Read Talaud LUKAS 4 Bible Online

LUKAS 4 - Talaud bible

LUKAS 4

¹Mawu Yesus niintaṛṛoannu Ghaṛṛahon Ruata su tempo i Tou nanantangken Sal᷊ukku Yordan. Ghaṛṛahon Ruata nangehetta si Tou watukku wadda'a mal᷊alangnga.

²Isudde i Tou niwono'annu Setanna appattu pul᷊o allo al᷊annune. Su al᷊o'engngu allo udde, i Tou tawe inumanna manga apa. Nariaddi panginsueanne i Tou naapendamma mal᷊unussa.

³Setanna nabbisara si Tou, “Amungkangngu I'o Ana'u Ruata, ola'e watu indi maola'a roti.”

⁴Mawu Yesus sinumimbakka, “Sulal᷊ummu Wuke Susi uawoṛṛetta, ‘Taumata tawe tumba'u ma'awiakku roti sassane.’ ”

⁵See Setanna nangapiddu Mawu Yesus su tampa apan matanggakka wuṛṛu tumba'u sangkaṛṛondapa Setanna namasilo si Tou anambon araratuanna su runia.

⁶“Anambon taṛṛino wuṛṛu pa'a'ala indi sarun ta'u itantilla Si'o,” unnu Setanna su Mawu Yesus, “ana waugu sarangkanambone udde suete nionggolla si ya'u wuṛṛu i ya'u wotongnge mangonggolla sisai-sai apan ipaapulu'u pangonggol᷊anne.

⁷Sarangkanambone indi sarun maola'a darotong-Ngu, amungkangngu I'o umal᷊intudda massubba si Ya'u.”

⁸Mawu Yesus sinumimbakka, “Sulal᷊ummu Wuke Susi uawoṛṛetta, ‘Passubbate Mawu Ruatanu wuṛṛu tumba'u pangimbe si Tou sassane.’ ”

⁹See Setanna nangapidde Mawu Yesus watukku Yerusalem wuṛṛu nangadon Tou su sal᷊awom Bal᷊e Mawu wuṛṛu nabbisara si Tou, “Amungkangngu I'o Ana'u Ruata, tumpate I'o wua isindi.

¹⁰Ana waugu sulal᷊ummu Wuke Susi uawoṛṛetta, ‘Ruata sarun mandolokku manga mala'ekan-Ne mandiaga Si'o mapia-pia.’

¹¹Wuṛṛu lai, ‘Manga mala'ekatta sarun manengkamma Si'o ringannu limane, tadea'u leddanu tawe mattu'a su watu.’ ”

¹²Mawu Yesus sinumimbakka, “Sulal᷊ummu Wuke Susi uawoṛṛetta, ‘Arie pamono'a Mawu, Ruatanu.’ ”

¹³Napawe Setanna suete namono'a Mawu Yesus ringannu al᷊awo'u hatin bawono'a, i tou nanantangke Mawu Yesus wuṛṛu nallaṛṛadote tempone apan mapia.

¹⁴Wua'udde Mawu Yesus nabelengke watukku Galilea; wuṛṛu i Tou niintaṛṛoannu Ghaṛṛahon Ruata. Watti'a su ola'u watangan-Ne naddingikka su ahewallu wanua udde.

¹⁵I Tou mangngaṛṛa'a su manga wal᷊em pattataṛṛamawuanna, wuṛṛu anambon taumata maddalo si Tou.

¹⁶Mawu Yesus inaite lai watukku Nazaret, su wanua inahewal᷊anni Tou. Su allon Sabatta, ere su wiasane i Tou inai su wal᷊em pattataṛṛamawuanna. I Tou dirumarisikka mabbasan Wuke Susi,

¹⁷wuṛṛu nionggol᷊annu wuke Nabi Yesaya. I Tou namu'ate wuke lalul᷊unanna udde, see inasombanganna wageangnge indi,

¹⁸“Ghaṛṛaho Mawu sidutu ringang-Ku, ana waugu i Tou suete namile si Ya'u iapapasingkattu Watti'u Al᷊al᷊uassa su taumata asiangnga. I Tou nandolo-U iapawatti'u pamamallossa su taumatan ṛuumanna wuṛṛu aaul᷊e su taumata wuta; wuṛṛu ipamallossu taumata allangnga

¹⁹wuṛṛu mamasingkattu orassu daranta Mawu manal᷊amatta pabbawala-Ge.”

²⁰Mawu Yesus nallul᷊unna apia wuke udde, niwelengke su mamamanarane, see inuma'ianna. Anambon taumata sulal᷊ummu wal᷊em pattataṛṛamawuanna udde na'ellega si Tou.

²¹Wuṛṛu Mawu Yesus nanattakke nabbisara si mangitou ereindi, “Manga wageangngu lal᷊oṛṛon Wuke Susi su allo indi natipusse su tempo i yamiu naaringikka watti'a udde.”

²²Manga wisara apan niwisara-Ne mapia atonna, na'oman sara i mangitou naherangnga wuṛṛu lapiddu nanamba'a si Tou. I mangitou nabbisara, “Wal᷊inewe i Tou indi ana'i Yusuf?”

²³Ne Mawu Yesus nabbisara si mangitou, “Atonna i yamiu sarun mappaattu sasumandingnga indi si Ya'u, ‘Doktere, paapia'a ririnu sassane. Al᷊aṛṛindu'a apan niaṛṛingiṛṛanni yami niolang-Ngu su Kapernaum, ola'a lai su ampungngu sassane.’ ”

²⁴Mawu Yesus nanassukku wisara-Ne, “Paanaunge, tawe nabi apan a'addatanna su ampungnge sassane.

²⁵Arawe daringiṛṛe: su tempon Elia, su tempo tawe manguranna tallu tonna anummu wul᷊anna al᷊annune, nariaddi al᷊aṛṛutumma apan bahewa su al᷊awo'u wanua. Su tempo udde manambo wawine wal᷊u su Israel.

²⁶Salaiwe aroddi, Ruata tawe nandolokki Elia su wallattu sangkatou wawine wal᷊u isudde, ewe'e tumba'u su sangkatou wawine wal᷊u su Sarfat su leta'u Sidon.

²⁷Aroddi lai su tempo i Nabi Elisa manambo taumata su Israel pia radangnge paro ma'ata'utta, arawe tawe sangkatou wuassi mangitou niapaapia, tumba'u i Naaman taumatan Siria udde.”

²⁸Anambon taumata su wal᷊em pattataṛṛamawuanna udde mangke nasa'u naaringikka watti'a udde.

²⁹I mangitou dirumarisikka see nallimbuakka Mawu Yesus watukku liuddu soa, wuṛṛu niapidda su wowon rampissa, su tampa udde soa mangitou niapaarisikka. I mangitou pia pandumma manuṛṛudu Mawu Yesus su rampissa.

³⁰Arawe Mawu Yesus nilumusi'a su tangngan taumata nambo udde wuṛṛu napul᷊e.

³¹Wua'udde Mawu Yesus inaite su soa Kapernaum su Galilea. Poiaroddi i Tou mangngaṛṛa'a manga taumata su allon Sabatta.

³²I mangitou naherangnga naasilo olangnge i Tou mangngaṛṛa'a, ana waugu i Tou mabbisara pia saṛṛaungnge.

³³Isudde su wal᷊em pattataṛṛamawuanna pia sangkatou niasutannu ghaṛṛaho lal᷊eo. Taumata udde mangke ma'uare,

³⁴“Ei Mawu Yesus, taumata Nazaret, apa olaannu si yami? I'o rumanta mamate si yami? I ya'u masingkatta isai I'o: I'o ralol᷊oṛṛannu Ruata apan susi!”

³⁵“Paal᷊annaba!” Mawu Yesus nandona ghaṛṛaho lal᷊eo udde, “Sabbangke wuassu taumata indi!” See ghaṛṛaho lal᷊eo udde namantingngu taumata udde su saruanni mangitou sarangkanambone wuṛṛu wua'udde sinumabangnga wuassu taumata udde ringannu tate napaaradange.

³⁶Awada'alla naherangnga, wuṛṛu uahahattote sangkatou ringannu sangkatou, “Wal᷊ine hampa al᷊awo'u wisara-Ne. Ringannu saṛṛaungnga wuṛṛu taṛṛino, i Tou namarenta manga ghaṛṛaho lal᷊eo niapaasabangnga wuṛṛu i mangitou sinumabangke lai!”

³⁷Ne watti'a su ola'u Mawu Yesus tinumelengke su ahewallu wanua su wageangnge udde.

³⁸Mawu Yesus nanantangkem wal᷊em pattataṛṛamawuanna udde, see inaite su wal᷊en Simon. La'iananni Simon marada'a sal᷊ihamma, wuṛṛu manga taumata nabbati'u olangnge udde su Mawu Yesus.

³⁹Mawu Yesus inaite nattudan lallowanganne, see nallimbuakka sal᷊ihamma udde. Sal᷊ihamma udde nawul᷊i, wuṛṛu la'iananni Simon lapiddu nabangunna wuṛṛu nangimbe si mangitou.

⁴⁰Napawe matannallo mattuppe, manambo taumata nangapiddu manga tuṛṛangngi mangitou apan uatataṛṛangnga al᷊awo'u hatin rada'a ringannu Mawu Yesus. Mawu Yesus namita si mangitou sangkatou-sangkatou wuṛṛu napaapia mangitou.

⁴¹Manga ghaṛṛaho lal᷊eo udde sinumabangke wuassu taumata nambo udde lapiddu mangngintul᷊i, “Ete I'o Ana'u Ruata!” Arawe Mawu Yesus namul᷊o si mangitou wuṛṛu naningaddi mangitou mabbisara, ana waugu i mangitou masingkatta manungku ete i Tou Ratum Punnu Sal᷊amatta.

⁴²Su tempo matannallo susssabangke, Mawu Yesus nanantangken soa udde see inaite su sambau tampa apan mal᷊annaba. Manga taumata maddea'a si Tou, wuṛṛu napawe i mangitou nassomba Mawu Yesus, i mangitou mangke mappandumma tadea'u i Tou tawe manantangngi mangitou.

⁴³Arawe Mawu Yesus nabbisara, “Watti'u Al᷊al᷊uassa su ola'u ereapa Ruata mamarenta sarun Ta'u iwatti'a lai su manga soa waine, ana waugu Ruata nandolo-U su runia.”

⁴⁴Ana waugu udde Mawu Yesus nannase sulal᷊ummu wal᷊em pattataṛṛamawuanna su ahewallu leta'u Yudea.