Read Talaud LUKAS 13 Bible Online

LUKAS 13 - Talaud bible

LUKAS 13

¹Su tempo udde taumata nabbati'a Mawu Yesus su ola'u manga pira taumatan Galilea apan nipatem Pilatus, su tempo i mangitou mangngapiddu sasamba su Ruata.

²Naaringikka watti'a udde, Mawu Yesus nabbisara, “Ana waugu taumatan Galilea nipate ereudde, i yamiu massunna udde tatialane i mangitou lembo marosa wuassu manga taumatan Galilea waine?

³Atonna-tonna tawe! Arawe paanaunge: amungkangngu i yamiu tawe mawal᷊u wuassu manga rosang kamiu, sarangkanambone sarun mate lai ere i mangitou.

⁴Ereapa lai ringannu sire mapul᷊o ual᷊u taumata apan nate su Siloam, su tempo menara udde nema'a si mangitou? I yamiu massunna udde ere sambau tanda manungku i mangitou arosanne wuassu manga taumata waine apan uatana'a su Yerusalem?

⁵Atonna-tonna tawe! Paassa lai ya'u mabal᷊o: Amungkangngu i yamiu tawe mawal᷊u wuassu manga rosang kamiu, i yamiu sarangkanambone mate lai ere i mangitou.”

⁶Wua'udde Mawu Yesus nabbati'u sasumandingnga indi, “Pia sangkatou taumata uatahuanna alu ara su waillu anggorene. Su sambau allo i tou inaite maddea'a wuang kalu udde, arawe tawe naasomba saran sambau.

⁷Nariaddi i tou nabbisara su mabbawaille udde, ‘Pa'ellega, tallute tonna i ya'u ruddanta maddea'a wuang kalu ara indi, arawe tawe naasomba saran sambau. Tuwangke alu udde! I tou tumba'u mangnginsue anna sulal᷊ummu leta'a!’

⁸Arawe mabbawailla udde sinumimbakka, ‘Wala'e lai i tou mabbiakka tumuwo santonna indi, mawu. I Ya'u sarun mamasolla leta'a uapal᷊iwutta si tou wuṛṛu pupuṛṛanna.

⁹Asinungka i tou mabua tonna suhati. Arawe amungkangngu tawe, wotongngete mawu mandolokka mapatuwangngi tou.’ ”

¹⁰Su sambau allon Sabatta, Mawu Yesus mangngaṛṛa'a su wal᷊em pattataṛṛamawuanna.

¹¹Isudde pia wawine mapul᷊ote ual᷊u su tonnane marada'a, ana waugu pia ghaṛṛaho lal᷊eo sulal᷊ummu wadangnge. Wawine udde uaal᷊udungnga wuṛṛu tawe maararisikka matul᷊ida.

¹²Napawe Mawu Yesus naasilo si tou, winagoante i tou, “Inangnga i'o mapia wuassu radangngu!”

¹³See Mawu Yesus namita wawine udde, ne su orassa udde lai i tou naararisikka matul᷊ida see nadalote Ruata.

¹⁴Piaṛṛa'u wal᷊em pattataṛṛamawuanna udde namul᷊o, ana waugu Mawu Yesus napaapian taumata su allon Sabatta, ana waugu udde i tou nabbisara su manga taumata, “Pia annummu allo ipammanara; rantate su miallo-miallo udde see iapaapia, imabaṛṛangnga su allon Sabatta!”

¹⁵Mawu sinumimbakka, “Lilangkamal᷊e'a i yamiu indi! Su allon Sabatta anambon taumata mammallossu sapi ara'e keledai wuassu tandangnge wuṛṛu ia'apidda su liudde ana iapa'inumma.

¹⁶Ne, orassa indi pia sangkatou wawine papapulunni Abraham, apan mapul᷊ote ual᷊u su tonnane al᷊annune aiitannu Setanna. Apa i tou tawe iapaapallossa wuassu aiitta udde su allon Sabatta?”

¹⁷Sasimbakku Mawu Yesus udde naasili atonna manga ro'amme; arawe anambon taumata waine lulluassa naasilo al᷊awo'u al᷊aṛṛindu'a apan niola'u Mawu Yesus.

¹⁸Mawu Yesus naiwal᷊o, “Napawe Ruata mamarenta, ereapa olangnge? Ringannu apa i Ya'u wotongnge manumandingnga?

¹⁹Olangnge ere sasumandingnga indi. Sambau watun sawi niapiddu sangkatou taumata nisuanne su waille. Watune udde tinumuwo see naola'a alu, wuṛṛu manga manu'a na'ola'a sal᷊akke su manga rannang kalu udde.”

²⁰Paassa lai Mawu Yesus naiwal᷊o, “Amungkangngu Ruata mamarenta, ringannu apa i Ya'u manumandingngu olangnge?

²¹Olangnge ere ragi apan nianun sangkatou wawine see niompelu taponna appatu pul᷊o su liteṛṛene, na'oman sara tinumuwo.”

²²Sulal᷊ummu amatanna watukku Yerusalem, Mawu Yesus sinumabbi manga soa wuṛṛu manga ampungnga lapiddu mangngaṛṛa'a.

²³See pia taumata naiwal᷊o si Tou, “Iamangnga, apa tumba'u matul᷊ungnga taumata masal᷊amatta?” Mawu Yesus sinumimbakka,

²⁴“Pattinsahadde sumutta malliu ngara apan maṛṛiputta. Ana waugu naunge! Manambo taumata maddea'a sumutta arawe tawe maasutta.

²⁵Napawe tatahuannu wal᷊e napu'o wuṛṛu naṛṛu'udu ngarane, i yamiu uarisikka su liudde wuṛṛu nanattakke mannengkella lapiddu mabbisara, ‘Tua, i yami pamu'aiwe ngara!’ Tuanga udde sarun sumimbakka, ‘I ya'u wagga i yamiu wuassuapa!’

²⁶I yamiu sarun sumimbakka, ‘I yami sueten inumanna wuṛṛu na'inumma su sambau ringannu Mawu, wuṛṛu Mawu suete nangaṛṛa'a lai su manga lal᷊anna su soang kami!’

²⁷Arawe Tuanga udde sarun mabbisara apia, ‘I ya'u wagga i yamiu wuassuapa. Passal᷊iu wua isindi, yamiu apan na'ola'a al᷊al᷊eo!’

²⁸Su tempo i yamiu naasilo si Abraham, si Ishak wuṛṛu si Yakub wuṛṛu anambon manga nabi lulluassa sulal᷊ummu Runia Wakku Ruata, i yamiu sarun lumuai wuṛṛu matataṛṛangnga susa ana waugu i yamiu sassane nillimbuaṛṛanna watukku liudde!

²⁹Manga taumata sarun rumanta wuassu ra'i wuṛṛu waṛṛatta, wuassu sawannakka wuṛṛu timukka, wuṛṛu sarun lumuassa sulal᷊ummu Runia Wakku Ruata.

³⁰Atonna-tonna, pia taumata panginsueanne sarun maola'a taumata paarorone, wuṛṛu pia taumata apan paarorone sarun maola'a panginsueanne.”

³¹Su tempo udde lai, pia manga pira taumatan Farisi nirumanta ringannu Mawu Yesus wuṛṛu nabbisara, “Arie paatana'a isindi! Roote su tampa waine, ana waugu Herodes pia pandumma mamate Si'o.”

³²Mawu Yesus sinumimbakka, “Roote wal᷊oa'a su taumata apan tawe gunane udde, ‘Allo indi wuṛṛu tiṛṛabbi i Ya'u mallimbuakka ghaṛṛaho lal᷊eo wuṛṛu mapaapian taumata marada'a, arawe su allo atallune i Ya'u sarun manginsue manara-U.’

³³Salaiwe aroddi i Ya'u ṛinone manassukku lai amatang-Ku allo indi, tiṛṛabbi wuṛṛu tillorega, ana waugu lal᷊eo sangkatou nabi pateanna su liuddu Yerusalem.

³⁴Yerusalem, Yerusalem! Manga nabi suete nipatenu! Manga ralol᷊oṛṛannu Ruata suete tinuntungannu watu na'oman sara nate! Paapirate i ya'u ma'apulu mangammullu anambon tumana'u soa indi ere inangngu manu'a mangooppa manga anangnge sulal᷊ummu papaidde, arawe i'o maddiri!

³⁵Ana waugu udde Ruata tate lai maṛṛundingannu. Paasingkate, manattakka orassa indi i'o tate lai maasilo si Ya'u, ma'oman sara i'o mabbisara, ‘Nial᷊amatannte i Tou apan nirumanta ringannu arannu Mawu.’ ”