa udde, tadea'u i yami maasilo wuṛṛu mangngimanna si Tou!” Manga taumata apan niarussa lai su sambau ringannu Mawu Yesus manggal᷊usa'a Mawu Yesus.

³³Su allo allattune, al᷊annune tallung ka'orassa ahewallu wanua udde naddandumma.

³⁴Wuṛṛu su puulla tatallu wawallo, Mawu Yesus inumui ringannu tingikka ma'ikkatta, “Eloi, Eloi, lama sabakhtani?” atappasanne, “Oh Ruata'u, oh Ruata'u, anio I'o nanantang-Ku?”

³⁵Manga pirang katou isudde naaringikka sasal᷊iomanna udde, wuṛṛu nabbisara, “Padaringikka, i Tou mamago si Elia!”

³⁶Sangkatou wuassi mangitou mal᷊iha-l᷊ihakka nanganu wungan sahatta, see inammo sulal᷊ummu anggore mapakkada. Wua'udde wungan sahatta udde niusu'u pentakku alu see tinogokka su wiwikku Mawu Yesus, ringannu wisarane, “Ṛaddoi, wette i ite ma'ellega tanne i Elia rumanta manossokki Tou wuassu arussa udde.”

³⁷See Mawu Yesus nangintul᷊i, wuṛṛu wua'udde natete.

³⁸Pampele ua'ele su Wal᷊e Mawu nahesa'a natahia darua, wua'doso na'oman sara wowane.

³⁹Tembonannu tantara uarisikka su saruannu al᷊ungngu arussa udde, naasilo ereapa Mawu Yesus nate. Tembonannu tantara arae perwira udde nabbisara, “Atonna-tonna taumata indi Ana'u Ruata!”

⁴⁰Isudde lai pia manga pira wawine tantal᷊anna ua'ellega sarangkanambone udde wuassu tampa marau. Su wallatti mangitou pia i Salome, i Maria Magdalena, wuṛṛu i Maria inangngi Yakobus apan maddario'anna wuṛṛu i Yoses.

⁴¹Ete i mangitou manga wawine apan uatantalongnga wuṛṛu nantul᷊ungngu Mawu Yesus, su tempo i Tou ta'e su Galilea, wuṛṛu pia manambo lai manga wawine waine isudde apan suete nirumanta su Yerusalem su sambau ringannu Mawu Yesus.

⁴²Allo maṛṛabite napawe Yusuf wuassu Arimatea nirumanta. I tou nareengnga lai sangkatou Mallaṛṛuungngu Agama apan a'addatanna. I tou lai tantal᷊anna uaṛṛado tempone Ruata manattakka mamarenta ere sangkatou Ratu. Allo udde allo Pananaddianna (eteudde allo taambe allon Sabatta). Ana waugu udde ringannu waṛṛani Yusuf sinumaruanna si Pilatus wuṛṛu madorongnga winal᷊unannu Mawu Yesus.

⁴³

⁴⁴I Pilatus naherangnga naaringakka Mawu Yesus natete. Nariaddi i tou nandolokku taumata namago piaṛṛa'u tantara wuṛṛu naiwal᷊o si tou apa Mawu Yesus mal᷊annute nate.

⁴⁵Napawe naaringikka wawal᷊on piaṛṛa'u tantara udde, i Pilatus namalan Yusuf mangal᷊appa winal᷊unannu Mawu Yesus.

⁴⁶See i Yusuf namallite mal᷊aṛṛenessa papi'unne wuassu linenna al᷊ussa wuṛṛu napawe suete nallintukku winal᷊unannu Mawu Yesus, nipi'unten mal᷊aṛṛenessa udde. Wua'udde i tou nangaddon winal᷊unanna udde sulal᷊ummu sambau labingnga apan niola'a sulal᷊ummu wuiddu batu. Wua'udde i tou nanal᷊inggin sambau batu bahewa nipaṛṛapingnga ngaran lal᷊abinganna udde.

⁴⁷Tantal᷊anna udde i Maria Magdalena wuṛṛu i Maria inangngi Yoses mannutukka suapa tampa Mawu Yesus niaddo.