Read Talaud LUKAS 11 Bible Online

LUKAS 11 - Talaud bible

LUKAS 11

¹Su sambau allo Mawu Yesus inumal᷊iomanna su sambau tampa. Man napawe suete inumal᷊iomanna, sangkatou su wallattu manga mallal᷊aṛṛenggen-Ne nabbisara, “Mawu, aṛṛa'e i yami umal᷊iomanna ere lai Yohanes mangngaṛṛa'a mallal᷊aṛṛenggenne umal᷊iomanna.”

²Ne Mawu Yesus nabbisara si mangitou, “Amungkangngu i yamiu umal᷊iomanna, pabbisarate ereindi, ‘Iamangnga, Ete I'o Ruata apan Tinggassa. Doronganna I'o subbanna wuṛṛu addatanna.

³Onggol᷊a'a su miallo-miallo anna apan haggausanni yami,

⁴Ampungnge manga rosang kami, ana waugu i yami lai mangngampungnga taumata sangkatou-sangkatou apan nassal᷊a si yami. Wuṛṛu arie mamalang kami awul᷊iannu pangangimanna su tempo i yami uasaruanna wawal᷊intongnga.’ ”

⁵Mawu Yesus nabbisara manga mallal᷊aṛṛenggen-Ne, “Unnu wisara sangkatou wuassu wallatti yamiu inai su wal᷊en hawene su tempo alloarane, wuṛṛu mabbisara, ‘Hawe, pawallasa'a roti tallum bau,

⁶ana waugu hawe'u apan su amatanne wakkute notongnga su wal᷊e'u wuṛṛu i ya'u tawe anna ipanaru si tou!’

⁷Unnu wisara hawe apan nirantannu udde sinumimbakka arendi, wuassu lal᷊ummu wal᷊ene, ‘Arie mapaasusa'u! Ngara suete niṛṛuuda wuṛṛu ya'u ringannu al᷊aṛṛana'u mattiille. I Ya'u tawe maawangunna wuṛṛu mangagillu manga apa si'o.’ ”

⁸“See ereapa?” wisara Mawu Yesus nanansunna. “I Ya'u mabbisara ore! Salaiwe i'o udde hawene, i tou maddiri mabangunna wuṛṛu mangagillu sarannapa si'o. Arawe ana waugu i'o tawe apendamma massili sidutu madorongnga si tou, ne i tou mabangunte wuṛṛu mangagille si'o apa apan pappandumannu.

⁹Nariaddi i Ya'u mabbisara si'o: Padorongke, ne i yamiu sarun onggol᷊anna; padea'e, ne i yamiu sarun maasomba; panengkelle, ne i yamiu sarun pamu'anna ngara.

¹⁰Ana waugu taumata apan nadorongnga sarun manengkamma, taumata apan maddea'a sarun maasomba, wuṛṛu taumata apan mannengkella sarun pamu'anna ngara.

¹¹Su wallatti yamiu apa pia iamangnga mangngagillu atoanna su anangnge, amungkangngu i tou madorongnga inassa?

¹²Ara'e mangagillu kalajengkingnga amungkangngu i tou madorongnga tallukka?

¹³Salaiwe i yamiu lal᷊eo, i yamiu masingkatta lai mangagillu sarannapa mapia su ana'i yamiu. Lembonete Iamangnga su surga. I tou sarun mangagillu Ghaṛṛaho-Ne si mangitou apan madorongnga si Tou!”

¹⁴Su sambau allo Mawu Yesus nallimbuakka ghaṛṛaho lal᷊eo niapaasabangnga wuassu sangkatou mou. Napawe ghaṛṛaho lal᷊eo udde sinumabangnga, taumata udde nanattakke ma'awisara. Manambo taumata naherangnga,

¹⁵arawe piaddu mabbisara, “I Tou wotongnge mallimbuakka ghaṛṛaho lal᷊eo ana waugu taṛṛino Beelzebul, tembonannu ghaṛṛaho lal᷊eo udde.”

¹⁶Piaddu lai manga sire pira taumata waine maddea'a mapaasal᷊a Mawu Yesus, aroddi i mangitou madorongnga i Tou ma'ola'a sambau al᷊aṛṛindu'a maola'a sambau tatiala manungku i Tou atonna-tonna nirumanta wuassu Ruata.

¹⁷Arawe Mawu Yesus naasingkatta pandumanni mangitou. Ne i Tou nabbisarate si mangitou, “Amungkangngu araratuanna natahia sulal᷊ummu wageangnge apan uasaseetta sambau ringannu waine, araratuanna udde tawe mattatana'a mal᷊annu. Wuṛṛu sambau walahanna apan uatal᷊ei wuṛṛu uasaseetta sambau ringannu waine, sarun mawinasa.

¹⁸Aroddi lai sulal᷊ummu araratuannu Setanna, amungkangngu sambageanganna mabawul᷊o ringannu wageangnge waine, araratuanna udde sarun mawinasa. I yamiu mabbisara manungku i Ya'u mallimbuakka ghaṛṛaho lal᷊eo ana waugu taṛṛinon Beelzebul.

¹⁹Amungkangngu aroddi, ringannu taṛṛinon sai manga mallal᷊aṛṛenggennu mallimbuakka ghaṛṛaho lal᷊eo udde? Manga mallal᷊aṛṛenggennu udde sassane apan nattiala manungku i yamiu nassal᷊a!

²⁰Arawe i Ya'u mallimbuakka ghaṛṛaho lal᷊eo ringannu taṛṛinon Ruata, wuṛṛu udde atappasanne manungku Ruata mannattakke mammarenta su pattangnganni yamiu.

²¹Amungkangngu sangkatou apan matohassa, ringannu ahidde apan nasuungnga, mandiaga wal᷊ene sassane, anambon darotongnge sarun masal᷊amatta.

²²Arawe amungkangngu sangkatou apan mattohasanna lumal᷊a'o wuṛṛu see i tou iaansukka, ne taumata apan mattohasanna udde sarun mangaṛṛo anambon ahidde apan naola'a atatohassu tatahuannu wal᷊e udde, see nattahiate anambon darotongnge udde.

²³Taumata apan tawe uasamba'a si Ya'u, atonna-tonna lullawangnga si Ya'u, wuṛṛu taumata apan tawe massumbala si Ya'u, atonna-tonna manggohakku manara-U!”

²⁴“Amungkangngu ghaṛṛaho lal᷊eo manantangu sangkatou taumata, ghaṛṛaho udde mammal᷊intaddu manga tampa apan mamara maddea'a tampa pangillol᷊oanna, arawe i tou tawe naasomba. Ana waugu udde, i tou nabbisara, ‘I Ya'u sarun mabelengnga su wal᷊e'u apan suete ta'u tinantangnga!’

²⁵Su tempo i tou na'omate poiaroddi, i tou naaratingnga wal᷊e udde waresi wuṛṛu uaatokka.

²⁶See i tou inaite wuṛṛu nangapiddu sire pitu ghaṛṛaho waine apan nangillembo aral᷊eoanne wuassi tou. Wua'udde i mangitou sinumuttate sulal᷊ummu taumata udde see natana'e isudde. Wuṛṛu panginsueanne taumata udde nangillemboten aral᷊eoanne wuassu paarorone.”

²⁷Napawe Mawu Yesus suete nabbisara aroddi, sangkatou wawine su wallattu taumata nambo udde nabbisara Mawu Yesus, “Lal᷊umanna'a eteapa su wawine apan nangunsiwe wuṛṛu nanusu Si'o!”

²⁸Arawe Mawu Yesus sinumimbakka, “Nangillembon lal᷊umanna'a lai su taumata apan maddaringikka wisaran Ruata wuṛṛu mappaamattu al᷊aṛṛang-Nge!”

²⁹Tantal᷊anna manga taumata uaṛṛimpulunna Mawu Yesus, i Tou nanassukku wisara-Ne, unni Tou, “Tumaniten dal᷊eo taumata su tempo indi. I mangitou madorongnga sambau al᷊aṛṛindu'a tadea'u i mangitou wotongnge mangngimanna si Ya'u, arawe i mangitou tawe onggol᷊annu saran sambau al᷊aṛṛindu'a, tumba'u al᷊aṛṛindu'i Nabi Yunus.

³⁰Su ereapa i Nabi Yunus na'ola'a al᷊aṛṛindu'a su taumatan soa Niniwe, aroddi lai Ana'u Taumata sarun ma'ola'a sambau al᷊aṛṛindu'a su manga taumata tempon indi.

³¹Su Allong Kiamatta, Ratu wuassu wanua Timukka sarun mabangunna ringannu taumatan tempo indi, wuṛṛu mangansilla si mangitou. Tadea'u, maaringikka al᷊aṛṛa'i Salomo apan pande udde, Ratu udde nangatokku amamatta marau wuassu pentakku runia. Arawe isindi orassa indi pia sangkatou magewal᷊anna wuassi Salomo!

³²Su Allong Kiamatta, tumana'u soa Niniwe sarun mabangunna su sambau ringannu taumatan tempo indi, wuṛṛu mangansilla si mangitou, ana waugu taumata Niniwe udde nawal᷊u wuassu manga rosane napawe Yunus nannase si mangitou. Arawe isindi orassa indi pia magewal᷊anna wuassi Nabi Yunus!”

³³“Tawe taumata mande'omma sol᷊o see iwuni ara'e luuwannu wensada. I tou sarun mangadon sol᷊o udde su tampane, tadea'u taumata apan sumutta wotongnge maasilo semakka.

³⁴Mata eteudde sol᷊om badangnga. Amungkangngu matanu matilangnga, ahewallu wadangngu masema-semakka. Arawe amungkangngu matanu mal᷊abukka, ahewallu wadangngu maola'a marandu-randumma.

³⁵Ana waugu udde, paatehamma, arie ma'oman sara asasemakka apan si'ote udde maola'a marandumma.

³⁶Amungkangngu ahewallu wadangngu masemakka, wuṛṛu tawedu saran sambau marandumma, ne ahewallu wadangngu udde masema-semakka ere sassemaṛṛannu semakku sol᷊o.”

³⁷Napawe Mawu Yesus nangudussu wisara-Ne, sangkatou taumatan Farisi nangahe si Tou umanna su wal᷊ene. Ne Mawu Yesus inaite inumanna isudde.

³⁸Taumatan Farisi udde naherangnga naasilo Mawu Yesus inumanna tawe nangukkassa lima rorone, tumuṛṛuttu atorannu agama.

³⁹Ana waugu udde Mawu nabbisara si tou, “Atonna yamiu manga taumatan Farisi ninumaramma mammaresi mangko wuṛṛu lama'a tumba'u su liudde, arawe sulal᷊ummu watangannu napene lal᷊awangnga wuṛṛu al᷊al᷊eo.

⁴⁰I yamiu woddo! Wal᷊inewe Ruata apan na'ola'a wageangngu liudde udde, suete na'ola'a lai wageangngu lal᷊umme?

⁴¹Apan sulal᷊ummu mangko wuṛṛu lamangngu udde, eteudde ṛinone ionggolli yamiu su taumata asiangnga. Ringannu olangnge aroddi, sarangkanambone sarun maola'a waresi hunane si yamiu.

⁴²Nasilakate i yamiu manga taumatan Farisi! Wuan sinuanannu ere salasih wuṛṛu inggu wuṛṛu rampa-rampa waine, i yamiu mangngagillu sambageanganna su Ruata, arawe atatul᷊idda wuṛṛu darangngu su Ruata tawe ia'ola'i yamiu. Sumbal᷊i eteudde ṛinone olaanni yamiu, ringannu tawe manantangngu atoranna waine lai.

⁴³Nasilakate i yamiu manga taumatan Farisi! I yamiu mal᷊utu manga tampa awantuhanne sulal᷊ummu wal᷊em pattataṛṛamawuanna, apulune a'addatanna su manga pasakka.

⁴⁴Nasilakate i yamiu! I yamiu ere lal᷊abinganna tawe aranne, apan raṛṛindannu taumata awagananna.”

⁴⁵Sangkatou hurun agama nabbisara Mawu Yesus, “Iamangnga Huru, ringannu manga wisara udde, Iamangnga mangngadio'a lai si yami!”

⁴⁶Mawu Yesus sinumimbakka, “I yamiu lai nasilakate, manga hurun agama! I yamiu madorongnga manga inolaanna apan masahadda wuṛṛu mangagillu manga atoranna apan mawakkatta, arawe i yamiu sassane maddiri mantul᷊ungngu taumata umaamanne.

⁴⁷Nasilakate i yamiu! I yamiu manggolangnga manga nabi apan suete nipaten iupungngu al᷊amonanu sassane.

⁴⁸Nariaddi yamiu sassane mangnga'u manungku i yamiu suadio'a lai su inolaanna apan suete niola'u iupungngi yamiu; ana waugu ete i mangitou apan namate manga nabi udde wuṛṛu ete i yamiu apan nanggolangnga.

⁴⁹Ana waugu udde Apapanden Ruata nabbisara, ‘I Ya'u sarun mandolokku manga nabi wuṛṛu manga ralol᷊oṛṛang-Ku ringanni mangitou; sangkawageanganna sarun pateanna wuṛṛu waine lai sarun sansaranna!’

⁵⁰Ruata na'ola'a udde tadea'u manga taumata orassa indi iṛṛuumanna ana waugu pamamate apan suete niola'a su manga nabi ro'en runia nariaddi,

⁵¹nanattakka wuassu pamamate si Habel na'oman sara pamamate si Zakharia, apan nariaddi su wallattu pangadoannu sasamba wuṛṛu Wal᷊e Mawu. Pangimante: Manga taumata orassa indi sarun iṛṛuumanna ana waugu sarangkanambone udde.

⁵²Nasilakate i yamiu, manga hurun agama! A'unsi ipamu'a ngaran apande sasahipunanni yamiu, arawe i yamiu sassane maddiri sumutta sulal᷊umme maddea'a apande udde. Arawe i yamiu mangngul᷊a'ukku manga taumata apan maapulu sumutta sulal᷊umme!”

⁵³Napawe Mawu Yesus nanantangke tampa udde, manga hurun agama wuṛṛu manga taumatan Farisi mammansaggu Mawu Yesus. I mangitou mannattakke mammono'a si Tou tadea'u i Tou mabbisara ringannu anambon inolaan-Ne.

⁵⁴Wuṛṛu tantal᷊anna udde lai, i mangitou mannutukka si Tou mapia-pia ana see maasametta manga apa apan nassal᷊a iwabbisara-Ne.