Read Talaud LUKAS 6 Bible Online

LUKAS 6 - Talaud bible

LUKAS 6

¹Su sambau allon Sabatta, su tempo Mawu Yesus sinumabbi sambau waillu gandumma, mallal᷊aṛṛenggen-Ne nangitingnga gandumma. I mangitou nangusu gandumma udde ringannu limane, see nianna.

²Sire pira taumatan Farisi nabbisara, “Anio i yamiu lullawangnga manga Titan agamang kite ringannu ma'ola'a apa isassingadda su allon Sabatta?”

³Mawu Yesus sinumimbakka, “I yamiu taambe naawasa su ola'u apa a'olaanni Daud, su tempo i tou wuṛṛu manga taumatane mal᷊unussa?

⁴I tou sinumutta sulal᷊ummu Wal᷊e Mawu wuṛṛu nanganu roti apan suete tinantilla su Ruata, see nianna. Wua'udde roti nianggilla lai su manga taumatane. Sumbal᷊i tumuṛṛuttu Titan agaman kite, tumba'u manga imam sassane wotongnge umanna roti udde.”

⁵See Mawu Yesus nabbisara, “Ana'u Taumata uataṛṛino allon Sabatta!”

⁶Su sambau allon Sabatta apan baine, Mawu Yesus inaite nangaṛṛa'a su wal᷊em pattataṛṛamawuanna. Isudde pia taumata limane lome samba'a.

⁷Sire pira hurun agama wuṛṛu taumatan Farisi maddea'a pasasal᷊a Mawu Yesus tadea'u wotongnge i Tou ialae. Nariaddi i mangitou sidutu mannutukka tanne i Tou mapaapian taumata su allon Sabatta.

⁸Arawe Mawu Yesus naasingkatta ṛingiṛṛanni mangitou. Ne i Tou nabbisarate su taumata limane lome samba'a udde, “Wette darisikke isindi su saruanne!” Taumata udde nabangunte, see dirumarisikke isudde.

⁹Wua'udde Mawu Yesus naiwal᷊o su manga taumata isudde, “Tumuṛṛuttu agama, i ite wotongnge mammanara apa su allon Sabatta? Ma'ola'a apapia ara'e ma'ola'a al᷊al᷊eo? Mandalukka taumata ara'e manilaka?”

¹⁰Mawu Yesus na'ellega uapal᷊iwutta si mangitou sarangkanambone, see nabbisara taumata udde, “Ul᷊uṛṛa'e limanu.” Taumata udde nangul᷊ukken limane, see limane udde napiate.

¹¹Arawe manga hurun agama wuṛṛu manga taumatan Farisi udde nasa'u atonna, wuṛṛu nanattakke ma'ire su ola'u apa apan wotongnge olaanni mangitou su Mawu Yesus.

¹²Su tempo udde Mawu Yesus sinuma'ate su sambau wuidda ana see inumal᷊iomanna. Isudde i Tou inumal᷊iomanna su Ruata su al᷊o'engngu ṛabbi.

¹³Napawe allote, i Tou namagote mallal᷊aṛṛenggen-Ne, see namilete sire mapul᷊o dua su atoune wuassu wallatti mangitou. I Tou nanagon sire mapul᷊o dua su atoune udde rasul. I mangitou eteudde:

¹⁴I Simon (isassago lai i Petrus), wuṛṛu i Andreas tuṛṛangngi Simon; i Yakobus wuṛṛu i Yohanes, i Filipus wuṛṛu i Bartolomeus,

¹⁵i Matius wuṛṛu i Tomas, i Yakobus ana'i Alfeus, wuṛṛu i Simon (isassago lai i Patriot).

¹⁶I Yudas ana'i Yakobus wuṛṛu i Yudas Iskariot apan sal᷊immurine naola'a mandal᷊al᷊eo.

¹⁷Wua'udde Mawu Yesus sinumossokke wuassu wuidda su sampunna ringannu manga rasul udde, see natta'alla wuṛṛu dirumarisikka su sambau tampa ratakke. Isudde pia lai sambau ammul᷊annu manga mallal᷊aṛṛenggenna waine wuṛṛu manambo lai taumata rudanta wuassu anambon tampa su ahewallu leta'u Yudea, Yerusalem, wuṛṛu manga soan Tirus wuṛṛu Sidon su winggin tahal᷊oangnga.

¹⁸I mangitou nirumanta madaringikka Mawu Yesus, wuṛṛu see iapa'apia wuassu manga rada'i mangitou. I mangitou apan niasuttannu ghaṛṛaho lal᷊eo nirumanta lai see niapa'apia.

¹⁹Anambon taumata maddea'a suapan wotongnge maaggassa Mawu Yesus, ana waugu pia taṛṛino sussabangnga wuassu wadangnge apan maapia si mangitou sarangkanambone.

²⁰Mawu Yesus nanutudda mallal᷊aṛṛenggen-Ne see nabbisara, “Lal᷊umanna'a i yamiu manga taumata asiangnga, ana waugu ete i yamiu udde lal᷊oṛṛon araratuannu Ruata!

²¹Lal᷊umanna'a i yamiu apan mal᷊unussa orassa indi; i yamiu sarun iapaal᷊aidda! Lal᷊umanna'a i yamiu apan lulluai orassa indi; i yamiu sarun lumagge!

²²Lal᷊umanna'a i yamiu amungkangngu ia'arantinna, ia'adiri, a'adio'anna wuṛṛu hagal᷊usaanna ana waugu Ana'u Taumata!

²³Manga nabi su tempo rorone a'olaanna lai aroddi. Amungkangngu olangnge udde mariaddi, ṛinone yamiu lulluassa wuṛṛu massal᷊aingnga ringannu lullala'a ana waugu wahewa lal᷊antakke si yamiu apan suete nissaddia su surga.

²⁴Arawe nasilakate i yamiu taumata ala su orassa indi; ana waugu i yamiu naapendampe al᷊al᷊uassa!

²⁵Nasilakate i yamiu apan mal᷊aida orassa indi; ana waugu i yamiu sarun amal᷊unusanna! Nasilakate i yamiu apan lullage orassa indi; ana waugu i yamiu sarun masusa wuṛṛu lumuai!

²⁶Nasilakate i yamiu, amungkangngu anambon taumata maddalo si yamiu; ana waugu aroddi lai iupungnga al᷊amona mangitou maddalo manga nabi awusu su tempo rorone.”

²⁷“Arawe i yamiu apan madaringikka si Ya'u orassa indi, i Ya'u mannanata ereindi: akkana'a manga seennu, wuṛṛu pa'ola'a pallal᷊agu mapia su taumata apan maddantinnu.

²⁸Al᷊amate taumata apan mammontoga si yamiu, wuṛṛu al᷊iomana'a taumata apan lal᷊eo si yamiu.

²⁹Amungkangngu taumata mamero wambalanu samba'a, wala'a lai i tou mamero wambalanu samba'a. Amungkangngu jubahnu aṛṛoanna, anggil᷊a'a lai laungngu.

³⁰Amungkangngu taumata madorongnga sarannapa si yamiu, anggil᷊a'a lai udde si tou; wuṛṛu amungkangngu darotongngu aṛṛoanna, arie padoronge apia.

³¹Ola'a su taumata waine ere lai yamiu ma'apulu olaanni mangitou mapia.

³²Amungkangngu yamiu tumba'u u'akkannu manga taumata apan mandangngu si yamiu, apa al᷊amannu? Taumata marosa lai u'akkannu manga taumata apan mandangngu si mangitou!

³³Wuṛṛu amungkangngu i yamiu pia pallal᷊agu mapia su taumata apan mapia si yamiu, apa al᷊amannu? Taumata marosa lai ma'ola'a aroddi!

³⁴Wuṛṛu amungkangngu i yamiu tumba'u mapawallassu roitta su taumata apan botongnge maawelengngu roitta udde, apa al᷊amanne si yamiu? Taumata marosa lai mapaawallassu roitta su taumata marosa, see doronganna apia roitta udde.

³⁵Ṛinone wal᷊ine aroddi! Ewe'e i yamiu ṛinone umakkannu seetti yamiu wuṛṛu pia pallal᷊agu mapia si mangitou. I yamiu ṛinone mapawallassa wuṛṛu arie mangantimma mawelengnga apia. Amungkangngu aroddi, lal᷊antakku wahewa wuṛṛu i yamiu sarun maola'a al᷊aṛṛana'u Ruata Apan Atanggaṛṛanne. Ana waugu Ruata naungnge mapia su saruannu taumata apan waga ma'aidengkamanna, wuṛṛu su saruannu taumata lal᷊eo lai.

³⁶Ṛinone i yamiu uararangngu ere Iamangngu lai mandangngu si yamiu!”

³⁷“Imbaṛṛangnga maṛṛuungngu taumata waine, tadea'u i yamiu lai sassane tawe iṛṛuungngu Ruata. Imbaṛṛangnga maṛṛuumannu taumata waine, tadea'u i yamiu sassane tawe iṛṛuumannu Ruata. Ampungete taumata waine, tadea'u Ruata lai mangampungnga si yamiu.

³⁸Pangonggolla su taumata waine, tadea'u Ruata lai mangonggolla si yamiu; i yamiu sarun manengkamma aonggolla nangillembo apan suete niuukka masada-sadatta maola'a wageangngu. Ana waugu auuṛṛanna apan ipanguukki yamiu su taumata waine sarun ipanguukku Ruata lai si yamiu.”

³⁹Wua'udde Mawu Yesus nabatti'u sasumandingnga si mangitou ere indi, “Amungkangngu taumata wuta mangehetta taumata wuta waine, itarua sarun manawo sulal᷊ummu loṛṛangnga.

⁴⁰Tawe ana'a si'ol᷊a nangillembo wuassu hurune. Arawe ana'a si'ol᷊a apan nasuete si'ol᷊ane, sarun maola'a lai massul᷊ungngu hurune.

⁴¹Anio i yamiu ma'asilo alu adio'a sulal᷊ummu matan tuṛṛangngu, arawe sal᷊aba'u su matanu sassane tawe asiloannu?

⁴²Ereapa i yamiu wotongnge mabbisara tuṛṛangngu, ‘Wette tuṛṛangnga, i ya'u mapasabangngu alu adio'a su matanu,’ arawe sulal᷊ummu matanu sassane pia sal᷊aba'u apan tawe asiloannu? Ei lilangkamal᷊e'a! Pasabanga'e rorone sal᷊aba'u su matanu sassane, wakkute udde i yamiu wotongnge maasilo ringannu masemakka wuṛṛu wotongnge mapasabangngu alu adio'a wuassu matan tuṛṛangngu.”

⁴³“Aaluanna apan masuwukka tawe mabua wua lal᷊eo. Aroddi lai alu maṛṛissita tawe mabua wua mapia.

⁴⁴Al᷊awo'u alu a'aillal᷊anna wuassu wuane. Manga ahuranganna ṛoaanna tawe mabua wuan ara, wuṛṛu manga ahuranganna ṛoaanna tawe mabua wuan anggore.

⁴⁵Taumata mapia mapasabangngu pallal᷊agu mapia ana waugu naungnge napenen apapia. Taumata pallal᷊agune lal᷊eo mapasabangngu inolaanne lal᷊eo ana waugu naungnge napenen al᷊al᷊eo. Ana waugu apa apan suete niwisara moṛṛongnga udde sinabanganne wuassu naungnga.”

⁴⁶“Anio i yamiu mammago si Ya'u, ‘Mawu, Mawu,’ arawe tawe tumuṛṛutta apa iwabbisara-U si yamiu?

⁴⁷Ringanni sai i ite wotongnge mannul᷊ungngu taumata apan rudanta ringang-Ku, wuṛṛu madaringikka wisara-U, see tumuṛṛutta parenta udde? — mappianne i Ya'u manantiro si yamiu — .

⁴⁸I tou ere taumata apan napawe mapararisikku wal᷊e naal᷊i malal᷊u-lal᷊umma, see na'ola'a rapappake wuassu watu. Su tempo nammanawangnga wuṛṛu ua'en sal᷊ukka nangelekka su wal᷊e udde, wal᷊e udde tawe naholle, ana waugu suete niapararisikka su wowon rapappake apan matohassa.

⁴⁹Arawe taumata apan maddaringikka wisara-U wuṛṛu tawe tumuṛṛutta, udde ere sangkatou apan napararisikku wal᷊e tawe rapappake. Napawe nammanawangnga, wal᷊e udde mal᷊iha-l᷊ihakka maṛṛa'a; wuṛṛu ahahohakke wahewalla atonna!”