Read Talaud LUKAS 5 Bible Online

LUKAS 5 - Talaud bible

LUKAS 5

¹Su sambau tempo Mawu Yesus uarisikka su winggin Dano Genesaret. Manambo taumata uasaseppe'a maddaringikka watti'u Ruata.

²Mawu Yesus naasilo saalanna rua ngassa su apanne udde; manga samakka nilumintukke wuassu saalanna udde wuṛṛu lapiddu mangngukkassa soma mangitou.

³Mawu Yesus sinuma'e su saalanna sangngassa, eteudde saalanni Simon, see nandolokki Simon manondon saalanne udde marau adio'a wuassu apanne. Mawu Yesus inuma'ianna su saalanna udde wuṛṛu mangngaṛṛa'e taumata nambo.

⁴Napawe suete nangaṛṛa'a, i Tou nabbisara si Simon, “Pundal᷊a'e watukku al᷊al᷊umanne, wuṛṛu pallosa'e somanu panameta'a inassa.”

⁵“Iamangnga Huru,” sasimbakki Simon, “su al᷊o'engngu ṛabbi yami mammanara maṛṛimadda, arawe tawe naahau saran sambua! Arawe ana waugu Iamangnga nandolokka, aroddite; i ya'u sarun mallombon soma apia.”

⁶Napawe i mangitou suete namallossu soma udde, i mangitou naahau inassa aroddi anambone na'oman sara soma mangitou nahahesa'e.

⁷Ana waugu udde i mangitou naitul᷊ungnga su manga hawene su saalanna waine. Manga hawe mangitou nirumanta see i mangitou su sambau nalloṛṛo saalanna rua ngassa udde napenen inassa na'oman sara manga saalanna udde maraniten lumakkuba.

⁸Napawe i Simon naasilo olangnge udde, i tou inumal᷊intuda su saruannu Mawu Yesus, see nabbisara, “Tantanga'e i ya'u, Mawu! ana waugu i ya'u taumata marosa!”

⁹I Simon wuṛṛu anambon taumata ringanni tou naherangnga naasilo inassa manambo apan niahauanni mangitou udde.

¹⁰Aroddi lai ringannu manga hawen Simon, eteudde i Yakobus wuṛṛu i Yohanes, al᷊aṛṛana'i Zebedeus. Mawu Yesus nabbisara si Simon, “Arie pa'ata'utta! Manattakka orassa indi i'o sarun maola'a mananoma taumata.”

¹¹I Simon wuṛṛu manga hawene namol᷊engke saalanna rua ngassa udde su apanne, wua'udde nanantangken sarangkanambone udde, see nallaṛṛenggente Mawu Yesus.

¹²Su sambau allo, Mawu Yesus uatana'a su sambau soa. Poiaroddi pia sangkatou esakka wadangnge napenen radangnge paro apan ma'arantinna. Napawe i tou naasilo Mawu Yesus, i tou inumal᷊intuda su saruan-Ne lapiddu sinumal᷊ande, “Iamangnga, amungkangngu Iamangnga ma'apulu, Iamangnga wotongnge mapaapia'u!”

¹³Mawu Yesus namita taumata udde lapiddu nabbisara, “I Ya'u maapulu, apiate!” Orassa udde lai radangnge nawul᷊i.

¹⁴See Mawu Yesus naningaddu taumata udde mabatti'u olangnge udde su manga taumata, tanatane, “Roote ringannu imam, wuṛṛu padorongnga si tou manantunna manungku i'o napiate. See roote pangagillu sasamba ere suete nirolokki Musa, maola'a pananaunganna su taumata manungku i'o atonna-tonna napiate.”

¹⁵Arawe watti'a su ola'u Mawu Yesus nadingikke su al᷊awo'u tampa, wuṛṛu manambo taumata nirumanta madaringikka wuṛṛu maapulu iapaapia wuassu rada'i mangitou.

¹⁶Wua'udde Mawu Yesus inaite inumal᷊iomanna su tampa apan mal᷊annaba.

¹⁷Su sambau allo, tantal᷊anna Mawu Yesus mangngaṛṛa'a, pia manga pirang katou taumatan Farisi wuṛṛu manga hurun agama ua'ianna isudde. I mangitou nirumanta wuassu Yerusalem, wuṛṛu wuassu manga soa su leta'u Galilea wuṛṛu Yudea. Taṛṛinon Ruata uaṛṛundinganna Mawu Yesus mapaapian taumata marada'a.

¹⁸Su tempo udde manga pirang katou nirumanta uaapiddu sangkatou lome ual᷊allowangnga su wilatta. I mangitou suapan botongnge mangapiddu taumata udde sulal᷊ummu wal᷊e tadea'u i tou botongnge iaddo su saruannu Mawu Yesus.

¹⁹Arawe ana waugu tumaniten manambo taumata isudde, i mangitou tawe naa'apiddi tou sinumutta. Ana waugu udde i mangitou nangawittu taumata udde su atuppu wal᷊e. See i mangitou nalla'ete atuppa, wuṛṛu nangul᷊ukku taumata udde ringannu wilanne su saruannu Mawu Yesus su pattangngannu taumata nambo udde.

²⁰Su tempo Mawu Yesus naasilo aroddi ahewalle pangangimanni tou, i Tou nabbisara taumata udde, “Tuṛṛangnga, rosanu suete niampunganna.”

²¹Manga hurun agama wuṛṛu manga taumatan Farisi mannattakke uahahatto sangkatou ringannu sangkatou, “Isai taumata indi apan baṛṛani mangngadio'a Ruata? Isai wotongnge mangampungnga rosa, su liuddu Ruata sassane?”

²²Mawu Yesus naasingkatta aiwal᷊o mangitou. Nariaddi i Tou nabbisara, “Anio i yamiu ma'iwal᷊o aroddi sulal᷊ummu naungngu?

²³Suapa mappianne mabbisara, ‘Rosanu suete niampunganna’, ara'e mabbisara, ‘Pabbangunte wuṛṛu amatte!’?

²⁴Arawe orassa indi i Ya'u sarun mapaal᷊iatta'a si yamiu manungku su wowon dunia indi Ana'u Taumata pia taṛṛinone mangampungnga rosa.” See Mawu Yesus nabbisara taumata lome udde, “Pabbangunte, apira'e lallowangannu, wuṛṛu apul᷊ete!”

²⁵Mal᷊iha-l᷊ihakka taumata udde nabangunna su saruanni mangitou sarangkanambone, see namasanna lallowanganne, wuṛṛu napul᷊e lapiddu maddalo Ruata.

²⁶I mangitou sarangkanambone naherangnga atonna see i mangitou nadalote Ruata. Wuṛṛu ringannu apendamma matta'utta, i mangitou mabbisara, “Maaṛṛindu'a atonna arariaddianna apan niasiloanni ite su allo indi!”

²⁷Wua'udde Mawu Yesus sinumabbangke wuṛṛu naasilo sangkatou madarorongnga wose, aranne i Lewi, tantal᷊anna ua'ianna su tampan pammanaranne. Mawu Yesus nabbisara si tou, “Paṛṛundingante si Ya'u.”

²⁸I Lewi dirumarisikka wuṛṛu nanantangngu sarangkanambone, see nirumandingante Mawu Yesus.

²⁹Wua'udde i Lewi na'ola'e andeangnga su wal᷊ene huna Mawu Yesus. Manambo madarorongnga wose wuṛṛu manga taumata waine lai inumanna su sampunna ringanni mangitou.

³⁰Sire pira taumatan Farisi wuṛṛu manga hurun agama pia apendamma tawe mal᷊uassa, see nabbisara su mallal᷊aṛṛenggennu Mawu Yesus, “Anio i yamiu sarangkanambone u'anna ma'inumma su sampunna ringannu madarorongnga wose wuṛṛu manga taumata lal᷊eo?”

³¹Mawu Yesus sinumimbakka, “Taumata apan tawe marada'a tawe mappandumma doktere, tumba'u taumata mangkarada'a.

³²I Ya'u nirumanta wal᷊ine mamago manga taumata apan uapendamma ririne mapiate, ewe'e taumata apan marosa tadea'u i mangitou mawal᷊u wuassu paddarosa mangitou.”

³³Manga taumata nabbisara Mawu Yesus, “Mallal᷊aṛṛenggenni Yohanes wuṛṛu mallal᷊aṛṛenggennu taumatan Farisi masokka mappuasa wuṛṛu u'al᷊iomanna. Arawe mallal᷊aṛṛenggennu u'anna wuṛṛu ma'inumma.”

³⁴Mawu Yesus sinumimbakka, “I yamiu wotongnge mandolokku manga raho mappuasa su andeangngu awingnga, tantal᷊anna maa'awingnga esakka ta'e su sampunna ringanni mangitou? Natantunna tawe!

³⁵Arawe sarun a'omanna tempone ma'a'awingnga esakka udde al᷊apanna wua dinganni mangitou. Su tempo udde i mangitou mappuasate.”

³⁶See Mawu Yesus nabatti'e si mangitou sasumandingnga indi, “Tawe taumata mandapella laubba tabbe rappelannu sampototta mal᷊aṛṛenessu laubba wakku. Ana waugu i tou sarun manggesa'a laubba wakku udde. Wuṛṛu lai mal᷊aṛṛenessa rarapela wakku udde tawe mapparen laubba tabbe.

³⁷Aroddi lai tawe taumata mandal᷊innu anggore wakku sulal᷊ummu pato'a pisi apan tabbe, ana waugu anggore wakku udde sarun mamesangnga pato'a tabbe udde. Ne anggore udde mabbosote, wuṛṛu tampane mahohakke.

³⁸Anggore apan wakku sarun ilal᷊inna su tampane apan wakku lai.

³⁹Aroddi lai tawe taumata maapulu ma'inumma anggore wakku napawe i tou suete na'inumma anggore tabbe. ‘Anggore tabbe udde mattemanganna,’ wisara-Ne.”