Read Talaud LUKAS 10 Bible Online

LUKAS 10 - Talaud bible

LUKAS 10

¹Wua'udde Mawu Yesus namile sire pitum pul᷊o mallal᷊aṛṛenggen-Ne lai, see nandolokki mangitou pattaṛṛa darua malliu ṛoro si Tou watukku al᷊awo'u soa wuṛṛu tampa apan rantanni Tou.

²“Wuane apan itinganna manambo,” unnu Mawu Yesus si mangitou. “arawe mangangitingnge matul᷊ungnga. Ana waugu udde padorongke su tatahuannu wailla tadea'u i tou mandolokku taumata mangitingnga wuan sinuananne.

³Ne, roote! I Ya'u mandolokki yamiu ere domba su pattangngannu serigala.

⁴Arie pangapiddu tampan roitta ara'e pato'am padaroronganna, ara'e sapatu. Arie mangillol᷊o su tangngan dal᷊anna ana mattabea su sangkatou taumata.

⁵Amungkangngu i yamiu sumutta su sambau wal᷊e, wisara'a paarorone, ‘Doronganna al᷊al᷊uassa sulal᷊ummu wal᷊e indi.’

⁶Amungkangngu isudde pia taumata maapulum padarame, tabeam padaramenu udde sarun sidutu si tou, amungkangngu tawe, ul᷊ei apia tabeam padaramenu udde.

⁷Atana'e tumba'u su wal᷊e sambau. Sengkamma apa apan iassaru si yamiu isudde, ana waugu taumata apan mammanara wotongnge manengkamma lal᷊antakke. Arie massal᷊iu wuassu wal᷊e sambau watukku wal᷊e waine.

⁸Amungkangngu i yamiu rumanta su sambau soa wuṛṛu isudde i yamiu sal᷊ohoanna ringannu mapia, ante apa apan ia'imbe mangitou isudde.

⁹Paapia'a taumata apan marada'a su soa udde, wuṛṛu paasingkata'a su manga taumata isudde manungku, ‘Ruata mal᷊ihakke mamarenta ere sangkatou Ratu su pattangnganni yamiu.’

¹⁰Arawe amungkangngu i yamiu rumanta su sambau soa wuṛṛu i yamiu isudde tawe itarimmatta, sabbangke su lal᷊anna wuṛṛu wisara'a,

¹¹‘Ewe'e sara lai awu su soanu apan uareetta su leddang kami, itontongngi yami maola'a sambau pananaunganna si yamiu. Arawe ṛinone i yamiu maasingkatta manungku maranite tempone Ruata mamarenta ere sangkatou Ratu su pattangnganni yamiu!’

¹²Paananunge, su Allong Kiamatta, taumatan Sodom malluasanna ampungannu Ruata wuassu taumata su soa udde!”

¹³“Nasilakate i yamiu Korazim! Wuṛṛu nasilakate i yamiu Betsaida! Unnu wisara manga al᷊aṛṛindu'a apan niola'a su pattangnganni yamiu udde suete niola'a su soan Tirus wuṛṛu Sidon, manga taumata poiaroddi mal᷊annute nawal᷊u wuassu manga rosa mangitou, wuṛṛu nalluṛṛeten laubbu asasusa see nangadon awu su pua mangitou.

¹⁴Su Allong Kiamatta, manga taumatan Tirus wuṛṛu Sidon malluasanna ampungannu Ruata wuassi yamiu.

¹⁵Wuṛṛu i yamiu Kapernaum! I yamiu maṛṛingidda manungku i yamiu sarun itanggakka ma'oman sara surga? Tawe! Ewe'e i yamiu sarun iramme su naraka!”

¹⁶See Mawu Yesus nabbisara manga mallal᷊aṛṛenggen-Ne, “Taumata apan madaringikka si yamiu, madaringikka lai si Ya'u. Taumata apan mannol᷊a'i yamiu, mannol᷊a-U lai. Wuṛṛu taumata apan mannol᷊a-U, mannol᷊a'i Tou lai apan nandolo-U.”

¹⁷Siri pitum pul᷊o mallal᷊aṛṛenggenna udde nabelengnga ringannu al᷊al᷊uassa. “Mawu,” wisara mangitou, “manga ghaṛṛaho lal᷊eo lai tuttuṛṛutta si yami amungkangngu i yami mamarenta si mangitou ringannu arannu Mawu!”

¹⁸Mawu Yesus sinumimbakka, “I Ya'u naasilo Setanna nanawo wuassu langitta naal᷊ihida sawallo.

¹⁹Asingkatewe! I yamiu suete inonggol᷊annu taṛṛino tadea'u i yamiu wotongnge maṛṛinda atoanna wuṛṛu kalajengking lapiddu mamadi al᷊awo'u auatannu seetta, ringannu tawe saran sambau wotongnge manilaka si yamiu.

²⁰Salaiwe aroddi arie lumuassa ana waugu manga ghaṛṛaho lal᷊eo nassuṛṛubawa si yamiu. Mappianne i yamiu lulluassa ana waugu arannu uawoṛṛetta su surga.”

²¹Su tempo udde lai, Mawu Yesus lullala'a ana waugu niasuttannu Ghaṛṛahon Ruata. Mawu Yesus nabbisara, “Iamangnga, Mawu apan uatahuanna langitta wuṛṛu runia! I Ya'u ma'adiangkamanna Si'o ana waugu sarangkanambone udde niadappingngu su taumata nambo apan pande wuṛṛu pia asingkanne, arawe I'o napaal᷊iatta'a su manga taumata tawe si'ol᷊ane. Eteudde apan ma'al᷊uassa naungngu Iamangnga.

²²Sarangkanambone suete tinantillu Iamangnga si Ya'u. Tawe saran sangkatou ma'aillal᷊a Ana'a tumba'u Iamangnga. Tawe saran sangkatou maaillal᷊a Iamangnga tumba'u Ana'a, wuṛṛu su manga taumata ete sisai Ana'a udde iapaasingkattu Iamangnga.”

²³See Mawu Yesus nanaile mallal᷊aṛṛenggen-Ne, see nabbisara si mangitou sassane, “Auntunganna si yamiu ana waugu suete naasilo apa apan niasiloanni yamiu orassa indi.

²⁴Ana waugu paanaunge: Manambonabi wuṛṛu ratu ma'apulu ma'ellega apa apan niasiloanni yamiu orassa indi arawe i mangitou tawe maasilo. I mangitou maapulu madaringikka apan radaringiṛṛanni yamiu orassa indi, arawe i mangitou tawe maaringikka.”

²⁵Wua'udde sangkatou hurun agama nirumanta maddea'a mapaasal᷊a Mawu Yesus. I tou naiwal᷊o, “Iamangnga Huru, apa sarun ta'u manaranna tadea'u wotongnge maasengkamma wiakka tutune wuṛṛu mal᷊annu-l᷊annu?”

²⁶Mawu Yesus sinumimbakka, “Apa udde uawoṛṛetta su Wuke Susi? Ereapa su ṛingiṛṛannu matataṛṛino su olangnge udde?”

²⁷Taumata udde sinumimbakka, “ ‘Pandangngute Mawu Ruatanu ringannu ahewallu naungngu wuṛṛu ringannu ahewallu apendammu, ringannu al᷊awo'u auatannu, wuṛṛu ringannu anambon apandenu,’ wuṛṛu ‘Pandangngu sansul᷊ungngu ere lai i'o mandangngu wadangngu sassane.’ ”

²⁸“Sasimbakku udde atonna,” unnu Mawu Yesus. “Ola'e udde tadea'u i'o maralukka.”

²⁹Arawe hurun agama udde maddiri mapaasal᷊an ririne. I tou naiwal᷊o, “Isai sansul᷊ungku udde?”

³⁰Mawu Yesus sinumimbakka, “Pia sangkatou esakka sinumossokka wuassu Yerusalem watukku Yerikho. Su tangngan dal᷊anna i tou niampangannu maṛṛarampassa, niaṛṛo al᷊awo'u darotongnge, nipuulla na'oman sara maranite mate, see tinantangnga ual᷊allowangnga su lal᷊anna ringannu nal᷊al᷊essa.

³¹Inaṛṛombanganne sangkatou imam inumamatta lai su lal᷊anna udde. Napawe i tou naasilo taumata udde, i tou nanewadda su samba'an dal᷊anna, see nanassukku amatanne.

³²Aroddi lai sangkatou taumatan Lewi apan inumamatta isudde; napawe i tou naasilo taumata udde, i tou nangundani ma'ellega. Arawe i tou lai nanewadda su samba'an dal᷊anna see nanassukku amatanne.

³³Arawe wua'udde sangkatou taumata Samaria apan tantal᷊anna u'amatta, sinumabbi isudde. Napawe i tou naasilo taumata udde, naungnge nasusa wuṛṛu inumakkanna.

³⁴Ne i tou nangundanin taumata udde see namaresi manga lessane ringannu anggore wuṛṛu inundamannu lana, wua'udde manga lessa udde niwa'issa. Wua'udde, i tou nallurannu taumata udde su keledain tou sassane, see niapidda su sambau wal᷊em patindahoanna see niundamante.

³⁵Tiṛṛabbine i tou nanganu darua roitta sal᷊a'a wuṛṛu nianggilla su tatahuannu wal᷊e lapiddu nabbisara, ‘Undamete i tou, wuṛṛu amungkangngu pia bawaekke waine, i ya'u mamaekka napawe i ya'u mabelengnga apia isindi.’ ”

³⁶Wua'udde Mawu Yesus nanginsuete watti'a udde ringannu aiwal᷊o indi, “Wuassu sire tallu udde, suapane tumuṛṛuttu addapannu apan nantul᷊ungngu sansul᷊ungnge wuassu taumata apan nipangaṛṛoanna udde?”

³⁷Hurun agama apan niiwal᷊oanna udde sinumimbakka, “Taumata apan suete nantul᷊ungngu taumata udde.” “Ne, roote wuṛṛu pa'ola'e lai ereudde!” wisara Mawu Yesus.

³⁸Wua'udde Mawu Yesus wuṛṛu mallal᷊aṛṛenggen-Ne nanassukku amatanne, see na'omate su sambau ampungnga. Isudde sangkatou wawine, aranne i Marta, namaggo si Tou niaparanta su wal᷊ene.

³⁹I Marta pia tuṛṛangnge wawine aranne i Maria. I Maria indi inuma'ianna marani Mawu Yesus madaringikka manga al᷊aṛṛang-Nge.

⁴⁰Arawe i Marta mangke mammanara al᷊awo'u manara su wal᷊ene. I tou inaite ringannu Mawu Yesus wuṛṛu naiwal᷊o, “Mawu, anio Mawu tawe managu si Maria mappamanara'u sassane? Doloṛṛa'e i tou mallal᷊ima si ya'u!”

⁴¹“Marta, Marta!” sasimbakku Mawu Yesus. “I'o sussinggawangnga wuṛṛu maṛṛingiddu manara indi wuṛṛu manara udde;

⁴²arawe apa apan pia gunane tumba'u sambau. Wuṛṛu i Maria suete namile lembon apianne, apan tawe iaal᷊appa wuassi tou.”