Read Talaud LUKAS 15 Bible Online

LUKAS 15 - Talaud bible

LUKAS 15

¹Su sambau allo, manambo mallaluṛṛu wose wuṛṛu manga taumata apan sassunnanna lal᷊oṛṛon soa lal᷊eo, nirumanta madaringikka Mawu Yesus.

²Manga taumatan Farisi wuṛṛu manga hurun agama mannattakke sussal᷊iomanna. I mangitou mabbisara, “Eh, taumata indi mannengkamma taumata lal᷊eo wuṛṛu u'anna lai su sampunna ringanni mangitou!”

³Ana waugu udde, Mawu Yesus nabbati'e si mangitou sasumandingnga indi,

⁴“Unnu wisara sangkatou wuassi yamiu uatahuanna domba maṛṛasutta see i tou niawul᷊iannu sambau — apa sarun olaanne? Natantunna i tou sarun manantangngu siom pul᷊o sio domba udde su wadda'a, wuṛṛu inaite maddea'a sambau apan nawul᷊i udde ma'oman sara asombanganna.

⁵Wuṛṛu napawe i tou naasombate apia domba udde, i tou aroddi lulluassa na'oman sara pinasanna domba udde su wambangnge,

⁶see niapidda napul᷊e. Wua'udde i tou namago manga hawene wuṛṛu al᷊indonganne, wuṛṛu nabbisara, ‘Wette i ite lumuassa. Domba'u apan nawul᷊i niasombangante apia!’

⁷Ne, aroddi lai su surga pia al᷊al᷊uassa apan bahewalla su sangkatou apan marosa nawal᷊u wuassu rosane, wuassu siom pul᷊o sio taumata apan mapiate wuṛṛu tate lai iwata'a mawal᷊u wuassu rosane.”

⁸“Ara'e unnu wisara sangkatou wawine uatahuanna mapul᷊o roitta sal᷊a'a, see sambau nawul᷊i — apa sarun olaanni tou? I tou sarun mande'omma sol᷊o wuṛṛu manapu wal᷊ene lapiddu maddea'a su al᷊awo'u tampa ma'oman sara asombanganna roitta udde.

⁹Su tempo i tou naasomba roitta udde, i tou namago manga hawene wuṛṛu manga al᷊indonganne, see nabbisara, ‘I ya'u lulluassa atonna ana waugu niasombangante apia roi'u apan nawul᷊i. Wette i ite lumuassa!’

¹⁰Aroddi lai mala'ekattu Ruata lulluassa napawe pia sangkatou taumata lal᷊eo nawal᷊u wuassu manga rosane. Pangimante!”

¹¹Mawu Yesus nabbisara apia, “Pia sangkatou iamangnga apan pia anangnge ruang katou esakka.

¹²Iapa atuarianne nabbisara si tou, ‘Iamangnga, anggil᷊a'e si ya'u wageangku orassa indi wuassu darotongngi ite.’ Ne iamangnge nattahiate darotongnge udde su anangnge ruan katou udde.

¹³Manga pira allo wua'udde ana'a atuarianne udde nabal᷊u'u wageangnge pussaane udde see inaite su wanua marau. Poiaroddi i tou nanginsuete roinne wuṛṛu mallal᷊umanna'e.

¹⁴Napawe roinne udde nasuete, nariaddite su wanua udde ṛutumma apan wahewa, na'oman sara i tou nasusate.

¹⁵See i tou inaite nammanara ringannu sangkatou tumana'u soa isudde, apan nandolokki tou su wailla mandiaga wawi.

¹⁶I tou niamal᷊unusante, na'oman sara i tou pia apulu malloṛṛo tianne ringannu annu manga wawi udde. Salaiwe i tou mal᷊unussa aroddi, tawe saran sangkatou mangonggolu anna si tou.

¹⁷Panginsueanne i tou naanaungnga wuṛṛu nabbisara, ‘Manga taumata apan mammanara ringannu iamangku pia anna marasai arawe i ya'u isindi mateten lunussa!

¹⁸I ya'u mapul᷊ete wuṛṛu inaite ringannu iamangku wuṛṛu mabbisara si tou: Iamangnga, i ya'u suete na'ola'a rosa su saruannu Ruata wuṛṛu su saruanni Iamangnga.

¹⁹I ya'u tate su ṛinone lai isago ana'u Iamangnga. Ola'e i ya'u ere sangkatou allangngu Iamangnga.’

²⁰Ne i tou inaite napul᷊e ringannu iamangnge. Ta'e marau wuassu wal᷊e, i tou niasiloanten iamangnge. Ringannu aakkanna iamangnge tinumal᷊angnga naisasomban tou, see naṛṛa'uppa wuṛṛu nangari'a si tou.

²¹‘Iamangnga,’ unnu ana'a udde, ‘i ya'u suete na'ola'a rosa su saruannu Ruata wuṛṛu su saruannu Iamangnga. Tate su ṛinone lai ya'u isago ana'u Iamangnga.’

²²Arawe iamangnge namago manga mangangimbene wuṛṛu nabbisara, ‘Paal᷊ihakka! Panganu laubba apianne, wuṛṛu luṛṛea'e si tou. Luṛṛea'a lai sinsingnga su tal᷊imadone, wuṛṛu sapatu su leddane.

²³Wua'udde panganute ana'u sapi atawanne wuṛṛu pototte. I ite sarun umanna wuṛṛu lumuassa.

²⁴Ana waugu ana'u indi natete, orassa indi nabbiakke apia; i tou nawul᷊ite, orassa indi niasombangante apia.’ See i mangitou nanattakke naandeangnga.

²⁵Tantal᷊anna udde, ana'a pahul᷊une su wailla. Su tempo i tou napul᷊e wuṛṛu na'omate maranin bal᷊e, i tou naaringikka tingikku musikka wuṛṛu masasal᷊aingnga.

²⁶I tou namago sangkatou su wallattu mangangimbene see naiwal᷊o, ‘Pia apa su wal᷊e?’

²⁷Mangangimbe udde sinumimbakka, ‘Tuarinu nawelengke! Wuṛṛu iamangngu suete nandolokka niapapototta ana'u sapi apan matawa, ana waugu nawelengnga apia ana'i tou ringannu sal᷊amatta!’

²⁸Ana'a pahul᷊une udde mangke nasa'u, na'oman sara i tou maddiri sumutta su wal᷊e. See iamangnge sinumabangnga wuṛṛu nassal᷊o'en tou niapaasutta.

²⁹Arawe i tou nabbisara, ‘Ringannu tonnane al᷊annune i ya'u mammanara ringanni Iamangnga. Taambe saran paassa i ya'u nilumawangnga parentan Iamangnga. Apate nionggolli Iamangnga si ya'u? Ambingnga sambau lai taambe nionggolli Iamangnga si ya'u ipa'ola'a andeangnga ringannu manga hawe'u!

³⁰Ana'u Iamangnga udde suete nanginsue darotongngu Iamangnga ringannu wawine masandaga, arawe napawe i tou nawelengnga, Iamangnga namototta ana'u sapi apan matawa si tou!’

³¹‘Ana'u,’ sasimbakku iamangnge, ‘i'o sidutu isindi ringangku. Anambon darotongnga apan tatahuanangku udde darotongngu lai.

³²Arawe i ite sarun ma'andeangnga wuṛṛu lumuassa ana waugu tuarinu udde natete, arawe orassa indi nabbiakke apia; i tou nawul᷊ite, arawe orassa indi nawelengke apia.’ ”