Read Talaud LUKAS 2 Bible Online

LUKAS 2 - Talaud bible

LUKAS 2

¹Su tempo udde i Kaisar Agustus namarenta tadea'u anambon tumana'u Araratuannu Roma maiwoṛṛettu aranne ana see ireengnga.

²Pandareengnga paarorone indi, niamatta su tempo i Kirenius naola'a gubernure su leta'u Siria.

³Su tempo udde anambon taumata inaite mapawoṛṛettu aranne su soan sangkatou-sangkatou.

⁴I Yusuf inaite wuassu Nazaret su Galilea, watukku Betlehem su Yudea, su soa inasungkanganni Ratu Daud; ana waugu i Yusuf wuassu papapulunni Daud.

⁵I Yusuf naiwoṛṛettu aranne su sambau ringanni Maria tunangane, apan tantal᷊anna pia illoṛṛo.

⁶Napawe i mangitou na'omate su Betlehem, nia'omante tempone i Maria mangunsiwe.

⁷I tou nangunsiweten sangkatou ana'a esakka, anangnge pahul᷊u. Ana'a udde nioosannu laṛṛeme, see niapaatiilla su tampan aananannu winatangnga niampaṛṛannu laṛṛami; ana waugu i mangitou niasueannu tampa pattindahoanna.

⁸Su ṛabbi udde pia manga mallal᷊u'adda apan tantal᷊anna mandiaga manga dombane su wadda'u nannal᷊o su leta'a udde.

⁹Inaṛṛombanganne mala'ekattu Mawu natingkapasilom batanganne si mangitou, wuṛṛu semakku asasemakka wuassu Mawu nilumansiangnga nanemakka si mangitou, wuṛṛu i mangitou mangke nata'utta.

¹⁰Arawe mala'ekatta udde nabbisara, “Arie pa'ata'utta! Ana waugu i ya'u nirumanta uaapiddu Watti'u Al᷊al᷊uassa si yamiu — watti'a apan maal᷊uassa anambon taumata.

¹¹Allo indi su soan Daud nasungkangke Ratum Punnu Sal᷊amatti yamiu, eteudde i Kristus, Mawu.

¹²Ete indi tatialane: I yamiu sarun maaratingnga sangkatou ana'a aoosannu laṛṛeme, niapaatiilla su tampan aananannu winatangnga.”

¹³Inaṛṛombanganne mala'ekatta udde raṛṛundingannannu manambo mala'ekatta waine, apan maddalo Ruata. I mangitou mabbisara,

¹⁴“Daralo su Ruata su langitta apan atanggaṛṛanne! Wuṛṛu su wowon dunia, paddarame su taumata apan ma'al᷊uassa naungngu Mawu!”

¹⁵Napawe manga mala'ekatta udde nanantangke mangitou wuṛṛu nabelengke su surga, manga mallal᷊u'adda uawawisarate sangkatou ringannu sangkatou, “Wette i ite inaite su Betlehem ma'ellega apa apan suete nariaddi udde, apan suete niapasingkattu Mawu si ite.”

¹⁶I mangitou lapiddu inai, see naaratingke si Maria wuṛṛu si Yusuf, wuṛṛu ana'a adio'a udde tantal᷊anna mattiilla su tampa aananannu winatangnga.

¹⁷Napawe manga mallal᷊u'adda domba naasilo ana'a udde, i mangitou nabbatti'e apa apan niapaasingkattu manga mala'ekatta su ola'u ana'a udde.

¹⁸Wuṛṛu anambon taumata naherangnga naaringikka watti'u manga mallal᷊u'adda domba udde.

¹⁹Arawe i Maria nanahipunna sarangkanambone udde sulal᷊ummu naungnge wuṛṛu iraṛṛingida.

²⁰Manga mallal᷊u'adda domba nabelengke watukku wadda'u nannal᷊o lapiddu maddalo wuṛṛu mammantuga Ruata, ana waugu sarangkanambone apan suete inaringiṛṛanna wuṛṛu inasiloanni mangitou naṛṛino ere suete niapaasingkattu mala'ekatta si mangitou.

²¹Napawe uukke ual᷊ute allo, ana'a udde nissunatte. Wuṛṛu aranne nissagote mangitou Yesus, aranna apan suete nionggolu mala'ekatta si Tou tantal᷊anna i Tou ta'e su illoṛṛon inangnge-Ne.

²²Na'omate tempone i Yusuf wuṛṛu i Maria mapaamattu addatta pamamaresi tumuṛṛutta Tita Musa. Nariaddi i mangitou nangapiddu ana'a udde watukku Yerusalem itantilla su Mawu.

²³Ana waugu sulal᷊ummu tita Mawu uawoṛṛetta arendi, “Suapan ana'a esakka puhul᷊u sarun itantilla su Mawu.”

²⁴I mangitou lai pia pandumma manantillu sasamba, eteudde sampare manu'a bakiangnga ara'e darua ana'u merpati ta'e maradio'a, ere suete tinantunna sulal᷊ummu tita Mawu.

²⁵Tempo udde su Yerusalem pia sangkatou taumata aranne Simeon. I tou taumata mapia, apan matta'uttu Ruata wuṛṛu tantal᷊anna uaraṛṛaddo tempone Ruata manal᷊amatta Israel. Ghaṛṛahon Ruata uaṛṛundinganna si tou,

²⁶wuṛṛu Ghaṛṛahon Ruata suete namasingkatta si tou manungku i tou taambe mate tantal᷊anna taambe naasilo Ratum Punnu Sal᷊amatta apan suete pina'ire Mawu.

²⁷Wuassu aehettu Ghaṛṛahon Ruata, i Simeon sinumutta su Wal᷊e Mawu. Su tempo udde i Yusuf wuṛṛu i Maria uaapiddu Mawu Yesus, apan ta'e adio'a udde mallagun addatta apan suete niatokku Titan agama.

²⁸Ne i Simeon nanganute ana'a udde wuṛṛu nisal᷊uruten tou, see nadalote Ruata,

²⁹“Orassa indi, Mawu, I'o suete napasuungngu pa'aire-Nu. Wala'ewe allang-Ngu indi mate ringannu matammuda.

³⁰Ana waugu ringannu mata'u sassane, i ya'u suete naasilo Punnu Sal᷊amatta wuassu Ruata.

³¹Punnu Sal᷊amatta apan suete nisaddia-Nu hunane su al᷊awo'u walahanna:

³²naal᷊ihida semakka apan mannemakka lal᷊annu manga walahanna waine, ana see rumanta ringan-Nu; eteudde asasemakka apan mandantan awawantuga su al᷊aṛṛanang-Ngu Israel.”

³³Iamangnga wuṛṛu inangngu ana'a udde naherangnga naaringikka apa apan suete niwisaran Simeon su ola'u ana'i mangitou.

³⁴I Simeon nangal᷊amatta si mangitou wuṛṛu nabbisara si Maria, inangngu ana'a udde, “Ana'a indi suete nipilen Ruata sarun mamate wuṛṛu manal᷊amatta anambon taumatan Israel. I Tou sarun maola'a tatiala wuassu Ruata, apan sarun ipaseettu taumata nambo,

³⁵wuṛṛu ringannu aroddi inasingkatante lal᷊oṛṛo naungngi mangitou. Asasusa sarun mangusu'a naungngu ere hal᷊ele maṛṛoro.”

³⁶Pia lai sangkatou nabi wawine timmaddete atonna. Aranne i Hana, ana'i Fanuel, wuassu walahanna Asyer. Napawe pitute tonna wua naawingnga,

³⁷i Hana naola'e wawine wal᷊u, wuṛṛu orassa indi uukke ual᷊utem pul᷊o appatta su tonnane. Tawe saran paassa i tou nanantangngu Wal᷊e Mawu. Allo ṛabbi i tou mattaṛṛamawu isudde su Ruata ringannu u'al᷊iomanna wuṛṛu mappuasa.

³⁸Orassa udde lai i tou naṛṛindo'a nirumanta, see nadalo Ruata wuṛṛu uahahatto su ola'u ana'a udde ringannu awadaalla apan uaraṛṛaddo tempone Ruata mamallossu Yerusalem.

³⁹Napawe i Yusuf wuṛṛu i Maria suete na'ola'a sarangkanambone apan niatokku tita Mawu, i mangitou napul᷊ete watukku Nazaret su Galilea.

⁴⁰Ana'a udde aatambante ahewalle wuṛṛu atohanne. I Tou pande atonna wuṛṛu lembon arangnguannu Ruata.

⁴¹Suapan tonna hagurangngu Mawu Yesus inai watukku Yerusalem maddamean Allo Wahewam Paskah.

⁴²Wuṛṛu napawe Mawu Yesus uukke mapul᷊ote dua su tonnane, i mangitou inaite su ramea udde tumuṛṛuttu inanaramanna.

⁴³Napawe ramea udde nasuete i mangitou napul᷊ete, arawe Mawu Yesus, ana'a udde, ta'e natantangnga su Yerusalem wuṛṛu iamangnga inangnge wagga.

⁴⁴I mangitou massunna i Tou uatantalongnga suadio'a ringannu ammul᷊anna su amatanna. Napawe suete inumamatta allo massallo wakkute udde i mangitou naddea'a si Tou su wallattu manga tuṛṛangnge see hawe mangitou.

⁴⁵Arawe i mangitou tawe naasangkala si Tou, nariaddi i mangitou nabelengke apia watukku Yerusalem nadea'a si Tou.

⁴⁶Napawe tallute allo maddea'a, i mangitou naasangkala si Tou sulal᷊ummu Wal᷊e Mawu. I Tou tantal᷊anna ua'ianna madaringikka manga hurun agama wuṛṛu manggagillu manga aiwal᷊o.

⁴⁷Anambon taumata apan naaringikka si Tou naherangnga ana waugu manga sasimbak-Ke apan masiṛṛongnga.

⁴⁸Hagurang-Nge lai naherangnga naasilo si Tou. Inangnge nabbisara si Tou, “Ana'a, anio I'o na'ola'a arendi si yami? Iamangngu wuṛṛu inangngu sussinggawangnga maddea'a Si'o!”

⁴⁹Mawu Yesus sinumimbakka, “Anio iamangnga wuṛṛu inangnga maddea'a si Ya'u? Iamangnga wuṛṛu inangnga wagga manungku i Ya'u ṛinone su wal᷊en Iamang-Ku?”

⁵⁰Arawe i mangitou tawe naasunna sasimbakku Mawu Yesus.

⁵¹Wua'udde Mawu Yesus napul᷊ete su sampunna ringanni mangitou watukku Nazaret, wuṛṛu uararingikka si mangitou. Anambon inolaanna udde sasahipunannu inangnge sulal᷊ummu naungnge.

⁵²Mawu Yesus mangke a'atambanna ahewalle wuṛṛu a'atambanna apandene, see iattal᷊antuppu Ruata wuṛṛu ipaapulun taumata.