Read Talaud LUKAS 24 Bible Online

LUKAS 24 - Talaud bible

LUKAS 24

¹Su allo Misa, ruaallo maṛṛanggapa, manga wawine udde inaite su lal᷊abinganna nangapiddu manga rampa apan suete nisaddia mangitou.

²Su lal᷊abinganna, i mangitou naaratinga watu ṛaṛṛapingnge natal᷊inggite.

³See i mangitou sinumuttate sulal᷊ummu lal᷊abinganna udde, arawe tawe naasomba winal᷊unannu Mawu Yesus isudde.

⁴Tantal᷊anna i mangitou uarisikka isudde wuṛṛu tuttatiangnga maṛṛingiddu olangnge udde, inaṛṛombanganne ruang katou ringannu laungnge sussal᷊endappa nirumarisikka marani mangitou.

⁵I mangitou mangke nata'utta, see inumal᷊intuda su leta'a, tantal᷊anna ruang katou udde mabbisara si mangitou, “Anio i yamiu maddea'a taumata wiakka su tampan taumata nate?

⁶I Tou tate isindi. I Tou nabangunte! Paanaunge apa apan suete niwal᷊on Tou si yamiu su tempo i Tou ta'e su Galilea,

⁷manungku ‘Ana'u Taumata sarun itantilla su taumata marosa, see iarussa, wuṛṛu su allo atallune i Tou sarun mabangunna.’ ”

⁸Ne naanaungke manga wawine udde manga wisara Mawu Yesus.

⁹Napawe nawelengke wuassu lal᷊abinganna udde, i mangitou nabatti'e anambon apa apan suete nariaddi udde su sire mapul᷊o assa mallal᷊aṛṛenggen-Ne wuṛṛu su manga mallal᷊aṛṛenggen-Ne apan waine.

¹⁰Manga wawine apan namasingkattu sarangkanambone udde su mallal᷊aṛṛenggennu Mawu Yesus eteudde: i Maria Magdalena, i Yohana wuṛṛu i Maria inangngi Yakobus, see manga wawine waine apan su sampunna ringanni mangitou.

¹¹Arawe manga rasul udde massunna manungku manga wawine udde tumba'u mabatti'a waṛṛaṛṛia. I mangitou tawe mangngimanna watti'u manga wawine udde.

¹²Arawe i Petrus nabuatta dirumarisikka see tinumal᷊angnga watukku lal᷊abinganna. Lapiddu u'aruutta i tou ma'ellega watukku lal᷊umme, see naasilo tumba'u mal᷊aṛṛenessa kafan isudde. I Petrus naherangnga, see napul᷊e ringannu anambon aiwal᷊o sulal᷊ummu naungnge su ola'u apa apan suete nariaddi.

¹³Su allo udde lai, ruang katou mallal᷊aṛṛenggennu Mawu Yesus tantal᷊anna u'amatta watukku sambau ampungnga, aranne Emaus, itatakasere araune mapul᷊o assa su kilone wuassu Yerusalem.

¹⁴Lapiddu u'amatta i mangitou uahahatto su ola'u apa apan suete nariaddi udde.

¹⁵Tantal᷊anna i mangitou uahahatto wuṛṛu maṛṛingidda su sambau, Mawu Yesus sassane nirumanta wuṛṛu inumamatta su sampunna ringanni mangitou.

¹⁶I mangitou naasilo Mawu Yesus, arawe piaddu naal᷊imbatta na'oman sara i mangitou tawe naaillal᷊a Mawu Yesus.

¹⁷See Mawu Yesus nabbisara, “Apa ipagahatong kamiu su tangngan dal᷊anna indi?” I mangitou natta'alla ringannu naungnga nasusa.

¹⁸See sangkatou wuassi mangitou, aranne i Kleopas, naiwal᷊o Mawu Yesus, “Ete Iamangnga sangkatou raho su Yerusalem apan waggam batti'a apan suete nariaddi poiaroddi wakku-wakku indi?”

¹⁹“Watti'a apa?” aiwal᷊o Mawu Yesus. “Watti'a apan naṛṛia'a su Mawu Yesus, taumata Nazaret udde,” sasimbakki mangitou. “I Tou sangkatou nabi. Manga wisara-Ne wuṛṛu manga manara-Ne pia taṛṛinone — mapia su aellegu Ruata aroddi lai su aellegu awada'alla!

²⁰Manga imam tembonanne wuṛṛu manga piaṛṛa'u walahanni ite nanantilli Tou iṛṛuumanna na'oman sara mate, wuṛṛu i mangitou nangarussan Tou!

²¹Sumbal᷊i yami mangngantimma manungku ete i Tou mamallossu Israel! Wuṛṛu allo indi allo atallune wuassu olangnge udde nariaddi.

²²Wuṛṛu lai manga sire pira wawine wuassu ammul᷊anni yami suete namaṛṛindu'a si yami. Rua'allo maṛṛanggapa i mangitou nabatukku lal᷊abinganna,

²³arawe tawe naasomba winal᷊unan-Ne poiaroddi. See i mangitou nabelengke wuṛṛu nabatti'a manungku i mangitou suete naasilo mala'ekatta, wuṛṛu manga mala'ekatta udde nabbisara manungku Mawu Yesus nabbiakke.

²⁴Siri pira wuassi yami inaite su lal᷊abinganna wuṛṛu naaratinga manungku apa apan niwatti'u manga wawine udde atonna, tumba'u i mangitou tawe naasilo Mawu Yesus.”

²⁵See Mawu Yesus nabbisara si mangitou, “I yamiu woddo atonna! Tumanite mal᷊iwue i yamiu mangngimanna anambon apa apan suete niapasingkattu manga nabi!

²⁶Wal᷊inewe Ratum Punnu Sal᷊amatta udde sarun mamendamma asasusa rorone, wua'udde na'omate su awawantug-Ge?”

²⁷Wua'udde Mawu Yesus nanal᷊aate si mangitou apa apan uawoṛṛetta sulal᷊ummu Wuke Susi su ola'u wadang-Nge, manattakka wuassu wuke Musa wuṛṛu wuke manga nabi.

²⁸Tantal᷊anna udde i mangitou maddanin soa patudanni mangitou. Mawu Yesus na'ola'a paṛṛimaunnapa ere manassukku amatan-Ne,

²⁹arawe i mangitou nama'ungnga si Tou. “Atana'e su tampang kami.” unni mangitou si Tou, “allo maranite maṛṛabi wuṛṛu maranite marandumma lai.” Ne Mawu Yesus sinumuttate manaṛṛabi ringanni mangitou.

³⁰Su tempo inuma'ianna su sambau ringanni mangitou umanna, Mawu Yesus nangawakka roti, na'adiangkamanna su Ruata, namesangnga roti ringannu lima-Ne, see nionggolle si mangitou.

³¹Wua'udde naatutukke i mangitou manungku udde Mawu Yesus. Arawe i Tou nattingkawul᷊i wuassu aellegi mangitou.

³²Unni mangitou sangkatou ringannu waine, “Wal᷊inewe pendamanna naungngi ite ere ola'u sussarootta, su tempo i Tou uahahattong kite su tangngan dal᷊anna, wuṛṛu nanal᷊a'an lal᷊oṛṛon Buke Susi si ite?”

³³Orassa udde lai i mangitou dirumarisikka see nabelengke watukku Yerusalem. Poiaroddi i mangitou naaratingnga sire mapul᷊o assa mallal᷊aṛṛenggennu Mawu Yesus uaammulla suadio'a ringannu taumata waine.

³⁴I mangitou nabbisara, “Atonna-tonna Mawu nabbiakke apia! I Tou suete nattingkapasilon batangan-Ne si Simon!”

³⁵Ruang katou mallal᷊aṛṛenggennu Mawu Yesus apan wakku nirumanta udde nabbati'u lai addapatti mangitou su tangngan dal᷊anna, wuṛṛu ereapa i mangitou naaillal᷊a Mawu su tempo i Tou namesangnga roti.

³⁶Tantal᷊anna i mangitou ta'e uahahatto, inaṛṛombanganne Mawu Yesus sassane nirumarisikka su pattangnganni mangitou wuṛṛu nabbisara, “Paddarame si yamiu!”

³⁷I mangitou niṛṛumuro wuṛṛu nata'utta, ana waugu i mangitou massunna i mangitou naasilo setanna.

³⁸Arawe Mawu Yesus nabbisara, “Anio i yamiu matta'utta? Anio naungngi yamiu uapapadua?

³⁹Pa'ellege lima-U wuṛṛu ledda-U. Asingkatawe manungku indi uarisikka i Ya'u sassane! Pangagasse wuṛṛu panutukke, ana waugu setanna tawe ṛemene ara'e duṛṛine, ere i yamiu maasilo si Ya'u orassa indi.”

⁴⁰Mawu Yesus nabbisara aroddi lapiddu namasilon lima-Ne wuṛṛu ledda-Ne si mangitou.

⁴¹Wuṛṛu tantal᷊anna i mangitou taambe mangngimanna atonna ana waugu tumaniten lulluassa wuṛṛu naherangnga, Mawu Yesus naiwal᷊o si mangitou, “I yamiu pia anna isindi?”

⁴²I mangitou nangonggolu inassa horengnga sanduru.

⁴³Mawu Yesus nanengkamma inassa udde see inumante su saruanni mangitou.

⁴⁴Wua'udde i Tou nabbisara si mangitou, “Ete indi manga inolaanna apan suete Ta'u niwal᷊o si yamiu su tempo i Ya'u ta'e su sambau ringanni yamiu manungku manga inolaanna apan uawoṛṛetta matataṛṛino si Ya'u sulal᷊ummu manga wuke Musa, Manga Nabi, wuṛṛu Mazmur, ṛinone matipussa.”

⁴⁵Wua'udde Mawu Yesus nanualaga ṛingiṛṛanni mangitou ana see maasunna pandumannu Wuke Susi.

⁴⁶See i Tou nabbisara si mangitou, “Sulal᷊ummu Wuke Susi uawoṛṛetta manungku Ratum Punnu Sal᷊amatta ṛinone matataṛṛangnga, wuṛṛu sarun mabangunna apia wuassu papate su allo atallune.

⁴⁷Wuṛṛu lai manungku ringannu arannu Ratum Punnu Sal᷊amatta udde ṛinone iwatti'a su anambon walahanna manungku ṛinone taumata mawal᷊u wuassu rosane, wuṛṛu manungku Ruata mangampungnga rosa mangitou. Wuṛṛu watti'a udde ṛinone iapasingkatta manattakka wuassu Yerusalem.

⁴⁸Ete i yamiu maola'a manga tatialane wuassu sarangkanambone udde.

⁴⁹Wuṛṛu i Ya'u sassane sarun mandolokka ringanni yamiu apa apan suete pina'iren Iamangnga. Arawe i yamiu ṛinone maṛṛado su soa indi ma'oman sara taṛṛino wuassu Ruata mannilla'uppa si yamiu.”

⁵⁰Wua'udde Mawu Yesus nangapidde mangitou sinumabangnga wuassu soa nadatingngu Betania. Isudde i Tou namatten lima-Ne, see nangal᷊amatta si mangitou.

⁵¹Tantal᷊anna i Tou mangngal᷊amatta, i Tou nasengkengnga watukku surga, see naṛṛae wua dinganni mangitou.

⁵²I mangitou inumal᷊intuda nassubba si Tou, wua'udde nabelengke su Yerusalem ringannu naungnga lulluassa atonna,

⁵³wuṛṛu sidutu madalo Ruata su Wal᷊e Mawu.