Read Talaud LUKAS 20 Bible Online

LUKAS 20 - Talaud bible

LUKAS 20

¹Su sambau allo, Mawu Yesus tantal᷊anna mangngaṛṛa'a wuṛṛu mabatti'u Watti'u Al᷊al᷊uassa wuassu Ruata su manga taumata sulal᷊ummu Wal᷊e Mawu. Manga imam tembonanne, wuṛṛu manga hurun agama su sambau ringannu manga piaṛṛa'u Yahudi, nirumanta

²wuṛṛu nabbisara Mawu Yesus, “Annama'a wal᷊oa'a si yami, ringannu taṛṛinon sai I'o ma'ola'a sarangkanambone indi? Isai nangonggolu taṛṛino udde Si'o?”

³Mawu Yesus sinumimbakka, “I Ya'u ma'apulu maiwal᷊o. Annama'a wal᷊oa'a si ya'u:

⁴I Yohanes mannaṛṛani ringannu taṛṛinon sai? Ruata ara'e taumata?”

⁵Ne i mangitou nanattakke na'ire, “Amungkangngu i ite mabal᷊o, ‘Ringannu taṛṛinon Ruata,’ i Tou sarun mabbisara, ‘Amungkangngu aroddi anio i yamiu tawe mangngimanna si Tou?’

⁶Arawe amungkangngu i ite mabbisara, ‘Ringannu taṛṛinon taumata,’ manga taumata sarun manuntungngu watu si ite, ana waugu i mangitou mangngimanna manungku i Yohanes sangkatou nabi.”

⁷Nariaddi i mangitou sinumimbakka, “I yami wagga.”

⁸Ne Mawu Yesus nabbisara si mangitou, “Amungkangngu aroddi ya'u lai tawe mabal᷊o si yamiu ringannu taṛṛinon sai Ya'u ma'ola'a sarangkanambone indi.”

⁹Mawu Yesus nabatti'e su manga taumata udde, sasumandingnga ereindi, “Pia sangkatou massuanna su sambau waillu anggore. I tou napa sewan wailla udde su sire pira mammamanara, see i tou inaite su wanua waine wuṛṛu natana'e mal᷊annu poiaroddi.

¹⁰Napawe temponete mangitingnga wuan anggore udde, tatahuannu wailla udde nandolokku mangangimbene ringannu manga mammamanara udde iapatarimmattu wageangnge. Arawe mammamanara udde namuulla mangangimbe udde wuṛṛu nandolokki tou niapaapul᷊e tawe nionggol᷊annu wageangnge.

¹¹Ne tatahuannu wailla udde nandolokka apia sangkatou mangangimbe waine; arawe mangangimbe udde lai nipuulla apia wuṛṛu niwusannu manga mammamanara udde, see nirolokka ringannu tawe nionggol᷊annu wageangnge.

¹²Wua'udde tatahuannu wailla udde nandolokku mangangimbe atallune. Arawe darol᷊oṛṛanna udde nipuullu manga mammamanara udde lai wuṛṛu niramme su liuddu wailla udde.

¹³Panginsueanne tatahuannu wailla udde nabbisara, ‘Apa ṛinone sarun ta'u olaanna? I Ya'u sarun mandolokku ana'u sassane apan arangnguangku. I Tou sarun addatanni mangitou!’

¹⁴Arawe napawe manga mammamanaram bailla udde naasilo ana'u tatahuannu bailla udde, i mangitou nabbisara sangkatou ringannu sangkatou, ‘Ete i tou indi mallol᷊ossa manahuanna. Wette i ite mamate si tou, tadea'u i ite wotongnge manahuanna.’

¹⁵Ne i mangitou namangkassa si tou su liuddu wailla udde see namate si tou.” Wua'udde Mawu Yesus naiwal᷊o, “Ei, amungkangngu tatahuannu wailla udde mabelengke, apa sarun olaanni tou su manga mammamanara udde?

¹⁶I tou sarun dumanta wuṛṛu mamate manga mammamanara udde, see manantillu wailla udde su mammamanara waine.” Naaringikka aroddi, nabbisarate manga taumata su Mawu Yesus, “Atonna-tonna tawe!”

¹⁷Mawu Yesus nanutudda si mangitou see naiwal᷊o, “Amungkangngu aroddi apa atappasannu wageangngu Wuke Susi indi? ‘Watu apan tawe ipaattu maaola'a wal᷊e, naola'e watu apan paarorone.’

¹⁸Anambon taumata apan manawo su watu udde sarun maṛṛimunsa'a; wuṛṛu isai apan aemaannu watu udde sarun atal᷊inggianne mabal᷊i awu.”

¹⁹Manga hurun agama wuṛṛu manga imam tembonanne naasingkatta manungku sasumandingnga udde ipammasendekku Mawu Yesus si mangitou. Ana waugu udde i mangitou pia pandumma manametta si Tou orassa udde lai, arawe i mangitou matta'uttu taumata nambo.

²⁰Nariaddi i mangitou maddea'a tempone mapia. I mangitou nangonggolu roitta su taumata iapaatanno lihiddu taumata matul᷊ida, wuṛṛu nandolokku manga taumata udde mapaasal᷊a Mawu Yesus ringannu manga aiwal᷊o, tadea'u i mangitou wotongnge manantilli Tou su apulu wuṛṛu taṛṛinon gubernure.

²¹Ne manga taumata apan suete nionggol᷊annu roitta udde nabbisara Mawu Yesus, “Iamangnga Huru, i yami masingkatta manungku anambon apa apan iwabbisara wuṛṛu iatantiron Iamangnga udde atonna. I yami masingkatta lai Iamangnga mangngaṛṛa'a ringannu masema-semakka su ola'u apulun Ruata su taumata, ana waugu Iamangnga tawe mamile taumata.

²²Ana waugu udde Iamangnga pabal᷊ote si yami, tumuṛṛuttu Titan agamang kite, wotongnge mamaekka wose si Kaisar ara'e tawe wotongnge?”

²³Arawe Mawu Yesus masingkattu aawusu mangitou. Ana waugu udde i Tou nabbisara,

²⁴“Annama'a paelleha'a si Ya'u sambau roitta sal᷊a'a. Hambaranna wuṛṛu aranni sai indi?” “Kaisar!” sasimbakki mangitou.

²⁵“Amungkangngu aroddi,” unnu Mawu Yesus si mangitou, “onggol᷊a'e si Kaisar, apa apan tatahuananni Kaisar wuṛṛu su Ruata, apa apan tatahuannnu Ruata.”

²⁶Nasemakke su saruannu taumata nambo udde, i mangitou tawe naasomba saran sambau pasasal᷊a Mawu Yesus. I mangitou tumba'u mal᷊annabba wuṛṛu naherangngu sasimbakke udde.

²⁷Manga sire pira wuassu taumatan Saduki nirumanta ringannu Mawu Yesus. (I mangitou ammul᷊anna apan pia addapanne manungku taumata nate tawe mabangunna apia.) I mangitou naiwal᷊o Mawu Yesus,

²⁸“Iamangnga Huru, i Musa namoṛṛettu tita indi si ite: Amungkangngu sangkatou esakka nate wuṛṛu i tou tawe ana'a, tuṛṛangnge ṛinone ma'awingngu inawal᷊uanne tadea'u maasomba pangangawanne wuassu taumata nate udde.

²⁹Suete nariaddi pia sire pitu sangkatuṛṛangnga. Iapa pahul᷊une na'awingnga, see nate tawe ana'a.

³⁰Wua'udde iapa aruane naawingke lai ringannu inawal᷊uanna udde, arawe i tou lai nate tawe ana'a.

³¹Aroddi lai su tuṛṛangnge atallune wuṛṛu nallal᷊isansunna na'oman sara appitune.

³²Panginsueanne wawine udde lai nate.

³³Su allon taumata nate iapawangunna apia, awingngi sai wawine udde? Ana waugu sire pitu udde suete na'awingngi tou.”

³⁴Mawu Yesus sinumimbakka, “Manga taumata apan mabbiakka tempo indi, ma'awingnga,

³⁵arawe manga taumata apan wotongnge iapawangunna napawe suete nate, wuṛṛu mabbiakka su tempo addantane, i mangitou tawe ma'awingnga.

³⁶Ola'i mangitou ere mala'ekatta wuṛṛu tate mate. Ete i mangitou udde al᷊aṛṛana'u Ruata, ana waugu i mangitou suete niapawangunna apia wuassu papate.

³⁷I Musa sassane napaal᷊iatta'a ringannu masemakka manungku taumata nate sarun iapawangunna apia. Sulal᷊ummu woṛṛenne nabbatti'u anggaṛṛumunanne apan luṛṛenggamma udde, i tou mannago Mawu ere ‘Ruatan Abraham, Ruatan Ishak, Ruatan Yakub’.

³⁸Ne, Ruata udde wal᷊inewe Ruatan taumata nate! I Tou Ruatan manga taumata wiakka! Ana waugu hunane su Ruata, anambon taumata mabbiakka.”

³⁹Manga pira hurun agama nabbisara, “Sasimbakki Iamangnga Huru naṛṛino atonna.”

⁴⁰Ana waugu udde i mangitou tawe waṛṛani lai maiwal᷊o manga apa su Mawu Yesus.

⁴¹Mawu Yesus naiwal᷊o si mangitou, “Ereapa wotongnge iwisara manungku Ratum Punnu Sal᷊amatta papapulunni Daud?

⁴²Sumbal᷊i Daud sassane nabbisara sulal᷊ummu wuke Mazmur, ‘Mawu nabbisara su Mawu'u: A'iante su samba'a uanang-Ku,

⁴³ma'oman sara i Ya'u ma'ola'a manga seen-Nu massuṛṛubawa Si'o.’

⁴⁴Nariaddi amungkangngu i Daud mannagon Ratum Punnu Sal᷊amatta udde ‘Mawu’, ereapa wotongnge i Tou papapulunni Daud?”

⁴⁵Tantal᷊anna manga taumata udde uararingikka Mawu Yesus, i Tou nabbisara su mallal᷊aṛṛenggen-Ne,

⁴⁶“Paatehamma su manga hurun agama. I mangitou apulune u'amatta ualuṛṛen jubah mal᷊o'e, wuṛṛu mal᷊utu a'addatanna su manga pasakka. I mangitou mal᷊utu su manga tampa mawantuga sulal᷊ummu wal᷊em pattataṛṛamawuanna wuṛṛu su manga andeangnga.

⁴⁷I mangitou mammahia manga wawine wal᷊u wuṛṛu mangngaṛṛo wal᷊ene. Wuṛṛu see al᷊al᷊eo mangitou tawe asingkatanna, i mangitou u'al᷊iomanna mal᷊o'e-l᷊o'engnga! Ṛuumanni mangitou mawakkatta!”