Read Talaud LUKAS 1 Bible Online

LUKAS 1 - Talaud bible

LUKAS 1

¹Teofilus apan naungnge mapia, Manambo taumata suete nammanara atonna mammoṛṛetta ringannu uaatokka su ola'u manga arariaddianna apan suete nariaddi su pattangnganni ite.

²I mangitou namoṛṛetta nassul᷊ungngu apan niwatti'a si ite wuassu manga taumata apan naasilo sassane manga arariaddianna udde wuassu panattaṛṛanne, ana see namasingkattu watti'a udde.

³Napawe i ya'u ringannu matiti'a mammarikissa sarangkanambone udde wuassu panattaṛṛanne, i ya'u mangngantimma mappianne mamoṛṛettu sambau watti'a apan uaatokka si Tuangnga.

⁴I ya'u namoṛṛetta udde, tadea'u i Tuangnga masingkatta manungku apa apan suete niaṛṛa'a si Tuangnga udde atonna.

⁵Napawe i Herodes naola'e ratu su leta'u Yudea, pia sangkatou imam aranne i Zakharia. I tou nasutta su wageangngu manga imam Abia. Awingnge aranne i Elisabet, i tou lai papapulunnu imam.

⁶Rua sangkawinganna udde, mabbiakka ma'al᷊uassa naungngu Ruata. Itarua matuṛṛutta anambon parenta wuṛṛu tita Mawu ringannu ahewallu naungnge.

⁷Itarua tawe ana'a ana waugu i Elisabet tinna wuṛṛu itarua timmaddete.

⁸Su sambau allo, su tempo wageangngi imam Abia naasomba wuatta, i Zakharia nangamattu manaran imam su saruannu Ruata.

⁹Ringannu na'ola'a undi, ere inanaramanne a'olaannu manga imam, i Zakharia niatebo'anne su mutta sulal᷊ummu Wal᷊e Mawu wuṛṛu manutungnga amania.

¹⁰Tantal᷊anna amania tattutunganna taumata nambo u'al᷊iomanna su liudde.

¹¹Su tempo udde mala'ekattu Mawu nattingkapasilo si Zakharia. Mala'ekatta udde uarisikka su samba'an aikkatannu medda, su tampa pananutunganna amania.

¹²Napawe i Zakharia naasilo mala'ekatta udde, i tou nabingo wuṛṛu nata'utta.

¹³Arawe mala'ekatta udde nabbisara, “Arie pa'ata'utta, Zakharia! Ruata suete naddaringikka aal᷊iomannu. Awingngu i Elisabet sarun mangunsiwen sangkatou ana'a esakka. I'o sarun managon aranne i Yohanes.

¹⁴I'o sarun lembon lumuassa wuṛṛu manambo taumata lullala'a napawe ana'a udde inasungkangke!

¹⁵I tou sarun maola'a taumata mapia su aellegu Mawu, wuṛṛu i tou tawe ma'inumma anggore ara'e inumanna ma'awu'anna. Ro'en inasungkangnge i tou aintaṛṛoanten Ghaṛṛahon Ruata.

¹⁶Manambo taumatan Israel sarun ehetanne apia mabelengnga ringannu Ruata, Mawu mangitou.

¹⁷I Tou sarun maola'a ralol᷊oṛṛannu Mawu apan matohassa wuṛṛu mataṛṛino ere i Elia. I tou sarun mangonggolu paddarame su iamangnga wuṛṛu ana'a, wuṛṛu taumata apan tawe tumuṛṛutta sarun ehetanne apia sulal᷊ammu ṛingiṛṛanna apan mapia. Ringannu aroddi i tou nanaddia sambau walahanna apan nasaddiate huna Mawu.”

¹⁸“Ereapa i ya'u maasingkatta manungku olangnge udde sarun mariaddi?” aiwal᷊on Zakharia su mala'ekatta udde. “I ya'u timmaddete, wuṛṛu awingku lai timmaddete.”

¹⁹Mala'ekatta udde sinumimbakka, “I ya'u indi Gabriel. I ya'u mangngimbe Ruata wuṛṛu ete i Tou nandolo'u mamasingkattu watti'a mapia indi si'o.

²⁰Apa apan ta'u niwisara, sarun mariaddi su tempone. Arawe ana waugu i'o tawe mangngimanna, i'o sarun tawe maawisara; i'o sarun imoune ma'oman sara apa apan suete niwal᷊o'u matipusse.”

²¹Tantal᷊anna udde taumata nambo sidutu uaṛṛado si Zakharia. I mangitou naherangnga anio i tou aroddi al᷊annune sulal᷊ummu Wal᷊e Mawu.

²²Wuṛṛu su tempo i tou sinumabangnga, i tou tate maawisara si mangitou. I tou sidutu maggahatto ringannu limane wuṛṛu sidutu nimmoune. Ne manga taumata naasingkatte manungku i tou suete naasilo sambau sondappa sulal᷊ummu Wal᷊e Mawu.

²³Napawe nasuete manarane su Wal᷊e Mawu, i Zakharia napul᷊ete su wal᷊e.

²⁴Tawe nal᷊annu wua'udde, i Elisabet awingnge piate illoṛṛo, see i tou sidutu uatana'a su wal᷊e al᷊annune lima wul᷊anna.

²⁵I tou nabbisara, “Panginsueanne Mawu nantul᷊ungku wuṛṛu namappassa asasili'u.”

²⁶Napawe i Elisabet piate illoṛṛo annumpe wul᷊anna, Ruata nandolokku mala'ekattu Gabriel inai su Nazaret, sambau soa su leta'u Galilea.

²⁷I Gabriel nirolokka ringannu sangkatou maṛṛuala aranne i Maria. Maṛṛuala udde uatatunangan sangkatou aranne i Yusuf, papapulunni Daud.

²⁸Mala'ekatta udde nirumanta ringanni Maria wuṛṛu nabbisara, “Sal᷊amatta, si'o apan lembo nial᷊amatannu Mawu! Mawu su sampunna ringannu!”

²⁹Naaringikka wisara mala'ekatta udde i Maria niṛṛumoro, see mangke ma'iwal᷊o sulal᷊ummu naungnge apa pandumannu tabea udde.

³⁰Ne mala'ekatta udde nabbisara si tou, “Arie pa'ata'utta, Maria, ana waugu i'o naal᷊uassa naungngu Ruata.

³¹I'o sarun pia illoṛṛo wuṛṛu mangunsiwen sangkatou ana'a apan sarun isagonu aranne i Yesus.

³²I Tou sarun maola'a wahewa wuṛṛu sarun isago Ana'u Ruata Lembon Atanggaṛṛanne. Mawu Ruata sarun ma'ola'a si Tou ratu ere i Ratu Daud iupungngu al᷊amonane.

³³Wuṛṛu i Tou sarun mamarenta ere sangkatou ratu wuassu papapulunni Yakub saran mal᷊annu-l᷊annu. Araratuan-Ne tawe panginsueanne.”

³⁴“Arawe i ya'u ta'e maṛṛuala,” unni Maria su mala'ekatta udde, “Ereapa olangnge udde wotongnge mariaddi?”

³⁵Mala'ekatta udde sinumimbakka, “Ghaṛṛahon Ruata sarun rumanta si'o, wuṛṛu taṛṛinon Ruata sarun mangintaṛṛo si'o. Ana waugu udde ana'a apan sarun iunsiwenu udde sarun isago Naukkassa, Ana'u Ruata.

³⁶Naunge; i Elisabet, tuṛṛangngu udde piate illoṛṛo annummu wul᷊anna, al᷊annune salaiwe i tou timmaddete wuṛṛu taumata mabal᷊o manungku i tou tinna.

³⁷Ana waugu su Ruata tawedu sambau apan tawe maola'a.”

³⁸See i Maria nabbisara, “I ya'u indi allangngu Mawu; ariaddite si ya'u su ereapa suete niwisaranu.” See mala'ekatta udde nanantangke Maria.

³⁹Ringannu mal᷊ihakka wua'udde, i Maria inaite su sambau soa su Yudea, su wageangngu panenteanna.

⁴⁰I tou inaite su wal᷊en Zakharia, wuṛṛu napawe i tou nasutta, i tou nattabea si Elisabet.

⁴¹Aroddi napawe i Elisabet naaringikka Maria nattabea, ana'a sulal᷊ummu illoṛṛon i Elisabet udde inumal᷊ore. Ne i Elisabet niasuttanten Ghaṛṛahon Ruata,

⁴²see nangintul᷊i, “Ete i'o apan lembo nial᷊amatanna su wallattu anambon bawine! Inal᷊amatante ana'a apan sarun iasungkangu udde!

⁴³Isai ya'u na'oman sara inangngu Mawu nirumanta ringangku?

⁴⁴Aroddi ya'u naaringikka tabeanu, ana'a sulal᷊ummu illoṛṛo'u inumal᷊ore lulluassa.

⁴⁵Lal᷊umanna'a si'o, ana waugu mangngimanna manungku apa apan niwal᷊o Mawu si'o udde sarun mariaddi!”

⁴⁶I Maria nabbisara, “Naungku maddalo Mawu

⁴⁷wuṛṛu ṛimuu'u lullala'a ana waugu Ruata Mananal᷊ama'u.

⁴⁸I Tou uanaungnga si ya'u, allang-Nge apan adio'anne! Manattakka orassa indi, anambon walahanna mabbisara manungku i ya'u su lal᷊umanna'a.

⁴⁹Ana waugu Ruata Lembo Mataṛṛino nandantan inolaanna wahewa si ya'u. Naukkassa aran-Ne.

⁵⁰Papapulunna sansunannu papapulunna Mawu napaal᷊iatta'u darangngu-Ne su taumata apan matta'un-Ne.

⁵¹Ringannu lima-Ne apan matohassa I Tou napaatal᷊ein taumata mawunga, wuṛṛu nanongkakku pandumanni mangitou.

⁵²Manga ratu nilintukka wuassu araratuanne wuṛṛu taumata adio'anne tinanggakka.

⁵³Taumata mal᷊unussa niapaal᷊aidu al᷊awo'u apapia, taumata ala nillimbuaṛṛanna tawe ul᷊ene.

⁵⁴I Tou nantul᷊ungngu Israel allang-Nge, tumuṛṛuttu pa'aire apan suete niolang-Nge ringannu iupungngu al᷊amonang kite.

⁵⁵Mawu tawe maabul᷊im pa'aire-Ne, i Tou marangngu si Abraham wuṛṛu papapulunne ma'oman sara mal᷊annu-l᷊annu.”

⁵⁶Iraṛṛangngo tallu wul᷊anna al᷊annune i Maria uatana'a ringanni Elisabet, wua'udde i tou napul᷊ete su wal᷊ene.

⁵⁷Na'omate tempone i Elisabet mangunsiwe. I tou nangunsiweten sangkatou ana'a esakka.

⁵⁸Manga al᷊indonganne wuṛṛu manga tuṛṛangnge naaringikka aroddi apiane Ruata si Elisabet, ne i mangitou lulluasse su sampunna ringanni tou.

⁵⁹Su tempo ana'a udde uukke ual᷊ute allo, i mangitou nirumanta massunatta si tou. I mangitou maapulu managon arannu ana'a udde i Zakharia, ere arannu iamangnge,

⁶⁰arawe inangngene nabbisara, “Tawe! I tou ṛinone isago Yohanes.”

⁶¹“Tawe saran sangkatou wuassu wallattu manga tuṛṛangngu pia aranne aroddi,” unni mangitou si Elisabet.

⁶²See ringannu isaratta, i mangitou naiwal᷊o si Zakharia aranna apan ipa'apulu ianggilla su ana'i tou.

⁶³I Zakharia nadorongnga watullei see namoṛṛetta, “Aranne i Yohanes.” I mangitou sarangkanambone naherangnga.

⁶⁴Su tempo udde lai i Zakharia naawisarate wuṛṛu nadalote Ruata.

⁶⁵Manga al᷊indonganne mangke nata'utta, wuṛṛu watti'a udde nitumelengke su al᷊awo'u leta'u manga panenteannu Yudea.

⁶⁶Anambon taumata apan naaringikka olangnge udde naiwal᷊o sulal᷊ummu naungnge, “Maola'e apa ana'a udde sal᷊immurine?” Ana waugu Mawu uaṛṛundinganna si tou.

⁶⁷I Zakharia iamangngu ana'a udde, niasuttannu Ghaṛṛahon Ruata na'oman sara i tou namasingkattu tanata wuassu Mawu. I tou nabbisara,

⁶⁸“Wette i ite maddalo Mawu, Ruatam balahannu Israel! I Tou suete nirumanta mantul᷊ungngu pabbawala-Ge wuṛṛu mamallossi mangitou.

⁶⁹I Tou nangonggolla si ite mananal᷊amatta matohassa, papapulunni Daud, allang-Nge.

⁷⁰Ro'en al᷊amonane sulal᷊ummu manga nabi arangnguan-Ne, Mawu suete nangagillu pa'aire-Ne,

⁷¹ipanal᷊amatta si ite wuassu seetti ite wuṛṛu wuassu taṛṛino manga taumata apan maddantinni ite.

⁷²Wuṛṛu mammasilo naungnge mapia su iupungngu al᷊amonang kite, pa'aire-Ne apan naukkassa sarun tipusan-Ne.

⁷³I Tou nassalu si Abraham iamangngi ite, wuṛṛu na'ire manal᷊amatta si ite wuassu seetti ite, tadea'u i ite tawe matta'utta mangimbe si Tou

⁷⁴

⁷⁵sidutu mattaṛṛamawu si Tou wuṛṛu mapa'al᷊uassu naung-Nge su al᷊o'engngu pabbiaṛṛanni ite.

⁷⁶I'o, ei Ana'u, sarun isago nabi Ruata Lembon Atanggaṛṛanne. I'o apan nirolokka malliu ṛoro Mawu wuṛṛu mamu'a lal᷊an-Ne,

⁷⁷see mamasingkatta su pabbawala-Ge manungku i mangitou sarun masal᷊amatta, amungkangngu Ruata suete nangampungnga manga rosa i mangitou.

⁷⁸Mawung kite naung-Nge masaṛṛionto'a wuṛṛu maakkanna; ana waugu manal᷊amatta si ite i Tou nirumanta. Ere matannallo sinumabbangnga su rua'allo,

⁷⁹aroddiwe lai Tou nangonggolu semak-Ke su anambon taumata apan mabbiakka sulal᷊ummu ararandumma wuṛṛu su atata'utta. I Tou mangngehetta si ite su lal᷊anna apan matudda m paddarame.”

⁸⁰Ana'i Zakharia udde maggewalla see a'atambanna auatannu ghaṛṛahone. I tou uatana'a su wadda'a, na'oman sara tempone nia'omanna i tou namasingkattu watanganne su walahannu Israel.