Read Talaud LUKAS 12 Bible Online

LUKAS 12 - Talaud bible

LUKAS 12

¹Su ṛiwune taumata mangke uasaseppe'a na'oman sara piaddu niaṛṛindanna leddane. Tantal᷊anna manga taumata udde uaṛṛimpulunna, Mawu Yesus nabbisara su manga mallal᷊aṛṛenggen-Ne, “Paatehamma su ragin taumata Farisi, pandumang-Ku, lilangkamal᷊e'i mangitou.

²Tawedu uawuni apan tawe aasiloanna, wuṛṛu tawedu apan iadappingnga apan tawe asingkatanna.

³Apan iwabbisarang kamiu su alloarane, sarun aringiṛṛanna lai su tempo allo; wuṛṛu apa apan isassal᷊imburungngi yamiu su tal᷊ingan taumata sulal᷊ummu wabbo'a uaṛṛuuda, sarun ial᷊iata su al᷊awo'u tampa.”

⁴“Paanaunge, manga hawe'u! Arie pa'ata'utti mangitou apan mammate wadangnga arawe tawe maaola'a manampal᷊iu wua isudde.

⁵Mappianne Ta'u ita'e si yamiu apan ṛinone iaata'utti yamiu. Ata'utten Ruata! Ana waugu napawe suete namate, i Tou uataṛṛino lai mandammenu sulal᷊ummu naraka! Pangimante, tumba'u i Tou iaata'utti yamiu.

⁶Limam bau manu'a sanggelokka niwal᷊u'a ringannu aregane darua roitta apan aadio'anne. Salaiwe aroddi tawe saran sambau inabul᷊ianannu Ruata.

⁷Uta'a su puanu lai suete nireengnga anambone, ana waugu udde arie pa'ata'utta; i yamiu ma'areganna marau wuassu manga sanggelokka udde!”

⁸“Paanaunge mapia-pia: Taumata apan nanga'u su saruannu awada'alla manungku i tou mallal᷊aṛṛenggeng-Ku, i tou sarun a'uannu Ana'u Taumata lai su saruannu manga mala'ekattu Ruata.

⁹Arawe taumata apan nassinaada su saruannu awadaalla manungku i tou mallal᷊aṛṛenggeng-Ku, i tou sarun isinaadu Ana'u Taumata lai su saruannu manga mala'ekattu Ruata.

¹⁰Amungkangngu taumata mabbisara wisara lullawangnga Ana'u Taumata, i tou wotongnge aampunganna, arawe amungkangngu i tou mangngadio'a Ghaṛṛahon Ruata, i tou tawe aampunganna.

¹¹Amungkangngu i yamiu iapidda su manga wal᷊em pattataṛṛamawuanna parikisanna su saruannu pamarenta ara'e tembonanne, arie pa'asinggawangnga su ola'u ereapa i yamiu manahekku wadangngu ara'e su ola'u apa apan sarun iwisaranu.

¹²Ana waugu apa apan sarun iwisaranu udde, sarun itantiron Ghaṛṛahon Ruata si'o su temponete.”

¹³Sangkatou wuassu wallattu taumata nambo nabbisara Mawu Yesus, “Iamangnga Huru, wotongnge Iamangnga mandolokku tuṛṛangku mangonggolla si ya'u sangkawageanganna wuassu darotongngu iamangngi yami.”

¹⁴Mawu Yesus sinumimbakka, “Tuṛṛangnga, isai namile si ya'u maola'a mallaṛṛuungnga ara'e matatahia darotongnga pussa'a su wallatti raddua?”

¹⁵Wua'udde Mawu Yesus nabbisara su anambon taumata isudde, “Paatehamma wuṛṛu paariaga, arie ma'oman sara i yamiu manaṛṛia'u. Ana waugu wiakku taumata tawe uaantimma wuassu pa'a'alane, salaiwe darotongnga uarundu'a.”

¹⁶See Mawu Yesus nabatti'u sasumandingnga indi, “Pia sangkatou ala. I tou pia leta'a apan manambo hessine.

¹⁷Taumata ala udde nanattakke maṛṛingidda sulal᷊ummu naungnge, ‘Inasueannu tampane hessin leta'u. Apa apande'u orassa indi?’

¹⁸Wua'udde i tou naṛṛingida lai wuṛṛu nabbisara su watanganne sassane, ‘Ore i ya'u pia ṛingidda; manga tampan darotongku iapaahohakka see ta'u iapaola'a lembon ahewal᷊anne. Isudde sarun pangadoannu al᷊awo'u gandumma wuṛṛu manga darotongku waine.

¹⁹Wua'udde sarun iwisara su riri'u sassane: I'o naauntungnga! Al᷊awo'u apa apan mapia naola'e pussaanu wuṛṛu tawe masue sulal᷊ummu pira tonna al᷊annune. Pangillol᷊ote orassa indi! Ante wuṛṛu pa'inumpe, wuṛṛu pamendammpe lal᷊umanna'u wiakku!’

²⁰Arawe Ruata nabbisara si tou, ‘Ei taumata woddo! Ṛabbi indi lai i'o sarun mate, see isai sarun manahuanna paa'ala apan suete niammullu hunam badangngu?’

²¹Aroddi olangnge al᷊awo'u taumata apan maddea'a maala hunan badangnge sassane, arawe tawe maddea'a maala su saruannu Ruata.”

²²See Mawu Yesus nabbisara su manga mallal᷊aṛṛenggen-Ne, “Ana waugu udde i Ya'u mabbisara, ‘Arie pa'asinggawangnga su ola'u wiakki yamiu, eteudde apa apan sarun annananni yamiu, ara'e apa sarun iluṛṛeng kamiu.’

²³Wiakka udde nangillembo wuassu anna, wuṛṛu wadangnga nangillembo wuassu laubba.

²⁴Panutukka paapia manga manu'u winalanganna! I mangitou tawe massuanna, tawe mangitingnga, tawe lai gudangnga ara'e wal᷊ingkakka. Arawe Ruata mappadul᷊i si mangitou! I yamiu lembo maareganna wuassu manga manu'a udde!

²⁵Isai su wallatti yamiu ringannu asasinggawangnge wotongnge maatamba uukke salaiwe adio'a?

²⁶Amungkangngu hatto adio'a udde tate ia'ola'i yamiu, anio i yamiu sussinggawangngu inolaanna waine?

²⁷Panutukka ereapa manga wunga bakung tumuwo, manga wunga udde tawe mammanara, tawe lai mandadu'a. Arawe i Ratu Salomo apan paa'alane aroddi anambone tawe malluṛṛen laubba aṛṛamage ere manga wunga udde!

²⁸Wal᷊abukka su wadda'a tumuwo allo indi wuṛṛu tiṛṛabbine masue tutunganna. Arawe Ruata mammedetta wal᷊abukka udde aroddi aṛṛamage. Nangillembote i yamiu! Arawe pangangimanni yamiu matul᷊ungnga!

²⁹Nariaddi, arie pa'asinggawangnga wuṛṛu umal᷊iwu su ola'u apa apan sarun annananna wuṛṛu inumanni yamiu.

³⁰Sarangkanambone udde raddeaannu taumata apan waggan Ruata. Arawe Iamangngu masingkatta manungku i yamiu mappandumma sarangkanambone udde.

³¹Arawe i yamiu ṛinone padea'a tadea'u Ruata mamarenta sulal᷊ummu wiakku, ne waine udde lai sarun ionggolu Ruata si yamiu.”

³²“I yamiu apan tumba'u matul᷊ungnga anambone, arie paata'utta! Ana waugu Iamangngu mal᷊uassa mangagillu al᷊amatta si yamiu wuassu Araratuan-Ne.

³³Wal᷊ua'e darotongngu wuṛṛu anggil᷊a'e roinne su taumata asiangnga. Ola'e sulal᷊ummu ririnu tampan doitta apan tawe maṛṛenessa, eteudde darotongnga apan uaraddo su surga. Darotongnga udde tawe mawul᷊i ana waugu taṛṛa ta'o tawe maapanna'o wuṛṛu wiangnga tawe maahohakka.

³⁴Ana waugu suapa pia darotongngu uaraddo, isudde lai naungngu uaraddo!”

³⁵“Paatehamma sumaruanna al᷊awo'u hatto. I yamiu ṛinone sidutu uasaddia ualluṛṛen laubba wuṛṛu sol᷊onu sidutu rare'omanna,

³⁶ere manga mangangimbe apan uasaddia mawune mawelengnga wuassu andeangngu awingnga. Amungkangngu mawune udde mawelengnga wuṛṛu manengkella ngara, i mangitou sarun mal᷊iha-l᷊ihakka mamu'a ngara.

³⁷Tumanite naauntunga manga mangangimbe apan aratinganna tantal᷊anna uaraṛṛaddo tempone mawune rumanta. Pangimante: mawune udde uasaddiate wuṛṛu mandolokku mangangimbene udde uma'ianna, see i tou nangimbete si mangitou.

³⁸Tumanite naauntunga manga mangangimbe udde inaratingannu mawune tantal᷊anna uaraṛṛaddo, salaiwe i tou nirumanta ṛabbi mattangnga ara'e mallannuanna lai wua'isudde!

³⁹Paanaunge indi! Unnu wisara tatahuannu wal᷊e masingkatta orassa tingngera taṛṛa ta'o rumanta, i tou sarun mandiaga tadea'u taṛṛo ta'o udde tawe maasutta sulal᷊ummu wal᷊ene.

⁴⁰Ana waugu udde i yamiu ṛinone uasasaddia, ana waugu Ana'u Taumata sarun dumanta su tempo apan tawe iaṛṛangngong kamiu.”

⁴¹“Mawu, apa al᷊aṛṛa'a udde pandumanne si yami ara'e su taumata nambo?” aiwal᷊om Petrus.

⁴²Mawu Yesus sinumimbakka, “Isai mangangimbe apan matuṛṛutta wuṛṛu pande ma'oman sara pileannu mawune maola'a tembonannu mangangimbe waine tadea'u i tou mappaanni mangitou su tempone?

⁴³Lal᷊umanna'a eteapa su mangangimbe udde napawe mawune mawelengnga wuṛṛu naaratingnga si tou tantal᷊anna mammanara manarane!

⁴⁴Pangimante: Mawunu udde sarun manantillu al᷊awo'u rarotongnge su mangangimbe udde.

⁴⁵Arawe amungkangngu mangngimbe udde mabbisara sulal᷊ummu naungnge, ‘Mawu'u ta'e mal᷊annu mabelengnga,’ see i tou namuulle anambon mangangimbe, wuṛṛu umanna; ma'inumma ma'oman sara iwu'anne,

⁴⁶ne mawune mabelengnga su allo wuṛṛu orassa apan tawe iaṛṛangngo. Wuṛṛu mangangimbe udde sarun puul᷊annu mawune see olaanna lai ere manga taumata apan tawe tumuṛṛutta Ruata.

⁴⁷Mangangimbe apan masingkattu apulu mawune, arawe tawe uasasaddia wuṛṛu maddiri tumuṛṛutta apulu mawune udde sarun heseṛṛanna ringannu ma'ikkatta.

⁴⁸Arawe mangangimbe apan masingkattu apulu mawune, wua'udde na'ola'a sambau apan nassal᷊a ma'oman sara puul᷊anna, tumba'u puul᷊anna masi'ome. Ana waugu taumata apan suete nionggol᷊annu manambo wuassi tou sarun padoronganna lai manambo. Wuṛṛu taumata apan suete nipangimananna masokka, wuassi tou lai sarun padoronganna masokka lai.”

⁴⁹“I Ya'u nirumanta su runia indi mandantan soṛṛoba. Apia eteapa amungkangngu putungnga luṛṛenggampe!

⁵⁰Ta'e pia lai asasusa wahewa sarun ta'u pendamanna. Wuṛṛu naungku u'ambul᷊isada amungkangngu udde taambe natipussa.

⁵¹Apa i yamiu massunna manungku i Ya'u rumanta mangapiddu paddarame su runia? Tawe, wal᷊ine paddarame ewe'e pasaseetta.

⁵²Manattakka orassa indi, su wal᷊e sambau apan lal᷊oṛṛone sire lima, sarun matatiakka, sire tallu mandoappa ruang katou, ara'e ruang katou mandoappa sire tallu.

⁵³Iamangnga sarun mandoappa anangnge esakka wuṛṛu anangnge esakka sarun mandoappa iamangnge. Inangnga mandoappa anangnge wawine, wuṛṛu anangnge wawine mandooppa inangngene. La'iananna wawine sarun mandoappa mananambone wawine wuṛṛu mananambo wawine sarun mandoappa la'iananna wawine.”

⁵⁴Mawu Yesus nabbisara lai su taumata nambo, “Amungkangngu i yamiu maasilo winabbawa wuassu samba'an waṛṛatta, i yamiu lapiddu mabbisara, ‘Sarun manguranna,’ Wuṛṛu atonna-tonna manguranna.

⁵⁵Amungkangngu maapendamma anginna nirumanta wuassu timukka, i yamiu mabbisara, ‘Sarun mapadissa.’

⁵⁶I yamiu taumata apan maapulu mangawusu! I yamiu wotongnge maṛṛangngon tempone ringannu ma'ellega ola'u langitta wuṛṛu runia. Anio tatiala indi tawe iaṛṛangngong kamiu?”

⁵⁷“Anio i yamiu tawe maṛṛawessa sassane apa apan naṛṛino?

⁵⁸Amungkangngu pia taumata mangalaeng kamiu su mallaṛṛuungnga, suapan botongnge padea'a hatto udde masue ringanni tou tantal᷊anna i yamiu ta'e su tangngan dal᷊anna. Amungkangngu tawe, i tou sarun mangapiddi yamiu su saruannu mallaṛṛuungnga udde wuṛṛu mallaṛṛuungnga udde sarun manantilli yamiu su polisi, wuṛṛu polisi sarun maṛṛuumanni yamiu su tuttupanna.

⁵⁹Pangimante! I yamiu tawe maasabangnga wuassu tuttupanna tantal᷊anna wawaekku ṛuumanna udde taambe niawaeṛṛanna.”