Read Talaud LUKAS 17 Bible Online

LUKAS 17 - Talaud bible

LUKAS 17

¹Mawu Yesus nabbisara manga mallal᷊aṛṛenggen-Ne, “Manga inolaanna apan ma'arosa taumata udde ṛinone pia. Arawe nasilakate taumata apan naola'a punnene!

²Mappianne amungkangngu pia watun gahilinganna ii'itta su ullekkane, see i tou iwontolla su tahal᷊oangnga wuassu i tou mapaarosan sangkatou su wallattu manga taumata maradio'a indi.

³Ana waugu udde, paatehamma! Amungkangngu tuṛṛangngu ma'ola'a rosa, taggue i tou. Amungkangngu i tou sinumassilla, ampungewe i tou.

⁴Amungkangngu i tou nassal᷊a si'o paapitu sulal᷊ummu massallo wuṛṛu suapan massal᷊a rumanta ringannu wuṛṛu mabbisara, ‘I ya'u madorongnga ampungnga,’ ampungewe i tou.”

⁵Manga rasul nabbisara Mawu Yesus, “Mawu, tohassawe pangangimanni yami.”

⁶Mawu Yesus sinumimbakka, “Amungkangngu i yamiu pia pangangimanna ere ahewallu watun sawi, yamiu wotongnge mabbisara su alu murbei indi, ‘Aabute i'o wuṛṛu tuwote su tahal᷊oangnga,’ alu indi sarun tumuṛṛutta parentanu.”

⁷“Unnu wisara sangkatou wuassi yamiu pia mangangimbe apan mammasolla su wailla wuṛṛu mallu'ada domba. Napawe mangangimbe udde nabelengnga, apa mawune mabbisara mangangimbene, ‘Wette paal᷊ihakka umanna’?

⁸Asinungka tawe! Ewe'e i tou mabbisara mangangimbene, ‘Saddiae anna i ya'u. Palluṛṛeten laubba waresi wuṛṛu riagaite i ya'u umanna wuṛṛu ma'inumma, wua'udde wotongngete i'o umanna!’

⁹Mangangimbe udde salaiwe tawe raloanna, ana waugu suete tinumuṛṛutta parenta mawune, wal᷊inewe aroddi?

¹⁰Aroddi lai yamiu. Amungkangngu i yamiu suete tinumuṛṛutta anambon manara nirolokka si'o, wal᷊oa'e, ‘I yami tumba'u mangangimbe wiasa; i yami tumba'u ma'ola'a manarang kami.’ ”

¹¹Sulal᷊ummu amatanna watukku Yerusalem, Mawu Yesus sinumabbi passarannu Samaria wuṛṛu Galilea.

¹²Su tempo sinumutta su sambau ampungnga, i Tou nirantannu sire mapul᷊o taumata marada'a paro apan ma'arantinna. I mangitou nirumarisikka ro'en marau

¹³wuṛṛu mangngintul᷊i, “Mawu Yesus! Tuangnga! Akkanaawe i yami!”

¹⁴Su tempo Mawu Yesus naasilo si mangitou, i Tou nabbisara, “Roote ringannu manga imam, padorongke i mangitou mamarikissa wadangngi yamiu.” Tantal᷊anna i mangitou u'amatta, nawul᷊ite rada'i mangitou.

¹⁵Napawe sangkatou su wallatti mangitou naapendamma manungku i tou napiate, i tou nabelengnga see ringannu tingikka ma'ikkatta i tou nadalo Ruata.

¹⁶See su saruannu Mawu Yesus i tou nassubba wuṛṛu naadiangkamanna si Tou. Taumata udde taumatan Samaria.

¹⁷Wua'udde Mawu Yesus nabbisara, “Wal᷊inewe pia sire mapul᷊o apan niapaapia? Suapa sire sio udde?

¹⁸Anio tumba'u taumata raho indi nabelengnga ma'adiangkamanna su Ruata?”

¹⁹See Mawu Yesus nabbisara su taumata udde, “Darisikke, wuṛṛu roote. Ana waugu i'o mangngimanna si Ya'u, i'o napiate.”

²⁰Sire pira taumatan Farisi naiwal᷊o Mawu Yesus tingngera Ruata rumanta mamarenta. Mawu Yesus sinumimbakka, “Araratuannu Ruata tawe itattakka ringannu manga tanda apan wotongnge asiloannu taumata,

²¹ma'oman sara taumata botongnge mabbisara, ‘Wette pa'ellega, indi i Tou!’ ara'e, ‘Poiaroddi i Tou!’ Ana waugu Ruata suete nanattakka mamarenta su pattangnganni yamiu.”

²²Wua'udde Mawu Yesus nabbisara su manga mallal᷊aṛṛenggen-Ne, “Sarun dumanta tempone i yamiu ma'apulu ma'ellega sambau allo wuassu manga allon Ana'u Taumata, arawe i yamiu tawe maasilo allo udde.

²³Wuṛṛu taumata sarun mabbisara si yamiu, ‘Pa'ellega, isudde!’ ara'e, ‘Pa'ellega isindi!’ Arawe imbaṛṛangnga i yamiu sumabangnga maddea'a si Tou.

²⁴Su ereapa sawallo ma'ilatta wuassu langitta, wuṛṛu mannemakka wuassu pentakke saran pondolle, aroddi lai ola'u Ana'u Taumata napawe su allonete.

²⁵Arawe paarorone i Tou ṛinone matataṛṛangnga anambon asasusa wuṛṛu ipa'adirin taumata orassa indi.

²⁶Su allo udde Ana'u Taumata sarun iapaal᷊iatta'a lihidde ere su tempo Nabi Nuh rorone.

²⁷Taumata u'anna wuṛṛu ma'inumma, wuṛṛu ma'awingnga; aroddi lai tawe illol᷊one na'oman sara i Nuh sinumutta sulal᷊ummu apalla wuṛṛu nammanawangnga lapiddu namate anambon taumata udde.

²⁸Wuṛṛu ere lai su tempon Lot. Taumata u'anna ma'inumma, mabbal᷊u'a, mammalli, mabbailla, massuanna wuṛṛu ma'ola'a wal᷊e.

²⁹Arawe napawe i Lot sinumabangnga wuassu Sodom, allo udde putungnga wuṛṛu belerangnga nanawo wuassu langitta wuṛṛu namate si mangitou sarangkanambone.

³⁰Aroddi lai olangnge su allon Ana'u Taumata iapaal᷊iatta'a.

³¹Su allo udde taumata apan tantal᷊anna roso uaawitta su wal᷊ene arie pallintukka mangal᷊appa darotongnge sulal᷊ummu wal᷊e. Aroddi lai taumata apan tantal᷊anna su wailla arie pabelengnga su wal᷊ene.

³²Paananunge apa apan suete nariaddi su awingngi Lot!

³³Taumata apan mattinsahadda manal᷊amatta wiakke, sarun awul᷊iannu wiakke. Arawe taumata apan niawul᷊iannu wiakke sarun maasal᷊amatta wiakke udde.

³⁴Pangimante: Su ṛabbi udde ruang katou apan mattiilla su atatiil᷊anna sambau, sangkatou sarun iapidda wuṛṛu sangkatou lai itantangnga.

³⁵Ruang katou wawine tantal᷊anna manggilingngu gandumma, sangkatou sarun iapidda wuṛṛu sangkatou sarun itantangnga. [

³⁶Ruang katou tantal᷊anna mammanara su wailla, sangkatou sarun iapidda wuṛṛu sangkatou sarun itantangnga.]”

³⁷Mallal᷊aṛṛenggennu Mawu Yesus naiwal᷊o, “Suapa udde sarun mariaddi, Mawu?” Mawu Yesus sinumimbakka, “Suapa pia winal᷊unanna, isudde pia manu'a u'inassa winal᷊unanna udde.”