Read Talaud MARKUS 7 Bible Online

MARKUS 7 - Talaud bible

MARKUS 7

¹Sambageanganna taumatan Farisi wuṛṛu manga pira hurun agama wuassu Yerusalem, nirumanta ringannu Mawu Yesus.

²I mangitou naasilo sire pira mallal᷊aṛṛenggennu Mawu Yesus u'anna ringannu lima tawe niukkassa tumuṛṛuttu atorannu agama, eteudde tawe nangukkassa lima rorone tumuṛṛuttu atorannu agama.

³Manga taumatan Farisi, aroddi lai manga taumatan Yahudi, matuṛṛutta atonna su addatta inanaramannu iupungngu al᷊amona mangitou. I mangitou tawe umanna, amungkangngu taambe nangukkassa lima tumuṛṛuttu atoranna apan suete nitantunna.

⁴Sarannapa niwallianna su pasakka tawe annananna, amungkangngu taambe niukkassa rorone. Wuṛṛu manambo atoranna waine wuassu iupungngu al᷊amona mangitou apan aagasanni mangitou matoha-tohassa, ere lai atorannu pangangukkassa halasi, mangko wuṛṛu manga sarannapa wuassu witu'a.

⁵Ana waugu udde manga taumatan Farisi wuṛṛu manga hurun agama naiwal᷊o Mawu Yesus, “Anio mallal᷊aṛṛenggen-Nu udde u'anna tawe mangukkassa lima? Anio i mangitou tawe tumuṛṛutta addatta inanaramannu iupungngu al᷊amonang kite?”

⁶Mawu Yesus sinumimbakka, “I yamiu taumata lilangkamal᷊e'a! Naṛṛino atonna apa apan suete niapasingkatti Yesaya su ola'i yamiu eteudde, ‘Arendi unnu Ruata, Manga taumata udde tumba'u massubba si Ya'u ringannu manga wisara, arawe naungngi mangitou marau wuassia-U.

⁷Tawe gunane i mangitou massubba si Ya'u, ana waugu i mangitou mangngaṛṛa'u atorannu taumata paṛṛimau napa udde ere atorang-Ku!’

⁸Manga parentan Ruata tawe pandumanni yamiu, arawe manga atorannu taumata aagasanni yamiu matoha-tohassa.”

⁹See Mawu Yesus nabbisara apia, “Yamiu pande atonna manol᷊a'u parentan Ruata tadea'u wotongnge mannohassa al᷊aṛṛa'i yamiu sassane.

¹⁰I Musa suete nangagillu parenta indi, ‘Pangaddatta iamangngu wuṛṛu inangngu,’ wuṛṛu, ‘Isai-sai mabbisara iamangnga inangnge ṛinone iṛṛuumanna ma'oman sara pateanna.’

¹¹Arawe i yamiu mangngaṛṛa'a: Amungkangngu taumata mabbisara hagurangnge, ‘Apa ṛinone ta'u ianggila su iamangnga wuṛṛu inangnga, sueten ta'u nianggilla su Ruata,’

¹²ne yamiu napaal᷊iun taumata wuassu manarane mantul᷊ungngu hagurangnge.

¹³Nariaddi ringannu al᷊aṛṛangngu sassane, apan nianggillu su manga taumata, i yamiu mapaawul᷊im bisara Ruata. Ta'e manambo lai inolaanna ereindi apan a'olaanni yamiu.”

¹⁴See Mawu Yesus namagote paassa lai taumata nambo udde wuṛṛu nabbisara si mangitou, “Padaringikka tadea'u maasunna!

¹⁵Tawe saran sambau wuassu liudde apan sumutta sulal᷊ummu taumata wotongnge maarosa si tou. Arawe, apan sinumabangnga wuassu sangkatou eteudde ma'arosa si tou. [

¹⁶Nariaddi, amungkangngu pia tal᷊inga, padaringikka.]”

¹⁷Su tempo Mawu Yesus nanantangken taumata nambo udde, wuṛṛu sinumuttate su wal᷊e, mallal᷊aṛṛenggen-Ne naiwal᷊ote si Tou su ola'u pandummu sasumandingnga udde.

¹⁸Ne Mawu Yesus nabbisara si mangitou, “Mangal᷊ene i yamiu taambe lai naasunna? Apa i yamiu tawe maasunna manungku apan sinumutta sulal᷊ummu sangkatou taumata tawe wotonge maaola'a taumata udde marosa?

¹⁹Ana waugu sinumutta udde tawe sinumabbi su naungnga, arawe sinumabbi su tianna wuṛṛu wua'udde sinumabangnga apia.” Ringannu wisara udde, Mawu Yesus napaal᷊iatta'a manungku al᷊awo'u anna wotongnge annananna.

²⁰See Mawu Yesus nabbisara apia, “Apan sinumabangnga wuassu taumata, eteudde maarosa si tou.

²¹Ana waugu wuassu lal᷊umme eteudde wuassu lal᷊ummu naungnga, sumabangnga ṛingiṛṛanna lal᷊eo apan panginsueanne taumata ma'ola'a al᷊al᷊eo, manna'ote, mammate,

²²sussandaga, mallinga, mangngadio'a, ma'ola'a al᷊awo'u al᷊al᷊eo, wal᷊iu, tawe addanne, mangngune mawarabunga wuṛṛu masahadda pangaṛṛaanne.

²³Anambon al᷊al᷊eo udde sinumabangnga wuassu lal᷊umme, wuṛṛu eteudde ma'aola'a taumata marosa.”

²⁴Wua'udde Mawu Yesus nanantangken tampa udde, wuṛṛu inaite su wageangngu leta'a maranin soa Tirus. I Tou sinumutta su sambau wal᷊e wuṛṛu maddiri asingkatanna manungku i Tou uatana'a isudde. Arawe i Tou tawe mappa'imbuni.

²⁵Sangkatou inangnga, apan pia anangnge wawine niasuttannu ghaṛṛaho lal᷊eo, naaringikka su ola'u Mawu Yesus. I tou nirumanta ringannu Mawu Yesus wuṛṛu nassubba su saruan-Ne,

²⁶lapiddu sinumal᷊ande tadea'u Mawu Yesus mallimbuakka ghaṛṛaho lal᷊eo wuassu ana'a udde. Wawine udde wal᷊ine taumatan Yahudi, inasungkangnga su wageangngu leta'u Fenisia su Siria.

²⁷Mawu Yesus nabbisara si tou, “Al᷊aṛṛana'a ṛinone anggil᷊annu anna rorone. Lal᷊eo manganu annu al᷊aṛṛana'a ilombo su asu.”

²⁸“Tuangnga,” sasimbakku wawine udde, “manga asu su al᷊ungngu medda lai u'anna manga lambe apan ia'ema'u al᷊aṛṛana'a!”

²⁹See Mawu Yesus nabbisara si tou, “Ana waugu sasimbakku udde, apul᷊ete; ghaṛṛaho lal᷊eo sinumabangke wuassu anangngu!”

³⁰Inangnga udde napul᷊ete. Su wal᷊e i tou naaratingnga ana'i tou mattiilla su lallowanganna, wuṛṛu ghaṛṛaho lal᷊eo, atonna-tonna sinumabangke wuassu ana'a udde.

³¹Wua'udde Mawu Yesus nanantangken wageangngu leta'u Tirus, wuṛṛu nanassukku amatanne sinumabbi Sidon watukku Ranon Galilea. I Tou namile lal᷊anna sumabbi wageangngu leta'u Mapul᷊o Soa (Dekapolis).

³²Isudde taumata nangapiddu sangkatou mou wuṛṛu wengella ringanni Tou. I mangitou madorongnga Mawu Yesus mangadon lima-Ne su taumata udde.

³³Mawu Yesus nangapiddu taumata udde nangindau wuassu taumata nambo, see nantaṛṛon tal᷊imado-Ne sulal᷊ummu tal᷊ingan taumata udde. Wua'udde Mawu Yesus nangaddu, wuṛṛu namita lilan taumata udde.

³⁴Wua'udde Mawu Yesus naningngara watukku langitta, see sinumangngo ma'ikkatta wuṛṛu nabbisara taumata udde, “Efata,” atappasanne, “Awu'ate!”

³⁵Tal᷊ingan taumata udde nawu'a wuṛṛu lilane nallome apia, i tou nanattakke ma'awisara ringannu mapia.

³⁶See Mawu Yesus naningaddi mangitou sarangkanambone mabatti'u inolaanna udde sisai-sai. Arawe mangkasingadde Mawu Yesus, i mangitou mangke mabatti'a lai.

³⁷Wuṛṛu anambon taumata apan naaringikka udde naherangnga atonna. I mangitou nabbisara, “Sarangkanambone niolang-Nge ringannu mapia! Wuṛṛu lai i Tou na'ola'a taumata wengella naaringikka wuṛṛu taumata mou naawisara!”