Read Talaud LUKAS 14 Bible Online

LUKAS 14 - Talaud bible

LUKAS 14

¹Su sambau allon Sabatta, Mawu Yesus inaite inumanna su wal᷊en sangkatou piaṛṛa'u Farisi. Isudde manga taumata mannutukka Mawu Yesus mapia-pia.

²Ne nirumantate ringannu Mawu Yesus sangkatou marada'a hanne su limane wuṛṛu su leddane.

³See Mawu Yesus naiwal᷊o su manga huru n agama wuṛṛu manga taumatan Farisi apan isudde, “Tumuṛṛuttu Titan agaman kite, wotongnge i ite mapa'apian taumata marada'a su allon Sabatta ara'e tawe?”

⁴Manga hurun agama wuṛṛu taumatan Farisi udde nallannaba. See Mawu Yesus namaggo taumata udde wuṛṛu niapaapiaten tou, wua'udde i tou nirolokke niapaapul᷊e.

⁵Wua'udde Mawu Yesus nabbisara su manga taumata, “Unnu wisara sangkatou wuassu wallatti yamiu pia anangnge ara'e sapi apan nanawo sulal᷊ummu paṛṛihi su allon Sabatta, apa i tou tawe watunanna su liudde, ana'a ara'e sapi udde su allo udde lai?”

⁶Arawe tawe saran sangkatou wotongnge sinumimbakka Mawu Yesus su ola'u hatto udde.

⁷Mawu Yesus naasilo manga raho apan namile tampa apianne. Ana waugu udde i Tou nangagillu al᷊aṛṛa'a indi si mangitou nambo.

⁸“Amungkangngu i yamiu wal᷊oanna su andeangngu awingnga, arie inai uma'ianna su addera awantuhanne, ana waugu arie piaddu sangkatou waine apan lembon a'addatanna wuassi yamiu suete winal᷊oanna lai,

⁹na'oman sara tatahuannu wal᷊e apan suete nabal᷊o siraddua udde, ringannu ipabbawata'a rumanta ringanni yamiu wuṛṛu mabbisara, ‘Madorongnga ampungnga, tampa indi suete nisaddia su raho udde.’ Ne ringannu massili i'o nangingkatta su tampa apan su liudde.

¹⁰Ana waugu udde, amungkangngu i yamiu wal᷊oanna, pamile tampa su liudde, tadea'u tatahuannu wal᷊e rumanta wuṛṛu mabbisara si yamiu, ‘Hawe wette aiana'e su tampa apianne.’ Ringannu aroddi yamiu a'addatanna su saruannu anambon raho waine.

¹¹Ana waugu suapan taumata apan mannaggakku watanganne sarun iapaawawo, arawe isai mammawon batanganne sarun iapaatanggakka.”

¹²See Mawu Yesus nabbisarate mawum bal᷊e, “Amungkangngu i'o mabal᷊o taumata su andeangnga umanna allo ara'e rabbi, arie mabal᷊o hawe ara'e tuṛṛangnga, ara'e sangkatuṛṛangnganna, ara'e al᷊indonganne apan ala. Ana waugu pia tempone lai i mangitou mabal᷊o si'o, wuṛṛu ringannu aroddi i'o manengkamma wawal᷊inne wuassu inolaannu.

¹³Nariaddi, amungkangngu i'o ma'ola'a andeangnga, wal᷊oite taumata asiangnga, taumata pia sangkulle, taumata lome wuṛṛu taumata wuta.

¹⁴I'o sarun al᷊amatanna, ana waugu manga taumata udde tawe maawal᷊issa apapianu. Apapiannu sarun bal᷊isannu Ruata su tempo manga taumata apan mapia iapaawangunna apia wuassu papate.”

¹⁵Su tempo sangkatou wuassu wallattu taumata u'anna su sambau isudde naaringikka wisara Mawu Yesus, i tou nabbisara, “Auntunganna eteapa su taumata apan sarun umanna su sambau ringannu Ruata napawe i Tou rumanta ere sangkatou Ratu!”

¹⁶Arawe Mawu Yesus nabbisara taumata udde, “Su sambau allo pia sangkatou na'ola'a andeangnga apan wahewa wuṛṛu nabal᷊o taumata nambo.

¹⁷Napawe na'omate tempone manattakku andeangnga, taumata udde nandolokku mangangimbene inai ringannu manga raho wuṛṛu nabbisara, ‘Wette rantate, sarangkanambone nasaddiate!’

¹⁸Arawe i mangitou sarangkanambone, sangkatou-sangkatou madorongnga ampungnga. Paarorone nabbisara su mangangimbe udde, ‘I ya'u wakkute namalli leta'a, wuṛṛu i ya'u inai mamarikissa leta'a udde. Ampungewe i ya'u.’

¹⁹Waine lai nabbisara, ‘I ya'u wakku namalli limam pare sapi, wuṛṛu inai maannammu manga sapi udde. Ampungewe i ya'u.’

²⁰Waine lai nabbisara, ‘I ya'u wakkute na'awingnga, ana waugu udde i ya'u tawe maaranta.’

²¹Mangangimbe udde napul᷊ete wuṛṛu nabal᷊on olangnge udde su mawune. Mawune mangke nasa'u, wuṛṛu nabbisara su mangangimbene, ‘Paal᷊ihakka inai su manga lal᷊anna wuṛṛu manga sasuttanna su soa. Apira'e isindi taumata asiangnga, taumata pia sangkulle, taumata wuta, wuṛṛu taumata lome.’

²²Wua'udde mangangimbe udde nabbisara, ‘Tua, parentan Tuanga suete niapaamatta, arawe tampa ta'e manambo.’

²³See tuanga udde nabbisara, ‘Roote watukku lal᷊anna wuṛṛu manga sasuttanna su liuddu soa, wuṛṛu wataa'e taumata rumanta, tadea'u wal᷊e'u mapene.

²⁴Paanaunge! Tawedu saran sangkatou wuassu wallattu manga raho apan suete niwal᷊oanna udde inumanna annu andeangku indi!’ ”

²⁵Manambo taumata u'amatta su sambau ringannu Mawu Yesus. Mawu Yesus nanaile wuṛṛu nabbisara si mangitou,

²⁶“Amungkangngu taumata rumanta ringang-Ku, arawe lembo mandangngu inangnge, iamangnge, awingnge, al᷊aṛṛanangnge, manga tuṛṛangnge, lembonete ririne sassane, i tou tawe maola'a mallal᷊aṛṛenggeng-Ku.

²⁷Taumata apan maddiri mamasanna arussane wuṛṛu tumantalongnga si Ya'u, tawe maola'a mallal᷊aṛṛenggeng-Ku.

²⁸Amungkangngu sangkatou wuassu wallatti yamiu maapulu mapararisikku menara i tou sarun uma'ianna mandeengnga rorone roinne, tadea'u i tou maasingkatta apa roinne wotongnge ipanginsue menara udde ara'e tawe.

²⁹Ana waugu amungkangu natualage i tou tawe wotonge maasue menara udde, salaiwe rapappakke naola'e, ne alawo'u taumata apan maasilo manara udde sarun lumaggen tou.

³⁰I mangitou sarun mabbisara, ‘Ih, taumata indi mapararisikka, arawe tawe maasue manarane!’

³¹Amungkangngu sangkatou ratu pia tantarane mapul᷊o ṛiwu su atoune inai mappapangalo ringannu ratu waine apan uatahuanna tantara ruam pul᷊o su ṛiwune, ratu udde sarun uma'ianna maṛṛingidda asuene apa i tou matohasse mandooppa seenne udde.

³²Amungkangngu i tou masingkatte manungku i tou lome, asinungka su tempo seenne ta'e marau, i tou mandolokku ralol᷊oṛṛanne inai madorongnga maddame.”

³³Panginsueanne Mawu Yesus nabbisara, “Aroddi lai matataṛṛino si yamiu. Tawe saran sangkatou wuassi yamiu wotongnge maola'a mallal᷊aṛṛenggeng-Ku, amungkangngu i tou tawe manantillu al᷊awo'u darotongnge.”

³⁴“Asimma udde mapia, arawe amungkangngu naola'e maammi, wotongnge iapaapakkada apia?

³⁵Tate gunane lai, mapia ete su wailla aroddi lai ipanuwukka sasuanna. Nariaddi rammea'e. Amungkangngu pia tal᷊inga padaringikka!”