Read Talaud LUKAS 9 Bible Online

LUKAS 9 - Talaud bible

LUKAS 9

¹Mawu Yesus namago sire mapul᷊o dua mallal᷊aṛṛenggen-Ne, see nangagillu taṛṛino si mangitou ipallimbuakka ghaṛṛaho lal᷊eo wuṛṛu mapaapian rada'a.

²Wua'udde i Tou nandolokke mangitou inai mapaapian taumata marada'a wuṛṛu mamasingkattu watti'a su ola'u ereapa Ruata mamarenta ere sangkatou Ratu.

³“Arie pangapiddu sarannapa su amatanni yamiu,” unnu Mawu Yesus si mangitou. “Arie pangapiddu ta'inna, ara'e tampam pondi, ara'e anna, ara'e roitta, ara'e lai laubba ruam parassa.

⁴Suapan tampa i yamiu itarimmatta, atana'e isudde ma'oman sara i yamiu manantangngu soa udde.

⁵Wuṛṛu su tampa i yamiu tawe itarimmatta, su tempo i yamiu manantangngu soa udde, tontonga'a awu wuassu pal᷊adu leddanu, maola'a sambau pannanaunganna si mangitou.”

⁶Manga mallal᷊aṛṛenggennu Mawu Yesus nabuatte, see inaite su manga ampungnga mabatti'u Watti'u Al᷊al᷊uassa udde wuṛṛu napaapian taumata marada'a su al᷊awo'u tampa.

⁷Su Tempo i Herodes uaparenta su Galilea, naaringikka su ola'u anambon arariaddianna udde, i tou nial᷊iwune. Ana waugu piaddu mabbisara manungku i Yohanes Mananaṛṛani nabbiakke apia.

⁸Piaddu lai mabbisara manungku i Elia nirumantate apia. Taumata waine lai mabbisara manungku sangkatou nabi su wallattu manga nabi ro'en al᷊amonane nabbiakke apia.

⁹I Herodes nabbisara, “I ya'u suete nandolokku taumata niapapototta puan Yohanes. Arawe taumata indi, isai i Tou? Manambo watti'a sueten ta'u niaringiṛṛanna matataṛṛinno si Tou.” Ne i Herodes mappandumma ma'ellega Mawu Yesus.

¹⁰Manga ralol᷊oṛṛannu Mawu Yesus nabelengke wuṛṛu nabbatti'e su Mawu Yesus, sarangkanambone apan suete niola'i mangitou. Mawu Yesus nangahe si mangitou see inaite su sambau, i mangitou nanginsassa watukku soa Betsaida.

¹¹Arawe napawe manga taumata naasingkatta olangnge udde, i mangitou tinumantalongnga Mawu Yesus. I Tou nanarimmatti mangitou, see nabbatti'a si mangitou su ola'u ereapa Ruata mamarenta ere sangkatou Ratu. Wuṛṛu i Tou lai napaapian taumata marada'a su wallatti mangitou.

¹²Napawe matannallo mattattupe, sire mapul᷊o dua mallal᷊aṛṛenggennu Mawu Yesus nirumanta ringanni Tou wuṛṛu nabbisara, “Iamangnga, tampa indi naṛṛae marau. Mappianne Iamangnga mandolokku manga taumata indi iapaapul᷊e, tadea'u i mangitou wotongnge maddea'a anna wuṛṛu maddea'a tampa atiil᷊anna su manga soa wuṛṛu manga ampungnga maranine isindi.”

¹³Arawe Mawu Yesus sinumimbakka, “I yamiute mapaanni mangitou.” Manga mallal᷊aṛṛenggennu Mawu Yesus nabbisara, “I yami tumba'u pia limam bau roti wuṛṛu inassa ruam bua. Apa i yami ṛinone inai mamalli anna iapaanna su awadaalla indi?” (

¹⁴Iraṛṛangngo sire lima ṛiwu su atoune esakka isudde.) Mawu Yesus nabbisara mallal᷊aṛṛenggen-Ne, “Doloṛṛa'e manga taumata indi uma'ianna uawahageangnga, iraṛṛangngo limam pul᷊o su atoune sambageanganna.”

¹⁵Manga mallal᷊aṛṛenggennu Mawu Yesus udde tinumuṛṛutte su ereapa suete niwisara Mawu Yesus si mangitou.

¹⁶See Mawu Yesus nanganute limam bau roti wuṛṛu inassa ruam bua, wua'udde naningngara langitta wuṛṛu naadiangkamanna su Ruata. Wua'udde i Tou namesangnga roti wuṛṛu inassa udde ringannu lima-Ne see nianggille su mallal᷊aṛṛenggen-Ne niapatahia su taumata nambo udde.

¹⁷I mangitou sarangkanambone inumanna na'oman sara nal᷊ai-l᷊aidda. See manga mallal᷊aṛṛenggennu Mawu Yesus nangammulen lambeng kanna udde anambone mapul᷊o dua su ul᷊angnge.

¹⁸Su sambau allo, napawe Mawu Yesus tantal᷊anna u'al᷊iomanna sassane, mallal᷊aṛṛenggen-Ne nirumanta ringanni Tou. Mawu Yesus naiwal᷊o si mangitou, “Tumuṛṛuttu wisaran taumata, i Ya'u indi isai?”

¹⁹I mangitou sinumimbakka, “Piaddu nabbisara i Yohanes Mananaṛṛani. Piaddu lai mabbisara i Elia, waine lai nabbisara su wallattu sangkatou nabi su tempon al᷊amona apan nabbiakke apia.”

²⁰“Arawe tumuṛṛutta si yamiu sassane, i Ya'u indi isai?” aiwal᷊o Mawu Yesus. I Petrus sinumimbakka, “Iamangnga eteudde Ratu Punnu Sal᷊amatta apan pina'iren Ruata.”

²¹See Mawu Yesus nabbisara mallal᷊aṛṛenggen-Ne, “Imbaṛṛangnga mamasingkattu olangnge indi sisai-sai.”

²²Mawu Yesus nabbisara apia, “Ana'u Taumata sarun matataṛṛangnga wuṛṛu ipasseettu manga piaṛṛangnge wuṛṛu manga imam tembonanne, see manga hurun agama. I Tou sarun pateanna, arawe su allo atallune sarun iapawangunna apia.”

²³Wua'udde Mawu Yesus nabbisara taumata nambo isudde, “Taumata apan maapulu rumandinganna si Ya'u, ṛinone tawe mannaungnga manarane sassane, mamasanna arusane miallo-miallo wuṛṛu sidutu uatantalongnga si Ya'u.

²⁴Ana waugu taumata apan mannahekku wiakke, sarun awul᷊iannu wiakke udde. Arawe taumata apan mannantillu wiakke ana waugu apulu-U, i tou sarun masal᷊amatta.

²⁵Apa sombangnge su sangkatou taumata amungkangngu ahewallu runia indi maola'a pussaane, arawe i tou mandal᷊eo wuṛṛu awul᷊iannu wiakke?

²⁶Amungkangngu taumata massili manga'u si Ya'u wuṛṛu al᷊ara'u, Ana'u Taumata lai massili manga'u taumata udde su tempo i Tou rumanta apia ringannu taṛṛino-Ne, wuṛṛu ringannu taṛṛinon Iamangnga wuṛṛu taṛṛino mala'ekatta apan susi!

²⁷Asingkatewe: wuassu wallatti yamiu isindi pia sangkatou tawe mate tantal᷊anna i tou taambe naasilo Ruata mamarenta.”

²⁸Iraṛṛangngo sangkamisa wuassu tempo Mawu Yesus nangaṛṛa'u sarangkanambone udde, i Tou nangapidden Petrus, i Yohanes wuṛṛu i Yakobus su sambau wowone inai umal᷊iomanna.

²⁹Tantal᷊anna Mawu Yesus u'al᷊iomanna isudde, hati-Ne nawal᷊u wuṛṛu laung-Nge nabal᷊i mawira sussal᷊endappa.

³⁰Inaṛṛombanganne ruang katou, eteudde i Musa wuṛṛu Elia nattingkapasilom batanganne ringannu asasemakka wuassu surga. I mangitou uahahatto Mawu Yesus su ola'u apapate-Ne apan tate mal᷊annu lai mariaddi su Yerusalem.

³¹

³²Su tempo udde i Petrus wuṛṛu manga hawene niamatiil᷊anna, arawe inaṛṛombanganne napu'o wuṛṛu naasilo Mawu Yesus lullansiangnga wuṛṛu taumata ruang katou uarisikka ringanni Tou.

³³Su Tempo ruang katou udde manantangke Mawu Yesus, i Petrus nabbisara Mawu Yesus, “Iamangnga Huru, mapia atonna i ite isindi. Mappianne i yami mapararisikku rasanna tatallu; sambau si Tuangnga, sambau si Musa wuṛṛu sambau lai si Elia.” (I Petrus nabbisara aroddi arawe tawe maasunna wisarane udde.)

³⁴Tantal᷊anna i Petrus ta'e uahahatto, nirumantate winabbawa, wuṛṛu nangooppa si mangitou na'oman sara i mangitou nata'utta.

³⁵Wua'udde wuassu winabbawa udde niaringiṛṛanna tinggikka mabbisara, “Ete indi Ana'u apan Ta'u pinile. Padaringikka si Tou!”

³⁶Napawe tingikka udde naddote, i mangitou naasilo Mawu Yesus sassane isudde. Mallal᷊aṛṛenggennu Mawu Yesus nallannaba su ola'u sarangkanambone apan nariaddi udde, wuṛṛu tawe nabatti'a sisai-sai apa apan suete niasiloanni mangitou.

³⁷Su allo tiṛṛabbine Mawu Yesus wuṛṛu sire tallu mallal᷊aṛṛenggen-Ne sinumossokke wuassu wowone udde, wuṛṛu manambo taumata nirumanta ringannu Mawu Yesus.

³⁸Sangkatou esakka wuassu pattangngannu awada'alla udde, nangintul᷊i, “Iamangnga Huru, tul᷊unga'a ellehe ana'u — tumba'u sangkatou udde ana'u!

³⁹Amungkangngu ghaṛṛaho lal᷊eo sumutta si tou, inaṛṛombanganne i tou umui wuṛṛu awangnge iwabantikke ma'oman sara moṛṛongnge lullupa. Ghaṛṛaho udde sidutu mannansara si tou wuṛṛu maddiri sumabangnga wua dinganni tou.

⁴⁰I ya'u suete naitul᷊ungnga su mallal᷊aṛṛenggenni Iamangnga mallimbuakka ghaṛṛaho udde, arawe i mangitou tawe naal᷊imbuakka.”

⁴¹Mawu Yesus sinumimbakka, “Wal᷊ine hampa i yamiu indi! I yamiu atonna manga taumata apan maṛṛusal᷊a wuṛṛu tawe mangngimanna! Ma'oman sara tingngera i Ya'u matana'a suadio'a ringanni yamiu wuṛṛu manabare si yamiu? Apira'e anangngu udde isindi!”

⁴²Tantal᷊anna ana'a udde u'amatta mattuda Mawu Yesus, ghaṛṛaho lal᷊eo udde nangema'i tou wuṛṛu wadangnge iwabantikke. Arawe Mawu Yesus namarenta ghaṛṛaho lal᷊eo udde niapaasabangnga see napiate ana'a udde. See ana'a udde tinantille apia su iamangnge.

⁴³Awadaalla naherangnga naasilo taṛṛinon Ruata aroddi ahewalle. Su tempo manga taumata ta'e tuttiangnga naasilo sarangkanambone apan niolang-Nge, Mawu Yesus nabbisara su mallal᷊aṛṛenggen-Ne,

⁴⁴“Paatutuṛṛe pa'apia-pia wuṛṛu arie paabul᷊iane manga wisara-U indi: Ana'u Taumata sarun itantilla su taṛṛinon taumata.”

⁴⁵Arawe mallal᷊aṛṛenggennu Mawu Yesus udde tawe naasunna wisara-Ne. Olangnge udde ia'adappingnga si mangitou tadea'u i mangitou tawe maasunna. Arawe i mangitou matta'utta maiwal᷊o olangnge udde si Tou.

⁴⁶Su wallattu mallal᷊aṛṛenggennu Mawu Yesus nariaddi pattatiakka su ola'u isai su wallatti mangitou apan ahewal᷊anne.

⁴⁷Mawu Yesus naasingkatta ṛingiṛṛanni mangitou, ana waugu udde i Tou namaggo sangkatou ana'a adio'a wuṛṛu niapararisikka su sandiṛṛan-Ne.

⁴⁸See i Tou nabbisara manga mallal᷊aṛṛenggen-Ne, “Taumata apan manarimmattu ana'a indi ana waugu i Ya'u, udde ere lai manarimmatta si Ya'u. Wuṛṛu taumata apan manarimmatti i Ya'u manarimmatti Tou lai apan nandolo-U. Ana waugu taumata apan adio'anne su wallatti yamiu, ete i tou apan ahewal᷊anne!”

⁴⁹I Yohanes nabbisara, “Mawu, i yami naasilo taumata mallimbuakka setanna ringannu arannu Mawu, wuṛṛu i yami naningaddi tou, ana waugu i tou wal᷊ine wua dinganni ite.”

⁵⁰“Arie maningaddi tou,” wisara Mawu Yesus si Yohanes wuṛṛu manga mallal᷊aṛṛenggennu Mawu Yesus apan waine, “ana waugu taumata apan tawe mandooppa si yamiu, udde uasamba'a si yamiu.”

⁵¹Napawe maranite tempone Mawu Yesus masengkengnga watukku surga, i Tou nakkawessa inai mabatukku Yerusalem.

⁵²Ne i Tou nandolokku taumata inai malliu ṛoro si Tou. Manga taumata apan nirolokka udde inaite, see sinumuttate su sambau ampungnga su Samaria tadea'u manaddia manga al᷊awo'a huna Mawu Yesus.

⁵³Arawe manga taumata su ampungnga udde maddiri manarimmattu Mawu Yesus, ana waugu niasingkatante atonna manungku i Tou mattudaten Yerusalem.

⁵⁴Ne su tempo manga mallal᷊aṛṛenggennu Mawu Yesus, eteudde i Yakobus wuṛṛu i Yohanes naasingkatta olangnge udde, i mangitou nabbisara, “Mawu, apa Mawu ma'apulu, i yami madorongnga putungnga sumossokka wuassu langitta ipamate manga taumata indi?”

⁵⁵Mawu Yesus nanaile, see namul᷊o si mangitou.

⁵⁶Wua'udde i mangitou inaite su ampungnga waine.

⁵⁷Tantal᷊anna Mawu Yesus wuṛṛu mallal᷊aṛṛenggen-Ne mannassukku amatanne, pia taumata nabbisara Mawu Yesus, “Iamangnga, i ya'u ma'apulu tumantalongnga su Iamangnga suapan tampa Iamangnga umamatta!”

⁵⁸Mawu Yesus sinumimbakka, “Serigala pia liangnge, wuṛṛu manu'u winalanganna pia sal᷊akke, arawe Ana'u Taumata tawe tampa lallalowangan-Ne.”

⁵⁹See Mawu Yesus nabbisara su sangkatou waine, “Tantalongke si Ya'u.” Arawe taumata udde nabbisara, “Iamangnga wala'a i ya'u mapul᷊e asuene mallabingngu iamangku.”

⁶⁰Mawu Yesus sinumimbakka, “Wala'e taumata nate mallabingngu taumatane nate sassane. Arawe i'o roote wuṛṛu wal᷊oa'e watti'a manungku Ruata mannattakke mammarenta.”

⁶¹Piaddu lai taumata waine nabbisara, “Iamangnga, i ya'u maapulu tumantalongnga su Iamangnga, arawe wala'a i ya'u mapul᷊e rorone mabal᷊o.”

⁶²Mawu Yesus nabbisara taumata udde, “Taumata apan mannattakke mammajeko see manaile liudda, tawe ṛinone maola'a lal᷊oṛṛon araratuannu Ruata.”