Read Talaud MARKUS 9 Bible Online

MARKUS 9 - Talaud bible

MARKUS 9

¹“Asingkate!” unnu Mawu Yesus, “Wuassu wallatti yamiu isindi piaddu apan tawe mate, tantal᷊anna taambe maasilo Ruata mamarenta ringannu taṛṛino-Ne!”

²Annummu allo wua'udde, Mawu Yesus nangapiddi Petrus wuṛṛu i Yakobus wuṛṛu tuṛṛangnge i Yohanes, nangindau su sambau wuidda apan matanggakka. Su saruannu mata mangitou Mawu Yesus nawal᷊u hati-Ne.

³Laung-Nge nabal᷊i mawira lullendapa. Tawedu sangkatou mabawansalla su runia indi wotongnge maawaresi aroddi awirane.

⁴Wua'udde sire tallu mallal᷊aṛṛenggen-Ne naasilo Mawu Yesus uahahattoni Elia wuṛṛu i Musa.

⁵Ne i Petrus nabbisara su Mawu Yesus, “Iamangnga Huru, mapia atonna i ite isindi. Mappianne i yami mapararisikku rasanna tatallu: sambau su Iamangnga, sambau si Musa, wuṛṛu sambau lai si Elia.”

⁶I Petrus wagga apa apan ṛinone iwisarane, ana waugu i tou wuṛṛu ringanne darua tantal᷊anna matta'utta atonna.

⁷Wua'udde winabbawa nangooppa si mangitou wuṛṛu wuassu winabbawa udde inaringiṛṛanna tingikka nabbisara, “Ete indi Ana'u apan arangnguanna. Daringiṛṛe i Tou!”

⁸Mal᷊iha-l᷊ihakka i mangitou na'ellega su uapal᷊iwutta si mangitou, wuṛṛu tawe naasilo manga apa isudde ringanni mangitou, tumba'u Mawu Yesus sassane.

⁹Su tempo i mangitou sinumossokke wuassu wuidda udde, Mawu Yesus napaanaungnga si mangitou, “Arie pabbatti'a sisai-sai, apa apan suete niasiloanni i yamiu tanginna tantal᷊anna Ana'u Taumata taambe niapawangunna wuassu papate.”

¹⁰I mangitou tinumuṛṛutte tanata udde, arawe su wallatti mangitou sassane nanattakke uahahatto apa pandumannu Mawu Yesus nabbisara “mabbiakka apia wuassu papate”.

¹¹Ne i mangitou naiwal᷊o si Tou, “Anio manga hurun agama mabbisara manungku i Elia sarun dumanta paarorone?”

¹²Mawu Yesus sinumimbakka, “I Elia atonna nirumanta paarorone ana waugu manuungngu sarangkanambone. Arawe ereapa olangnge ringannu Ana'u Taumata? Anio sulal᷊ummu Wuke Susi uawoṛṛetta manungku i Tou sarun matataṛṛangngu anambon asasusa wuṛṛu aal᷊uandahannu taumata?

¹³Arawe i Ya'u mabbisara si yamiu: i Elia suete nirumanta, wuṛṛu manga taumata na'ola'a si tou walate apulu mangitou. Udde naṛṛino ere suete niwoṛṛeta sulal᷊ummu Wuke Susi su ola'u watanganne.”

¹⁴Napawe Mawu Yesus wuṛṛu sire tallu mallal᷊aṛṛenggen-Ne nawelengke apia ringannu mallal᷊aṛṛenggen-Ne waine, i mangitou naasilo pia taumata manambo isudde. Manga pira hurun agama tantal᷊anna uasasimbakku mallal᷊aṛṛenggennu Mawu Yesus isudde.

¹⁵Aroddi manga taumata udde naasilo Mawu Yesus, i mangitou inagukke, lapiddu tinumal᷊angnga nanal᷊oho si Tou.

¹⁶“Apa ipattatiakki yamiu ringannu manga hurun agama udde?” aiwal᷊o Mawu Yesus su mallal᷊aṛṛenggen-Ne.

¹⁷Sangkatou wuassu wallattu taumata nambo sinumimbakka, “Iamangnga Huru, i ya'u uaapiddu ana'u iapa'ellega su Iamangnga. I tou mou ana waugu niasuttannu ghaṛṛaho lal᷊eo.

¹⁸Amungkangngu ghaṛṛaho udde sumutta si tou, wadangnge iwabatingnge su leta'a, moṛṛongnge lullupa, isine ia'gaṛṛagitta wuṛṛu ahewallu wadangnge mannottoga. I ya'u nadorongnga mallal᷊aṛṛenggennu Iamangnga mallimbuakka ghaṛṛaho lal᷊eo udde, arawe i mangitou tawe maal᷊imbuakka.”

¹⁹Ne Mawu Yesus nabbisara si mangitou, “Tawe hampa i yamiu indi! I yamiu atonna-tonna taumata apan tawe mangngimanna. Ma'oman sara tempo suapa i Ya'u sarun matana'a su sampunna ringanni i yamiu wuṛṛu manabare su al᷊al᷊eong kamiu? Apira'e ana'a udde isindi!”

²⁰Ne i mangitou nangapidden ana'a udde ringannu Mawu Yesus. Aroddi ghaṛṛaho lal᷊eo udde naasilo Mawu Yesus, i tou napawantikku ana'a udde na'oman sara ana'a udde nawantingnga tuttal᷊ingngi su leta'a. Moṛṛongnge lullupa.

²¹See Mawu Yesus naiwal᷊o iamangnge, “Pirate al᷊annune i tou arendi?” “Ro'en i tou ta'e adio'a!” sasimbakki iamangnge.

²²“Masokkate ghaṛṛaho lal᷊eo udde mappandumma mamate si tou ringannu mangema'a su putungnga ara'e sulal᷊ummu ua'e. Arawe amungkangngu Iamangnga wotongnge mantul᷊ungnga, doronganna Iamangnga umakkanni i yami wuṛṛu mantul᷊ungngi i yami!”

²³“Apa wisaranu? Amungkangngu Iamangnga wotongnge?” sasimbakku Mawu Yesus. “Sarangkanambone wotongnge, sambal᷊iate taumata mangngimanna!”

²⁴Iamangngu ana'a udde lapiddu inumui, “Mawu, i ya'u mangngimanna, arawe pangangimangku adio'a. Tul᷊unga'a i ya'u tadea'u a'atambanna lai pangangimangku!”

²⁵Napawe Mawu Yesus naasilo manungku taumata mannattakke rudanta maṛṛimpulunna, i Tou namarenta ghaṛṛaho lal᷊eo udde ringannu nabbisara, “Ghaṛṛaho wengella wuṛṛu mou, i Ya'u mandolokku; sabbangnga wuassu ana'a indi wuṛṛu ariete passutta si tou apia.”

²⁶Ghaṛṛaho lal᷊eo udde nangintul᷊i, see na'ola'a ana'a udde iwabantikke, wua'udde sinumabangnga wuassu ana'a udde. Ana'a udde ellehanna ere asuangnga na'oman sara taumata manambo mabbisara, “I tou natete!”

²⁷Arawe Mawu Yesus nangagassa limane wuṛṛu nantul᷊ungngi tou dirumarisikka. Ne ana'a udde nabangunte.

²⁸Napawe Mawu Yesus su wal᷊ete, manga mallal᷊aṛṛenggen-Ne nirumanta passangkatou ringanni Tou wuṛṛu naiwal᷊o, “Anio i yami tawe maal᷊imbuakka ghaṛṛaho lal᷊eo udde?”

²⁹Mawu Yesus sinumimbakka, “Ghaṛṛaho lal᷊eo ere udde tawe aal᷊imbuaṛṛanna ringannu al᷊awo'u inolaanna, tumba'u aal᷊iomanna.”

³⁰Mawu Yesus wuṛṛu mallal᷊aṛṛenggen-Ne nanantangken tampa udde wuṛṛu inaite nanassu amatanna sinumabbi Galilea. Mawu Yesus madiri tampa atatanaan-Ne asingkatannu taumata,

³¹ana waugu i Tou tantal᷊anna mangngaṛṛa'a mallal᷊aṛṛenggen-Ne. “Ana'u Taumata sarun itantilla su taṛṛinon taumata,” aroddi unnu Mawu Yesus, “wuṛṛu i Tou sarun pateanna, arawe su allo atallune i Tou sarun mabangunna apia!”

³²Manga mallal᷊aṛṛenggen-Ne tawe naasunna al᷊aṛṛa'u Mawu Yesus, arawe i mangitou matta'utta maiwal᷊o Mawu Yesus.

³³I mangitou na'omate su Kapernaum. Napawe su wal᷊ete, Mawu Yesus naiwal᷊ote mallal᷊aṛṛenggen-Ne, “I yamiu uasasimbakku apa tanginna su tangngan dal᷊anna?”

³⁴I mangitou tawe sinumimbakka, ana waugu tanginna su tangngan dal᷊anna i mangitou uatatiakka su ola'u isai ahewal᷊anne.

³⁵Mawu Yesus inuma'ianna, see namagote sire mapul᷊o dua mallal᷊aṛṛenggen-Ne udde. I Tou nabbisara si mangitou, “Taumata apan maapulu maola'a paarorone, i tou sarun maola'a panginsueanne wuṛṛu sarun maola'a mangangimbe-taumata nambo.”

³⁶Wua'udde Mawu Yesus nangehetta sangkatou ana'a adio'a, wuṛṛu ana'a udde niapararisikka su saruanni mangitou sarangkanambone. Mawu Yesus naṛṛa'uppa ana'a udde wuṛṛu nabbisara su mallal᷊aṛṛenggen-Ne,

³⁷“Taumata apan manarimmattu sangkatou ana'a ereindi ana waugu i Ya'u, udde ere lai manarimmatta si Ya'u. Wuṛṛu taumata apan manarimmatta si Ya'u, i tou wal᷊ine tumba'u manarimmatta si Ya'u, arawe manarimmattu lai si Tou apan nandolo-U.”

³⁸See Yohanes nabbisara Mawu Yesus, “I yami naasilo sangkatou mallimbuakka setanna ringannu arannu Iamangnga. Wuṛṛu i yami naningaddi tou ana waugu i tou wal᷊ine wua dinganni ite.”

³⁹Arawe Mawu Yesus nabbisara, “Arie maningaddi tou, ana waugu tawe sangkatou apan maaola'a al᷊aṛṛindu'a wuassu arang-Ku, wotongnge lapiddu mandal᷊eo arang-Ku.

⁴⁰Ana waugu taumata apan tawe mandoappa si ite, udde atappassanne uasamba'a si ite.

⁴¹Paanaunge! Taumata apan mappa'inummi yamiu, ana waugu yamiu mallal᷊aṛṛenggennu Ratum Punnu Sal᷊amatta, i tou sarun manengkamma lal᷊antakke.”

⁴²“Isai napa'ola'a su wallattu sangkatou taumata maradio'a indi tate lai mangngimanna si Ya'u, mappianne amungkangngu watun gahilinganna ii'itta su ullekkane, wuṛṛu i tou iwontolla su tahal᷊oangnga.

⁴³Amungkangngu limanu ma'arosa si'o, pototta limanu udde! Mappianne i'o mabbiakka ringannu Ruata tawe limanu samba'a wuassu i'o ringannu limanu ruam ba'a masutta su naraka, eteudde putungnga apan tawe mappadumma. [

⁴⁴Poiaroddi putungnga tawe mappadumma wuṛṛu ul᷊ida tawe mate.]

⁴⁵Wuṛṛu amungkangngu leddanu ma'arosa si'o, pototta ledda udde. Mappianne i'o mabbiakka ringannu Ruata tawe leddanu samba'a wuassu i'o ringannu leddanu ruam ba'a iramme sulal᷊ummu naraka. [

⁴⁶Poiaroddi putungnga tawe mappadumma wuṛṛu ul᷊ida tawe mate.]

⁴⁷Amungkangngu matanu ma'arosa si'o, loetta mata udde. Mappianne i'o sumutta su Runia Wakkun Ruata tawe mata samba'a, wuassu i'o ringannu matanu ruam ba'a iramme su naraka.

⁴⁸Poiaroddi putungnga tawe mappadumma wuṛṛu ul᷊ida tawe mate.

⁴⁹Sangkatou-sangkatou sarun waresiannu putungnga ere sasamba apan wabaresiannu asimma.

⁵⁰Asimma udde mapia, arawe amungkangngu naola'a maammi, wotongngewe iapaapakkada apia? Nariaddi, ṛinone yamiu maola'a ere asimma — pabbiakke su sampunna ringannu paddarame.”