Read Talaud LUKAS 8 Bible Online

LUKAS 8 - Talaud bible

LUKAS 8

¹Tawe nal᷊annu wua'udde, Mawu Yesus inaite su manga soa wuṛṛu manga ampungnga, ana mamasingkattu Watti'u Al᷊al᷊uassa manungku Ruata manattakke mamarenta ere sangkatou Ratu. Siri mapul᷊o dua mallal᷊aṛṛenggen-Ne uatantalongnga su sampunna ringanni Tou.

²Aroddi lai sire pira wawine apan suete niapaapia wuassu ghaṛṛaho lal᷊eo wuṛṛu rada'a. I mangitou eteudde i Maria apan isassago Magdalena (pitu ghaṛṛaho lal᷊eo apan suete niapaasabangnga wuassi tou);

³wuṛṛu lai i Yohana awingngi Khuza, maṛṛinun araratuanni Herodes; i Susana, wuṛṛu manambo lai wawine waine. Ringannu roitti mangitou sassane, i mangitou nallal᷊ima Mawu Yesus wuṛṛu manga mallal᷊aṛṛenggen-Ne.

⁴Manga taumata sidutu rudanta ringannu Mawu Yesus wuassu al᷊awo'u soa. Wuṛṛu napawe manambote taumata uaammulla, Mawu Yesus nabbatti'a si mangitou sasumandingnga ereindi:

⁵“Sangkatou mabawailla inai mangasi'u wualanna. Su tempo i tou mangngasi'a, pia bualanna nanawo su lal᷊anna. Sangkawageanganna nisal᷊edanannu taumata wuṛṛu waine lai niannu manu'a.

⁶Pia lai nanawo su tampa manambo watune. Su tempo wualanna udde tuttuwote, sinuananna udde tinumolangnga ana waugu letangnge mamara.

⁷Pia lai bualanna nanawo su tangngan ahuranganna ṛoaanna. Ahuranganna ṛoaanna udde tinumuwo su sambau ringannu wualanna udde, wuṛṛu nangangkuba na'oman sara nate.

⁸Arawe pia lai bualanna nanawo su leta'a masuwukka, see tinumuwo wuṛṛu nabua paaṛṛasutta anambone.” Napawe suete nabbati'u sasumandingnga udde, Mawu Yesus nabbisara, “Amungkangngu pia tal᷊inga padaringikka!”

⁹Manga mallal᷊aṛṛenggennu Mawu Yesus naiwal᷊o si Tou atappasannu sasumandingnga udde.

¹⁰Mawu Yesus sinumimbakka, “I yamiu suete nionggol᷊annu al᷊amatta tadea'u maasingkatta addapingnga su ola'u ereapa Ruata mamarenta ere sangkatou Ratu. Arawe manga taumata waine niaṛṛaannu sasumandingnga, tadea'u i mangitou madaringikka, arawe wagga apa apan mariaddi; wuṛṛu i mangitou madaringikka, arawe tawe maasunna.”

¹¹“Ete indi atappasannu sasumandingnga udde: Wualanna eteudde watti'u Ruata.

¹²Wualanna apan nanawo su lal᷊anna isassumandingnga su manga taumata apan madaringikka wisara udde. Arawe Setanna nirumanta wuṛṛu nangaṛṛo watti'a udde wuassu naungngi mangitou, tadea'u i mangitou tawe mangngimanna wuṛṛu tawe masal᷊amatta.

¹³Wualanna apan nanawo su leta'a pia batune isassumandingnga su taumata napawe naaringikka watti'a udde, nanengkamma ringannu naungnge mal᷊uassa. Arawe watti'a udde tawe naṛṛamutta sulal᷊ummu naungnge. I mangitou mangngimanna tal᷊ang kadio'a, wuṛṛu napawe wawono'a nirumanta, i mangitou nassinaada.

¹⁴Wualanna apan nanawo su tangngan ahuranganna ṛoaanna isassumandingnga su taumata madaringikka watti'a udde, arawe sussinggawangngu wiakki mangitou wuṛṛu maapulu mabbiakka nasuungnga wuṛṛu mal᷊uassa sulal᷊ummu runia indi. Sarangkanambone udde nangumpisanna si mangitou na'oman sara tawe nabua wua apan nal᷊aha.

¹⁵Wualanna nanawo su leta'a masuwukka isassumandingnga su taumata madaringikka watti'a udde, see sinahipunna sulal᷊ummu naungnge apan baresi wuṛṛu matul᷊ida. I mangitou natataṛṛangnga na'oman sara nabua.”

¹⁶“Tawe taumata mande'omma sol᷊o see luuwannu wensada, ara'e iaddo su al᷊ungngu antilla. I tou sarun mangadon sol᷊o udde su pangangadoanne, tadea'u taumata apan sumutta maasilo semakke.

¹⁷Tawedu apa apan uawuni apan tawe asiloanna; wuṛṛu tawedu apa apan iaadappingnga apan tawe sarun massongkakka wuṛṛu asingkatanna.

¹⁸Ana waugu udde paanaungete mapia-pia apa apan niaaringiṛṛanni yamiu. Ana waugu taumata apan uatahuante, sarun onggol᷊anna lembon anamboanne lai; arawe taumata tawedu tatahuananne, adio'a apan ta'e si tou sarun anuanna lai.”

¹⁹Inangnga wuṛṛu manga tuṛṛangngu Mawu Yesus nirumanta ringan-Ne, arawe i mangitou tawe na'oma ringan-Ne ana waugu taumata tumanite manambo.

²⁰Ne pia sangkatou apan nabbisara su Mawu Yesus, “Iamangnga, inangnga wuṛṛu manga tuṛṛangngi Iamangnga wowa su liudde. I mangitou maapulu maisasombam Iamangnga.”

²¹Arawe Mawu Yesus nabbisara si mangitou, “Manga taumata apan madaringikka wisara Ruata wuṛṛu tuttuṛṛutta, ete i mangitou udde inang-Ku wuṛṛu manga tuṛṛang-Ku.”

²²Su sambau allo Mawu Yesus wuṛṛu mallal᷊aṛṛenggen-Ne sinuma'ete saalanna. “Wette i ite inai su samba'an rano,” unnu Mawu Yesus si mangitou. Ne i mangitou inaite.

²³Su tempo i mangitou tantal᷊anna massaalanna, Mawu Yesus inamatiil᷊anna. Inaṛṛombanganne anginna ma'ikkatta tinumiuppa su rano udde. Ua'e sussuttate su saalanna, na'oman sara maasilakate si mangitou sarangkanambone.

²⁴Mallal᷊aṛṛenggennu Mawu Yesus inaite ringan-Ne wuṛṛu namu'o si Tou. I mangitou nabbisara, “Iamangnga Huru, Iamangnga Huru, i ite masilakate!” Mawu Yesus napu'o see nandona anginna wuṛṛu lua'a apan mattandi'a udde. Anginna wuṛṛu lua'a udde nol᷊ote, see rano nabbal᷊ite mal᷊enakka atonna.

²⁵See Mawu Yesus nabbisara mallal᷊aṛṛenggen-Ne, “Anio i yamiu tawe mangngimanna si Ya'u?” I mangitou naherangnga wuṛṛu nata'utta. Wuṛṛu uahahattote i mangitou sangkatou ringannu waine, “Isai ṛinone taumata indi na'oman sara namarenta anginna wuṛṛu lua'a, wuṛṛu parenta-Ne tinuṛṛutanna!”

²⁶Mawu Yesus wuṛṛu mallal᷊aṛṛenggen-Ne lapiddu nassaalanna na'oman sara leta'u Gerasa su samba'an Ranon Galilea.

²⁷Napawe Mawu Yesus nilumintukke su ammaranne, i Tou nirantannu sangkatou esakka apan niasuttannu ghaṛṛaho lal᷊eo. Taumata udde wuassu soa. Mal᷊annute i tou uatantol᷊e wuṛṛu maddiri matana'a su wal᷊e. I tou tumba'u maapulu matana'a su manga liangnga tampam pallabinganna.

²⁸Napawe naasilo Mawu Yesus, i tou nangintul᷊i see inumal᷊intuda su saruannu Mawu Yesus wuṛṛu nabbisara, “Mawu Yesus, Ana'u Ruata Apan Atanggaṛṛanne! Sarun olaannu ereapa i ya'u indi? I ya'u sumal᷊ande ariewe manansara si ya'u!”

²⁹Taumata udde nabbisara aroddi ana waugu Mawu Yesus namarenta ghaṛṛaho lal᷊eo udde sinumabangnga wuassi tou. Masokkate i tou suttannu ghaṛṛaho lal᷊eo udde, ma'oman sara salaiwe limane wuṛṛu leddane suete niṛṛapussu ṛate wuṛṛu i tou rariaganna mapia-pia, i tou ta'e lai maawassutta ṛate udde see iaapiddu ghaṛṛaho lal᷊eo watukku wadda'a.

³⁰Mawu Yesus naiwal᷊o taumata udde, “Isai arannu?” “Arangku ‘Legiun’,” sasimbakku taumata udde — ana waugu manambo ghaṛṛaho lal᷊eo sinumutta sulal᷊ummu wadangnge.

³¹Manga ghaṛṛaho lal᷊eo udde sinumal᷊ande tadea'u Mawu Yesus tawe mallimbuakka si mangitou sulal᷊ummu Rampissu Papate.

³²Maranin tampa udde manambo atonna wawi tantal᷊anna maddea'a anna su welen wuidda. Manga ghaṛṛaho lal᷊eo udde sinumal᷊ande Mawu Yesus tadea'u iwala sumutta sulal᷊ummu manga wawi udde. Ne Mawu Yesus inumire.

³³Ne manga ghaṛṛaho lal᷊eo udde sinumabangke wuassu taumata udde see nangintaṛṛote su manga wawi udde. See manga wawi udde tinumal᷊angnga wuṛṛu tinumumpa wuassu winggin rampissa watukku lal᷊ummu rano, wua'udde nal᷊ammissa.

³⁴Manga mandariaga wawi udde naasilo apa apan suete nariaddi. Ne i mangitou tinumal᷊angnga, wuṛṛu namasingkattu watti'a udde su soa wuṛṛu su ampungnga maranine.

³⁵See manga taumata nampassabangnga ma'ellega apa apan suete nariaddi. I mangitou nirumanta ringannu Mawu Yesus, wuṛṛu isudde i mangitou naaratingnga taumata apan napallosse wuassu manga ghaṛṛaho lal᷊eo udde tantal᷊anna ua'ianna maranin ledda Mawu Yesus. I tou ualuṛṛeten laubba wuṛṛu ṛingiṛṛanne masemakke. I mangitou nata'utta.

³⁶Sarangkanambone apan naasilo arariaddianna udde nabbatti'e su taumata ereapa taumata udde niapaapia.

³⁷See anambon tumana'u leta'u Gerasa udde sinumal᷊ande Mawu Yesus tadea'u i Tou manantangngu tampa udde, ana waugu i mangitou nambo matta'utta. Nariaddi Mawu Yesus sinuma'ete saalanna inaite mapul᷊e.

³⁸Taumata apan napallosse wuassu ghaṛṛaho lal᷊eo udde sinumal᷊ande Mawu Yesus tadea'u i tou wotongnge tumantalongnga.

³⁹Arawe Mawu Yesus nandolokki tou napul᷊e, wisara-Ne, “Apul᷊ete wuṛṛu wattia'e apa apan suete niola'u Ruata si'o.” Ne taumata udde napul᷊ete wuṛṛu nabbatti'e su ahewallu soa, al᷊awo'u inolaanna apan suete niola'u Mawu Yesus si tou.

⁴⁰Napawe Mawu Yesus nabelengke su samba'an rano, i Tou nisal᷊ohoannu manga taumata ringannu al᷊al᷊uassa ana waugu i mangitou tantal᷊anna ual᷊aṛṛado si Tou.

⁴¹See nirumanta sangkatou tembonannu wal᷊em pattataṛṛamawuanna isudde. Aranne i Yairus. I tou nassubba su saruannu Mawu Yesus wuṛṛu sinumal᷊ande tadea'u Mawu Yesus rumanta su wal᷊ene,

⁴²ana waugu anangnge wawine man sambau uukke mapul᷊o dua su tonnane maranite mate. Tantal᷊anna Mawu Yesus u'amatta watukku wal᷊en Yairus, manga taumata mangke mannesse'i Tou wuassu al᷊awo'u tampa.

⁴³Su wallatti mangitou pia sangkatou wawine apan mapul᷊ote dua su tonnane uapendamma rada'u wawine. I tou suete nanginsue manga darotongnge iapa'undamma su doktere, arawe tawedu sangkatou apan naapia si tou.

⁴⁴Wawine udde nangundani Mawu Yesus wuassu liudde, see nangindingnga pentakku jubah-Ne. Orassa udde lai rada'u wawine udde napia.

⁴⁵Mawu Yesus naiwal᷊o, “Isai nangindingnga si Ya'u?” Anambon taumata nassinaada. See i Petrus nabbisara, “Iamangnga, manambo atonna taumata uapal᷊iwutta su Iamangnga; i mangitou mangke mannesse'i Iamangnga!”

⁴⁶Mawu Yesus nabbisara, “Arawe pia taumata nangindingnga si Ya'u. I Ya'u masingkatta ana waugu pia auatanna sinumabangnga wuassia-U.”

⁴⁷Wawine udde naatutukka manungku inolaanne udde niasingkatante. Nariaddi i tou nirumanta ringannu mangngindo see inumal᷊intuda su saruannu Mawu Yesus. Ne i tou nabbatti'e su saruannu awada'alla, anio i tou nangindingnga Mawu Yesus, wuṛṛu manungku radangnge napia orassa udde lai.

⁴⁸Mawu Yesus nabbisara si tou, “Ana'u, ana waugu i'o mangngimanna si Ya'u, i'o napia. Apul᷊ete ringannu sal᷊amatta.”

⁴⁹Tantal᷊anna Mawu Yesus ta'e uahahatto, sangkatou ralol᷊oṛṛanna nirumanta wuassu wal᷊en Yairus. I tou nabbisara si Yairus, “Ana'i tuangnga natete. Ariete lai tuangnga mapaasusam Iamangnga Huru.”

⁵⁰Napawe Mawu Yesus naaringikka wisara udde, i Tou nabbisara si Yairus, “Arie pa'ata'utta. Pangimante, anangngu sarun mapia.”

⁵¹Napawe na'omate su wal᷊en Yairus, Mawu Yesus tawe namalan saran sangkatou sumutta su sambau ringanni Tou tumba'u i Petrus, i Yohanes, i Yakobus wuṛṛu inangnga iamangngu ana'a udde.

⁵²Anambon taumata tantal᷊anna lulluai wuṛṛu massusa ana waugu apapaten ana'a udde. Arawe Mawu Yesus nabbisara, “Arie palluai. Ana'a udde tawe nate, i tou tumba'u mattiilla!”

⁵³I mangitou nilumage Mawu Yesus, ana waugu i mangitou masingkatta manungku ana'a wawine udde natete.

⁵⁴Wua'udde Mawu Yesus namita liman ana'a udde see nabbisara, “Pabbangunte, Ana'a!”

⁵⁵Niawang kana'a nabelengke apia su ana'a udde, wuṛṛu orassa udde lai i tou nabangunna. Wua'udde Mawu Yesus nandolokki mangitou napaannu ana'a udde.

⁵⁶Hagurangngu ana'a udde naherangnga atonna. Arawe Mawu Yesus naningaddi mangitou mamasingkattu arariaddianna udde su al᷊awo'u taumata.