Read Talaud MARKUS 3 Bible Online

MARKUS 3 - Talaud bible

MARKUS 3

¹Mawu Yesus nabelengke apia su wal᷊em pattataṛṛamawuanna. Isudde pia sangkatou taumata limane lome samba'a.

²Isudde lai pia taumata apan maddea'a pasasal᷊a Mawu Yesus, tadea'u wotongnge mangalaen Tou. Nariaddi i mangitou sidutu ua'ellega si Tou, apa I tou mapaapian taumata su allon Sabatta.

³Mawu Yesus nabbisara su taumata apan limane lome samba'a udde, “Wette darisikke isindi, su saruanne.”

⁴See i Tou naiwal᷊o manga taumata isudde, “Tumuṛṛuttu agama, i ite wotongnge mammanara su allon Sabatta? Ma'ola'a apapia ara'e ma'ola'a al᷊al᷊eo? Manal᷊amatta taumata ara'e mamate?” I mangitou mal᷊annaba.

⁵Ringannu nasa'u Mawu Yesus na'ellega taumata apan uapal᷊iwutta si Tou, arawe i Tou nasusa lai, ana waugu i mangitou tumanite maattikka puane. See i Tou nabbisara taumata udde, “Ul᷊uṛṛa'e limanu.” Taumata udde nangul᷊ukken limane see limane udde napiate.

⁶Ne manga taumatan Farisi nanantangken wal᷊em pattataṛṛamawuanna udde see mal᷊iha-l᷊ihakka na'ire ringannu sire pira taumatan Herodes, pandumanne mamate Mawu Yesus.

⁷Mawu Yesus wuṛṛu mallal᷊aṛṛenggen-Ne inaite nabelengnga wuassu Ranon Galilea. Ne manambo atonna taumata wuassu Galilea inai mallaṛṛenggenna Mawu Yesus. Manambo lai nirumanta wuassu Yudea,

⁸wuassu Yerusalem, wuassu wageangngu leta'u Idumea, wuṛṛu wuassu wageangngu leta'a samba'an ra'i Sal᷊ukku Yordan, wuṛṛu wuassu manga soa su Tirus wuṛṛu Sidon. I mangitou sarangkanambone nirumanta ringannu Mawu Yesus, ana waugu i mangitou naaringikka manga inolaanna apan suete niola'u Mawu Yesus.

⁹Manga taumata udde tumanite manambo, na'oman sara Mawu Yesus nandolokku manga mallal᷊aṛṛenggen-Ne niapasaddia saalanna sa'ean-Ne, ana waugu aṛṛengenne i Tou iasesse'u taumata nambo udde.

¹⁰I Tou napaapian taumata nambo, na'oman sara manga taumata marada'a uasasesse'a maddea'a tadea'u maa'agassa si Tou.

¹¹Wuṛṛu manga taumata apan niasuttannu ghaṛṛaho lal᷊eo, napawe maasilo si Tou lapiddu niumal᷊intudda su saruanni Tou wuṛṛu niumui, “Ete I'o Ana'u Ruata!”

¹²Arawe Mawu Yesus mangke manningaddu ghaṛṛaho lal᷊eo udde mamasingkatta isai i Tou.

¹³Wua'udde Mawu Yesus sinumaate su sambau wuidda, wuṛṛu namagote manga taumata apan pappanduman-Ne. Manga taumata udde nirumanta,

¹⁴see i Tou namilete wuassu wallatti mangitou sire mapul᷊o dua su atoune. Wisara-Ne, “I Ya'u mamile si yamiu, tadea'u i yamiu maṛṛundinganna si Ya'u, tadea'u I Ya'u mandolokki yamiu mamasingkattu Watti'u Al᷊al᷊uassa wuassu Ruata,

¹⁵wuṛṛu i yamiu sarun maasomba taṛṛino ipallimbuakka manga ghaṛṛaho lal᷊eo.”

¹⁶Ete indi arannu sire mapul᷊o dua taumata udde: i Simon (apan isassago lai Petrus),

¹⁷i Yakobus wuṛṛu i Yohanes tuṛṛangnge, eteudde al᷊aṛṛana'i i Zebedeus (i mangitou indi inonggol᷊annu aranna Boanerges atappasanne “ana'u rallu'a”),

¹⁸i Andreas, i Filipus, i Bartolomeus, i Matius, i Tomas, i Yakobus ana'i Alfeus, i Tadeus, i Simon Patriot,

¹⁹wuṛṛu i Yudas Iskariot apan nandal᷊eo Mawu Yesus.

²⁰Wua'udde Mawu Yesus napul᷊ete su wal᷊e. Arawe taumata nambo nirumanta lai na'ammulla, na'oman sara Mawu Yesus wuṛṛu mallal᷊aṛṛenggen-Ne tawe naa'anna.

²¹Manga taumata udde nabbisara, “I Tou nabewate!” Wuṛṛu napawe manga tuṛṛang-Nge naaringikka olangnge udde, i mangitou nirumanta nangal᷊appa si Tou.

²²Manga hurun agama apan nirumanta wuassu Yerusalem nabbisara, “I Tou niasuttannu Beelzebul! Tembonannu manga ghaṛṛaho lal᷊eo apan mangngagillu taṛṛino si Tou ipallimbuakka ghaṛṛaho lal᷊eo.”

²³Ne Mawu Yesus namago taumata nambo udde, wuṛṛu nabbati'a si mangitou manga pira sasumandingnga. “Ereapa wotongnge ghaṛṛaho lal᷊eo mallimbuakka ghaṛṛaho lal᷊eo,” unnu Mawu Yesus.

²⁴“Amungkangngu sambau araratuanna mapesangnga sulal᷊ummu pirang kawageanganna apan uasaseetta, araratuanna udde tawe maataṛṛangnga mal᷊annu.

²⁵Wuṛṛu amungkangngu sulal᷊ummu lal᷊oṛṛon bal᷊e, tawe paddarame wuṛṛu manga lal᷊oṛṛone uasaseetta, lal᷊oṛṛon bal᷊e udde sarun massongkakka.

²⁶Amungkangngu sulal᷊ummu araratuannu Setanna pia passaseetta wuṛṛu pabbawawul᷊o, araratuanna udde tawe mal᷊annu wuṛṛu sarun mal᷊ihakka mawul᷊i.

²⁷Tawe saran sangkatou wotongnge maasutta sulal᷊ummu wal᷊en sangkatou taumata matohassa wuṛṛu mangaṛṛo darotongnge amungkangngu i tou tawe malliu ṛoro maṛṛapussa taumata matohassa udde. Wua'udde i tou wotongngete mangaṛṛo darotongnge.

²⁸Asingkatewe! Amungkangngu taumata ma'ola'a rosa wuṛṛu mangngadio'a, i tou wotongnge aampunganna.

²⁹Arawe amungkangngu i tou mangngadio'a Ghaṛṛahon Ruata, i tou tawe aampunganna! Ana waugu mangngadio'a udde rosa ma'oman sara mal᷊annu-l᷊annu.” (

³⁰Mawu Yesus nabbisara aroddi ana waugu pia taumata mabbisara manungku Mawu Yesus niasuttannu ghaṛṛaho lal᷊eo.)

³¹Wua'udde inangnga wuṛṛu manga tuṛṛangngu Mawu Yesus nirumantate. I mangitou uaraṛṛaddo su liudde wuṛṛu nandolokku taumata iapawago Mawu Yesus.

³²Su tempo udde manambo taumata tantal᷊anna ua'ianna uapal᷊iwutta Mawu Yesus. I mangitou nabbisara si Tou, “Iamangnga, inangngu wuṛṛu manga tuṛṛangngi Iamangnga wowa su liudde. I mangitou maddea'a Iamangnga.”

³³Mawu Yesus sinumimbakka, “Isai inang-Ku? Isai manga tuṛṛang-Ku?”

³⁴Wua'udde i Tou nanaile manga taumata apan ua'ianna uapal᷊iwutta si Tou see nabbisara, “Ete indi inang-Ku wuṛṛu manga tuṛṛang-Ku!

³⁵Taumata apan tuttuṛṛutta apulun Ruata, ete i tou tuṛṛang-Ku esakka, tuṛṛang-Ku wawine, wuṛṛu inang-Ku.”