Read Talaud MARKUS 8 Bible Online

MARKUS 8 - Talaud bible

MARKUS 8

¹Tawe nal᷊annu wua'udde, pia lai sambageanganna taumata nambo nirumanta na'ammulla. Ana waugu i mangitou tawe anna, Mawu Yesus namago mallal᷊aṛṛenggen-Ne wuṛṛu nabbisara,

²“I Ya'u u'akkannu taumata nambo indi. Tallute allo al᷊annune i mangitou su sampunna ringang-Ku, wuṛṛu orassa indi i mangitou tawe anna.

³Amungkangngu i Ya'u mandolokki mangitou iapaapul᷊e mal᷊unussa, i mangitou sarun mawantingnga su tangngan dal᷊anna. Apa lai su wallatti mangitou piaddu nirumanta wuassu tampa marau.”

⁴Mallal᷊aṛṛenggennu Mawu Yesus sinumimbakka, “Su tampa araune indi, suapa taumata wotongnge maasomba anna iapaanna su taumata nambo indi?”

⁵“Sangkura anambone roti si yamiu?” aiwal᷊o Mawu Yesus. “Pitum bau,” sasimbakki mangitou.

⁶Ne Mawu Yesus nandolokku taumata nambo udde inuma'ianna su leta'a, see i Tou nanganute pitum bau roti udde wuṛṛu na'adiangkamante su Ruata. Wua'udde i Tou namesangke roti ringannu lima-Ne wuṛṛu nianggille su mallal᷊aṛṛenggen-Ne niapatahia su taumata. Ne mallal᷊aṛṛenggen-Ne na'ola'e aroddi.

⁷I mangitou lai pia manga pira inassa maradio'a. Mawu Yesus na'adiangkamante lai su Ruata ana waugu inassa udde, see nandolokku mallal᷊aṛṛenggen-Ne niapatahia inassa udde lai.

⁸I mangitou inumanna na'oman sara nal᷊aidda — iraṛṛangngo pia appatu ṛiwu su atoune taumata inumanna. Wua'udde mallal᷊aṛṛenggennu Mawu Yesus nangammullu lamben anna — pitung kul᷊a'a napene-pene. See Mawu Yesus nandolokku manga taumata udde niapaapul᷊e,

¹⁰wuṛṛu i Tou ringannu mallal᷊aṛṛenggen-Ne lapiddu sinuma'e saalanna wuṛṛu inaite su wageangngu leta'u Dalmanuta.

¹¹Siri pira taumatan Farisi nirumanta ringannu Mawu Yesus, wuṛṛu nanattakke uasasimbakka ringanni Tou ana maddea'a mapaasal᷊an i Tou. I mangitou madorongnga Mawu Yesus ma'ola'a al᷊aṛṛindu'a, maola'a sambau tatiala manungku i Tou nirumanta wuassu Ruata.

¹²Mawu Yesus nasa'u, see sinumimbakka, “Anio manga taumatan tempo indi madorongnga si Ya'u ma'ola'a al᷊aṛṛindu'a? Tawe! I Ya'u tawe mangagillu tanda ereudde si mangitou!”

¹³See Mawu Yesus nanantangke mangitou, wuṛṛu sinuma'ete saalanna; wua'udde inaite nassenggotta su samba'an dano udde.

¹⁴Manga mallal᷊aṛṛenggennu Mawu Yesus naabul᷊i nangapiddu roti natimu. I mangitou tumba'u pia roti sambau su saalanna.

¹⁵“Paatehamma su ragi manga taumatan Farisi wuṛṛu ragin Herodes,” unnu Mawu Yesus si mangitou.

¹⁶Ne manga mallal᷊aṛṛenggennu Mawu Yesus mannattakke uawawatti'u hatto udde. I mangitou nabbisara, “I Tou nabbisara aroddi, ana waugu i ite tawe nangapiddu roti.”

¹⁷Mawu Yesus masingkattu apa ipagahato mangitou. Ana waugu udde i Tou naiwal᷊o si mangitou. “Anio yamiu uahahatto su ola'u tawe roti? Apa i yamiu ta'e wagga wuṛṛu taambe naasunna lai? Aroddi al᷊umune ṛingiṛṛannu?

¹⁸I yamiu pia mata — anio tawe ma'ellega? I yamiu pia tal᷊inga — anio tawe madaringikka? I yamiu tawe maanaungnga,

¹⁹limam bau roti apan nitahia-U su lima ṛiwu su atoune? Pirang kul᷊a'a lamben anna niammulli yamiu?” “Mapul᷊o dua,” sasimbakki mangitou.

²⁰“Wuṛṛu su tempo i Ya'u nattahia pitum bau roti su appatu ṛiwu su atoune,” aiwal᷊o Mawu Yesus apia, “pirang kul᷊a'a lambeng kanna apan niammulli yamiu?” “Pitu,” sasimbakki mangitou.

²¹“Ne, i yamiu taambe lai naasunna?” wisara Mawu Yesus apia.

²²I mangitou na'omate su Betsaida. Isudde taumata nangapiddu sangkatou wuta ringannu Mawu Yesus, wuṛṛu nadorongnga tadea'u i Tou mamita taumata udde see mapia.

²³Ne Mawu Yesus nangagassa liman taumata wuta udde wuṛṛu nangehetta si tou su liuddu soa. Wua'udde Mawu Yesus nangaddu matan taumata udde. I Tou nangadon limane su matan taumata udde, see naiwal᷊o si tou, “Wotongngete i'o maasilo sarannapa orassa indi?”

²⁴Taumata udde na'ellega saruanne, see nabbisara, “Ore, i ya'u naasilo taumata u'amatta; arawe i mangitou ia'asilo naal᷊ihida alu.”

²⁵Mawu Yesus nangadon lima-Ne apia su matan taumata udde. Paassa indi taumata udde mammata'u matane tadea'u maasilo. Matane napiate wuṛṛu i tou naasilote sarangkanambone ringannu masema-semakka.

²⁶See Mawu Yesus nabbisara si tou, “Apul᷊ete, wuṛṛu ariete pabelengnga su soa udde.”

²⁷Mawu Yesus wuṛṛu manga mallal᷊aṛṛenggen-Ne inaite su manga ampungnga su leta'u Kaisarea Filipi. Su pattangngannu lal᷊anna Mawu Yesus naiwal᷊o si mangitou, “Tumuṛṛuttu wisaran taumata, isai Ya'u indi?”

²⁸I mangitou sinumimbakka, “Piaddu mabbisara: i Yohanes Mananaṛṛani; piaddu lai mabbisara i Elia, wuṛṛu waine lai mabbisara; sangkatou su wallattu nabi.”

²⁹“Arawe tumuṛṛutti yamiu sassane, i Ya'u indi isai?” aiwal᷊o Mawu Yesus. I Petrus sinumimbakka, “Iamangnga eteudde Ratum Punnu Sal᷊amatta!”

³⁰See Mawu Yesus napaanaungnga si mangitou, tadea'u tawe mabatti'a su manga taumata su ola'u watangan-Ne.

³¹Wua'udde, Mawu Yesus nanattakke mangngaṛṛa'a mallal᷊aṛṛenggen-Ne manungku Ana'u Taumata sarun matataṛṛangngu anambon asasusa, wuṛṛu ipaseettu manga tembonanne, manga imam tembonanne wuṛṛu manga hurun agama. I Tou sarun pateanna, arawe su allo atallune i Tou sarun mabangunna apia.

³²Ringannu masemakka atonna Mawu Yesus namasingkattu olangnge udde su mallal᷊aṛṛenggen-Ne. Ne i Petrus nangehetta Mawu Yesus su sandiṛṛanne wuṛṛu nanagu si Tou.

³³Arawe Mawu Yesus nanaile wuṛṛu na'ellega mallal᷊aṛṛenggen-Ne wuṛṛu nanagu si Petrus, “Roote wua isindi, Wawono'a! Ṛingiṛṛannu udde ṛingiṛṛannu taumata; wal᷊ine ṛingiṛṛannu Ruata!”

³⁴Wua'udde Mawu Yesus namagote taumata nambo isudde su sampunna ringannu mallal᷊aṛṛenggen-Ne. See i Tou nabbisara si mangitou, “Taumata apan mallaṛṛenggenna si Ya'u, ṛinone manantangngu manarane wua'udde mamasanna arussa-Ne wuṛṛu sidutu uatantalongnga si Ya'u.

³⁵Ana waugu taumata apan mannahekku wiakku ririne, sarun awul᷊iannu wiakke. Arawe taumata apan mannantillu wiakke ana waugu i Ya'u wuṛṛu Watti'u Al᷊al᷊uassa wuassu Ruata, sarun masal᷊amatta.

³⁶Apa auntunganne su sangkatou taumata, amungkangngu ahewallu runia indi maola'a darotongnge arawe i tou awul᷊iannu wiakke?

³⁷Wotongnge wiakka udde asal᷊iuannu darotongnga waine?

³⁸Amungkangngu sangkatou taumata massili mangnga'u si Ya'u wuṛṛu al᷊aṛṛa'U su tempo mal᷊awangnga wuṛṛu lal᷊eo indi, Ana'u Taumata lai massili manga'u taumata udde, su tempo i Tou rumanta apia ringannu taṛṛinon Iamangnge, tatantalongannu manga mala'ekatta apan susi.”